Qara amadowa massie

Cinaanchu doorshiwa massie

Furchonniwa massie

Yihowa Farci'raasine

Sidaamu Afoo

Qullaawu Maxaafi Xagge Roseemmo Maxaafa'ya

Xagge 30: Buwanno Cita

Xagge 30: Buwanno Cita

MUSE gereewisira hayisso hasi'ranni Korebi ilaali geeshsha ha'ri. Hakkiichchono buwanno cita lai, ikkollana citu digiiramino!

Muse buwanno citi mule

Muse, ‘Kuni hiikkinoreeti’ yee hedi. ‘Shiqqi yee seekke laeemmo’ yii. Shiqqi yii wote, citu giddonni fultino huuro togo yitusi: ‘Kowiira shiqqi yitooti. Kaxxootto uulla qullaawa ikkitinohura caammakki fushshi.’ Musera sokkaanchu widoonni coyi'ranni noohu Maganoho. Konni daafira Muse albasi guggu'li.

Maganu togo yiisi: ‘Gibitsete hee'ranno manni'ya qarra laoommo. Borojjimmatenni fushshammonsaraati, Konni daafira ate hakka soyeennahe Gibitsete gobbanni manna'ya massagge fushshato.’ Yihowa mannasi Kana''aanni yinannita dancha gobba massansaraati.

Muse kayinni, ‘Massage fushsheemmohu ani ayeeti? Ani gariha di''ikkoommo. Ha're fulle yuummoro nafa, Isiraaeelete gosa, “Ayi soyinohe?” yitannoe. Hakkawote mayyeemmo?’ yii.

Maganu qole, ‘Togo yaattonsa’ yiisi. ‘“Abirahaami Magani, Yisaaqi Magani, Yaaqoobi Magani YIHOWA soyinoe” yiinsa.’ Ledeno Yihowa, ‘Hegererano su'mi'ya konneeti’ yiisi.

Museno, ‘Ati soottoeta kuleennansa ammana gibburonaa?’ yii.

Maganu Muse, ‘Angakkira noohu maati?’ yiisi.

Museno, ‘Siqqote’ yii.

Maganuno, ‘Uullara tugi’ yiisi. Muse siqqosi uullara tugita, siqqo hamashsho ikkitu. Yihowa xaano Musera wole maalale leellishisi. Togo yiisi: ‘Angakki kikki'lakki giddora eessi.’ Muse angasi kikki'latenni fushshita kaadete gedee waajjo ikkitino! Anga xiigaho yinannihu bushu xibbi amadinohu gede ikkitu. Aanteteno Yihowa Musera wole sayikki maalale assanno gede wolqa uyisi. Gedensaannino, ‘Tenne baala maalale assatto wote, Isiraeelete gosa ani soommoheta ammantanno’ yiisi.

Hakkunni gedensaanni Muse minira ha're Yootoori, ‘Gibitse ha're fiixi'ya noo gara layireemmona fajjie’ yii. Yootoorino Muse keerunni yeenna, Muse Gibitse ha'ri.

Wolaphpho 3:1-22; 4:1-20.



Xa'muwa

  • Misilete aana noo ilaali su'ma mayinanni?
  • Muse gereewo haare ilaala mari wote lainoha xagge ikkanno coye xawisi.
  • Buwanno citi giddonni fultino huuro Muse mayitu? Hatti huuro ayite?
  • Maganu mannasi Gibitsetenni fushshanno gede Musera kulisita, Muse mayyii?
  • Maganu, mannu Muse ayi soyinosiro xa'miro, mayyee qolanno gede kulisi?
  • Muse Maganu soyinosita mannaho buuxisa dandiinohu hiittoonniiti?

Wole xa'muwa

  • Wolaphpho 3:1-22 nabbawi.

    Maganu looso loosate garire ikkinoommokkihu gede macciishshaminkerono, Yihowa dandoo aannonketa Muse xagge leellishshannohu hiittoonniiti? (Wol. 3:11, 13; 2 Qor. 3:5, 6)

  • Wolaphpho 4:1-20 nabbawi.

    Muse Miidiyaami gobbara 40 diro hee'ri yannara laosi soorrinohu ma garinniiti? Songote giddo mabte afi'rate sharrantanni noo roduuwi konninni mayi roso afidhanno? (Wol. 2:11, 12; 4:10, 13; Mik. 6:8; 1 Xim. 3:1, 6, 10)

    Yihowa dirijjitesi widoonni qole seejjannonkeha ikkirono, Muse lawishshi mayi jawaante aannonke? (Wol. 4:12-14; Far. 103:14; Ibi. 12:4-11)