Qara amadowa massie

Cinaanchu doorshiwa massie

Furchonniwa massie

Yihowa Farci'raasine

Sidaamu Afoo

Qullaawu Maxaafi Xagge Roseemmo Maxaafa'ya

Xagge 32: Tonne Qoomama

Xagge 32: Tonne Qoomama

MISILLA tenne lai. Mitte mittenti Yihowa Gibitsete dirrisino qoomama leellishshanno. Umi misilera Aarooni Nayili Laga siqqosinni gananna lai. Aarooni siqqosinni waa ganita wayi mundee ikki. Giddo noo qulxu'me reyite gooffu; wayino bowi.

Gibitsete gosara dirrino qoomama

Aancheno Yihowa Nayili Laginni bechche'naama fultanno gede assi. Bechche'naamano qishi'nanniwa ikko gafi'nanniwa, boosaallo, mannu goxannowanna wolewa baalawa wo'mitu. Bechche'naama reyituta, Gibitsete gosa mittowa duuntu; uullano isenni kainohunni bobbu.

Hakkiinnino Aarooni siqqosinni bushsha ganita, buko biinnete soorrantu. Kuri buubbannonna manna ittanno shiimmaadda lubbuwaati. Gibitsete gobbara dirrinohu sayikki qoomami biinnete.

Gatinohu wolu qoomami baalunku Isiraeele kisikkinni Gibitsete gosa calla gawajji. Shoolki qoomami torondeho; toronduno Gibitsete gosa baalante minira e''e wo'mi. Ontikki qoomami saadate aana dirri. Gibitsennihu lowo lali, gereewinna mei goofi.

Hakkiinnino Musenna Aarooni shiima buluulo haadhe iimira qolte fincitu. Hakku buluulino mannahonna saadate mada naqi. Kuni leyikki qoomamaati.

Hakkunni gedensaanni Muse angasi iimira kayisi; Yihowano banqonna kaade dirrisi. Togoo kaade Gibitsete gobbara konni albaanni dirrite diegentino.

Settikki qoomami kanchafareho. Hatte yannara albaannino ikko gedensaanni hakkeeshshi kanchafari dirre diegennino. Kaadetewiinni gatinore baala kanchafaru ite gudi.

Honsikki qoomami tunsichchoho. Sase barra wo'ma xi'mu tunsichchi gobba amadi; Isiraeelete gosa noo widoonni kayinni xawaabbaho.

Gedensaannino Maganu, dagasi meichchu woyi ge'rechchu mundee tanqinsara buurtanno gede kulinsa. Hakkiinnino Maganu sokkaanchi Gibitsete gobba widoonni sai. Sokkaanchu tanqaho mundee lai wote, mine nooha mittono dikisino. Mundee buurroonnikki tanqi noo mine mari wote kayinni, mannunniha ikko saadate bayira shee gudi. Kuni 10kki qoomamaati.

Konni goofimarchu qoomami gedensaanni, Feeriooni Isiraeelete gosa hadhara aguri. Maganu daga wonanni hadhara qixxaabbe noo daafira, hakko hashshanni Gibitsete fultu.

Wolaphpho fooliishsho 7 kayise 12.



Xa'muwa

  • Misile laittohu gedensaanni, Yihowa Gibitsete gosara dirrisinoha umiha sase qoomama kuli.
  • Umo dirrinohu sasu qoomami wolu qoomamiwiinni baxxannohu mayinniiti?
  • Shoolki, ontinna leyikki qoomami maati?
  • Lamalki, settikkinna honsikki qoomami maatiro kuli.
  • Yihowa tonnikki qoomama dirrisara albaanni, Isiraeelete gosa ma assitanno gede kulinsa?
  • Tonnikki qoomami maati? Hakko qoomami gedensaanni mayi maikki?

Wole xa'muwa

  • Wolaphpho 7:19 kayisse 8:23 geeshsha nabbawi.

    Gibitsete gobba kiilaano Yihowa dirrisinoha umiha lame qoomama qolte assitinoha ikkirono, sayikki qoomami dirri gedensaanni baxxukki ammantino coyi maati? (Wol. 8:18, 19; Maat. 12:24-28)

    Shoolki qoomami Yihowa mannasi gatisa dandaannota leellishinohu hiittoonniiti? Maganu gosa tenne afansa, masaalleenna nooha “bayira qarra” dandiite sa'anno gede jawaachchishshannonsahu hiittoonniiti? (Wol. 8:22, 23; Yo. Aj. 7:13, 14; 2 Ze. 16:9)

  • Wolaphpho 8:24; 9:3, 6, 10, 11, 14, 16, 23-25 nna 10:13-15, 21-23 nabbawi.

    Tonnu qoomami dirrita, noonsa wolqa shiima ikkite leeltinoti lame gaamo hiitteeti? Tenne lamente gaamo wolqa shiima ikkase xaa yannara lamente gaamora hiittoo lao heedhannonke gede assitanno? (Wol. 8:10, 18, 19; 9:14)

    Sheexaanu xaa geeshsha hee'rara Yihowa mayira agurinoro buunxeemmo gede, Wolaphpho 9:16 kaa'litannonkehu hiittoonniiti? (Ro. 9:21, 22)

  • Wolaphpho 12:21-32 nabbawi.

    Faasiku ayyaani duuchchu manni gatanno gede faro faninohu hiittoonniiti? Kuni ayyaani maa leellishanno? (Wol. 12:21-23; Yoh. 1:29; Ro. 5:18, 19, 21; 1 Qor. 5:7)