Qara amadowa massie

Cinaanchu doorshiwa massie

Furchonniwa massie

Yihowa Farci'raasine

Sidaamu Afoo

Qullaawu Maxaafi Xagge Roseemmo Maxaafa'ya

Xagge 64: Salamooni Maganu Mine Mini

Xagge 64: Salamooni Maganu Mine Mini

DAAWITI reyara albaanni, Yihowa minesi minnanni gara kulinosire Salamoonira kulisi. Salamooni nugusa ikkihunni shoolki diro, Maganu mine mina hanafi; konne mine lamalu dirinninna daratunni mine gudino. Maganu mine tonnu kuminni kiiramanno manni minino; konni loosira lowo woxi fulino. Korkaatuno konne mine minate lowo worqenna birra fushshinoonni.

Xaadooshshu dunkaaninte gede kuni Maganu minino lame kifile afi'rino. Ikkollana tini kifilla xaadooshshu dunkaani kifillanni lame ero ikkitanno. Salamooni gondooru taawoota giddiidi kifilera wori; xaadooshshu dunkaanira nooha wole uduunne kayinni layinki kifilera wori.

Maganu mini miname goofita maassi'ni. Misilete aana la''attonte gede, Salamooni Maganu minira albaanni guluphphe huuccatto assi. Isino togo yee Yihowa huucci'ri: ‘Iimi nafa gudisire ate haarate ajannoha ikkiro, kuni shiimu mini isinni ate haarate lowo geeshsha ajanno. Ikkeennano Magano'ya, mannikki alba konni miniwa hige huucci'rannohe wote eeggatena macciishshi.’

Nugusu Salamooni huuccatto assanni no

Salamooni huuccatto asse kaita, iiminni giira dirritu. Dirriteno kakkalloonnita saadate kakkalo ittu. Qoleno Yihowawiinni wara'a yiino xawaabbi daye Maganu mine wo'mi. Tini ikkito, Yihowa macciishshanni nootanna minnoonni minenna Salamooni huuccatto baxinota leellishshanno. Maganu mini xaadooshshu dunkaaninni roore mannu Yihowa magansi'rate daanno base ikki.

Salamooni seeda diro danchu garinni gashshi; mannuno hagiidhi. Ikkollana Salamooni Yihowa maga'nannokkiha batinynye meento wole gobbanni adhi. Hakko meenti giddonni mitte kakkalo magansidhanna kuneeti laitto? Yannate gedensaanni, adhino meenti Salamoonino wole maganna maga'nanno gede assisi. Salamooni wole maganna maga'nita mayi kalaqiminoro afootto? Manna danchu garinni gashsha aguri. Kaajjado mancho ikki; mannu hagiirrino bai.

Nugusu Salamooni misile magansi'ranni no

Konni daafira Yihowa Salamoonira hanqe, ‘Gashshoote atewiinni haare, woleho eemmo. Tenne asseemmohu ati lubbote heedheenna ikkikkinni beettikki gashshooti yannaraati. Ikkirono beettikki gashshootira noo manna gudise haare dihooleemmo’ yiisi. Kuni ikkinohu hiittoonniitiro hanni la'no.

1 Zeena 28:9-21; 29:1-9; 1 Negesti 5:1-18; 2 Zeena 6:12-42; 7:1-5; 1 Negesti 11:9-13.



Xa'muwa

  • Salamooni Yihowa mine mine gudate mageeshshi yanna keeshshi? Konne mine minate lowo woxi fulinohu mayiraati?
  • Maganu minira me''e jajjabba kifile noosi? Giddoyiidi kifilera maa worroonni?
  • Maganu mine minne gundita Salamooni mayyee huuccatto assi?
  • Salamooni huuccattonni hagiidhinota Yihowa hiisse leellishshi?
  • Salamooni adhino meenti iso maa assanno gede assisi? Hakkiinnino isi hiittooha ikki?
  • Yihowa Salamoonira hanqinohu mayiraati? Hanqe mayyiisi?

Wole xa'muwa

  • Umi Zeena 28:9, 10 nabbawi.

    Umi Zeena 28:9, 10 aana Daawiti coyi'rinori, barru baala marichcho assate sharrama hasiissannonketa leellishanno? (Far. 19:14; Fil. 4:8, 9)

  • Layinki Zeena 6:12-21, 32-42 nabbawi.

    Salamooni mannu minino mini Ayirrado Magano haare afannokkita kulinohu ma garinniiti? (2 Ze. 6:18; Soq. Los. 17:24, 25)

    Layinki Zeena 6:32, 33 aana Salamooni coyi'rinori Yihoware ma rosiisannonke? (Soq. Los. 10:34, 35; Gal. 2:6)

  • Layinki Zeena 7:1-5 nabbawi.

    Isiraeelete ooso Yihowa ayirrinynye la'e iso galatate kakka'unte gede, yannankera Yihowa mannisira dirrisanno atooti ninkeno ma assineemmo gede kakkayisannonke? (2 Ze. 7:3; Far. 22:22; 34:1; 96:2)

  • Umi Negesti 11:9-13 nabbawi.

    Salamooni heeshsho goofimarchu geeshsha ammanama hasiissannota ikkitinota leellishshannohu hiittoonniiti? (1 Neg. 11:4, 9; Maat. 10:22; Yo. Aj. 2:10)