Qara amadowa massie

Cinaanchu doorshiwa massie

Furchonniwa massie

Yihowa Farci'raasine

Sidaamu Afoo

Qullaawu Maxaafi Xagge Roseemmo Maxaafa'ya

Xagge 41: Camote Hamashsho

Xagge 41: Camote Hamashsho
Musenna camote hamashsho

KUNI haqqu aana xaaxaminohu addu hamashsho lawanno? Addu hamashsho di''ikkino. Camotenni loonsoonni hamashshooti. Mannu konne hamashsho lae lubbo gatanno gede, Muse haqqu aana sutanno gede Yihowa kulinosi. Uulla noo hamasi kayinni addu hamasooti. Kuni hamasi manna qase madiissanni no. Mayiraatiro afootto?

Korkaatuno Isiraeelete manni Maganohonna Musera gunguntinohuraati. Togo yitu: ‘Koye halallaho reyinammora Gibitsetenni fushshittonkehu mayiraati? Kowiichcho sagaleno wayino dino. Konne menna xaate di''inteemmo.’

Ikkollana mennu dancha sagaleeti. Yihowa menna maalaletenni uyinonsa. Qoleno maalaletenni waa uyinonsa. Isiraeelete manni kayinni Maganu towaatanni hee'reennansanni digalattino. Konni daafira Yihowa Isiraeele qorichchishate konne marzaamma hamaso soyi. Hamasu qaseenna haammatu manni reyi.

Isiraeelete gosa hamasu qasanni no

Gedensaannino mannu Musewa mare, ‘Yihowaranna atera gungumankenni so'noommo. Xa eeggatena konne hamaso hoolannonke gede Yihowa huuccinke’ yii.

Museno mannaho Yihowa huucci. Hakkiinnino Yihowa, Muse konne camote hamashsho seekkanno gede kulisi. Qoleno hakkonne hamashsho haqqu aana sutanno gedenna, uulla hamasi qasino manni baalunku hakko hamashsho la''anno gede kulisi. Museno Maganu yiisi gede assi. Hamasu qasino mannino camote hamashsho lae madansanni huri.

Tenne xaggenni ronseemmo rosi no. Ninke baalinke hamasu qasi Isiraeele noo gari giddo hee'noommo. Baalinke reyineemmoreeti. Hanni qooxeessikkira noo manna lai; mannu geedhannota, xiwamannotanna reyannota huwatatto. Kuni ikkinohu, umi labbaahunna meyaati yaano Addaaminna Heewani, Yihowara hajajaminokkihuranna ninkeno baalinke oosonsa ikkinoommohuraati. Ikkollana Yihowa hegerera hee'neemmo gede qixxaawo assino.

Yihowa Beettosi Yesuusi Kiristoosi uullara soyino. Batinynyu manni Yesuusi bushaho yee hedino daafira haqqu aana sutisi. Ikkollana Yihowa Yesuusi uyinohu ninke gatisaraati. Yesuusi addaxxinummoronna iso ha'runsinummoro hegere heeshsho afi'neemmo. Tenne hajore albaange lowore ronseemmo.

Zehulqu 21:4-9; Yohaannisi 3:14, 15.



Xa'muwa

  • Misilete aana haqqaho xaaxaminohu maati? Muse haqqaho xaaxanno gede Yihowa kulinosihu mayiraati?
  • Isiraeelete manni Maganu assinonsarira galatu noonsakkire ikkitinohu hiittoonniiti?
  • Yihowa Isiraeele qorichchishate marzaamma hamaso soyita, insa Muse mayite huuccidhu?
  • Yihowa, Muse camote hamashsho seekkanno gede kulinosihu mayiraati?
  • Tenne xaggenni maa ronseemmo?

Wole xa'muwa

  • Zehulqu 21:4-9 nabbawi.

    Isiraeele Yihowa uyinonsa sagale gibbe gungumansa ninkera mayi qorowishsha ikkitannonke? (Zeh. 21:5, 6; Ro. 2:4)

    Yannate gedensaanni, Isiraeele camote hamashsho maaho horonsidhu? Konnira Nugusu Hiziqiyaasi ma assi? (Zeh. 21:9; 2 Neg. 18:1-4)

  • Yohaannisi 3:14, 15 nabbawi.

    Camote hamashsho haqqaho suta, Yesuusi Kiristoosi sutamara lawishsha ikkitannohu hiittoonniiti? (Gal. 3:13; 1 Phe. 2:24)