Qara amadowa massie

Cinaanchu doorshiwa massie

Furchonniwa massie

Yihowa Farci'raasine

Sidaamu Afoo

Qullaawu Maxaafi Xagge Roseemmo Maxaafa'ya

Xagge 78: Angatenni Borreessinoonnita Girgiddu Aani Borro

Xagge 78: Angatenni Borreessinoonnita Girgiddu Aani Borro
Angatenni borreessinoonnita girgiddu aani borro

KOWIICHCHO mayi ikkanni no? Mannootu lowo jili aana no. Baabiloonete nugusi kume ayirradda manna jilaho woshshino. Kuni manni Yerusaalamete Yihowa mininni abbinoonni worqetenna birru xaasira aganni, saanete qole sagale wodhe itanni no. Hedeweelcho kayinni mitte mannu anga dagge girgiddaho borreessa hanaffu. Jilu aana noo manni baalunku lowo geeshsha waajji.

Bilxaasoorinna jilaho koyisamino manna

Nabukedenetsoori ahaaho ikkannohu Bilxaasoori hakkawaro nugusa ikke no. Nugusu hayyoota mannasi minira abbinanni gede qoonqosi gotti asse coyi'ri. Isi hayyoota mannasi togo yii: ‘Tenne borro nabbawe tirose kulannoehura, lowo elto uyinannisi; qoleno hakku manchi gashshooti'ya giddo sayikkiha qara nugusa ikkanno.’ Ikkollana hayyootu mannisi giddo girgiddu aani borro nabbawanna tirose kula dandiinohu mittuno dino.

Nugusu ama canco macciishshite jila intanniwa lowo minira daggu. Ise nugusa togo yitu: ‘Massooti. Gashshootikki giddo magannate ayyaani noosihu mittu manchi no. Ahaahikki Nabukedenetsoori moohi waro hayyootu mannisi baalunkura hakkonne mancho roorrichcha assino. Hakko manchi su'mi Daanieeliiti. Manna sokke iso woshshi; tenne borro tiro maatiro gudise kulannohena.’

Konni daafira hakkawotenni Daanieeli daanno gede assini. Daanieeli mitte elto nafa diadheemmo yii; hakkiinnino Yihowa Bilxaasoori ahaaho Nabukedenetsoori nugusimmatenni dirrisinohu mayiraatiro kula hanafi. Daanieeli togo yii: ‘Isi lowo geeshsha naaxxino. Yihowano qorichchishinosihu iseraati.’

Daanieeli Bilxaasoori togo yiisi: ‘Ati kayinni isira mayi iillinoro afootto; hattenne affanni heedhenni Nabukedenetsoori naaxxinte gede atino naaxxootto. Yihowa mininni xaasanna saane abbite insara wodhite agootto. Haqqetenninna kinnatenni seekkinoonni maganna galatte, Bayiru Kalaqaanchinkera kayinni ayirrinynye diootto. Maganu girgiddu aana tenne borro borreessitanno gede anga soyinohu iseraati.’

Daanieeli lede togo yii: ‘Borreessantino borro, MAANE, MAANE, TEEQEELINNA FAAREESI yitanno.’

‘MAANE yaa Maganu gashshootikki diro kiire jeefo ganino yaate. TEEQEELI yaa ati kiilotenni keenamitto; kayinni kiilote aana shotte leellitto yaate. FAAREESI yaa kayinni gashshootekki Meedooninna Faarsi gosara uyinoonni yaate.’

Daanieeli coyi're nafa gudikki, Meedooninna Faarsi daga Baabiloone qasa hanaffu. Katama doyissite amadde, Bilxaasoori shitu. Angatenni borreessinoonniti girgiddu aani borro yitinori hakko hashshanni wo'mi! Xa Isiraeelete gosa kayinni hiikkitannokka? Mulenni tenne hajore ronseemmo; balanxe kayinni Daanieelira iillinore hanni la'no.

Daanieeli 5:1-31.



Xa'muwa

  • Baabiloonete nugusi lowo jila jile Yerusaalamete Yihowa mininni abbinoonni xaasiranna saanera aganinna itanni hee'reenna mayi maikki?
  • Bilxaasoori hayyoota mannasi mayyii? Insa kayinni ma assa hooggu?
  • Nugusu ama nugusa ma assi yitu?
  • Daanieeli nugusaho xawise kulinonte gede, Maganu girgiddaho borreessitanno gede anga soyinohu mayiraati?
  • Daanieeli girgiddaho borreessinoonni qaalla tiro mayyee xawisi?
  • Daanieeli coyi're nafa gudikki mayi maikki?

Wole xa'muwa

  • Daanieeli 5:1-31 nabbawi.

    Bilxaasoori girgiddu aani borro laeenna macciishshantinosi waajja, Magano waajjate ledo heewisiisi. (Dan. 5:6, 7; Far. 19:9; Ro. 8:35-39)

    Daanieeli Bilxaasooriranna ayirradu mannisira coyi'ri wote, guulle leellishinohu hiittoonniiti? (Dan. 5:17, 18, 22, 26-28; Soq. Los. 4:29)

    Daanieeli fooliishsho 5, Yihowa kalqete alamera aliidiha ikkinota luphphi assite leellishshannohu hiittoonniiti? (Dan. 4:17, 25; 5:21)