හිතෝපදේශ 30:1-33

30  මෙය යාකේගේ පුත් ආගුර් විසින් පවසන ලද බැරෑරුම් පණිවිඩයකි.+ ඔහු මෙම වදන් පැවසුවේ ඉතියෙල්ට සහ ඌකාල්ටය.  මා අන් සියලුදෙනාටම වඩා අඥානයෙකි.+ සාමාන්‍ය මිනිසුන්ට තිබෙන නුවණවත් මට නැත.+  මා ප්‍රඥාව අත් කරගෙන නැත.+ අතිශුද්ධ තැනැත්තාණන් සතු දැනුම මා ලබාගෙන නැත.+  ස්වර්ගයට ගොස් නැවත පොළොවට පැමිණියේ කවුද?+ එවැනි කෙනෙකුව ඔබ හඳුනන්නෙහිද? තම දෑතින් සුළඟ+ අල්ලාගත්තේ කවුද? තම සළුවෙන් ජල ධාරා රැස් කරගත්තේ කවුද?+ පොළොවේ සීමා නියම කළේ කවුද?+ ඔබ එවැනි කෙනෙකුව දන්නවා නම් ඔහුගේ නම+ මට කියන්න. ඔහුගේ පුත්‍රයාගේ නමත් මට කියන්න.+  දෙවිගේ සියලු වදන් පවිත්‍රය.+ ඔහුගේ රැකවරණය පතන අයට ඔහු පලිහකි.+  ඔහුගේ වදන්වලට කිසිවක් එකතු නොකරන්න.+ මන්ද එසේ කළොත් ඔබ බොරුකාරයෙක් වන්නෙහිය.+ එවිට දෙවි ඔබට තරවටු කරනු ඇත.  දෙවියනි, මම ඔබෙන් දේවල් දෙකක් ඉල්ලා සිටිමි.+ මා මිය යන තුරු වෙන කිසිවක් ඔබෙන් ඉල්ලන්නේ නැත.+  බොරුවත් වංචාවත් මාගෙන් ඉවත් කරන්න.+ මට දුප්පත් වීමටවත් පොහොසත් වීමටවත් ඉඩ නොදී,+ එදිනෙදා අවශ්‍ය ආහාර පාන විතරක් ලබා දෙන්න.+  නැත්නම් මා ඕනෑවට වඩා තෘප්තියට පත් වී,+ “යෙහෝවා දෙවි කවුද? මා ඔහුව හඳුනන්නේ නැහැ”+ යයි කියමින් ඔබව ප්‍රතික්ෂේප කිරීමට ඉඩ තිබේ. එසේත් නැත්නම්, මා දිලිඳුකමට වැටී සොරකමට පුරුදු වී ඔබගේ නමට නින්දා කිරීමට පෙලඹෙයි.+ 10  සේවකයෙකු ගැන ඔහුගේ ස්වාමියාට කේලාම් නොකියන්න.+ එසේ කළහොත් ඔහු ඔබට ශාප කරයි. ඔබ කළ වරද ගැන ඔබට ගණන් දෙන්න සිදු වෙයි.+ 11  තම පියාට ශාප කරන, මවට කිසි ගෞරවයක් නොදක්වන පරම්පරාවක් ඇත.+ 12  තමන් පවිත්‍රයයි සිතන පරම්පරාවක්ද ඇත.+ එහෙත් ඔවුහු තමුන්ගේ අපවිත්‍රකම් සෝදා ඉවත් කරගෙන නැත.+ 13  ඉතා අහංකාර ලෙස කටයුතු කරන පරම්පරාවක් ඇත. ඔවුන්ගේ ඇස් උඩඟුය.+ 14  කඩු වැනි තියුණු දත් ඇති, මන්න පිහි වැනි ශක්තිමත් හකු ඇති පරම්පරාවක් ඇත.+ ඔවුහු පීඩාවට පත් වූ ජනයාවද දුප්පතුන්වද කා දමන්නෝය.+ 15  කූඩැල්ලාට දූවරු දෙදෙනෙක් සිටිති. ඒ දූවරු, “දෙන්න! දෙන්න” යයි කියමින් නිතරම කෑගසති. කිසිදා සෑහීමට පත් නොවන දේවල් තුනක් තිබේ. ඒ තුනට අමතරව, “මට ඇති” යයි නොකියන තවත් දෙයක්ද තිබේ. 16  මිනී වළද+ දරුපල නැති ගැබද+ නියඟයෙන් වියළී ගිය දේශයක්ද+ කිසිදා සෑහීමට පත් නොවේ. ගින්නද+ කිසිදා, “මට ඇති” යයි නොකියන්නේය.+ 17  පියාව සුළු කොට තකමින් මවගේ උපදෙස්ද හෙළාදකින තැනැත්තෙක් සිටියි.+ නිම්නයේ ලගින කපුටෝ ඇවිත් ඔහුගේ ඇස් උගුලා දමනු ඇත. රාජාලි පැටවුන් ඔහුව කා දමනු ඇත. 18  මම පුදුමාකාර දේවල් තුනක් දුටිමි. ඒ තුනට අමතරව, මට වටහාගැනීමට නොහැකි වූ තවත් දෙයක්ද දුටුවෙමි. 19  අහසේ පියාසර කරන රාජාලියෙකුගේ ගමන් මඟවත් පර්වතයක් මත ඇදී යන සර්පයෙකුගේ ගමන් මඟවත් ගැඹුරු මුහුදේ යාත්‍රා කරන+ නැවක ගමන් මඟවත් සොයාගත නොහැක. එසේම, තරුණියක වෙතට ඇදී යන පුරුෂයෙකුගේ ක්‍රියාකලාපයද වටහාගත නොහැක.+ 20  අනාචාරයේ යෙදෙන ස්ත්‍රියක හැසිරෙන්නේ මෙසේය. ඇය කෑම කා කට පිස දමා, “මා කිසි වරදක් කර නැත” යයි කියන්නීය.+ 21  පොළොවේ වැසියන්ව කැලඹීමට පත් කරන දේවල් තුනක් ඇත. ඒ තුනට අමතරව, ඔවුන්ට දරාගත නොහැකි තවත් දෙයක්ද තිබේ. 22  රජකමට පත් වූ දාසයෙකුගේ අණසක යටතේ සිටීමත්+ කා බී තෘප්තියට+ පැමිණි මෝඩයෙකු ඉදිරියේ සිටීමත් 23  එපා කළ ස්ත්‍රියකව විවාහ කරගෙන සිටීමත්+ දාසියක ඇගේ ස්වාමිදුවට හිමි තැන පැහැරගැනීමත් දරාගත නොහැකිය.+ 24  පොළොවේ කුඩාම සතුන් අතරින් සතරදෙනෙක් සිටිති. උන් කුඩා වුණත් සහජයෙන්ම ප්‍රඥාවන්තය.+ 25  කුහුඹුවන් සවිශක්තිය අතින් දුර්වලය.+ එහෙත් ගිම්හානයේ උන් කෑම රැස් කරගනිති.+ 26  බෙන්හාවුන්+ බලවත් සතුන් නොවෙයි. එහෙත් උන් තම වාසස්ථාන තනාගන්නේ පර්වතයක් මතයි.+ 27  පළඟැටියන්ට+ රජෙක් නැත. එහෙත් උන් සියල්ලෝ කණ්ඩායම් වශයෙන් බෙදී පිළිවෙළකට ගමන් කරති.+ 28  හූණා+ තම පාදවලින් එල්ලීගෙන සිටියි. රජමාලිගාවල පවා ඌව දක්නට ලැබේ. 29  ආඩම්බර ලීලාවෙන් ගමන් කරන තුන්දෙනෙක් සිටිති. තේජාන්විතව ගමන් කරන තවත් අයෙක්ද සිටියි. 30  වනසතුන් අතරින් බලවතා සිංහයාය. ඌ කිසිවෙකුට භයෙන් හැරී එන්නේ නැත.+ 31  දඩබල්ලා හා එළුවා ගමන් කරන්නෙත් ආඩම්බර ලීලාවෙනි. රජෙකු තම සේනාව ඉදිරියේ ගමන් කරන්නේද එලෙසමය.+ 32  ඔබ ඔබවම උසස් කරගනිමින් අඥානව කටයුතු කර ඇත්නම්+ එසේත් නැත්නම්, එසේ කිරීමට කල්පනා කරමින් සිටින්නේ නම් කට පියාගෙන නිහඬ විය යුතුයි.+ 33  කිරි කලතන විට වෙඬරු* සෑදෙයි. නාසය තදින් මිරිකන විට ලේ ගලයි. කෝපය පිට කිරීමෙන් ආරවුල් ඇති වෙයි.+

පාදසටහන්

උත් 18:8හි පාදසටහන බලන්න.