2 රාජාවලිය 17:1-41

17  යූදාහි රජු වූ ආහස්ගේ පාලන සමයේ දොළොස්වන අවුරුද්දේදී ඒලාගේ පුත් හෝෂෙයා+ ඊශ්‍රායෙල්හි රජකමට පත් විය. ඔහු සමාරියේ සිට+ අවුරුදු නවයක් පාලනය කළේය.  ඔහු යෙහෝවා දෙවි පිළිකුල් කළ දේවල් කළත් ඔහුට කලින් ඊශ්‍රායෙල්හි පාලනය කළ රජවරුන් මෙන් ඔහු කටයුතු නොකළේය.+  ඇසිරියාවේ රජ+ වන ෂල්මනෙසෙර්+ ඊශ්‍රායෙල්වරුන්ට විරුද්ධව යුද්ධ කිරීමට පැමිණියේ ඔහුගේ පාලන සමයේදීය. හෝෂෙයා රජ ඔහුට යටත් වී කප්පම් ගෙවීමට පොරොන්දු විය.+  නමුත් ටික කලකට පසු හෝෂෙයා රජ ඇසිරියාවේ රජුට අවුරුද්දක් අවුරුද්දක් පාසා ගෙවූ කප්පම් නතර කළේය. ඔහු ඊජිප්තුවේ රජු වන සෝ වෙතට තම දූත පිරිසක්ද යැවීය.+ හෝෂෙයා රජු තමන්ට ද්‍රෝහි වූ බව+ දැනගත් විට ඇසිරියාවේ රජ හෝෂෙයා රජුව සිර අඩස්සියේ තැබුවේය.+  පසුව ඇසිරියාවේ රජ ඊශ්‍රායෙල් දේශයේ සියලුම පළාත් ආක්‍රමණය කළේය. ඔහු සමාරියටත් පැමිණ අවුරුදු තුනක් පුරා එය වටලාගෙන සිටියේය.+  හෝෂෙයා රජුගේ පාලන සමයේ නවවන අවුරුද්දේදී ඇසිරියාවේ රජ සමාරිය යටත් කරගත්තේය.+ ඉන්පසු ඊශ්‍රායෙල්වරුන්ව ඇසිරියාවට රැගෙන ගියේය.+ ඔහු ඔවුන්ව හලා නම් ස්ථානයේද+ ගෝසාන් ගඟ+ අසල පිහිටි හාබොර් නම් ස්ථානයේද මේදියවරුන්ට අයත් නුවරවලද+ පදිංචි කරවීය.  මේ සියල්ල සිදු වූයේ ඔවුන් ඊජිප්තුවේ රජු වූ පාරාවෝගේ අතින් තමන්ව නිදහස් කර, එම දේශයෙන් පිටතට ගෙනා තමන්ගේ දෙවි වූ යෙහෝවාට+ විරුද්ධව පව් කර,+ වෙනත් දෙවිවරුන්ට නමස්කාර කිරීමට පටන්ගත් නිසාය.+  ඊශ්‍රායෙල්වරු, යෙහෝවා දෙවි විසින් පන්නා දැමූ ජාතීන් අනුගමනය කළ චාරිත්‍ර අනුවද+ තමන් විසින්ම පත් කරගත් රජවරුන් පැනවූ නියෝග අනුවද ක්‍රියා කළෝය.  මෙසේ ඊශ්‍රායෙල්වරු තම දෙවි වන යෙහෝවා අනුමත නොකළ ක්‍රියාවල නිරත වූවෝය.+ ඔවුන්ගේ සියලු නුවරවල ඔවුහු පූජනීය ස්ථාන සෑදුවෝය.+ විශාල ජනාවාස නුවරවල පමණක් නොව ඈත එපිට පිහිටි කුඩා මුරකොටුවල පවා+ එම පූජනීය ස්ථාන දක්නට තිබිණ. 10  ඔවුහු සෑම කඳු මුදුනකම+ සහ සරුසාරව වැඩුණු සෑම ගසක් යටම+ නමස්කාරය සඳහා කණුද+ කුලුනුද+ සෑදුවෝය. 11  ඔවුන්ගේම යහපත තකා යෙහෝවා දෙවි පන්නා දැමූ ජාතීන් කළ ලෙසම ඔවුහුද ඒ සියලු පූජනීය ස්ථාන මත සුවඳ දුම් ඔප්පු කළෝය.+ මෙසේ ඔවුහු යෙහෝවා දෙවිව උදහස් කරවන දුෂ්ට දේවල් දිගටම කළෝය.+ 12  “රූපවලට නමස්කාර නොකළ යුතුයි”+ කියා යෙහෝවා දෙවි පවසා තිබුණද ඔවුහු පිළිකුල් රූපවලට*+ දිගටම නමස්කාර කළෝය. 13  එමෙන්ම යෙහෝවා දෙවි තම සියලු අනාගතවක්තෘවරුන් මාර්ගයෙන්ද+ දර්ශන මගින් පණිවිඩ දුන් සියල්ලන් මාර්ගයෙන්ද+ ඊශ්‍රායෙල්හි+ සහ යූදාහි+ වැසියන්ට නැවත නැවත මෙසේ අනතුරු ඇඟෙව්වේය.+ “ඔබ කරන මේ දුෂ්ටකම් නතර කර,+ මාගේ ආඥා+ සහ නියෝග+ පිළිපදින්න. ඔබේ මුතුන්මිත්තන්ට දුන්+ සියලු නීති+ රක්ෂා කරන්න. මාගේ සේවකයන් සහ අනාගතවක්තෘවරුන් මාර්ගයෙන් මා ඔබට දුන් සෑම අවවාදයක්ම පිළිගන්න.”+ 14  නමුත් ඔවුහු ඊට සවන් දුන්නේ නැත. තමන්ගේ දෙවි වන යෙහෝවා කෙරෙහි විශ්වාසය නොතැබූ ඔවුන්ගේ මුතුන්මිත්තන් මෙන්+ ඔවුහුද මුරණ්ඩු ලෙස ක්‍රියා කළෝය.+ 15  දෙවි ඔවුන්ගේ මුතුන්මිත්තන්ට දුන් නියෝග, අනතුරු ඇඟවීම් හා සිහිගැන්වීම්+ ඔවුහු අමතක කළෝය. මුතුන්මිත්තන් සමඟ දෙවි ඇති කරගත් ගිවිසුමද අමතක කර+ දිගටම දෙවිට විරුද්ධව ක්‍රියා කළෝය. තමන් අවට සිටින ජාතීන් මෙන් නොහැසිරෙන ලෙස යෙහෝවා දෙවි ඔවුන්ට අණ කර තිබුණත්+ ඔවුහු ඒ ජාතීන් මෙන් කිසි වැඩකට නැති දේවතා රූපවලට නමස්කාර කළෝය.+ මෙසේ ඔවුහුද කිසි වැඩකට නැති ජාතියක් බවට පත් වූහ.+ 16  ඔවුහු තම දෙවි වන යෙහෝවා දුන් සෑම ආඥාවක්ම කඩ කර,+ වසු රූප දෙකක්ද+ නමස්කාරය සඳහා කුලුනක්ද+ සාදාගත්තෝය. තවද ඔවුහු ආකාශයේ වස්තූන් ඉදිරියේ+ මෙන්ම බාල් දෙවියන් ඉදිරියේ+ වැඳ වැටීමටද පටන්ගත්තෝය. 17  එපමණක්ද නොව ඔවුහු තම දූපුතුන්ව ගින්නෙන් දවා පූජා ලෙස ඔප්පු කළෝය.+ මන්තර ගුරුකම් කිරීමටද+ නැකත් බැලීමටද+ ඔවුහු පෙලඹුණෝය. ඔවුහු හිතාමතාම යෙහෝවා දෙවි පිළිකුල් කළ දේ කරමින්+ ඔහුව උදහස් කළෝය.+ 18  එබැවින් යෙහෝවා දෙවි ඊශ්‍රායෙල්වරුන් සමඟ බොහෝ සෙයින් උදහස් වී+ තම අනුමැතිය ඔවුන්ගෙන් ඉවත් කළේය. ඔහු ඔවුන්ව දේශයෙන් පන්නා දැමුවේය.+ යූදා ගෝත්‍රය හැර වෙන කිසි ගෝත්‍රයක් දේශයේ ඉතුරු වීමට ඉඩහැරියේ නැත.+ 19  නමුත් යූදා ගෝත්‍රයද තම දෙවි වන යෙහෝවාගේ ආඥාවලට කීකරු වූයේ නැත.+ ඔවුහු ඊශ්‍රායෙල්වරුන් සාදාගත් චාරිත්‍ර අනුව ක්‍රියා කළෝය.+ 20  එබැවින් යෙහෝවා දෙවි මුළු ඊශ්‍රායෙල් ජාතියම ප්‍රතික්ෂේප කළේය.+ දෙවි ඔවුන්ට පීඩා පමුණුවා ඔවුන්ව නැති නාස්ති කර දැමීමට ඔවුන්ගේ සතුරන්ට ඉඩ දුන්නේය. මෙසේ දෙවි තම අනුමැතිය ඔවුන්ගෙන් ඉවත් කළේය.+ 21  දෙවි ඊශ්‍රායෙල්වරුන්ව, දාවිත්ගේ පෙළපතෙන් වෙන් කළ විට ඔවුහු නෙබාත්ගේ පුත් යෙරොබොවම්ව තමන්ගේ රජු හැටියට පත් කරගත්තෝය. යෙරොබොවම් රජ,+ ඊශ්‍රායෙල්වරුන්ව බරපතළ පාපයක් කිරීමට පෙලඹවූ+ නිසා ඔවුහු යෙහෝවා දෙවිව අත්හැරියෝය. 22  ඊශ්‍රායෙල්වරු යෙරොබොවම් රජු කළ පාපවලින් වැළකී සිටිනවා වෙනුවට ඔහු කළ සියලු පාපවල දිගටම නියැලී සිටියෝය.+ 23  අවසානයේදී යෙහෝවා දෙවි, තම සේවකයන් වූ සියලු අනාගතවක්තෘවරුන් මාර්ගයෙන් පවසා තිබූ පරිදි+ තම අනුමැතිය ඊශ්‍රායෙල්වරුන් වෙතින් ඉවත් කර ඔවුන්ව දේශයෙන් පන්නා දැමුවේය.+ එබැවින් ඊශ්‍රායෙල්වරුන්ව වහලුන් ලෙස ඇසිරියාවට ගෙන යන ලදි. ඔවුහු අද දක්වාම එහි සිටිති.+ 24  ඇසිරියාවේ රජ බැබිලෝනිය,+ කූතා, අව්වා,+ හමාත්+ සහ සෙෆාවායිම්+ යන ස්ථානවල විසූ ජනයාව ගෙනැවිත්, ඊශ්‍රායෙල්වරුන් කලින් පදිංචිව සිටි සමාරියේ නගරවල+ පදිංචි කරවීය. ඔවුහු සමාරිය අයිති කරගෙන එහි නගරවල ජීවත් වූහ. 25  ඔවුහු එහි වාසය කිරීමට පටන්ගත් මුල් කාලයේදී යෙහෝවා දෙවිට ගරුබිය පෙන්වූයේ නැත.+ එබැවින් යෙහෝවා දෙවි ඔවුන් වෙතට සිංහයන් එව්වේය.+ ඒ සිංහයෝ ඔවුන්ගෙන් සමහරෙකුව මරා දැමුවෝය. 26  එබැවින් ඔවුහු ඇසිරියාවේ රජුට පණිවිඩ යවා මෙසේ කීවෝය. “රජතුමනි, ඔබ සමාරියේ නගරවල පදිංචි කළ ජාතීන් සමාරියේ දෙවිව හඳුනන්නේ නැති නිසා ඒ දෙවි ඔවුන් වෙතට සිංහයන් එව්වා.+ ඒ සිංහයන් ඔවුන්ගෙන් සමහරෙකුව මරා දැමුවා. ඔවුන්ට එවැන්නක් සිදු වී තිබෙන්නේ ඔවුන් ඒ දේශයේ දෙවිට නමස්කාර කළ යුත්තේ කෙසේද කියා නොදන්නා නිසයි.” 27  එවිට ඇසිරියාවේ රජ මෙසේ අණ කළේය. “වහල්කමට මෙහි ගෙනා පූජකයෙකුව+ ආපසු ඒ දේශයට ගෙන ගොස් එහි සිටින වැසියන්ට ඒ දේශයේ දෙවිට නමස්කාර කළ යුත්තේ කෙසේද කියා ඉගැන්වීමට ඔහුට අණ කරන්න.” 28  එබැවින් සමාරියෙන් ගෙන ගිය පූජකයන්ගෙන් එක් කෙනෙක් නැවත බෙතෙල් නගරයට+ පැමිණ, එහි සිටි මනුෂ්‍යයන්ට යෙහෝවා දෙවි කෙරෙහි ගරුබිය ඇතුව ජීවත් වීමට ඉගැන්වූවේය.+ 29  එහෙත් ඒ දේශයේ පදිංචිව සිටි ජාතීන් නමස්කාර කළේ තම තමන්ගේ දෙවිවරුන්ටය.+ ඔවුහු තමන් නමස්කාර කළ දෙවිවරුන්ගේ රූප සාදා, කලින් සමාරියේ සිටි ජනයා සෑදූ පූජනීය ස්ථානවල ඒ රූප තැබුවෝය. මෙසේ ඒ දේශයේ වාසය කළ එක් එක් ජාතිය තම තමන් විසූ නුවරවල තැබීමට දේවතා රූප සාදාගත්තෝය. 30  බැබිලෝනියෙන් පැමිණි අය සුක්කොත්-බෙනොත් දෙවියන්ගේද කුත් සිට පැමිණි අය+ නේර්ගල් දෙවියන්ගේද හමාත් සිට පැමිණි අය අෂීමා දෙවියන්ගේද රූප සෑදුවෝය. 31  අව්වා නගරයෙන් පැමිණි අය+ නිබ්හස් සහ තර්තාක් යන දෙවිවරුන්ගේ රූපද සෑදුවෝය. සෙෆාවායිම් නගරයෙන් පැමිණි අය+ සෙෆාවායිම්වරුන්ගේ දෙවිවරුන් වන අද්‍රම්මෙලෙක් සහ අනම්මෙලෙක්ට තමන්ගේ පුත්‍රයන්ව පූජාවක් ලෙස ගින්නෙන් දවා ඔප්පු කළෝය.+ 32  ඔවුන්ට යෙහෝවා දෙවි කෙරෙහිත් බියක් තිබිණ. පූජනීය ස්ථානවල සේවය කිරීමට සාමාන්‍ය ජනයා අතරින්ම ඔවුහු පූජකයන්ව පත් කරගත්තෝය.+ 33  ඔවුන්ට යෙහෝවා දෙවි කෙරෙහි බියක් තිබුණද+ ඔවුහු තමන්ගේම දෙවිවරුන්ට නමස්කාර කිරීම නතර කළේ නැත.+ ඔවුහු තමන් කලින් පදිංචිව සිටි දේශයන්වල තිබූ ආගම් ඇදහුවෝය.+ 34  යෙහෝවා දෙවි යාකොබ්ට ඊශ්‍රායෙල් යන අලුත් නාමය+ දී ඔහුගේ පුත්‍රයන්ට+ තම ආඥා, තීන්දු+ හා නියෝග+ දී තිබිණ. එහෙත් යෙහෝවා දෙවි දුන් එම නීතිවලට+ අනුව ජීවත් වූ එක වැසියෙකුවත් දේශයේ සොයාගැනීමට නොහැකි විය. දෙවි කෙරෙහි ගරුබිය දැක්වූ කිසිවෙක් නොසිටියේය.+ ඔවුහු සියලුදෙනා මේ දක්වාම තමන් කලින් නමස්කාර කළ දෙවිවරුන්ට නමස්කාර කරමින් සිටින්නෝය.+ 35  යෙහෝවා දෙවි ඊශ්‍රායෙල්වරුන් සමඟ ගිවිසුමක් ඇති කරගත්+ අවස්ථාවේ මෙසේ අණ කර තිබුණේය. “ඔබ වෙනත් දෙවිවරුන්ට සේවය නොකළ යුතුයි.+ ඔවුන් ඉදිරියේ වැඳ වැටී ඔවුන්ට නමස්කාර කරන්නවත් පුදපූජා ඔප්පු කරන්නවත් එපා.+ 36  මම මාගේ මහත් බලය විදහාපෙන්වා ඊජිප්තු දේශයෙන් ඔබව නිදහස් කළෙමි.+ එබැවින් ඔබ නමස්කාර කළ යුත්තේ යෙහෝවා දෙවි වන මට පමණි.+ ඔබ වැඳ වැටිය යුත්තේ මා ඉදිරියේ පමණි.+ පූජා ඔප්පු කළ යුත්තේද මට පමණි.+ 37  මා ඔබට ලියා දුන්+ මාගේ නියෝග+ හා තීන්දුද+ මාගේ ආඥා හා නීතිද සැමදා පිළිපදින්න.+ කිසිවිටෙකත් වෙනත් දෙවිවරුන්ට නමස්කාර නොකරන්න. 38  මා ඔබ සමඟ ඇති කරගත් ගිවිසුම අමතක නොකරන්න.+ වෙනත් දෙවිවරුන්ට නමස්කාර නොකරන්න.+ 39  ඔබ නමස්කාර කළ යුත්තේ ඔබේ දෙවි වන යෙහෝවාට පමණයි.+ මන්ද ඔබේ සියලු සතුරන් අතින් ඔබව ගලවාගන්නේ මමය.”+ 40  නමුත් ඔවුහු දෙවිට කීකරු නොවී කලින් ඇදහූ ආගම්වල වත්පිළිවෙත්වලට අනුව ජීවත් වූහ.+ 41  එම ජාතීන්ට යෙහෝවා දෙවි කෙරෙහි බියක් තිබුණද+ ඔවුන් නමස්කාර කළේ තමන් සාදාගත් දේවතා රූපවලටය. ඔවුන්ගේ දරුවෝද මුනුපුරෝද එලෙසම ක්‍රියා කළෝය. අද දක්වාම ඔවුහු තම මුතුන්මිත්තන් හා සමානව ක්‍රියා කරති.

පාදසටහන්

1රාජා 15:12හි පාදසටහන බලන්න.