2 ලේකම් 20:1-37

20  කල් යත්ම මෝවබ්වරුන්ගෙන්,+ අම්මොන්වරුන්ගෙන්+ සහ අම්මොනිවරුන්ගෙන් සමහරෙක්+ යෙහෝෂපාට් රජුට විරුද්ධව යුද්ධයට පැමිණියෝය.+  සෙනඟ යෙහෝෂපාට් රජු ළඟට පැමිණ මෙසේ පැවසූහ. “රජ්ජුරුවනි, ඔබට විරුද්ධව යුද්ධ කිරීමට මුහුද* අවට ප්‍රදේශයෙන්ද ඒදොම් දේශයෙන්ද+ විශාල සේනාවක් පැමිණ සිටිනවා. ඔවුන් දැන් සිටින්නේ හෂෂොන්-තාමාර් කියා හඳුන්වන ඒන්-ගෙදීවලයි.”+  එය අසා බියට පත් වූ යෙහෝෂපාට් රජ+ මහත් ඕනෑකමින් යුතුව යෙහෝවා දෙවිගේ මඟ පෙන්වීම් පැතුවේය.+ යූදා දේශයේ සියලුදෙනාම නිරාහාරව සිටිය යුතු බවට ප්‍රකාශයක්ද ඔහු නිකුත් කළේය.+  එමෙන්ම ඒ සම්බන්ධයෙන් යෙහෝවා දෙවිගේ කැමැත්ත කුමක්ද කියා විමසා දැනගැනීම සඳහා යූදාහි වැසියෝ එකට රැස් වූහ.+ එසේ යූදාහි සියලුම නුවරවලින් සෙනඟ පැමිණියේ යෙහෝවා දෙවිගේ මඟ පෙන්වීම් ලබාගැනීමට ඔවුන් තුළ තිබූ මහත් ඕනෑකම නිසාය.+  මෙසේ යෙහෝෂපාට් රජද යූදා හා යෙරුසලමෙහි වැසියෝද යෙහෝවා දෙවිගේ ගෘහයේ+ අලුතෙන් ගොඩනැඟූ මළුවෙහි+ රැස් වූවෝය. රජ ඔවුන් මැද සිටගෙන  මෙසේ පැවසීය.+ “ස්වර්ගයේ වාසය කරන යෙහෝවා දෙවියනි,+ අපේ මුතුන්මිත්තන්ගේ දෙවි ඔබයි.+ සියලු රාජ්‍යයන්ට වඩා උසස්ව සිටින්නෙත් ඔබයි.+ සියලු බලැති දෙවි වන ඔබට විරුද්ධව නැඟී සිටින්න කාට පුළුවන්ද?+  අපේ දෙවියනි,+ ඔබ ඔබේ සෙනඟ වන ඊශ්‍රායෙල්වරුන් වෙනුවෙන් මේ දේශයේ කලින් ජීවත් වූ අයව පන්නා දැමුවා.+ ඉන්පසු ඔබට බොහෝ සෙයින් ආදරය කළ ආබ්‍රහම්ටත්+ ඔහුගෙන් පැවතෙන්නන්ටත් ඔබ මේ දේශය සදහටම ලබා දුන්නා.+  එහි පදිංචි වූ ඔවුන් ඔබේ නාමය ගෞරවයට පත් කිරීම සඳහා ශුද්ධස්ථානයක් ගොඩනඟා+ මෙසේ පැවසුවා.  ‘අප යම් විපතකට මුහුණ දුන් විට+ හෝ අපට විරුද්ධව කඩුවක් ඔසවනු ලැබූ විට හෝ අපට ඔබෙන් බරපතළ දඬුවමක් ලැබුණු විට එසේත් නැත්නම් අප සාගතයකින්+ හෝ වසංගතයකින්+ පීඩා විඳින විට අපි ඔබ ඉදිරියට එනම්, ඔබේ නාමය දරන+ මේ ගෘහයට ඇවිත්+ ඔබේ උපකාරය පතා ඔබට කන්නලව් කරන්නම්. එවිට අපේ කන්නලව්වට සවන් දී අපව ගලවාගන්න කියා අපි ඔබෙන් අයැද සිටිනවා.’+ 10  දෙවියනි, දැන් අපට සිදු වී තිබෙන දේ බලන්න! අම්මොන්වරුන්,+ මෝවබ්වරුන්+ සහ සේයිර් කඳුකරයේ වැසියන්+ අපට විරුද්ධව යුද්ධ කරන්න ඇවිත් සිටිනවා. අපේ මුතුන්මිත්තන් ඊජිප්තුවෙන් පිට වී පැමිණි කාලයේදී ඒ ජාතීන්ව ආක්‍රමණය කිරීමට ඔබ ඔවුන්ට ඉඩ දුන්නේ නැහැ. ඒ නිසා අපේ මුතුන්මිත්තන් ඔවුන්ව විනාශ නොකර ඔවුන්ගේ දේශයෙන් ඉවත්ව ගියා.+ 11  නමුත් දැන් ඔවුන් අපට කරන්න යන දේ බලන්න!+ ඔවුන් උත්සාහ කරන්නේ අපට විරුද්ධව යුද්ධ කර ඔබ අපට උරුමයක් ලෙස ලබා දුන් මේ දේශයෙන් අපව පන්නා දමන්නයි.+ 12  අපේ දෙවියනි, ඔබ අප වෙනුවෙන් යුක්තිය ඉටු කරන්නේ නැද්ද?+ අපට විරුද්ධව පැමිණෙන මෙම විශාල සමූහයට එරෙහිව සිටින්න අපිට කිසිම ශක්තියක් නැහැ.+ කළ යුත්තේ කුමක්ද කියාවත් අප දන්නේ නැහැ.+ ඒ නිසා අප උපකාර පතා බලා සිටින්නේ ඔබ දෙසයි.”+ 13  රජු ඒ සියලු දේ පවසද්දී යූදාහි සියලුම වැසියෝ ඔවුන්ගේ භාර්යාවන්, දරුදැරියන් හා ළදරුවන්+ සමඟ යෙහෝවා දෙවි ඉදිරියෙහි සිටගෙන සිටියෝය.+ 14  මෙම සමූහය අතරේ ආසාෆ්ගේ පුත්‍රයන්ගෙන් පැවත ආ+ ලෙවීවරයෙකු වූ යහෂියෙල්ද සිටියේය. ඔහු සෙකරියාගේ පුත්‍රයාය. සෙකරියා බෙනායාගේ පුත්‍රයාය. බෙනායා යෙයීයෙල්ගේ පුත්‍රයාය. යෙයීයෙල් මත්තනියාගේ පුත්‍රයාය. ඒ අවස්ථාවේදී යහෂියෙල් තුළ යෙහෝවා දෙවිගේ බලය+ ක්‍රියාත්මක වී 15  ඔහු මෙසේ පැවසුවේය. “යෙහෝෂපාට් රජ්ජුරුවනි, යූදා හා යෙරුසලමෙහි සියලු වැසියෙනි, මට සවන් දෙන්න! යෙහෝවා දෙවි ඔබට මේ දේ දන්වන්න කියා මට පැවසුවා. ‘මේ විශාල සමූහයට භය වෙන්න කිසිම හේතුවක් නැහැ.+ මන්ද මේ සටන ඔබේ සටනක් නොවෙයි. එය දෙවිගේ සටනක්.+ 16  හෙට ඔවුන්ට විරුද්ධව සටනට යන්න. ඔවුන් එන්නේ ෂීෂ් නම් දුර්ගය ඔස්සේයි. ඔබට ඔවුන්ව නිම්නය කෙළවරේ ඇති යෙරූයෙල් නම් පාළුකරය ඉදිරියේදී අනිවාර්යයෙන්ම මුණගැසෙයි. 17  නමුත් එහිදී ඔබට සටන් කරන්න අවශ්‍ය වෙන්නේ නැහැ.+ ඔවුන් ඉදිරියට ගොස් නිශ්චලව බලා සිටින්න.+ එවිට යෙහෝවා දෙවි ඔබව ගලවන ආකාරය ඔබේ ඇස් දෙකෙන්ම දැකගැනීමට ඔබට හැකි වෙයි.+ යූදා හා යෙරුසලමෙහි වැසියෙනි, කිසි දෙයකට භය වෙන්න එපා.+ හෙට ඔවුන්ට විරුද්ධව සටනට යන්න. යෙහෝවා දෙවි ඔබ සමඟයි.’”+ 18  ඒ මොහොතේදීම යෙහෝෂපාට් රජ නැමී හිස පහත් කළේය.+ යූදා හා යෙරුසලමෙහි සියලුම වැසියෝද යෙහෝවා දෙවිට නමස්කාර කරන පිණිස යෙහෝවා දෙවි ඉදිරියේ වැඳ වැටුණෝය.+ 19  ඉන්පසු කෝහාත්ගෙන් පැවත ආ+ ලෙවීවරු+ සහ කෝරාගෙන් පැවත ආ+ ලෙවීවරු නැඟිට, ඊශ්‍රායෙල්හි දෙවි වන යෙහෝවාට මහත් හඬකින් ප්‍රශංසා කළෝය.+ 20  සෙනඟ හිමිදිරි උදෑසන නැඟිට තෙකෝවා නම් පාළුකරයට+ ගියෝය.+ ඔවුන් පිටත්ව යෑමට පෙර යෙහෝෂපාට් රජ ඔවුන්ට මෙසේ පැවසුවේය. “යූදා හා යෙරුසලමෙහි වැසියෙනි! මට සවන් දෙන්න!+ ඔබේ දෙවි වන යෙහෝවා කෙරෙහි විශ්වාසය තබන්න.+ එවිට කිසි දෙයකට නොසැලී, දිගටම ස්ථිරව සිටින්න ඔබට හැකි වෙයි. දෙවිගේ අනාගතවක්තෘවරුන් පැවසූ දේ විශ්වාස කර+ ජය අත් කරගන්න.” 21  ඔහු සෙනඟගෙන් අදහස් විමසූ පසු+ යෙහෝවා දෙවිට ප්‍රශංසා ගී ගැයීම සඳහා ගායක කණ්ඩායමක්+ සූදානම් කළේය. එසේම ඔහු දෙවිට ප්‍රශංසා කිරීම සඳහා+ තවත් කණ්ඩායමක් සූදානම් කර ඔවුන්ට විශේෂ වස්ත්‍ර+ පැළඳුවේය. ඔහු එම කණ්ඩායම් දෙකම හමුදාවට ඉදිරියෙන් යැවීය.+ ඔවුහු එසේ හමුදාවට ඉදිරියෙන් ගමන් කරමින්, “යෙහෝවා දෙවිට ප්‍රශංසා කරන්න.+ මන්ද ඔහුගේ මහත් ප්‍රේමය* සදහටම පවතින්නේය”+ කියා පැවසුවෝය. 22  ඔවුන් ප්‍රශංසා ගී ගයමින්, ප්‍රීති ඝෝෂා නඟමින් ගමන් ඇරඹූ අවස්ථාවේදී යූදා දේශයට ඇතුල් වෙමින් සිටි අම්මොන්වරුන්, මෝවබ්වරුන් හා සේයිර් කඳුකරයේ වැසියන් එන තෙක් මඟ රැක සිටීමට යෙහෝවා දෙවි පුරුෂයන් පිරිසක් යැවීය.+ මඟ රැක සිටි ඔවුන්ව දුටු සතුරෝ කලබල වී තමන්ගේම අයට පහර දුන්නෝය.+ 23  අම්මොන්වරු සහ මෝවබ්වරු එකට එකතු වී තමන් සමඟ සේයිර් කඳුකරයෙන් පැමිණි අයට පහර දී+ ඔවුන්ව සහමුලින්ම නැති කර දැමුවෝය. මෙසේ සේයිර් වැසියන්ව ඝාතනය කළායින් පසු අම්මොන්වරු සහ මෝවබ්වරු එකිනෙකාට පහර දෙමින් තමන්ගේම සෙබළුන්ව මරා දැමූහ.+ 24  යූදාහි සේනාව පාළුකරයේ ඉදි කර තිබූ මුරටැඹ අසලට පැමිණ+ තමන්ට විරුද්ධව පැමිණි සේනාව දෙස බැලූ විට ඔවුන්ගේ මළ කඳන් භූමිය පුරා වැටී තිබෙනවා දුටුවෝය.+ ඒ අයගෙන් කිසිවෙක් ජීවතුන් අතර සිටියේ නැත. 25  යෙහෝෂපාට් රජ සහ ඔහුගේ සෙනඟ මිය ගිය අය සතු දේවල් රැගෙන යෑමට පැමිණි විට+ ඔවුන් සතුව බොහෝ වටිනා දේවල්ද වස්ත්‍රද භාණ්ඩද තිබුණු බව දුටුවෝය. ඒවා ඔවුන්ට ගෙන යෑමට නොහැකි තරම් විශාල ප්‍රමාණයකි.+ එය කොතරම්ද කිවහොත් ඒවා එකතු කරගැනීමට ඔවුන්ට දවස් තුනක් ගත විය. 26  හතරවන දවසේදී ඔවුහු තැනිතලාවක රැස් වී යෙහෝවා දෙවිට ප්‍රශංසා කළෝය.+ එදින ඔවුහු එම ස්ථානයට බෙරාකා තැනිතලාව යන නම තැබූහ.+ අද දක්වාම එම ස්ථානය ඒ නමින් හඳුන්වනු ලැබේ. 27  යූදා සහ යෙරුසලමෙහි සියලු වැසියෝද ඔවුන්ට ඉදිරියෙන් ගිය යෙහෝෂපාට් රජද මහත් ප්‍රීතියකින් නැවත යෙරුසලමට පැමිණියෝය. ඔවුන් එසේ ප්‍රීති වූයේ තම සතුරන්ව පරදවා යෙහෝවා දෙවි ඔවුන්ට ජය ලබා දුන් නිසාය.+ 28  වීණා+ හා කුඩා වීණා+ වාදනය කරමින්ද හොරණෑ පිඹිමින්ද+ යෙරුසලමට පැමිණි ඔවුහු යෙහෝවා දෙවිගේ ගෘහයට ගියෝය.+ 29  යෙහෝවා දෙවි ඊශ්‍රායෙල්වරුන්ගේ සතුරන්ට විරුද්ධව සටන් කළ බව අවට පිහිටි රාජ්‍යයන් දැනගත් විට+ ඔවුන් තුළ දෙවි ගැන මහත් බියක් ඇති විය.+ 30  මෙසේ යෙහෝෂපාට් රජුගේ රාජ්‍යය පුරා සාමකාමී වාතාවරණයක් පැවතිණ. ඔහුගේ දෙවි දේශය පුරාම සාමය උදා කර දුන්නේය.+ 31  යෙහෝෂපාට් රජ+ යූදා දේශයෙහි රජකම් කළේය. ඔහු රජකමට පත් වන විට ඔහුගේ වයස අවුරුදු තිස්පහකි. ඔහු යෙරුසලමේ අවුරුදු විසිපහක් රජකම් කළේය. ඔහුගේ මව ෂිල්හීගේ දියණිය වූ අෂූබාය.+ 32  ඔහු තම පියා වූ ආසාගේ අඩිපාරේ ගමන් කරමින්+ යෙහෝවා දෙවි යහපත්යයි සලකන දේ දිගටම කළේය.+ 33  නමුත් බොරු නමස්කාරය සඳහා වෙන් කර තිබූ පූජනීය ස්ථාන+ සමහරක් දේශයේ තිබුණේය. සෙනඟද තම මුතුන්මිත්තන්ගේ දෙවිට ළං වී ඔහුගේ මඟ පෙන්වීම් පැතීමට මුළු සිතින්ම අදිටන් කරගෙන සිටියේ නැත.+ 34  යෙහෝෂපාට් රජුගේ ජීවිතයේ අනිකුත් තොරතුරු හනානිගේ+ පුත් යේහු පැවසූ දේවල් සඳහන් ලේඛනයෙහි වාර්තා කර ඇත.+ එම තොරතුරු ඊශ්‍රායෙල්හි රජවරුන්ගේ ඉතිහාසය වාර්තා කර ඇති ලියවිල්ලෙහිද සඳහන් කර තිබේ.+ 35  ඉන්පසු යූදාහි රජු වූ යෙහෝෂපාට් දුෂ්ට ලෙස ක්‍රියා කළ+ ඊශ්‍රායෙල්හි රජු වූ අහසියා සමඟ මිත්‍රත්වයක් ඇති කරගත්තේය.+ 36  ඔහු තර්ෂිෂ් බලා නැව් යාත්‍රා කරවීමේ අරමුණින් අහසියා සමඟ එකතු වී නැව් සෑදීමට පටන්ගත්තේය.+ ඔවුන් එම නැව් තැනුවේ එෂියොන්-ගෙබෙර් නම් ස්ථානයෙහිය.+ 37  නමුත් මරේෂා නම් නුවරේ වැසියෙකු වූ දෝදාවාහුගේ පුත් එලියේසර්, යෙහෝෂපාට් රජුට අනතුරු අඟවමින් මෙම අනාවැකිය පළ කළේය. “ඔබ අහසියා සමඟ මිත්‍රකමක් ඇති කරගෙන තිබෙන නිසා+ යෙහෝවා දෙවි ඔබේ සියලුම සැලසුම් අසාර්ථක කරන්නේය.”+ එලියේසර් පැවසූ ලෙස ඒ නැව් සියල්ල මුහුදුබත් විය.+ එමනිසා තර්ෂිෂ් බලා නැව් යැවීමට දැරූ උත්සාහය ඔවුහු අත්හැරියෝය.+

පාදසටහන්

එනම්, මළ මුහුද.
හෝ, “ළැදි ප්‍රේමය.”