SALAMOONI nugusa ikki yannara qaaqqoho. Isi Yihowa baxanno; qoleno annisi Daawiti uyinosi amaale harunsino. Yihowa Salamooni baxino daafira mitto hashsha haaqetenni, ‘Salamooni, ma aammohera baxatto?’ yiisi.

Hakkiinnino Salamooni, ‘Magano'ya Yihowa, qaaqqo ikkoommo daafira manna hiitto asse gashsheemmoro diafoommo. Konni daafira mannakki garunni gashsheemmo gede hayyo uyie’ yee qoli.

Yihowa Salamooni xa'mirinori hagiirsiisisi. Konni daafira togo yiisi: ‘Lowo diro hee'ra woyi jiro xa'mira agurte hayyo xa'miroottohura, ayino afi'rinokki hayyo eemmohe. Xa'miroottokkire jironna ayirrinynye nafa lede eemmohe.’

Shiima yanna gedensaanni lame meenti lowo geeshsha qarrame Salamooniwa mari. Lamente giddo mitte togo yite qarransa kultu: ‘Tini manchonna ani mitto mine hee'neemmo. Ani labbaa qaaqqo ilumma; ani ilummahunni sayikkita iseno labbaa qaaqqo iltu. Hakkiinnino mitto hashsha ise qaaqqi reyi. Ani goxe hee'reenna, iseha reyino qaaqqo ane mule worte aneha adhitu. Goxoommawiinni baqqi yee reyino qaaqqo laeemma wote, dianeho.’

Ti'i mancho qoltannoti, ‘Dee'ni! Lubbote noo qaaqqi aneho; reyinohu iseho!’ yitu. Umo coyidhuti kayinni, ‘Dee'ni! Reyinohu ateho; lubbote noohu aneho!’ yite qoltu. Lamenti hatto yaanni heewisami. Xa Salamooni ma assakka?

Salamooni bise abbinasira soyi; bise abbinita, ‘Lubbote noo qaaqqo lamewa murtine, lamentera beekke’ yii.

Qaaqqu ama qoonqose gotti assite, ‘Dee'ni! Eeggatena qaaqqo hanni shii. Isera uyi!’ yitu. Ti'i mancho kayinni, ‘Lamentera uyitooti; lamewa murte beehinke’ yitu.

Nugusu Salamooni mitte qarrissanno hajo tiranni no

Goofimarchohono Salamooni, ‘Qaaqqo shitinoonte! Umo coyidhu manchora uyiyye. Qaaqqu ama iseetina’ yii. Salamooni tenne afinohu, qaaqqu ama qaaqqose lowo geeshsha baxxinohura reyannokki gede wole manchora uyinanni gede coyi'rasenniiti. Mannu Salamooni konne qarra tirino gara macciishshiti, togooha hayyichcha nugusa afi'ransanni hagiidhi.

Salamooni gashshooti waro, baatto lowo sindenna hayixe, woyinenna belese hattono wole sagale fushshitanno gede asse Maganu manna maassi'ri. Hakkawaro mannu dancha uduunne uddi'ranno; danchu minirano galanno. Mittu mittunku manchira danchuri baalunku wo'me noosi.

1 Negesti 3:3-28; 4:29-34.



Xa'muwa

  • Yihowa Salamooni mayyee xa'mi? Salamoonina mayyee qoli?
  • Salamooni yiinori hagiirsiiseennasi Yihowa maa aasira qaale ei?
  • Lame meenti Salamoonira ku'linoti qarrissanno hajo maati?
  • Misilete aana la''attonte gede Salamooni konne qarra hiisse tiri?
  • Salamooni gashshooti hiittooho? Mayira?

Wole xa'muwa

  • Umi Negesti 3:3-28 nabbawi.

    Yannankera Yihowa dirijjite giddo shoomantino labballi 1 Negesti 3:7 aana Salamooni giddosinni kae assino huuccattonni maa rossanno? (Far. 119:105; Law. 3:5, 6)

    Huucci'ra hasiissannonkere lainohunni Salamooni huuccatto dancha lawishsha ikkitannonkehu hiittoonniiti? (1 Neg. 3:9, 11; Law. 30:8, 9; 1 Yo. 5:14)

    Salamooni lame meenti gibbo tirino gari, konni ka'a Bayiru Salamooni Yesuusi Kiristoosi gashshanno yanna lainohunni maa addaxxineemmo gede assannonke? (1 Neg. 3:28; Isa. 9:6, 7; 11:2-4)

  • Umi Negesti 4:29-34 nabbawi.

    Salamooni hajajamanno wodana aannosi gede assi'rino huuccattora Yihowa mayi dawaro qolisi? (1 Neg. 4:29)

    Mannu Salamooni hayyo macciishshate assino sharronni, ninke Maganu Qaale xiinxalla lainohunni maa ronseemmo? (1 Neg. 4:29, 34; Yoh. 17:3; 2 Xim. 3:16)