Qara amadowa massie

Cinaanchu doorshiwa massie

Furchonniwa massie

Yihowa Farci'raasine

Sidaamu Afoo

Qullaawu Maxaafi Xagge Roseemmo Maxaafa'ya

Xagge 33: Duumo Baara Tayise Sa''a

Xagge 33: Duumo Baara Tayise Sa''a

KUNEETI mayi ikkanni nooro lai! Duumo Baara siqqotenni gananni noohu Museeti. Isi widoonni ge'e uurrite noori Isiraeelete gosaati. Feeriooninna wottaaddarasi baala kayinni wayi itanni no. Kuni hiitto ikke ikkinoro hanni la'no.

Gibitsete wottaaddari baaru giddo itamanni no

Albaanni ronsummonte gede, Feeriooni Maganu 10kki qoomama Gibitsete gosa aana abbi gedensaanni Isiraeele hadhara agurino. Gibitsetenni, 600,000 labballi, batinynyu meentinna qaaqquulli fulino. Qoleno Yihowa ammantannori wolootu haammatu mannooti Isiraeelete ledo fultino. Fulturi baalunku gereewonsa, me''ensanna lalonsa adhite fultino.

Isiraeelete gosa hadhara albaanni Gibitsete gosawiinni uddannanna wole worqetenna birru uduunne xa'midhu. Gibitsete gosa insa aana dirrinohu goofimarchu qoomaminni kainohunni lowo geeshsha waajjitino. Konni daafira Isiraeelete gosa xa'midhinore baala uyitunsa.

Shiimu barri gedensaanni Isiraeelete gosa Duumo Baara iillitu. Hakka iillituti fooliishshidhu. Shiima yanna gedensaanni, Feeriooninna mannisi Isiraeelete gosa hadhara aguransanni gaabbitu. ‘Borojjenke hadhara mayira agurrummo!’ yitu.

Konni daafira Feeriooni xaano hedosi soorri. Olu saragallanna wottaaddara qixxeessiri. Hakkiinnino 600 baxxino saragalla adhe, qoleno wolu Gibitsete saragalli baalu ledo Isiraeele shorrara fuli.

Isiraeelete gosa Feeriooninna wottaaddarisi badhensaa daanna la'uti, lowo geeshsha waajjitu. Hakkawote xooqqannowi dino. Albansaanni Duumu Baari no; badhensaanni kayinni Gibitsete gosa dagganni no. Ikkollana Yihowa dagasinna Gibitsete gosa mereero gomichcho wori. Konni daafira, Gibitsete gosa Isiraeele qasate la''a didandiitino.

Hakkiinnino Yihowa Muse siqqosinni Duumo Baara gananno gede kulisi. Muse siqqosinni Baara ganita, Yihowa kaajjado soojjaati bubbe abbi. Baaru wayi lamewa beehame guranna qiniiteenni gotti yee uurri.

Hakkunni gedensaanni Isiraeelete gosa baaru giddoonni moola baatto kaxxite sa'u. Kuni miliyoonetenni kiirranni manni saadansa baalante ledo baara tayise hobbaate fulate seeda saate adhinonsa. Gedensaannino Gibitsete gosara Isiraeele noowi leellinsa. Borojjootinsa fulte ba'anni no! Konni daafira shorritanni baaru giddora e'u.

Baaru giddora e'uta, Yihowa saragallinsa gomma qulfe gudi. Gibitsete gosa lowo geeshsha waajjite, ‘Yihowa Isiraeelete gosara olamanni noona amme kawiichchinni fullona!’ yite cancitu. Ikkollana fulate barre baino.

Misilete aana laittonte gede, Yihowa Muse siqqosinni Duumo Baara gananno gede kulinosihu hakkawoteeti. Muse siqqosinni baara ganita, guranna qiniiteenni uurrino wayi Gibitsete gosanna saragallansa diwe beeshshi. Baalunku wottaaddari Isiraeele shorranni baaru giddora ei. Einohu giddo mittu nafa digatino!

Maganu gosa gatte fultinohura mageeshsha hagiidhitinokka! Labballu Yihowara, ‘Yihowa bayira qeelle assi. Faradonna insa guluffinore baaraho naqi’ yite galatu faarso faarsitu. Muse rodoo Maariyaami dibbese adhite dibbe adhino wolu meenti ledo faarsitara ka'u. Isenna ledose noo meenti hagiidhe kubbanni labballu yiita yee faarsi: ‘Yihowa bayira qeelle assi. Faradonna guluffinore baaraho naqi.’

Wolaphpho fooliishsho 12 kayise 15



Xa'muwa

  • Meentinsanna oosonsa ledo Gibitsete gobbanni fulino labballi me''eho? Insa ledo ayeoo fultino?
  • Feeriooni Isiraeelete gosa hadhara aguri gedensaanni hiitto ikki? Hakkiinnino ma assi?
  • Yihowa Gibitsete gosa mannasi gawajjitannota hoolate ma assi?
  • Muse siqqosinni Duumo Baara ganita, baaru hiitto ikki? Hakkiinnino Isiraeelete gosa hiikkitu?
  • Gibitsete gosa Isiraeele shorritanni baaru giddora e'uta, mayi maikki?
  • Isiraeelete gosa Yihowa gatisinonsa daafira hagiidhitinotanna Yihowara galatu noonsata mayinni leellishshu?

Wole xa'muwa

  • Wolaphpho 12:33-36 nabbawi.

    Yihowa dagasi Gibitsete gobbara borojje ikkite lowo diro heedhino daafira kiisinonsahu hiittoonniiti? (Wol. 3:21, 22; 12:35, 36)

  • Wolaphpho 14:1-31 nabbawi.

    Muse Wolaphpho 14:13, 14 aana coyi'rinori, Yihowa soqqamaano Armageedooni oli yannara hiikkitanno gede jawaachchishannonsa? (2 Ze. 20:17; Far. 91:8)

  • Wolaphpho 15:1-8, 20, 21 nabbawi.

    Yihowa soqqamaano isira galatu faarso faarsa hasiissannonsahu mayiraati? (Wol. 15:1, 2; Far. 105:2, 3; Yo. Aj. 15:3, 4)

    Maariyaaminna ledose Duumu Baariwa noo meenti, Yihowara galatu faarso faarsa lainohunni yannankera Kiristaana ikkino meentira mayi lawishsha ikkanno? (Wol. 15:20, 21; Far. 68:11)