1 රාජාවලිය 12:1-33

12  රෙහබෝවම්ව+ රජකමට පත් කිරීම සඳහා සියලු ඊශ්‍රායෙල්වරු ෂීකෙම් නුවරෙහි+ රැස් වූහ. එබැවින් රෙහබෝවම්ද එතැනට ගියේය.  ඒ කාලයේදී සලමොන් රජු වෙතින් පලා ගිය නෙබාත්ගේ පුත් යෙරොබොවම්+ පදිංචිව සිටියේ ඊජිප්තුවේය. රෙහබෝවම් රජකමට පත් වූ බව යෙරොබොවම්ට එහිදී ආරංචි විය.+  ඊශ්‍රායෙල්වරු යෙරොබොවම්ට පණිවිඩයක් යවා ඔහුව නැවත ගෙන්වාගත්තෝය. පසුව යෙරොබොවම් ඊශ්‍රායෙල් සෙනඟ සමඟ රෙහබෝවම් රජුව හමු වී ඔහුට මෙසේ කීවේය.+  “ඔබේ පියා අප පිට දරාගන්න බැරි බරක්* පැටෙව්වා. දැන් ඔබ අපිට කරුණාවන්තව සලකමින් අපේ බර සැහැල්ලු කරන්න.+ අපට පවරා තිබෙන වැඩ කොටස අඩු කරන්න+ කියා අපි ඔබෙන් ඉල්ලා සිටිනවා. ඔබ එසේ කළොත් අපි ඔබට සැමදාටම සේවය කරන්න පොරොන්දු වෙනවා.”+  රෙහබෝවම් රජ එය අසා, “මට දවස් තුනක් කල් දෙන්න. ඉන්පසු ඇවිත් මාව හමු වෙන්න”+ කියා ඔවුන්ට කීවේය. එබැවින් සෙනඟ එතැනින් පිටත්ව ගියෝය.  එවිට රෙහබෝවම් රජ තම පියා වූ සලමොන්ට උපදෙස් දුන් වැඩිමහල්ලන්+ ළඟට ගොස්, “ඔබ හිතන හැටියට මම මේ අයට මොන වගේ පිළිතුරක් දිය යුතුද”+ කියා ඔවුන්ගෙන් ඇසුවේය.  ඔවුහු රජුට මෙසේ උපදෙස් දුන්නෝය. “ඔබ මේ සෙනඟට සේවය කරන්න කැමති නම්+ ඔවුන්ට කාරුණිකව කතා කර,+ ඔවුන්ගේ ඉල්ලීම ඉටු කරන්න. ඔබ එසේ කළොත් ඔවුන් සැමදාටම ඔබට සේවය කරයි.”+  නමුත් ඔහු ඒ වැඩිමහල්ලන් දුන් උපදෙස් සැලකිල්ලට ගත්තේ නැත. ඒ වෙනුවට කුඩා කාලයේ සිටම තමන් සමඟ එකට හැදී වැඩී,+ එවකට ඔහුගේ උපදේශකයන් ලෙස සේවය කරමින් සිටි තරුණයන්ගෙන් අදහස් විමසුවේය.+  “‘ඔබේ පියා අප පිට පැටවූ බර සැහැල්ලු කරන්න’+ කියා මගෙන් ඉල්ලා සිටින මේ අයට මම මොන වගේ පිළිතුරක් දිය යුතුද”+ කියා ඔහු ඔවුන්ගෙන් ඇසුවේය. 10  ඔහු සමඟ එකට හැදී වැඩුණු ඒ තරුණයෝ මෙසේ පැවසුවෝය. “‘ඔබේ පියා අප පිට පැටෙව්වේ දරාගන්න බැරි බරක්. දැන් ඔබ අපට කරුණාවන්තව සලකමින් ඒ බර සැහැල්ලු කරන්න’ කියා ඔබට පැවසූ අයට ඔබ මෙසේ කියන්න.+ ‘මම මගේ පියාට වඩා තදින් ක්‍රියා කරනවා.*+ 11  මගේ පියා දරාගන්න බැරි බරක් ඔබ පිට පටවන්න ඇති. නමුත් මම ඊටත් වඩා ලොකු බරක් ඔබ පිට පටවනවා.+ මගේ පියා ඔබට පහර දුන්නේ කසවලින්. නමුත් මම ඔබට පහර දෙන්නේ දරුණු කටු ඇමුණූ* කසවලිනුයි.’”+ 12  “දවස් තුනකින් ඇවිත් මාව හමු වෙන්න” කියා රජු පැවසූ නිසා යෙරොබොවම් සෙනඟ සමඟ තුන්වන දින රෙහබෝවම් රජුව හමු වීමට පැමිණියේය.+ 13  එවිට රජ, වැඩිමහල්ලන් දුන් උපදෙස් පිළි නොගෙන+ සෙනඟට සැරපරුෂ ලෙස කතා කළේය.+ 14  තරුණයන් තමාට දුන් උපදෙස් පරිදි ඔහු සෙනඟට මෙසේ කීවේය.+ “මගේ පියා දරාගන්න බැරි බරක් ඔබ පිට පටවන්න ඇති. නමුත් මම ඊටත් වඩා ලොකු බරක් ඔබ පිට පටවනවා. මගේ පියා ඔබට පහර දුන්නේ කසවලින්. නමුත් මම ඔබට පහර දෙන්නේ දරුණු කටු ඇමුණූ කසවලිනුයි.”+ 15  රජු සෙනඟගේ ඉල්ලීම ප්‍රතික්ෂේප කරන ආකාරයට+ යෙහෝවා දෙවි කාරණා සකස් කළේය.+ යෙහෝවා දෙවි එසේ කළේ ෂීලෝහි වැසියෙකු වූ අහියා+ මාර්ගයෙන් තමන් නෙබාත්ගේ පුත් යෙරොබොවම්ට කී දේ ඉටු වන පිණිසය.+ 16  රජු තමන්ගේ ඉල්ලීම ඉටු නොකරන බව ඊශ්‍රායෙල්වරුන්ට පෙනී ගිය විට ඔවුහු රජුට මෙසේ කීවෝය. “දාවිත්ගේ පෙළපතෙන් අපිට කිසිම ප්‍රයෝජනයක් නැහැ.+ යෙස්සේගේ පුත්‍රයාගෙන් කිසි උරුමයක් ලැබෙයි කියා අපිට බලාපොරොත්තු වෙන්නත් බැහැ. ඊශ්‍රායෙල් සෙනඟෙනි, ඔබ එක් එක් කෙනා ඔබේ දෙවිවරුන් වෙතට ගොස් ඔවුන්ට නමස්කාර කරන්න.+ දාවිත්ගේ පෙළපත දාවිත්ම බලාගත්තාවේ!”+ එසේ කියා සෙනඟ තම තමන්ගේ නිවෙස් බලා ගියෝය. 17  එහෙත් රෙහබෝවම් රජ යූදා දේශයට අයත් නුවරවල විසූ ඊශ්‍රායෙල්වරුන්ව දිගටම පාලනය කළේය.+ 18  දිනක් රෙහබෝවම් රජ සේවයට බඳවාගත් කම්කරුවන්ගේ වැඩ අධීක්ෂණය කිරීමට පත් කර තිබූ+ අදොරාම්ව+ වැඩ බැලීමට යැවීය. ඊශ්‍රායෙල්වරු ඔහුට ගල් ගසා ඔහුව මරා දැමුවෝය.+ නමුත් රෙහබෝවම් රජ අශ්ව රථයක නැඟී යෙරුසලමට පලා ගොස් තම දිවි ගලවාගත්තේය. 19  අද දක්වාම ඊශ්‍රායෙල්වරු දාවිත්ගේ පෙළපතට විරුද්ධව ක්‍රියා කරති.+ 20  යෙරොබොවම් නැවත පැමිණි බව ඊශ්‍රායෙල්වරුන්ට ආරංචි වූ විගස ඔවුහු ඔහුට පණිවිඩයක් යවා සභාව වෙත කැඳවාගත්තෝය. එතැනදී ඔවුහු ඊශ්‍රායෙල්වරුන්ගේ රජු ලෙස ඔහුව පත් කළෝය.+ යූදා ගෝත්‍රය හැර වෙන කිසි ගෝත්‍රයක් දාවිත්ගේ පෙළපතට පක්ෂපාත වූයේ නැත.+ 21  සලමොන්ගේ පුත් රෙහබෝවම් රජ යෙරුසලමට පැමිණි වහාම,+ ඊශ්‍රායෙල් රාජ්‍යයට විරුද්ධව සටන් කර මුළු රාජ්‍යයම නැවත තමන් යටතට ගැනීම සඳහා සැලසුම් යෙදුවේය. ඒ සඳහා ඔහු යූදා හා බෙන්ජමින්+ යන ගෝත්‍ර දෙකෙන් යුද්ධයට දක්ෂ එක්ලක්ෂ අසූදහස්දෙනෙකුව තෝරාගත්තේය. 22  එවිට සැබෑ දෙවිගේ සේවකයෙකු+ වූ ෂෙමායාට+ දෙවි කතා කර මෙසේ පැවසීය. 23  “යූදාහි රජු වන සලමොන්ගේ පුත් රෙහබෝවම්ටත් යූදා හා බෙන්ජමින් ගෝත්‍රයට අයත් සියලුදෙනාටත් අන් සියලුදෙනාටත් මෙසේ කියන්න. 24  ‘යෙහෝවා දෙවි මෙසේ පැවසුවේය. “මේ සියල්ල මාගේ අවසරය ඇතුව සිදු වූ දේවල්.+ එමනිසා ඔබේ සහෝදරයන් වන ඊශ්‍රායෙල්වරුන්ට විරුද්ධව සටන් නොකර+ ආපසු ඔබේ නිවෙස් බලා යන්න.”’” ඔවුහු යෙහෝවා දෙවිගේ වචනයට කීකරු වූහ.+ යෙහෝවා දෙවිගේ මඟ පෙන්වීමට අනුව සියලුදෙනාම ආපසු තමන්ගේ නිවෙස් බලා ගියෝය.+ 25  යෙරොබොවම් රජ එෆ්‍රායිම් කඳුකර පළාතෙහි පිහිටි ෂීකෙම් නගරයේ+ ගොඩනැඟිලි අලුත්වැඩියා කර එහි පදිංචි විය. පසුව ඔහු එතැනින් පිටත්ව ගොස් පෙනුයෙල් නමැති නගරයේ+ ගොඩනැඟිලිද අලුත්වැඩියා කළේය. 26  පසුව යෙරොබොවම් රජ මෙසේ සිතුවේය.+ “මුළු රාජ්‍යයම නැවත දාවිත්ගේ පෙළපතට+ යෑමට ඉඩ තිබෙනවා. 27  ජනයා හැමදාමත් යෙරුසලමට ගිහින් යෙහෝවා දෙවිගේ ගෘහයේ පුදපූජා ඔප්පු කළොත්+ ඔවුන්ගේ ස්වාමීන් වන යූදාහි රජු වන රෙහබෝවම් වෙතට නැවත ඔවුන්ගේ සිත් ඇදී යන්න පුළුවන්. එහෙමවුණොත් ඔවුන් මාව මරා+ නැවතත් යූදාහි රජු වන රෙහබෝවම්ට සේවය කරාවි.” 28  එබැවින් රජ මේ ගැන තම උපදේශකයන්ගෙන් අදහස් විමසූ පසු+ රන් වස්සන් දෙදෙනෙකු සාදා+ ජනතාවට මෙසේ කීවේය. “ඊශ්‍රායෙල් ජනයෙනි, නමස්කාර කරන්න හැමදාමත් යෙරුසලමට යන්න අවශ්‍ය නැහැ. එය දුෂ්කර ගමනක්.” ඉන්පසු ඔහු වසු රූප පෙන්වමින්, “ඊජිප්තු දේශයෙන් ඔබව පිටතට ගෙනා+ ඔබේ දෙවි මෙතැන ඉන්නවා”+ කියා කීවේය. 29  පසුව ඔහු එක් රූපයක් බෙතෙල් නගරයේද+ අනික් රූපය දාන් නගරයේද+ තැබුවේය. 30  මෙසේ යෙරොබොවම් රජ ජනයාව පාපයට පෙලඹුවේය.+ ජනයා වස්සාට නමස්කාර කිරීමට දාන් දක්වා ගියෝය. 31  ඔහු පූජනීය ස්ථානද+ ගොඩනැඟුවේය. ඒ ස්ථානවල සේවය කිරීම සඳහා ඔහු පත් කළ එක පූජකයෙක්වත් ලෙවී ගෝත්‍රයේ අය නොවූහ. ඒ පූජකයෝ සාමාන්‍ය ජනතාව අතරින් තෝරාගත් අය වූහ.+ 32  යෙරොබොවම් රජ තමා සෑදූ වසු රූපවලට පූජා ඔප්පු කිරීම සඳහා අටවන මාසයේ පහළොස්වන දිනයේදී යූදා දේශයේ පවත්වන උත්සවයට සමාන උත්සවයක්+ පැවැත්වීමට නියම කළේය. ඔහු බෙතෙල්හිදී+ සෑදූ පූජාසනය මත පූජා ඔප්පු කළ අතර එම පූජාසනය ඉදිරියේ සේවය කරන පිණිස තමන් සෑදූ පූජනීය ස්ථානවල සේවය කරමින් සිටි පූජකයන්වත් එතැනට රැස් කළේය. 33  මෙසේ ඔහු තමාගේම අදහසට අනුව ඊශ්‍රායෙල්වරුන් සඳහා නියම කරගත් උත්සවය අටවන මාසයේ පහළොස්වන දින පැවැත්වීය.+ ඔහු එදින තමන් බෙතෙල්හිදී සෑදූ පූජාසනය වෙත ගොස් ඒ මත පුදපූජාද සුවඳ දුම්ද ඔප්පු කළේය.+

පාදසටහන්

මූ.අ., “වියගහක්.”
මූ.අ., “මගේ පියාගේ තුනටියට වඩා මගේ සුළැඟිල්ල මහතයි.”
මෙහි භාවිත කර තිබෙන හෙබ්‍රෙව් වචනයේ ගෝනුස්සන් යන අර්ථයද ගැබ්ව ඇත.