Qara amadowa massie

Furchonniwa massie

Yihowa Farci'raasine

Afoo doodhi Sidaamu Afoo

Xagge 35: Yihowa Dagasira Higgesi Uyi

Xagge 35: Yihowa Dagasira Higgesi Uyi

ISIRAEELE Gibitsetenni fultuhunni lamu agani gedensaanni, Siina Ilaala woyi Korebi yinanni ilaala iillitu. Yihowa Muse buwanno citi giddonni coyishiishisihuno hakkooti. Mannuno hakkiichcho shiima yanna hee'ri.

Mannu ilaalu woroonni agaranna Muse ilaala giddi. Ilaalaho guunxoteno, Yihowa Isiraeelete manni isira hajajantanno gedenna isira baxxitino daga ikkitara hasi'rannota Musera kulisi. Muse ilaalunni dirre Isiraeelete Yihowa yiinota kulinsa. Insano Yihowara dagasi ikka hasidhino daafira, isira hajajammeemmo yitu.

Hakkiinnino Yihowa mitto baxxino coye assi. Ilaalu guunxo wiliiltanno gedenna banqo beleqqanno gede assi. Mannahono, ‘Ani Yihowa Gibitsetenni fushshummo'ne Magano'neeti’ yii. Qoleno, ‘Ane agurranna wole maganna magansidhinoonte’ yee hajajinsa.

Lame taaladda kinna

Maganu Isiraeelete wole honse hajajo woyi higge uyinsa. Mannuno lowo geeshsha waajje Muse togo yii: ‘Ati coyi'rinke; Maganu coyi'rinkero reyineemmo yine waajjinoommona.’

Gedensaannino Yihowa Muse, ‘Kawa anewa ilaala amo. Mannu ayirrisara hasi'reemmo higge borreessoommoha lame taalashsho kincho eemmohena’ yiisi. Konni daafira Muse xaano ilaala giddi. Ilaalu iima 40 barranna 40 hashsha keeshshi.

Maganu mannisira duuchcha higge uyinsa. Museno tenne higge borreessi. Qoleno Maganu Musera lame taaladda kinna uyisi. Tenne kinna aana mannisira coyiˈrinota 10 higge Maganu umisi borreessino. Tenne higge Tonne Hajajooti yinanni.

Muse Siina ilaalira

Tini Tonne Hajajo lowo geeshsha dancha higgeeti. Ikkollana Maganu Isiraeelete uyinoti wole higgeno danchate. Tenne higge giddo mitte togo yitanno: ‘Yihowa Maganokki wo'mu wodanikkinni, wo'ma hedokkinni, wo'ma lubbokkinninna wo'ma wolqakkinni baxi.’ Wole higge qolte, ‘Manna duuchchanka umikki gede assite baxi’ yitanno. Tini lamenti higge Yihowa mannisira Isiraeelete uyino higge giddo roortinota ikkitinota, Maganu Beetti Yesuusi Kiristoosi xawisino. Maganu Beettirenna isi rosiisinore haammatare albaange ronseemmo.

Wolaphpho 19:1-25; 20:1-21; 24:12-18; 31:18; Marro 6:4-6; Zelewaawuyaani 19:18; Maatewoosi 22:36-40.



Xa'muwa

  • Isiraeele Gibitsetenni fultuhunni lamu agani gedensaanni, hiikko dukka'nitu?
  • Yihowa Isiraeele ma assitara hasi'rannota kuli? Insa mayite qoltuyya?
  • Yihowa Musera lame taalashsho kincho mayira uyisi?
  • Tonne Hajajo agurranna, Yihowa Isiraeelete wole hiittee higge uyino?
  • Yesuusi Kiristoosi, wole higgenni roortanno yiinoti lame higge hiittenneeti?

Wole xa'muwa

  • Wolaphpho 19:1-25, 20:1-21, 24:12-18 nna 31:18 nabbawi.

    Ninkeneeto Yihowara uyinummo gedensaanni assa hasiissannonkehu wolu coyi noota buunxeemmo gede, Wolaphpho 19:8 kaa'litannonkehu hiittoonniiti? (Maat. 16:24; 1 Phe. 4:1-3)

  • Marro 6:4-6, Zelewaawuyaani 19:18 nna Maatewoosi 22:36-40 nabbawi.

    Kiristaanu Maganohonna mannaho noonsa baxille leellisha dandiitannohu hiittoonniiti? (Maar. 6:34; Soq. Los. 4:20; Ro. 15:2)