Qara amadowa massie

Cinaanchu doorshiwa massie

Furchonniwa massie

Yihowa Farci'raasine

Sidaamu Afoo

Qullaawu Maxaafi Xagge Roseemmo Maxaafa'ya

Xagge 86: Mitte Beeddakko Manna Massaggu

Xagge 86: Mitte Beeddakko Manna Massaggu
Ayyaanto

KONNI manni giddo mittichchu angichchunni kulannota roorte xabbanno beeddakko laitto? Kuni manni Yerusaalametenni kai wote, tini beeddakko leeltunsa. Insa Soojjaatinni daggino; ayyaantote yinannireeti. Insa, tini haaro beeddakko mittu ayirradu manchiwa massitanni noonke yite heddino.

Kuri mannooti umo Yerusaalame martu wote, ‘Yihudootaho nugusa ikkanno qaaqqi hiikko no?’ yite xa'mitu. “Yihudootu” yaa wole Isiraeelete su'maati. Mannootuno togo yitu: ‘Ninke Soojjaato hee'ne qaaqqu beeddakko balanxe la'ne, sagandammosira dangoommo.’

Yerusaalamete nugusa ikke noohu Heroodiisi tenne macciishshiti masi. Isi wolu nugusi bayichchosi adhannota dibaxino. Konni daafira kakkalaanote biilla woshshe, ‘Ilamanno yine qaale e'noonni nugusi ilamannohu hiikkooti?’ yee xa'mi. Insano, ‘Qullaawu Maxaafi Beeteleemete ilamanno yaanno’ yite qoltusi.

Hakkiinnino Heroodiisi Soojjaatinni dayi manna woshshe togo yii: ‘Hadhine ilamino qaaqqo hasse. Anino mare isira sagada hasi'roommona, affiniha ikkiro kulle''e.’ Ikkollana Heroodiisi qaaqqo hasi'rinohu shaara yoreeti!

Hakkiinnino beeddakko konne manna massagganni Beeteleeme hadhu; qaaqqu noo taaloote iillituti uurritu. Mannuno minira ei wote, Maariyaaminna qaaqqu Yesuusi hakko no. Insano abbitino elto Yesuusira uyitu. Gedensaanni kayinni Yihowa haaqetenni mannootaho, Heroodiisiwa higginoonte yee kulinsa. Konni daafira mannootu gobbansa wole doogo widoonni higgu.

Heroodiisi Soojjaatinni daggu mannooti gobbansa higginota afiti, lowo geeshsha hanqi. Konni daafira Beeteleemete lame diro wo'minonsarenna lamu diri woroonni noore labballo qaaqquulle baala shine gundanni gede hajaji. Yihowa kayinni balaxe Yooseefira tenne haaqetenni kulinosi daafira, Yooseefi maatesi ledo Gibitse ha'ri. Yannate gedensaanni Yooseefi, Heroodiisi reyinota afiti, Maariyaaminna Yesuusa haare Naazireete higi. Yesuusi lophphinohu hakkooti.

Tenne haaro beeddakko leeltanno gede assinohu aye lawannohe? Mannootu tenne beeddakko la'uhu gedensaanni, Yerusaalame hadhinota qaagi. Sheexaanu Daawuloosi Maganu Beetto shaara hasi'rino; qoleno Yerusaalamete nugusi Heroodiisino shaara hasi'rannota afino. Konni daafira tenne beeddakko fultanno gede assinohu Sheexaaneho.

Maatewoosi 2:1-23; Mikiyaasi 5:2.



Xa'muwa

  • Misilete aana noo mannooti ayeooti? Insa giddonni mittu wara'a yite xabbanni noo beeddakko angichchunni kulanni noohu mayiraati?
  • Nugusu Heroodiisi mayira masi? Isi mase ma assi?
  • Wara'a yite xabbanno beeddakko mannoota massage hiikka iillishshu? Mannootu daggino doogo agurte wole widoonni higge gobbansa hadhinohu mayiraati?
  • Heroodiisi mayyee hajaji? Mayira?
  • Yihowa Yooseefira ma assanno gede kulisi?
  • Haaro beeddakko leeltanno gede assinohu ayeeti? Mayira?

Wole xa'mo

  • Maatewoosi 2:1-23 nabbawi.

    Ayyaanto Yesuusa la'ara martu wote isira me''e diro ikkinosi? Isi hakkawote hiikko olliira no? (Maat. 2:1, 11, 16)