Skip to content

පටුනට යන්න

තාක්ෂණය ඔයාගේ හිතන විදිහට කොහොම බලපායිද?

තාක්ෂණය ඔයාගේ හිතන විදිහට කොහොම බලපායිද?

අද කොයි වෙලේ බැලුවත් මිනිස්සු මොනවා හරි දෙයක් ගැන ඉගෙනගන්නවා. ඒ ඉස්කෝලේ වැඩකට, රස්සාවේ වැඩකට නැත්නම් වෙන මොකක් හරි වැඩකට වෙන්න පුළුවන්. තාක්ෂණය නිසා වෙන කවදාටත් වඩා තොරතුරු හොයාගන්න එක හරිම ලේසියි. ගෙදරින් එළියට යන්නේවත් නැතුව කොටින්ම කිව්වොත් පුටුවෙන් නැඟිටින්නේවත් නැතුව ඒ දේ කරන්න පුළුවන් වෙලා තියෙනවා.

හැබැයි ඕනෑවට වඩා ගැජට් පාවිච්චි කරන සමහර අයට . . .

  • කියවද්දී අවධානය දෙන්න බැරි වෙනවා.

  • තනියම ඉන්න වෙලාවට ලොකු හිස්කමක් දැනෙනවා.

  • එක වැඩකට හොඳින් අවධානය දෙන්න බැරි වෙනවා.

 දැනගන්න ඕන දේ

දෙයක් කියවද්දී

ෆෝන් එකෙන්, ටැබ් එකෙන් කියවන සමහර අයට දෙයක් ඉවසීමෙන් කියවන්න අමාරුයි. එයාලා පුරුදු වෙලා තියෙන්නේ උඩින් පල්ලෙන් බලලා එයාලට ඕන තොරතුරු විතරක් හොයාගන්න.

ඔයාට මොකක් හරි ප්‍රශ්නෙකට ඉක්මනින්ම උත්තරේ හොයාගන්න ඕනෙ නම් උඩින් පල්ලෙන් කියෙව්වාට කමක් නැහැ. හැබැයි මොකක් හරි විෂයක් ගැන ගැඹුරින් හොයද්දී නම් ඒ ක්‍රමය හරියන්නේ නැහැ.

මේ ගැන හිතන්න: ඔයාට දිග ඡේදයක්, ලිපියක් එක දිගට කියවගෙන යන්න පුළුවන්ද? හොඳට අවධානය දීලා ඉවසීමෙන් දෙයක් කියවන එකෙන් ඔයාගේ ඉගෙනීමේ හැකියාව දියුණු වෙන්නේ කොහොමද?—හිතෝපදේශ 18:15.

අවධානය දෙද්දී

සමහර අය හිතනවා තාක්ෂණය නිසා එයාලට එකපාර වැඩ දෙක තුනක් කරන්න පුළුවන් කියලා. උදාහරණෙකට සමහර අය පාඩම් කරන ගමන් යාළුවොත් එක්ක මෙසේජ් කරනවා. හැබැයි කෙනෙක් එකපාර කරන වැඩ දෙක තුනම හොඳ අවධානයක් දීලා කරන්න ඕනෙ ඒවා නම් ඒ එකක්වත් හරියට කරගන්න එයාට බැරි වෙනවා.

එක දේකට අවධානය දීලා වැඩ කරන එක ලේසි නැති වෙන්න පුළුවන්. හැබැයි එහෙම කරන එකෙන් ගොඩක් ප්‍රයෝජන තියෙනවා. අවුරුදු 14ක් වයස ග්‍රේස් මෙහෙම කියනවා. “එකපාර වැඩ දෙක තුනක් කරනවාට වඩා එක දේකට අවධානය දෙන එක සාර්ථකයි කියලා මං අද්දැකීමෙන්ම දන්නවා. එතකොට මගේ අතින් වෙන වැරදිත් අඩුයි මට දැනෙන පීඩනයත් අඩුයි.”

මේ ගැන හිතන්න: එකපාර වැඩ දෙක තුනක් කරද්දී දේවල් තේරුම්ගන්න, මතක තියාගන්න අමාරුයි කියලා ඔයාට දැනිලා තියෙනවාද?—හිතෝපදේශ 17:24.

තනියම ඉද්දී

සමහර අයට කවුරුත් නැති තැනක ෆෝන් එකක්, ටැබ් එකක් නැතුව ඉන්නකොට ලොකු පාළුවක්, හිස්කමක් දැනෙනවා. “ටැබ් එක හරි ටීවී එක හරි ෆෝන් එක හරි නැතුව මට විනාඩි 15ක්වත් එක තැනක ඉඳගෙන ඉන්න බෑ” කියලා ඔලීවියා කියනවා.

අපිට දෙයක් ගැන ඉගෙනගන්න ඕනෙ නම් ඒ ඉගෙනගන්න දේ ගැන තනියම ඉන්න වෙලාවට හොඳට හිතන එක හරිම වැදගත්. ඒක යෞවනයන්ට විතරක් නෙවෙයි වැඩිහිටියන්ටත් අදාළයි.

මේ ගැන හිතන්න: ඔයා තනියම ඉන්න වෙලාවට දේවල් ගැන හොඳට හිතලා බලන්න ඒ කාලේ පාවිච්චි කරනවාද?—1 තිමෝති 4:15.

 කරන්න පුළුවන් දේ

ඔයා තාක්ෂණය පාවිච්චි කරන විදිහ ගැන හිතලා බලන්න

ඔයාගේ සිතීමේ හැකියාව තව දියුණු කරගන්න තාක්ෂණය උදව් වෙන්නේ කොහොමද? අවධානය දෙන්න, ඉගෙනගන්න ඔයාට තියෙන හැකියාව තාක්ෂණය නිසා දුර්වල වෙන්නේ කොහොමද?

බයිබල් ප්‍රතිපත්තිය: “ප්‍රඥාවද ඔබේ සිතීමේ හැකියාවද රැකගන්න.”—හිතෝපදේශ 3:21.