1 කොරින්ති 12:1-31

12  දැන් සහෝදරයෙනි, දෙවිගෙන් ලද දීමනා ගැන+ ඔබ යමක් දැනගන්නවාට කැමැත්තෙමි.  ඔබ වෙනත් ජාතීන්ට අයත් මිනිසුන්ව* සිටියදී+ ඔබ පෙලඹුණේ ගොළු+ රූපවලට+ නමස්කාර කිරීමටය.  එහෙයින් ඔබ යමක් දැනගත යුතුයි. එනම් දෙවිගේ බලය ඇතුව කතා කරන කිසිවෙකුට, “යේසුස් ශාප ලද්දෙක්”+ කියා පැවසිය නොහැකි බවයි. එලෙසම, “යේසුස් ස්වාමීන්” කියා පිළිගත හැක්කේ දෙවිගේ බලය ලැබූ කෙනෙකුට පමණි.+  විවිධාකාර දීමනා තිබුණත්+ ඒ සියල්ල ලැබෙන්නේ දෙවිගේ බලයෙනි.*+  සියලුදෙනා විවිධාකාර සේවාවන් ඉටු කළත්+ සිටින්නේ එකම ස්වාමීන්ය.+  සියලුදෙනා විවිධාකාර වැඩකටයුතු ඉටු කළත්+ ඒ සියල්ල එසේ සිදු වීමට සලස්වන්නේ+ එකම දෙවිය.+  දෙවිගේ බලය සියලුදෙනා තුළ ක්‍රියාත්මක වන්නේ යම් ප්‍රයෝජනවත් අරමුණක් ඉටු කිරීමටය.+  උදාහරණයක් ලෙස දෙවිගේ බලය මාර්ගයෙන් කෙනෙකුට ප්‍රඥාවන්තව කතා කිරීමේ හැකියාව ලැබේ.+ එසේම එම බලය මගින් තවත් කෙනෙකුට ආශ්චර්යවත් ලෙස දැනුමක් ඇතුව කතා කිරීමේ හැකියාව ලැබේ.+  එම බලය මගින් තවත් කෙනෙකුට විශ්වාසයද+ තවත් කෙනෙකුට සුව කිරීමේ දීමනාවද+ ලැබේ. 10  තවත් කෙනෙකුට බලවත් ක්‍රියා කිරීමටද+ තවත් කෙනෙකුට අනාවැකි කීමටද+ තවත් කෙනෙකුට දෙවිගේ මඟ පෙන්වීමෙන් ප්‍රකාශ වී ඇති දේවල්+ වටහාගැනීමටද+ තවත් කෙනෙකුට විවිධ භාෂා කතා කිරීමටද+ තවත් කෙනෙකුට ඒ භාෂා තේරුම් කර දීමටද+ හැකියාව ලැබේ. 11  නමුත් ඒ සියලු දේවල් සිදු වන්නේ එකම බලය විවිධාකාරව ක්‍රියාත්මක වන නිසාය.+ එලෙස දෙවිගේ කැමැත්තට එකඟව+ සෑම කෙනෙකුටම එම දීමනා නිසියාකාරව බෙදා දෙනු ලැබේ.+ 12  මිනිස් ශරීරයේ අවයව බොහොමයක් තිබේ. අවයව බොහොමයක් තිබුණත් එය එකම ශරීරය වේ.+ ක්‍රිස්තුස්ගේ ශරීරය ගැනත් එසේම පැවසිය හැක.+ 13  මන්ද අප යුදෙව්වරුන් වුවත් ග්‍රීකයන්* වුවත් දාසයන්ව සිටියත් නිදහස්ව සිටියත් අප සියලුදෙනාව බව්තීස්ම කළේ එකම බලයේ ක්‍රියාකාරිත්වය තුළින්+ එක ශරීරයක් සෑදීමටය. ඒ බලය අප සියලුදෙනාටම ලැබිණ.+ 14  ශරීරය සෑදී තිබෙන්නේ එක අවයවයකින් නොවේ. එය අවයව බොහොමයකින් සෑදී තිබේ.+ 15  එහෙයින් පාදය, “මා අතක් නොවන නිසා මා ශරීරයේ කොටසක් නොවෙයි” කියා පැවසූ පමණින් එය ශරීරයේ කොටසක් නොවෙයි කියා පැවසිය නොහැක.+ 16  එමෙන්ම කන, “මා ඇසක් නොවන නිසා මා ශරීරයේ කොටසක් නොවෙයි” කියා පැවසූ පමණින් එය ශරීරයේ කොටසක් නොවෙයි කියා පැවසිය නොහැක.+ 17  මුළු ශරීරයම ඇසක් වූවා නම් ඇසෙන්නේ කෙසේද? මුළු ශරීරයම කනක් වූවා නම් ගඳ සුවඳ දැනෙන්නේ කෙසේද? 18  නමුත් දෙවි තම කැමැත්ත පරිදි ශරීරයේ සෑම අවයවයක්ම නියමිත තැන්වල තබා ඇත.+ 19  ශරීරයේ තිබෙන සෑම අවයවයක්ම එක සමාන වූවා නම්+ ශරීරයට සිදු වන්නේ කුමක්ද? 20  බොහෝ අවයවයන් තිබුණත්+ ඇත්තේ එකම ශරීරයයි. 21  එහෙයින් ඇසට, “මට ඔබව අවශ්‍ය නැහැ” කියා අතට කියන්නවත් හිසට, “මට ඔබව අවශ්‍ය නැහැ” කියා පාදවලට කියන්නවත් නුපුළුවන. 22  ඇත්තෙන්ම වඩා දුර්වලයි කියා සැලකෙන අවයවවලින්+ පවා අත්‍යවශ්‍ය කාර්යයන් සිදු වේ. 23  එසේම වැදගත්කමින් අඩුයයි සලකන අවයවවලට පවා අපි වැඩි ගෞරවයකින් සලකමු.+ එලෙසම යම් අවයව නිසා අපට ලැජ්ජාවක් දැනුණත් ඒ අවයවවලටද අපි වැඩි ගෞරවයක් දෙමු. 24  වඩාත් අලංකාර අවයවයන්ට එතරම් සැලකිල්ලක් අවශ්‍ය නැත. නමුත් වැදගත්කමින් අඩුයයි සලකන අවයවවලට දෙවි වැඩි ගෞරවයක් දෙමින් මුළු ශරීරය පුරාම එකමුතුකමක් ඇති කළේය. 25  එසේ කළේ කිසි භේදයක් නැතුව ශරීරයේ අවයව සියල්ලට එක සමාන සැලකිල්ලක් දැක්වීම සඳහාය.+ 26  ඒ අනුව එක අවයවයකට වේදනාවක් ඇති වන විට අන් සියලුම අවයවවලටද ඒ වේදනාව දැනේ.+ එලෙසම එක් අවයවයකට යම් ගෞරවයක් හිමි වන විට+ අන් සියලුම අවයවද එකට සතුටු වෙති.+ 27  දැන් ඔබ සියලුදෙනාත් එක ශරීරයකි. ඒ ක්‍රිස්තුස්ගේ ශරීරයයි. සෑම කෙනෙක්ම එහි අවයවයන් ලෙස ඊට සම්බන්ධ වී සිටියි.+ 28  ඒ අනුව දෙවි සභාවේ විවිධ කාර්යයන් සඳහා විවිධ අයව පත් කර ඇත.+ එනම් මුලින්ම නියෝජිතයන්වද*+ දෙවෙනුව අනාගතවක්තෘවරුන්වද+ තුන්වෙනුව ගුරුවරුන්වද+ පත් කර ඇත. ඊළඟට බලවත් ක්‍රියා සඳහාද+ සුව කිරීම් සඳහාද+ අගහිඟකම් ඇති අයට උපකාර කිරීම සඳහාද+ මඟ පෙන්වීම් ලබා දීම සඳහාද+ විවිධ භාෂා කතා කිරීම සඳහාද+ එකිනෙකාට දීමනා ලබා දී ඇත. 29  එසේනම් සියලුදෙනාම නියෝජිතයෝද? සියලුදෙනාම අනාගතවක්තෘවරුද? සියලුදෙනාම ගුරුවරුද? සියලුදෙනාම බලවත් ක්‍රියා සිදු කරයිද? 30  සියලුදෙනාටම සුව කිරීමේ දීමනාව ලබා දී තිබේද? සියලුදෙනාම වෙනත් භාෂාවලින් කතා කරයිද?+ සියලුදෙනාම භාෂාවන් තේරුම් කර දෙයිද?+ 31  කෙසේවෙතත් දෙවිගෙන් වඩාත් උතුම් දීමනා ලබාගැනීමට උද්‍යෝගයෙන් උත්සාහ කරන්න.+ නමුත් ඒ සියල්ලටම වඩා උතුම් මාර්ගයක් ඔබට පෙන්වන්න කැමැත්තෙමි.+

පාදසටහන්

මින් අදහස් කරන්නේ දෙවි ගැන විශ්වාසයක් නැති අයයි.
ග්‍රීක බසින්, නියුමා. උපග්‍ර. 3 බලන්න.
රෝම 1:16හි පාදසටහන බලන්න.
හෝ, “යවනු ලැබූවන්වද.”