Qara amadowa massie

Cinaanchu doorshiwa massie

Furchonniwa massie

Yihowa Farci'raasine

Sidaamu Afoo

Qullaawu Maxaafi Xagge Roseemmo Maxaafa'ya

Xagge 4: Qaensanni Fushshininsahu Mayiraati?

Xagge 4: Qaensanni Fushshininsahu Mayiraati?

HANNI ikkanni noore lai. Addaaminna Heewani biifado Edenete kaashshi base giddonni fushshinanni hee'noonni. Mayiraatiro afootto?

Addaaminna Heewani biifado Edenete kaashshu base giddonni fushshinanni hee'noonni

Korkaatuno busha coye assitinohuraati. Konni daafira Yihowa qorichchishanni noonsa. Addaaminna Heewani assitinoha busha coye afootto?

Maganu assitinoonte yiinore assitino. Maganu kaashshu basera noo haqqenni guma ita dandiitannota kulinonsa. Ikkollana mitte haqqichchowiinni ittannokki gedenna gibbe itturo kayinni reyitannota kulinsa. Hatti haqqichcho isiniitira wodhinote. Qoleno mannirichcho adha so'ro ikkitinota anfoommo; dihattooti? Addaaminna Heewani ma assituyya?

Mitto barra kaashshu basera Heewani callase heedheenna hamashshu coyishiishise. Xagge ikkanno coyeeti! Heewani Maganu ittinoonte yiino haqqichchonni ittanno gede kulise. Yihowa hamashsho kalaqinohu coyi'rannokki gede asseeti. Konni daafira konne hamashsho coyi'ranno gede assinosihu wolu no yaate. Hakku ayeeti?

Addaami di''ikkino. Konni daafira, Yihowa uulla kalaqara albaanni balaxe kalaqinori giddo mitto ikka noosi. Insano sokkaanote; ninke sokkaano la''a didandiineemmo. Tenne sokkaano giddo mittu lowo geeshsha naaxxaleessa ikki. Maganu gede mootichcha ikka hasiissannoe yee heda hanafi. Qoleno mannu Yihowara agure isira hajajamannosi gede hasi'ri. Hamashsho coyi'ranno gede assinohu konne sokkaanchooti.

Kuni sokkaanchi Heewani doga dandiino. Hoolloonni guma itturo Maganu gedeeta ikkitannota kulise wote ammantino. Konni daafira hattee haqqichcho guma ittu; Addaamino iti. Addaaminna Heewani Maganoho dihajajantino; biifado kaashshu base giddonni fushshininsahu iseraati.

Ikkollana Maganu barrunni mitto barra wo'ma uulla Edenete kaashshi base gede biifado assanno. Atino konni loosira kaa'lo assa dandaattohu hiittoonniitiro albaange la'neemmo. Xa kayinni Addaamiranna Heewanira mayi iillinsaro la'no.

Kalaqo 2:16, 17; 3:1-13, 24; Ajuuja 12:9.



Xa'muwa

  • Misilete aana, Addaaminna Heewani hiissinanni hee'noonni?
  • Yihowa insa qorichchishinonsahu mayiraati?
  • Hamashshu Heewani mayyii?
  • Hamashshu Heewani coyishiishanno gede assinohu ayeeti?
  • Addaaminna Heewani Gannatetenni fushshinihu mayiraati?

Wole xa'muwa

  • Kalaqo 2:16, 17 nna 3:1-13, 24 nabbawi.

    Hamashshu Heewani xa'mino xa'mo Yihowa su'ma huntinohu hiittoonniiti? (Kal. 3:1-5; 1 Yo. 5:3)

    Heewani ninkera qorowishsha ikkitannonkehu hiittoonniiti? (Fil. 4:8; Ya. 1:14, 15; 1 Yo. 2:16)

    Addaaminna Heewani so'ronsa ammana gibbinohu ma garinniiti? (Kal. 3:12, 13)

    Edenete kaashshu basera soojjaatoonni worroonni kirubeele Yihowa aliidimma irkissinohu hiittoonniiti? (Kal. 3:24)

  • Yohaannisi Ajuu[j]a 12:9 nabbawi.

    Sheexaanu mannu ooso Maganuwiinni mageeshshi geeshsha badino? (1 Yo. 5:19)