සෙකරියා 7:1-14

7  දාරියුස්+ රජකම් කළ හතරවන අවුරුද්දේ නවවන මාසයේ එනම්, කිස්ලෙව් මාසයේ+ හතරවන දින යෙහෝවා දෙවිගෙන් සෙකරියාට පණිවිඩයක් ලැබුණේය.  ඒ කාලයේදී බෙතෙල් නගරයේ වැසියෝ, යෙහෝවා දෙවිට කන්නලව් කර+ ඔහුගේ අනුමැතිය ලබාගන්නා පිණිස ෂරෙෂෙර්, රෙගෙම්-මෙලෙක් සහ ඔහුගේ සේවකයන්ව පිටත් කර යැව්වෝය.  ස්වර්ගයේ සේනාවල අධිපති වන යෙහෝවා දෙවිගේ ගෘහයේ සිටි පූජකයන්ගෙන්+ හා අනාගතවක්තෘවරුන්ගෙන් මෙසේ අසා දැනගන්නා ලෙස ඔවුන්ට පවසා තිබිණ. “අපි මේ අවුරුදු ගණනාව පුරා කළාක් මෙන්+ මේ අවුරුද්දේ පස්වන මාසයෙත්+ නිරාහාරව සිට වැලපෙන්නද?”  එවිට ස්වර්ගයේ සේනාවල අධිපති වන යෙහෝවා දෙවි මට මෙසේ පැවසුවේය.  “දේශයේ සියලු වැසියන්ගෙනුත් පූජකයන්ගෙනුත් මෙසේ අසන්න. ‘ඔබ මේ අවුරුදු හැත්තෑව පුරා,+ පස්වන මාසයේදී හා හත්වන මාසයේදී+ නිරාහාරව සිට+ වැලපුණේ මා ඔබට පැවසූ නිසාද?+  ඔබ කා බී ප්‍රීතිමත් වූ අවස්ථාවලදීවත් මාව සිහි කළාද?  යෙරුසලමේ හා එහි අවට තිබුණු සියලු නුවරවලත් නෙගෙබ් පළාතේ+ හා පහත් බිම්වලත්*+ සෙනඟ සුව සේ කල් ගෙවූ කාලයේදී, අනාගතවක්තෘවරුන් මාර්ගයෙන් යෙහෝවා දෙවි වන මා පැවසූ දේවලට+ ඔබ කීකරු වුණාද? ඔබ කළ යුතුව තිබුණේ එය නොවෙයිද?’”+  යෙහෝවා දෙවි සෙකරියාට තවදුරටත් මෙසේ පැවසුවේය.  “ස්වර්ගයේ සේනාවල අධිපති වූ යෙහෝවා දෙවි වන මා ඔබට පවසන්නේ මෙයයි. ‘ඔබ විනිශ්චය කරද්දී සාධාරණය ඉටු කරන්න.+ එකිනෙකා සමඟ ප්‍රේමණීයව* කටයුතු කරන්න.+ එකිනෙකාට දයාව පෙන්වන්න.+ 10  වැන්දඹුවකටවත්+ පියා නැති දරුවෙකුටවත්+ ඔබ අතරේ වාසය කරන විදේශිකයෙකුටවත්+ පීඩාවට පත්ව සිටින කෙනෙකුටවත් කිසි අසාධාරණයක් නොකරන්න.+ එකිනෙකාට විරුද්ධව දුෂ්ට දේ කිරීමට කුමන්ත්‍රණය නොකරන්න.’+ 11  නමුත් ඔවුහු මා පැවසූ දේට ඇහුම්කන් දුන්නේ නැත.+ ඔවුහු මුරණ්ඩු ලෙස මට පිටු පෑවෝය.+ මා කතා කළ විට කන් වසාගත්තෝය.+ 12  ඔවුහු තමන්ගේ සිත්+ ගල් මෙන් දැඩි කරගත්තෝය.+ ස්වර්ගයේ සේනාවල අධිපති වූ යෙහෝවා දෙවි වන මාගේ බලය මාර්ගයෙන්+ අතීතයේ විසූ අනාගතවක්තෘවරුන්ට+ දුන් නීතියට ඔවුහු අකීකරු වූහ. ඔවුහු මාගේ වචනය ගැන කිසි තැකීමක් කළේ නැත. මේ නිසා ස්වර්ගයේ සේනාවල අධිපති ලෙස හඳුන්වන යෙහෝවා දෙවි වන මම ඔවුන් සමඟ අතිශයින් උදහස් වුණෙමි.”+ 13  “‘මා ඔවුන්ට කතා කළ විට ඔවුහු මට ඇහුම්කන් නොදුන්නෝය.+ එබැවින් ඔවුන් මට හඬගසන විට මමද ඔවුන්ට සවන් නොදුන්නෙමි.’+ එසේ පවසන මා ස්වර්ගයේ සේනාවල අධිපති වන යෙහෝවා දෙවිය. 14  ‘මම සුළිසුළඟක් යවා ඔවුන් නොදන්නා දේශවලට+ ඔවුන්ව විසුරුවාහැරියෙමි.+ ඔවුන් අත්හැර ගිය දේශයට කිසිවෙක් ආපසු හැරී ආවේ නැත. කිසිවෙක් ඒ මැදින් ගමන් කළේද නැත.+ අලංකාරව තිබුණු ඒ දේශය+ පාළු වී ගියේය. එයට සිදු වූ දේ දුටු සියලුදෙනාම පුදුමයට පත් වූහ.’”

පාදසටහන්

හෝ, “ෂෙපේලා.”
හෝ, “ළැදි ප්‍රේමය.”