2 ලේකම් 35:1-27

35  යොෂියා රජ,+ යෙහෝවා දෙවිට ගෞරව කරන පිණිස යෙරුසලමේදී පාස්කු උත්සවය පැවැත්වීමට+ සැලසුම් යෙදුවේය. පළමු මාසයේ+ දාහතරවන දිනයේදී+ පාස්කුව සඳහා ඔප්පු කරන සතුන්ව මරන ලදි.+  තමන්ට නියමිත වගකීම් නැවත ඉටු කිරීමට ඔහු පූජකයන්ට නියෝග කළ අතර+ යෙහෝවා දෙවිගේ ගෘහයේ ඔවුන් කරන සේවය හොඳින් කරගෙන යෑමට+ ඔවුන්ව දිරිගැන්වීය.+  ඉන්පසු ඔහු මුළු ඊශ්‍රායෙල් දේශයෙහි සියලු ලෙවීවරුන්ව එක් රැස් කළේය. යෙහෝවා දෙවි විසින් ශුද්ධ අය ලෙස සලකන, ඉගැන්වීම් කටයුතුවල නියැලෙන ඔවුන්ට+ යොෂියා රජ මෙසේ පැවසුවේය. “ඊශ්‍රායෙල්හි රජු වූ දාවිත්ගේ පුත් සලමොන් සෑදූ ගෘහයට+ ශුද්ධ වූ+ ගිවිසුම් පෙට්ටිය රැගෙන ඇවිත් ඊට නියමිත වූ ස්ථානයෙහි එය තබන්න. එය තවදුරටත් ඔබේ උරහිස් මත තබාගෙන තැනින් තැන ගෙන යෑමට අවශ්‍ය නැහැ.+ ඔබේ දෙවි වන යෙහෝවාටත් ඔහුගේ සෙනඟ වන ඊශ්‍රායෙල් ජනයාටත් දැන් සේවය කරන්න.+  ඊශ්‍රායෙල්හි රජු වූ දාවිත් සහ ඔහුගේ පුත් සලමොන් ලියා තිබෙන මඟ පෙන්වීම්වලට එකඟව,+ ඔබේ මුතුන්මිත්තන්ගේ පෙළපත්වලට අනුව+ නියමිත කාණ්ඩවලට බෙදී+ සේවය සඳහා සූදානම් වන්න.  ඔබේ සහෝදරයන් වන ඊශ්‍රායෙල් ජනතාව පූජා ඔප්පු කිරීම සඳහා තම මුතුන්මිත්තන්ගේ+ පෙළපත්වලට අනුව බෙදී+ ශුද්ධස්ථානයට* පැමිණෙයි. එවිට මුතුන්මිත්තන්ගේ පෙළපත්වලට අනුව නියමිත කාණ්ඩවලට සංවිධානය වී සිටින ඔබ, සෙනඟ රැගෙන එන ඒ පූජා පිළිගෙන නියම කර තිබූ ආකාරයට ඒවා සූදානම් කරන්න.+  පාස්කුව සඳහා ඔප්පු කරන සතුන්ව මරා+ මුලින්ම ඔබ පවිත්‍ර වෙන්න.+ ඊළඟට ඔබේ සහෝදරයන් වෙනුවෙනුත් පූජා සූදානම් කරන්න. ඔබ සියල්ල කළ යුත්තේ යෙහෝවා දෙවි මෝසෙස් මාර්ගයෙන් ආඥා කර තිබෙන ආකාරයටයි.”+  යොෂියා රජ පාස්කුව සඳහා ඔප්පු කිරීමට ජනතාව වෙනුවෙන් බැටළු පැටවුන් සහ එළු පැටවුන් තිස්දහසක් දුන්නේය. ඊට අමතරව ගවයන් තුන්දහසක්ද ඔහු පරිත්‍යාග කළේය.+ ඔහු ඒවා ලබා දුන්නේ ඔහු සතුව තිබූ සත්ව රැළවලිනි.+  ඔහු යටතේ සේවය කළ අධිපතීහු+ ජනතාව වෙනුවෙන්ද+ පූජකයන් හා ලෙවීවරුන් වෙනුවෙන්ද කැමැත්තෙන්ම දේවල් පරිත්‍යාග කළෝය. සැබෑ දෙවිගේ ගෘහයේ පෙරමුණ ගෙන කටයුතු කළ හිල්කියා,+ සෙකරියා සහ යෙහීයෙල් පූජකයන් වෙනුවෙන් පාස්කුව සඳහා ඔප්පු කිරීමට එළු බැටළු පැටවුන් දෙදහස් හයසියයක් පරිත්‍යාග කළෝය. එමෙන්ම ඔවුහු ගවයන් තුන්සියයක්ද දුන්නෝය.  ලෙවීවරුන්ගේ ප්‍රධානීන් වූ කොනනියාද ඔහුගේ සහෝදරයන් වූ ෂෙමායා හා නෙතනෙල්ද හෂබියා, යෙයීයෙල් හා යෝෂාබාද්ද ලෙවීවරුන් වෙනුවෙන් පාස්කුව සඳහා එළු බැටළු පැටවුන් පන්දහසක් දුන්නෝය. ඊට අමතරව ඔවුහු ගවයන් පන්සියයක්ද පරිත්‍යාග කළෝය. 10  සියලුම කටයුතු සූදානම් කළ පසු+ රජුගේ අණ පරිදි+ පූජකයෝ+ තමන්ට නියමිත ස්ථානවලද+ ලෙවීවරු තමන් සංවිධානය වී සිටි කාණ්ඩවලට අනුවද+ සිටගෙන සිටියෝය. 11  ලෙවීවරු පාස්කුව සඳහා ඔප්පු කරන සතුන්ව මරා+ උන්ගේ ලේ පූජකයන්ට ගෙනැවිත් දුන්නෝය. පූජකයෝ+ එම ලේ ගෙන පූජාසනය මත ඉසුවෝය.+ මැරූ සතුන්ව හම ගසන ලද්දේ ලෙවීවරුන් විසින්මය.+ 12  ඉන්පසු තම මුතුන්මිත්තන්ගේ පෙළපත්වලට අනුව+ පැමිණි ඊශ්‍රායෙල් ජනතාව වෙනුවෙන් ඔවුහු දවන පූජා සූදානම් කර,+ මෝසෙස්ගේ ලියවිල්ලේ සඳහන් පරිදි+ යෙහෝවා දෙවිට ඒවා ඔප්පු කළෝය.+ ගවයන් ඔප්පු කිරීමේදීද ඒ පිළිවෙතම අනුගමනය කරන ලදි. 13  ඔවුහු පාස්කුව සඳහා ඔප්පු කරන සතුන්ව+ සිරිත් පරිදි ගින්නෙන් පිලිස්සූ අතර+ දෙවිට කැප කරන ලද වෙනත් පූජාවන් කල්දේරම්වලද හැළිවලද ඇතිළිවලද පිසුවෝය.+ පිසින ලද එම ආහාර ඔවුහු ඉක්මනින්ම ජනතාවට ගෙනැවිත් දුන්නෝය.+ 14  ආරොන්ගෙන් පැවතෙන පූජකයන් රෑ බෝ වන තුරුම දවන පූජාද+ තෙල් කොටස්ද+ ඔප්පු කරමින් සිටි නිසා ලෙවීවරුන් තමන්ට පමණක් නොව පූජකයන්ටත් පාස්කුව සඳහා ඔප්පු කළ සතුන්ව පිසින ලදි.+ 15  දාවිත් රජු,+ ආසාෆ්,+ හේමාන්+ සහ රජුගේ අනාගතවක්තෘ වූ+ යෙදූතුන්+ නියෝග කර තිබූ ආකාරයට ආසාෆ්ගෙන් පැවතෙන+ ගායකයෝ+ තම කාර්යයන් හරියාකාරව ඉටු කළෝය. එමෙන්ම දොරටු පාලකයෝ+ ඔවුන්ට නියමිත ස්ථානවල සිට+ ඔවුන්ගේ වගකීම නිසියාකාරව ඉටු කළෝය. ඔවුන්ගේ සහෝදරයන් වූ ලෙවීවරුන් පාස්කුව සඳහා ඔප්පු කළ සතුන්ව ඔවුන් සියලුදෙනා වෙනුවෙන් සූදානම් කළ නිසා+ ඔවුන්ගේ කාර්යයන් නතර නොකර දිගටම කරගෙන යෑමට ඔවුන්ට හැකි විය. 16  යොෂියා රජුගේ අණ පරිදි+ එම දිනයේදී යෙහෝවා දෙවිට ගෞරවය ගෙනෙන පිණිස පාස්කුව පැවැත්වීමටත් යෙහෝවා දෙවිගේ පූජාසනය මත දවන පූජා ඔප්පු කිරීමටත් සියලුම කටයුතු සූදානම් කර තිබිණ.+ 17  රැස්ව සිටි සියලුම ඊශ්‍රායෙල්වරු පාස්කු උත්සවය පැවැත්වූ අතර+ මුහුන් නොදැමූ රොටි උත්සවය දවස් සතක් පුරා පැවැත්වූහ.+ 18  අනාගතවක්තෘ සාමුවෙල්ගේ කාලයේ සිට මේ දක්වා ඊශ්‍රායෙල් දේශයෙහි මෙතරම් උත්කර්ෂවත් ලෙස පාස්කුව පවත්වා තිබුණේ නැත.+ යොෂියා රජුද ඔහු සමඟ සිටි පූජකයන්ද ලෙවීවරුන්ද යූදා දේශයේ සහ ඊශ්‍රායෙල් දේශයේ වැසියන්ද යෙරුසලමෙහි වැසියන්ද එකතු වී පැවැත්වූ මෙම පාස්කුවට සමාන පාස්කුවක් ඊශ්‍රායෙල්හි වෙනත් කිසිම රජෙකු විසින් සංවිධානය කර නොතිබිණ.+ 19  මෙම පාස්කුව පවත්වනු ලැබුවේ යොෂියා රජකම් කළ දහඅටවන අවුරුද්දේදීය.+ 20  යොෂියා රජ ඒ සියල්ල අවසන් කර දෙවිගේ ගෘහය නමස්කාරය සඳහා නැවත සූදානම් කළේය. ඒ කාලයේදී ඊජිප්තුවේ රජු වූ+ නෙකෝ,+ සටනක් සඳහා යුප්‍රටීස් ගඟ අසල පිහිටි කර්කෙමිෂ්+ බලා ගියේය. එවිට ඔහු හා සටන් වැදීමට+ යොෂියා රජද+ පිටත්ව ගියේය. 21  එවිට නෙකෝ රජ පණිවිඩකරුවන් යවා යොෂියා රජුට මෙසේ පැවසීය. “යූදාහි රජ්ජුරුවනි, මට ඔබත් එක්ක කිසිම ප්‍රශ්නයක් නැහැ. මම යුද්ධයට ආවේ ඔබට විරුද්ධව නෙවෙයි. මම යන්නේ වෙනත් රාජ්‍යයකට විරුද්ධව සටන් කරන්නයි. ඔවුන් හා සටන් වැදීමට දෙවි මට අණ කර තිබෙනවා. ඒ නිසා මේ යුද්ධයට ඔබ හරස් වෙන්න එපා. මට දෙවිගේ උපකාරය තිබෙන නිසා මේ ගමනට ඔබ හරස් වුණොත් දෙවි අතින් ඔබ මරණයට පත් විය හැකියි.”+ 22  නමුත් යොෂියා රජ ආපසු හැරී ගියේ නැත.+ නෙකෝ රජු+ මාර්ගයෙන් දෙවි පැවසූ ඒ දේ ඔහු ගණනකටවත් නොගෙන, වෙස්වලා ගෙන+ නෙකෝ රජු සමඟ සටන් කිරීමට මෙගිද්දෝ තැනිතලාවට+ ගියේය. 23  සටන අතරතුර යොෂියා රජ දුනුවායන්ගේ+ ඊතල පහරකට ගොදුරු විය. එවිට ඔහු තම සේවකයන්ට කතා කර, “මම හොඳටම තුවාල වෙලයි ඉන්නේ. මාව මෙතනින් අරගෙන යන්න”+ කියා පැවසීය. 24  ඔහුගේ සේවකයෝ ඔහුව රථයෙන් බස්සවා, ඔහුගේ දෙවන යුධ රථයට ඔහුව නංවාගෙන යෙරුසලමට රැගෙන ගියෝය.+ එහිදී ඔහු මිය ගියේය.+ ඔහුව තම මුතුන්මිත්තන්ගේ සොහොන් ගෙයි තැන්පත් කරන ලදි.+ යූදා හා යෙරුසලමෙහි සියලුම වැසියෝ යොෂියා රජුට සිදු වූ දේ ගැන අසා හඬා වැලපුණෝය.+ 25  යොෂියා රජුට සිදු වූ දේ ගැන යෙරෙමියා+ විලාප ගී කීවේය.+ සියලුම ගායක ගායිකාවෝ+ අද දක්වාම තමන් ගයන විලාප ගීවල යොෂියා රජු ගැනද සඳහන් කරති. එම විලාප ගී ඊශ්‍රායෙල් දේශයෙහි චාරිත්‍රයක් ලෙස ගයනු ලබන අතර ඒවා විලාප ගී සමූහයටද ඇතුළත් කර තිබේ.+ 26  යොෂියා රජු කළ අනිකුත් දේවල්ද+ ඔහු යෙහෝවා දෙවිගේ නීතියට පක්ෂපාත වෙමින්+ සිදු කළ සියලුම ප්‍රේමණීය* ක්‍රියාවන්ද+ 27  ඔහුගේ ජීවිතයේ අනිකුත් සිදුවීම්ද+ ඊශ්‍රායෙල්හි සහ යූදාහි රජවරුන්ගේ ඉතිහාසය වාර්තා කර ඇති ලියවිල්ලෙහි සඳහන් කර තිබේ.+

පාදසටහන්

එනම්, ගෘහයේ මළුවට.
හෝ, “ළැදි ප්‍රේමයකින් කළ.”