2 ලේකම් 30:1-27

30  ඊශ්‍රායෙල්හි දෙවි වන යෙහෝවාට ගෞරවය ගෙනෙන පිණිස යෙරුසලමෙහි පිහිටි යෙහෝවා දෙවිගේ ගෘහයේදී+ පවත්වන පාස්කුවට+ සහභාගි වන ලෙස හෙසකියා රජ ඊශ්‍රායෙල් දේශයේ+ හා යූදා දේශයෙහි විසූ සියලුදෙනාට ලිපි යවා දැන්වීය. ඔහු එෆ්‍රායිම්+ හා මනස්සේ+ යන දේශවල සිටි අයටද ඒ ගැන ලියා යැවීය.  රජද ඔහුගේ අධිපතීහුද+ යෙරුසලමෙහි සිටි සියලුදෙනාද+ පාස්කුව දෙවන මාසයේ+ පැවැත්වීමට තීරණය කළෝය.  ඔවුන් එය දෙවන මාසයේ පැවැත්වීමට තීරණය කළේ පාස්කුව පැවැත්වීමට නියමිත පළමු මාසයේදී ඔවුන්ට එය පැවැත්වීමට නොහැකි වූ නිසාය.+ ප්‍රමාණවත් පූජකයන් සංඛ්‍යාවක්+ දෙවි ඉදිරියේ පවිත්‍ර තත්වයක නොසිටීමත් ඒ කාලය වන විට ජනතාව යෙරුසලමට රැස්ව නොසිටීමත් එය එසේ කල් දැමීමට හේතු විය.  රජද මුළු සෙනඟද එම තීරණයට එකඟ වූහ.+  එහෙයින් ඊශ්‍රායෙල්හි දෙවි වන යෙහෝවාට ගෞරවය ගෙනෙන පිණිස යෙරුසලමෙහිදී පාස්කුව පවත්වන බවට ප්‍රකාශයක්+ බෙයර්-ෂෙබා සිට+ දාන් දක්වා+ මුළු ඊශ්‍රායෙල් දේශය පුරාම පතළ කිරීමට ඔවුහු තීරණය කළෝය. ඔවුන් එවැනි තීරණයක් ගත්තේ අණ කර තිබූ ලෙස+ සියලුදෙනාටම එකට රැස් වී පාස්කුව පැවැත්වීමට පසුගිය කාලය පුරාම නොහැකි වූ නිසාය.+  රජුගෙන්ද ඔහුගේ අධිපතීන්ගෙන්ද+ ලද ලියුම් රැගත් පණිවිඩකරුවෝ+ රජුගේ අණ පරිදි මුළු ඊශ්‍රායෙල් හා යූදා දේශය පුරා ගොස් මෙසේ පැවසුවෝය. “ඊශ්‍රායෙල් වැසියෙනි, ඔබේ වැරදි මාර්ග අත්හැර ආබ්‍රහම්ගේද ඊසාක්ගේද ඊශ්‍රායෙල්ගේද දෙවි වන යෙහෝවා වෙතට+ නැවත එන්න.+ එවිට ඇසිරියාවේ රජුගෙන්+ බේරුණු ඔබට දෙවිගේ අනුමැතිය නැවතත් ලැබෙයි.+  යෙහෝවා දෙවිට ද්‍රෝහි වූ ඔබේ මුතුන්මිත්තන් වගේවත්+ ඔබේ සහෝදරයන් වගේවත් හැසිරෙන්න එපා. ඔවුන් එසේ ක්‍රියා කළ නිසා සියලුදෙනා ඉදිරියේ ඔවුන් නින්දාවට පත් වුණා.+ ඒ සියල්ලේ ප්‍රතිඵල දැන් ඔබ ඔබේ ඇස් දෙකෙන්ම දකිනවා නේද?  එමනිසා ඔබේ මුතුන්මිත්තන් වගේ ඔබත් මුරණ්ඩු ලෙස හැසිරෙන්න එපා.*+ යෙහෝවා දෙවිට කීකරු වී+ ඔහුගේ ශුද්ධස්ථානයට පැමිණ+ ඔහුට නමස්කාර කරන්න.+ මන්ද පරිශුද්ධ නමස්කාරය සඳහා එම ස්ථානය වෙන් කළේ යෙහෝවා දෙවි විසින්මයි.+ ඔබ දෙවිට එසේ නමස්කාර කළොත් ඔබට විරුද්ධව ඇවුළුණු ඔහුගේ උදහස නිවී යයි.+  යෙහෝවා දෙවි වෙතට හැරී එන්න.+ එවිට ඔබේ පුත්‍රයන්ව හා සහෝදරයන්ව වහල් කරගත් අයගෙන් ඔවුන්ට දයාව ලැබී+ නැවතත් ඔවුන්ට තම දේශයට පැමිණෙන්න හැකි වෙයි.+ මන්ද ඔබේ දෙවි යෙහෝවා දයාන්විත+ මෙන්ම කරුණාවන්ත+ දෙවි කෙනෙක් නිසා ඔබ ඔහු වෙතට හැරී ආවොත් ඔහු ඔබව කිසි දිනක අත් නොහරියි.”+ 10  මෙසේ පණිවිඩකාරයෝ+ මනස්සේ සහ එෆ්‍රායිම් දේශ+ පුරාත් සෙබ්‍යූලන් දේශය පුරාත් තිබූ සෑම නුවරකටම ගියෝය. නමුත් එහි වැසියෝ ඔවුන්ව සමච්චලයට ලක් කරමින් ඔවුන්ගේ ආරාධනය ප්‍රතික්ෂේප කළෝය.+ 11  නමුත් ආෂෙර්, මනස්සේ සහ සෙබ්‍යූලන් යන ප්‍රදේශවල සිටි යම් පිරිසක්+ ඔවුන්ගේ මුරණ්ඩු ආකල්ප අත්හැර,+ එම ආරාධනය පිළිගෙන යෙරුසලමට පැමිණියෝය. 12  යෙහෝවා දෙවිට කරන නමස්කාරය සම්බන්ධයෙන් රජු හා ඔහුගේ අධිපතීන් දුන්+ ආඥා ඉටු කිරීමට+ යූදා දේශයේ වැසියෝ එක්සත් වී කටයුතු කළෝය.+ මන්ද ඔවුන් සියලුදෙනාටම සැබෑ දෙවිගේ උපකාර ලැබිණ. 13  මෙසේ මුහුන් නොදැමූ රොටි උත්සවය පැවැත්වීමට+ දෙවන මාසයේදී+ ඉතා විශාල සමූහයක් යෙරුසලමෙහි එක් රොක් වූහ.+ 14  ඔවුහු යෙරුසලමෙහි බොරු නමස්කාරය සඳහා පිහිටුවා තිබූ සියලුම පූජාසන+ හා සුවඳ ද්‍රව්‍ය ඔප්පු කිරීම සඳහා පිහිටුවා තිබූ පූජාසන+ ඉවත් කර ඒවා කිද්‍රොන් නිම්නයට වීසි කළෝය.+ 15  ඉන්පසු ඔවුහු දෙවන මාසයේ දාහතරවනදා පාස්කුව සඳහා ඔප්පු කරන සතුන්ව මැරුවෝය.+ සෙනඟ කළ ඒ දේවල් දැක තමන් ගැන ලැජ්ජාවක් ඇති වූ පූජකයෝ සහ ලෙවීවරු පවිත්‍ර වී+ යෙහෝවා දෙවිගේ ගෘහයට දවන පූජා ගෙනාවෝය. 16  සැබෑ දෙවිගේ සේවකයා වූ මෝසෙස්ට දුන් නීතියේ සඳහන් ආකාරයට සේවය කළ ඔවුහු තමන්ට නියම කර තිබූ ස්ථානවල සිටගෙන සිටියෝය.+ ලෙවීවරුන් ගෙනැවිත් දුන් සතුන්ගේ ලේ රැගෙන පූජකයෝ+ එය පූජාසනය මතට ඉසුවෝය. 17  රැස්ව සිටි ජනයා අතරින් බොහෝදෙනෙකු යෙහෝවා දෙවි ඉදිරියේ පවිත්‍ර තත්වයක නොසිටි නිසා ඔවුන් වෙනුවෙන් පාස්කුව සඳහා ඔප්පු කරන සතුන්ව මරන ලද්දේ+ ලෙවීවරුන්+ විසිනි. එමගින් ඔවුහුද පවිත්‍ර තත්වයකට පත් වූහ. 18  එෆ්‍රායිම්,+ මනස්සේ,+ ඉසකාර් සහ සෙබ්‍යූලන්+ යන ප්‍රදේශවලින් පැමිණි බොහෝදෙනෙකුද තවත් විශාල පිරිසක්ද පවිත්‍ර තත්වයක නොසිටියෝය.+ නමුත් ඔවුහු නීතියේ සඳහන් නියමයන් නොසලකා පාස්කුවට ඔප්පු කළ සතාව අනුභව කළෝය.+ එහෙයින් හෙසකියා රජ ඔවුන් වෙනුවෙන් යාච්ඤා කරමින්+ මෙසේ පැවසුවේය. “යහපත් දෙවි වන යෙහෝවා,+ ඔවුන්ට අනුකම්පා කරන්න. 19  ඔවුන් ශුද්ධ වූ දෙයකට සහභාගි වීමට පවිත්‍ර තත්වයක නොසිටි බව ඇත්තයි.+ නමුත් ඔවුන් සියලුදෙනාම තම මුතුන්මිත්තන්ගේ දෙවි වන යෙහෝවා වූ ඔබට ළං වී ඔබේ මඟ පෙන්වීම් පැතීමට මුළු සිතින්ම අධිෂ්ඨාන කරගත්තා.”+ 20  හෙසකියා රජුගේ කන්නලව්වට සවන් දුන් යෙහෝවා දෙවි ජනයාට සමාව දුන්නේය.+ 21  යෙරුසලමෙහි රැස්ව සිටි ඊශ්‍රායෙල්වරු දින සතක් පුරා මුහුන් නොදැමූ රොටි උත්සවය+ මහත් ප්‍රීතියකින්+ යුතුව පැවැත්වූහ. ලෙවීවරු+ හා පූජකයෝ+ සංගීත භාණ්ඩ වාදනය කරමින් යෙහෝවා දෙවිට ප්‍රශංසා කළෝය. ඔවුහු ඒ දවස් සත පුරාම මහත් උද්‍යෝගයෙන් යෙහෝවා දෙවිට ප්‍රශංසා කිරීමෙහි හවුල් වූහ.+ 22  හෙසකියා රජ යෙහෝවා දෙවිට හොඳින් සේවය කළ සියලු ලෙවීවරුන්ව+ අගය කරමින් ඔවුන්ව දිරිගැන්වූයේය.+ ලෙවීවරු සහ මුළු සෙනඟ දින සතක් පුරා උත්සවය පැවැත්වූ අතර ඒ සඳහා පිළියෙල කළ ආහාරද අනුභව කළෝය.+ එමෙන්ම ඔවුහු හවුල් පූජා ඔප්පු කරමින්+ තම මුතුන්මිත්තන්ගේ දෙවි වන යෙහෝවා ඉදිරියේ තමන් කළ වැරදි පිළිගත්තෝය.+ 23  රැස්ව සිටි සියලුදෙනා තවත් දවස් සතක්+ එම උත්සවය පැවැත්වීමට තීරණය කළෝය.+ ඔවුහු එම දවස් සතද ප්‍රීතියෙන් සැමරූහ. 24  යූදාහි රජු වූ හෙසකියා රැස්ව සිටි අය වෙනුවෙන් ගොනුන් දහසක් හා බැටළුවන් හත්දහසක් දුන්නේය.+ ඔහුගේ අධිපතීහුද+ ගොනුන් දහසක් හා බැටළුවන් දසදහසක් සෙනඟ වෙනුවෙන් දුන්නෝය. පූජකයෝ+ විශාල පිරිසක්ද පවිත්‍ර වූහ. 25  පූජකයෝද ලෙවීවරුද+ යූදා දේශයේ වැසියෝද+ ඊශ්‍රායෙල් දේශයෙන් පැමිණි වැසියෝද+ ඊශ්‍රායෙල් දේශයේ+ හා යූදා දේශයේ සිටි විදේශිකයෝද+ ඒ මුළු කාලයම ප්‍රීතියෙන් ගත කළෝය.+ 26  මෙසේ යෙරුසලමෙහි රැස්ව සිටි සියලුදෙනා ප්‍රීතියෙන් ඉපිල ගියෝය. ඊශ්‍රායෙල්හි රජු වූ දාවිත්ගේ පුත් සලමොන්ගේ කාලයෙන් පසු+ යෙරුසලමෙහි මෙතරම් උත්කර්ෂවත් අවස්ථාවක් දක්නට ලැබුණු ප්‍රථම වතාව මෙය විය.+ 27  අවසන් වශයෙන් ලෙවී ගෝත්‍රයට අයත් පූජකයෝ රැස්ව සිටි අයට දෙවිගේ ආශීර්වාද ඉල්ලා යාච්ඤා කළෝය.+ ඔවුන්ගේ යාච්ඤාවට තම ශුද්ධ වාසස්ථානය වන ස්වර්ගයේ සිට+ දෙවි සවන් දුන්නේය.

පාදසටහන්

මූ.අ., “ඔබේ බෙල්ල දැඩි කර නොගන්න.”