Qara amadowa massie

Cinaanchu doorshiwa massie

Furchonniwa massie

Yihowa Farci'raasine

Sidaamu Afoo

Qullaawu Maxaafi Xagge Roseemmo Maxaafa'ya

Xagge 34: Baxxitino Sagale

Xagge 34: Baxxitino Sagale

KUNI mannu uullanni gamba assi'ranni noohu maatiro afootto? Loja lawannorichchooti. Qoleno waajjoho, shaqqadohonna boolamannoho. Ikkollana loja di''ikkino; intannireeti.

Isiraeelete gosa menna gamba assidhanni no

Isiraeelete gosa Gibitsetenni fultunku aganalla ikkinonsa. Xa insa halallaho no. Halallaho gidu laalannokkihura togo yite gunguntu: ‘Yihowa Gibitsete hee'neenna gudoommenkero woyyannonkenka. Hakkiichcho wole nafa hoongiro hasi'nummo dani sagale inteemmo.’

Konni daafira Yihowa, ‘Sagale iiminni dirrisammoraati’ yiinsa. Isino yiinonte gede assi. Layinki soodo Isiraeele konne giggilinore waajjore la'uti insa insaneewa, ‘Kuni maati?’ yitu.

Museno, ‘Tini Yihowa ittinara uyino'ne sagaleeti’ yiinsa. Insano hatte sagale, MENNAHO yitu. Intanni wote daabbote gede ikke coommannoreeti.

Museno Isiraeelete gosara, ‘Mittu mittunku manchi itanno geeshshiha gamba assi'ra hasiissannosi’ yee kulinsa. Hakko daafira layinki soodo yiinonsa gede assitu. Hakkiinnino arrishsho iibbituta, gamba assinanna gatino menni daaqe goofi.

Muse qoleno, ‘Ayino menna layinki soodora gashshira dihasiissannosi’ yiinsa. Gamu manni kayinni isi yiinota giwi. Mannu giwita mayi ikkiro afitto? Layinki soodo la'nanni wote gashshidhino menni da'muule bowi!

Ikkollana, Yihowa lamalate giddo gosa lame ero menna gamba assidhanno gede kulinonsahu mittu barri no. Hakku barri leyikki barraati. Qoleno Yihowa gosa gama menna layinki barrira gashshidhanno gede kulinsa; korkaatuno lamalki barra Yihowa mittoreno didirrisanno. Lamalki barrira gashshidhu wote, mennu dida'muulino; qoleno dibowino! Tinino wole maalaleeti!

Isiraeelete manni halallaho keeshshi diro duuchchanka Yihowa menna itisinonsa.

Wolaphpho 16:1-36; Zehulqu 11:7-9; Iyyaasu 5:10-12.



Xa'muwa

  • Misilete aana mannu uullanni maa xinqiranni no? Hakkonne mannu xinqirannorichcho mayinanni?
  • Menna xinqira lainohunni Muse mannaho mayyee kuli?
  • Yihowa mannu leekki barra ma assanno gede kuli? Mayira?
  • Mannu menna lamalki barrira gashshirita, Yihowa mayi maalale assi?
  • Yihowa mannasi menna mageeshshi diro itisino?

Wole xa'muwa

  • Wolaphpho 16:1-36 nna Zehulqu 11:7-9 nabbawi.

    Kiristaanu songo giddo Maganu ayyaaninni shoomantinore ayirrisa lainohunni, Wolaphpho 16:8 maa rosiissannonke? (Ibi. 13:17)

    Isiraeele halallaho noo waro, barru baala Yihowa addaxxitanno gede rosiisinonsahu maati? (Wol. 16:14-16, 35; Marro 8:2, 3)

    Yesuusi mennu mayi tiro afi'rinota coyi'rino? Kuni ‘iiminni dirrino timi’ ninkera mayi hoˈro aannonke? (Yoh. 6:31-35, 40)

  • Iyyaasu 5:10-12 nabbawi.

    Isiraeele menna me''e diro ittino? Kuni insara fonqolo ikkinonsahu hiittoonniiti? Ninke tenne xaggenni mayi roso afi'neemmo? (Wol. 16:35; Zeh. 11:4-6; 1 Qor. 10:10, 11)