1 සාමුවෙල් 9:1-27

9  බෙන්ජමින් ගෝත්‍රයට+ අයත් කිෂ්+ නම් මිනිසෙක් සිටියේය. ඉතා ධනවත් මිනිසෙකු වූ+ ඔහු අබියෙල්ගේ පුත්‍රයාය. අබියෙල් ෂෙරොර්ගේ පුත්‍රයාය. ෂෙරොර් බෙකොරත්ගේ පුත්‍රයාය. බෙකොරත් බෙන්ජමින්වරයෙකු වූ අෆියාගේ පුත්‍රයාය.  කිෂ්ට සාවුල්+ නම් පුත්‍රයෙක් සිටියේය. ඔහු ඉතා කඩවසම් තරුණයෙකි. ඊශ්‍රායෙල් සෙනඟ අතරේ ඔහු තරම් කඩවසම් කෙනෙක් තවත් නොවීය. ඔහු මොන තරම් උසද කිවහොත් ඔහුගේ උරහිසට වඩා උස් වූ කිසිවෙක් සිටියේ නැත.+  දිනක් සාවුල්ගේ පියා වන කිෂ්ට අයිති බූරුදෙනුන්+ නැති විය. එබැවින් කිෂ් තම පුත්‍රයා වන සාවුල්ට මෙසේ කීවේය. “සේවකයෙක් එක්ක ගිහින් නැති වුණු අපේ බූරුදෙනුන්ව හොයාගෙන එන්න.”  සාවුල් බූරුදෙනුන්ව සොයමින් එෆ්‍රායිම් කඳුකරය+ පසු කර ෂාලිෂා නම් පළාත+ දක්වා ගිය නමුත් උන්ව සම්බ වුණේ නැත. ඔවුහු ෂායලිම් දේශය හරහාද ඇවිදගෙන ගියෝය. එහෙත් උන්ව සම්බ වුණේ නැත. බෙන්ජමින්වරුන්ගේ දේශය හරහාද ඔවුන් ඇවිදගෙන ගිය නමුත් උන්ව සම්බ නොවීය.  පසුව ඔවුහු ෂුප් නම් පළාතට ආවෝය. සාවුල් ඔහු සමඟ සිටි සේවකයාට මෙසේ කීවේය. “අපි දැන් ගෙදර යමු. නැත්නම් තාත්තා නැති වුණු බූරුදෙනුන් ගැන දුක් වෙන එක අත්හැරලා අපිට මොනවද වුණේ කියලා කල්පනා කරයි.”+  නමුත් සේවකයා ඔහුට මෙසේ කීවේය. “දෙවිගේ අනාගතවක්තෘ කෙනෙක්+ මේ නුවරේ ඉන්නවා. ඔහුට හැමෝම ගෞරව කරනවා. ඔහු යමක් කිව්වොත් ඒක අනිවාර්යයෙන්ම ඉටු වෙනවා.+ නැති වුණු අපේ සත්තු හොයාගන්න අපි යන්න ඕනේ කොයි පැත්තටද කියලා අපි ගිහින් ඔහුගෙන් අහමු.”  එවිට සාවුල් ඔහුගේ සේවකයාගෙන් මෙසේ ඇසුවේය. “අපි ඔහු ළඟට යද්දී ඔහුට මොනවාද අරගෙන යන්නේ?+ සැබෑ දෙවිගේ අනාගතවක්තෘට තෑග්ගක්+ දෙන්න අපි ළඟ මොකුත් නැහැ. අපේ මලුවල තිබුණු කෑමත් ඉවරයි.”  සේවකයා සාවුල්ට මෙසේ කීවේය. “මා ළඟ රිදී ෂෙකෙල්* කාලක්+ තියෙනවා. මම ඒක සැබෑ දෙවිගේ අනාගතවක්තෘට දෙන්නම්. එවිට අපේ සත්තු හොයාගන්න අපි යන්න ඕනේ මොන පැත්තටද කියලා ඔහු කියයි.”  (පෙර කාලයේදී ඊශ්‍රායෙල් දේශයේ මනුෂ්‍යයෙක් දෙවිගෙන් යමක් විමසීමට යන විට සාමාන්‍යයෙන් පැවසුවේ මෙවැනි දෙයකි. “එන්න! අපි දිවැසිවරයා+ ළඟට යමු.” ඒ දවස්වල අනාගතවක්තෘවරුන්ව හැඳින්වූයේ දිවැසිවරුන් ලෙසය.) 10  එවිට සාවුල් ඔහුගේ සේවකයාට මෙසේ කීවේය. “ඒක හොඳ අදහසක්.+ අපි ගිහින් ඔහුව මුණගැහෙමු.” ඉන්පසු ඔවුහු සැබෑ දෙවිගේ අනාගතවක්තෘ සිටි නුවර වෙතට ගියෝය. 11  ඔවුන් නුවර වෙතට නැඟ යද්දී වතුර අදින්න+ නුවරින් පිටතට ආ තරුණියන්ව ඔවුන්ට මුණගැසිණ. ඔවුහු ඒ තරුණියන්ගෙන් මෙසේ ඇසුවෝය. “දිවැසිවරයා+ මෙහේ ඉන්නවාද?” 12  එවිට ඔවුහු මෙසේ කීවෝය. “ඔව්, අර ඔබට ඉදිරියෙන් ඉන්නේ ඔහු තමයි. ඉක්මනට ගියොත් ඔබට ඔහුව මුණගැහෙන්න පුළුවන් වෙයි. අද සෙනඟ වෙනුවෙන් පූජාවක්+ ඔප්පු කරන්න තියෙනවා. ඔහු අද නුවරට ආවේ ඒ නිසයි. දැන් ඔහු පූජා ඔප්පු කරන ස්ථානයට+ යනවා ඇති. 13  පූජාවට ආශීර්වාද කරන්නේ ඔහුයි.+ ඔහු එයට ආශීර්වාද කරන තෙක් කෑමට ආරාධනා කළ අය කන්නේ නැහැ. ඒ නිසා සෙනඟ ඔහු එන තුරු බලා ඉන්නවා ඇති. ඔහු කෑම කන්න එතැනට යන්න කලින් ගිහින් ඔහුව හමු වෙන්න. ඉක්මනට යන්න. නුවරට ඇතුල් වුණ ගමන්ම ඔබට ඔහුව හම්බ වෙයි.” 14  එබැවින් ඔවුහු නුවරට ගියෝය. ඔවුහු නුවරට ඇතුල් වූ විට සාමුවෙල් ඔවුන්ව හමු වීමට ඉදිරියට ආවේය. සාමුවෙල් ඔවුන්ව හමු වීමට ආවේ පූජාව ඔප්පු කරන ස්ථානයට ඔවුන්වත් රැගෙන යෑම සඳහාය. 15  සාවුල් ඒ නුවරට පැමිණීමට දවසකට කලින් යෙහෝවා දෙවි සාමුවෙල්ට මෙසේ හෙළි කර තිබිණ.+ 16  “හෙට මේ වෙලාවට බෙන්ජමින් දේශයේ+ මිනිසෙකුව මම ඔබ වෙතට එවන්නෙමි. මාගේ සෙනඟ වන ඊශ්‍රායෙල්වරුන්ගේ නායකයා ලෙස ඔබ ඔහුව අභිෂේක කරන්න.+ ඔහු මාගේ සෙනඟව පිලිස්තිවරුන්ගේ අතින් ගලවාගන්නේය.+ මන්ද මාගේ සෙනඟ විඳින දුක්ගැහැට මට පෙනෙන්නේය. උපකාරය පතා ඔවුන් නඟන මොරගැසීමත් මට ඇසෙන්නේය.”+ 17  සාමුවෙල් සාවුල්ව දුටු විට යෙහෝවා දෙවි ඔහුට මෙසේ කීවේය. “‘මාගේ සෙනඟ නොමඟ යෑමෙන් වළක්වන්නේ ඔහුයි’ කියා මම ඔබට කලින් කිව්වේ මේ තැනැත්තා ගැනයි.”+ 18  සාවුල් නුවර මැද* සිටි සාමුවෙල් වෙත ගොස් මෙසේ ඇසුවේය. “දිවැසිවරයාගේ නිවස තියෙන්නේ කොහෙද කියලා මට කියන්න පුළුවන්ද?” 19  එවිට සාමුවෙල් සාවුල්ට මෙසේ කීවේය. “මම තමයි ඔබ සොයන දිවැසිවරයා. අපි පූජාව ඔප්පු කරන ස්ථානයට දැන් යමු. ඔබ මට ඉදිරියෙන් ගමන් කරන්න. අද ඔබ දෙදෙනා කෑම කන්නේ මා සමඟයි.+ ඔබේ හිතේ තියෙන හැම දෙයක් ගැනම මම ඔබට කියන්නම්.+ හෙට උදේ ඔබට යන්න පුළුවන්. 20  දවස් තුනකට කලින් නැති වුණු බූරුදෙනුන්+ ගැන කරදර වෙන්න එපා.+ උන්ව හම්බ වුණා. මුළු ඊශ්‍රායෙල් දේශයේම තියෙන වටිනා දේවල්+ අයිති ඔබටයි ඔබේ පියාගේ පරම්පරාවටයි නොවේද?” 21  එවිට සාවුල් මෙසේ කීවේය. “මම බෙන්ජමින් ගෝත්‍රයේ කෙනෙක්. එය ඊශ්‍රායෙල් දේශයේ+ තියෙන කුඩාම ගෝත්‍රයයි.+ අනික බෙන්ජමින් ගෝත්‍රයේ අනික් පවුල් සමඟ සසඳා බලද්දී මගේ පවුල වැදගත් පවුලක් කියා කියන්න බැහැ.+ ඉතින් ඇයි ඔබ ඒ වගේ දෙයක් මට කිව්වේ?”+ 22  පසුව සාමුවෙල් කෑම කන ස්ථානයට සාවුල්වද ඔහුගේ සේවකයාවද රැගෙන ගියේය. එදින මිනිසුන් තිස්දෙනෙකුට පමණ කෑමට ආරාධනා කර තිබිණ. සාමුවෙල් සාවුල්ට සහ ඔහුගේ සේවකයාට හිඳගැනීමට මේසයේ ප්‍රධාන තැන්+ දුන්නේය. 23  ඉන්පසු සාමුවෙල් කෑම පිසින තැනැත්තාට මෙසේ කීවේය. “‘මේක පැත්තකින් අරං තියන්න’ කියලා මම ඔබට දුන්න මස් කොටස දැන් ගේන්න.” 24  එවිට ඔහු ගාත් කොටස ගෙන සාවුල් ඉදිරියේ තබමින් මෙසේ කීවේය. “මෙන්න, ඔබට වෙන් කළ කොටස. මෙතැන ඉන්න අනික් අය සමඟ දැන් ඔබත් කන්න. මේ අවස්ථාව සඳහායි මේ කෑම කොටස වෙන් කළේ.” එදින සාවුල්, සාමුවෙල් සමඟ එකට හිඳගෙන කෑම කෑවේය. 25  පසුව ඔවුහු එම ස්ථානයේ+ සිට නුවර වෙතට ගියෝය. ඉන් අනතුරුව සාමුවෙල් සහ සාවුල් ඔහුගේ නිවසේ සඳැල්ලට*+ වී කතා කරමින් සිටියේය. 26  ඔවුහු පසුවදා උදෑසනින්ම නැඟිට්ටෝය. එළිය වැටීගෙන එද්දී සාමුවෙල් සඳැල්ලේ සිටි සාවුල්ට කතා කර මෙසේ කීවේය. “දැන් ඔබ ගෙදර යන්න සූදානම් වෙන්න.” එබැවින් සාවුල් සූදානම් වී සාමුවෙල් සමඟ නිවසින් පිටත්ව ගියේය. 27  ඔවුන් නුවරේ සීමාව ළඟට පැමිණ කන්දෙන් බැස එද්දී සාමුවෙල් සාවුල්ට මෙසේ කීවේය. “ඔබේ සේවකයාට+ අපට පෙරටුවෙන් යන්න කියන්න.” සේවකයාද ඔවුන්ට පෙරටුවෙන් ගියේය. සාමුවෙල් තවදුරටත් මෙසේ කීවේය. “මම දෙවිගේ පණිවිඩය ඔබට පවසන තෙක් ඔබ මෙතැන ටික වේලාවකට නතර වෙන්න.”

පාදසටහන්

ෂෙකෙලයක් යනු ග්‍රෑම් 11.4කි.
මූ.අ., “දොරටුව මැද.”
එනම්, වහලයක් නැතුව සාදා ඇති, සඳ එළිය වැටෙන උඩුමහලට.