2 රාජාවලිය 16:1-20

16  රෙමලියාගේ පුත් පේකාගේ පාලන සමයේ දහහත්වන අවුරුද්දේදී යූදාහි රජු වූ යෝතම්ගේ පුත් ආහස්+ රජකමට පත් විය.  ආහස් රජකමට පත් වන විට ඔහුගේ වයස අවුරුදු විස්සකි. ඔහු යෙරුසලමේ සිට අවුරුදු දහසයක් පාලනය කළේය. නමුත් ඔහු යෙහෝවා දෙවි යහපත්යයි සලකන දේ කළ ඔහුගේ මුතුන්මිත්තා වූ දාවිත් මෙන් ක්‍රියා කළේ නැත.+  ඔහු ක්‍රියා කළේ ඊශ්‍රායෙල්හි අනිකුත් රජවරුන් ක්‍රියා කළ ආකාරයටමය.+ යෙහෝවා දෙවි ඊශ්‍රායෙල්වරුන් අතරින් පන්නා දැමූ ජාතීන් කළ පිළිකුල්සහගත ක්‍රියාවලද+ ඔහු නිරත වූයේය. ඔහු තමාගේම පුත්‍රයාව පවා පූජාවක් ලෙස ගින්නෙන් දවා ඔප්පු කළේය.*+  ඔහු පූජනීය ස්ථාන හා කඳු මුදුන් මතද+ සරුසාරව වැඩුණු සෑම ගසක් යටද+ පූජා හා සුවඳ දුම් ඔප්පු කළේය.+  ඒ කාලයේදී සිරියාවේ රජු වූ රෙෂින්ද+ ඊශ්‍රායෙල්හි රජු වූ රෙමලියාගේ පුත් පේකාද+ යුද්ධ කිරීම සඳහා යෙරුසලමට පැමිණ ආහස් සිටි ප්‍රදේශය වැටලූ නමුත් ඔවුන්ට ආහස්ව පරාජය කිරීමට හැකි වූයේ නැත.+  පසුව සිරියාවේ රජු වූ රෙෂින්, ඒලත් නගරය+ නැවත ඒදොම් දේශයේ පාලනය යටතට ගෙන, එහි සිටි යුදෙව්වන්ව පන්නා දැමුවේය. ඉන්පසු ඒදොම්වරු ඒ නගරයේ පදිංචි වූහ. ඔවුහු අද වන තුරුම එහි ජීවත් වන්නෝය.  එවිට ආහස් රජ ඇසිරියාවේ රජු වන තිග්ලත්-පිලෙසෙර්+ වෙතට පණිවිඩකරුවන් යවා මෙසේ කීවේය. “මම ඔබේ සේවකයාය.+ ඔබේ පුත්‍රයාය. ඒ නිසා මට විරුද්ධව සටනට එන සිරියාවේ රජුගෙන් හා ඊශ්‍රායෙල්හි රජුගෙන් මාව බේරගන්නා ලෙස ඔබෙන් ඉල්ලා සිටිමි.”+  එමෙන්ම ආහස් රජ යෙහෝවා දෙවිගේ ගෘහයේ හා රජමාලිගාවේ භාණ්ඩාගාරයේ තිබූ රන් හා රිදී ගෙන,+ ඒවා ඇසිරියාවේ රජුට අල්ලසක් ලෙස යැවීය.+  එබැවින් ඇසිරියාවේ රජ ඔහු කී දේට ඇහුම්කන් දී දමස්කයට+ ගොස් එය යටත් කරගත්තේය.+ පසුව එහි ජීවත් වූ වැසියන්ව කිර් නම් ප්‍රදේශයට+ ගෙන ගියේය. ඔහු රෙෂින් රජුව+ මරා දැමුවේය. 10  පසුව ආහස් රජ+ ඇසිරියාවේ රජු වන තිග්ලත්-පිලෙසෙර්ව+ හමු වීමට දමස්කයට ගියේය. ඔහු දමස්කයේ තිබූ පූජාසනය දැක+ ඒ පූජාසනය සාදා තිබූ ආකාරය පිළිබඳ විස්තරයක් ඇතුළත් සැලැස්මක් පූජක උරියාහ්ට යැව්වේය.+ 11  එවිට පූජක උරියාහ්,+ දමස්කයේ සිටි ආහස් රජු එවූ විස්තරයට අනුව පූජාසනයක් සෑදුවේය.+ ඔහු දමස්කයේ සිට ආපසු පැමිණීමට කලින් පූජක උරියාහ් එම පූජාසනය සාදා නිම කළේය. 12  රජ දමස්කයේ සිට පැමිණ සාදා තිබූ ඒ පූජාසනය+ මත පූජා ඔප්පු කළේය.+ 13  ඔහු ඒ පූජාසනය මත දවන පූජාවක්ද+ ධාන්‍ය පූජාවක්ද+ ඔප්පු කර+ ඒ මත පාන පූජාවක්ද වත් කළේය.+ හවුල් පූජාවන් සඳහා ඔප්පු කළ සතුන්ගේ ලේද පූජාසනය මත ඉස්සේය. 14  ඉන්පසු ඔහු යෙහෝවා දෙවිට පූජා ඔප්පු කිරීම සඳහා දේවමාලිගාවට ඉදිරියෙන් තිබූ තඹ පූජාසනය+ එතැනින් ඉවත් කර තමා සෑදූ පූජාසනයට උතුරින් එය තැබුවේය. කලින් තඹ පූජාසනය තිබුණේ ඔහු ගොඩනැඟූ පූජාසනයත් යෙහෝවා දෙවිගේ මාලිගාවත් අතරය.+ 15  එමෙන්ම ආහස් රජ පූජක උරියාහ්ට+ මෙසේ අණ කළේය. “මින් ඉදිරියට උදෑසන ඔප්පු කරන දවන පූජාවත්+ සවස ඔප්පු කරන ධාන්‍ය පූජාවත්+ මේ මහා පූජාසනය මත ඔප්පු කළ යුතුයි. රජු ඔප්පු කරන දවන පූජා+ හා ධාන්‍ය පූජා මෙන්ම දේශයේ වැසියන් ඔප්පු කරන දවන පූජා, ධාන්‍ය පූජා හා පාන පූජා සියල්ලත් මේ මත ඔප්පු කරන්න. දවන පූජාවක් ලෙස ඔප්පු කරන සතුන්ගේ ලේ සහ අන් සියලු පූජාවන් සඳහා ඔප්පු කරන සතුන්ගේ ලේ මේ මත ඉසින්න. තඹ පූජාසනය භාවිත කළ යුත්තේ කෙසේද කියා මම සිතා බලා පසුව ඔබට දැනුම් දෙන්නම්.” 16  පූජක උරියාහ්,+ ආහස් රජු කී සියල්ල කළේය.+ 17  ආහස් රජ දේවමාලිගාවේ මළුවේ තිබූ කරත්තවල+ පැතලි තහඩු+ කෑලිවලට කපා+ ඒ මත තිබුණු භාජන ගලවා දැමුවේය.+ ඔහු තඹවලින් සාදා තිබූ ගොනුන් මත තබා තිබූ වටකුරු භාජනය+ රැගෙන+ ගල් වේදිකාවක් මත තැබුවේය. 18  එපමණක්ද නොව සබත් දවසේදී භාවිත කිරීම සඳහා සාදා තිබුණු ශාලාවද රජතුමාට ඇතුල් වීමට තිබූ මාර්ගයද යෙහෝවා දෙවිගේ ගෘහයෙන් ඔහු ඉවත් කළේය. ඇසිරියාවේ රජු කෙරෙහි තිබූ භය නිසා ආහස් රජ ඒ දේවල් කළේය. 19  ආහස් රජුගේ ජීවිතයේ අනිකුත් සිදුවීම් හා ඔහු කළ දේවල් ගැන යූදාහි රජවරුන්ගේ ඉතිහාසය වාර්තා කර ඇති ලියවිල්ලෙහි සඳහන් කර තිබේ.+ 20  කලක් ගත වූ පසු ආහස් රජ මිය ගියේය. ඔහුගේ මුතුන්මිත්තන් මෙන් ඔහුවද දාවිත්ගේ නුවරෙහි තැන්පත් කරන ලදි.+ ඔහුගෙන් පසුව ඔහුගේ පුත් හෙසකියා+ රජකමට පත් විය.

පාදසටහන්

මූ.අ., “ගින්න මැදින් යෑමට සැලැස්වූවේය.”