විනිශ්චයකරුවෝ 1:1-36

1  යොෂුවාගේ මරණයෙන් පසු+ ඊශ්‍රායෙල්වරු රැස් වී යෙහෝවා දෙවිගේ මඟ පෙන්වීම් පතමින්,+ “කානානිවරුන්ට විරුද්ධව සටන් කරන්න අප අතරින් මුලින්ම යැවිය යුත්තේ කාවද” කියා දෙවිගෙන් විමසුවෝය.  යෙහෝවා දෙවි ඔවුන්ට මෙසේ පිළිතුරු දුන්නේය. “යූදා ගෝත්‍රයේ සෙනඟව යවන්න.+ දේශය අල්ලාගන්න මම ඔවුන්ට උපකාර කරන්නෙමි.”  එවිට යූදා ගෝත්‍රයේ සෙනඟ තම සහෝදර ගෝත්‍රය වූ සිමියොන් ගෝත්‍රයේ වැසියන්ට කතා කරමින්, “දාදු දමා අපට ලැබුණු ප්‍රදේශය අල්ලාගන්න ඔබත් අප සමඟ හවුල් වෙන්න.+ අපි එකතු වෙලා කානානිවරුන්ට විරුද්ධව සටන් කරමු. ඔබේ වාරයේදී අපිත් ඔබට උදව් කරන්නම්”+ කියා පැවසුවෝය. එහෙයින් සිමියොන් ගෝත්‍රයේ සෙනඟ ඔවුන් සමඟ ගියෝය.+  යෙහෝවා දෙවි සටනට ගිය යූදා ගෝත්‍රයේ සෙනඟට කානානිවරුන්වද පෙරිස්සිවරුන්වද යටත් කර දුන්නේය.+ ඔවුහු බෙෂෙක් නම් ස්ථානයේදී දසදහස්දෙනෙකුට පහර දී ඔවුන්ව පරාජය කළෝය.  අදොනි-බෙෂෙක් එහි සිටින බව දැනගත් ඔවුහු ඔහුට විරුද්ධව සටන් කර කානානිවරුන්ව+ හා පෙරිස්සිවරුන්ව+ පරාජය කළෝය.  නමුත් අදොනි-බෙෂෙක් ඔවුන් වෙතින් පලා ගියේය. එවිට ඔවුහු ඔහු පසුපස ලුහුබැඳ ගොස් ඔහුව අල්ලාගෙන ඔහුගේ අත් පාවල මාපටැඟිලි කපා දැමුවෝය.  එවිට අදොනි-බෙෂෙක් මෙසේ පැවසීය. “අත් පාවල මාපටැඟිලි නැති රජවරුන් හැත්තෑදෙනෙක් මා යටතේ ඉන්නවා. ඔවුන් ජීවත් වෙන්නේ මගේ මේසයෙන් වැටෙන කෑම අහුලාගෙන කාලයි. මම කළ ඒ දේ නිසයි දෙවි මට දඬුවම් දීලා තියෙන්නේ.”+ ඉන්පසු ඔවුහු ඔහුව යෙරුසලමට+ ගෙනාවෝය. එහිදී ඔහු මිය ගියේය.  යූදා ගෝත්‍රයේ සෙනඟ යෙරුසලමට විරුද්ධව යුද්ධ කර+ එය අල්ලාගත්තෝය. ඔවුහු එහි වැසියන්ව කඩුවෙන් මරා දමා නුවර ගිනිබත් කළෝය.  ඉන්පසු ඔවුහු කඳුකරයේද නෙගෙබ්+ හා ෂෙපේලා ප්‍රදේශවලද*+ වාසය කළ කානානිවරුන්ට විරුද්ධව සටනට ගියෝය. 10  පසුව ඔවුහු හෙබ්‍රොන්හි වාසය කළ කානානිවරුන්ට විරුද්ධවද යුද්ධ කර+ ෂේෂයි, අහිමාන් සහ තල්මයි යන අයව මරා දැමුවෝය.+ (හෙබ්‍රොන් නුවර කලින් හැඳින්වූයේ කිර්යත්-අර්බා ලෙසයි.)+ 11  එතැන් සිට ඔවුහු දෙබීර් බලා ගොස් එහි වැසියන්ට විරුද්ධව සටන් කළෝය.+ (දෙබීර් නුවර කලින් හැඳින්වූයේ කිර්යත්-සේෆර් ලෙසයි.)+ 12  එවිට කාලෙබ්,+ “කිර්යත්-සේෆර් නුවරට පහර දී එය අල්ලාගන්නා තැනැත්තාට මම මගේ දුව අක්සාව+ විවාහ කර දෙනවා”+ කියා පැවසීය. 13  කාලෙබ්ගේ බාල සොහොයුරු වූ+ කෙනෂ්ගේ පුත්+ ඔත්නියෙල්+ එය අල්ලාගත්තේය. එහෙයින් කාලෙබ් තම දියණිය වූ අක්සාව ඔහුට විවාහ කර දුන්නේය.+ 14  ඔත්නියෙල් ඇයව බූරුවෙකු පිට තබාගෙන තම නිවසට රැගෙන යමින් සිටියදී තම පියාගෙන් ඉඩමක් ලබාගන්න කියා අක්සා ඔහුට පෙරැත්ත කළාය. පසුව ඇය අත්පුඩි ගසා තම පියාට අඬගැසුවාය.+ එවිට කාලෙබ්, “මගේ දුවේ, ඔබට මොනවද ඕනේ” කියා ඇගෙන් ඇසුවේය. 15  ඇය මෙසේ පිළිතුරු දුන්නාය. “තාත්තේ, ඔබ මට දුන්නේ දකුණු දේශයේ තියෙන වියළි බිම් කොටසක්. මම කැමතියි ඔබේ ආශීර්වාදය ඇතුව ගුල්ලොත්-මායිම්* ප්‍රදේශයත් තෑග්ගක් හැටියට මට දෙනවා නම්.”+ එහෙයින් කාලෙබ් ඇයට ගුල්ලොත් ප්‍රදේශයේ ඉහළ කොටසද+ පහළ කොටසද දුන්නේය. 16  කේනිවරුන්ගෙන් පැවතෙන්නන්+ යූදා ගෝත්‍රයේ සෙනඟ සමඟ තාල වර්ගයේ ගස්වලට ප්‍රසිද්ධ වූ නුවරින්+ පිටත් වී යූදාහි පාළුකරයට ගියෝය. (එම කේනිවරු මෝසෙස්ගේ මාමණ්ඩිගෙන්+ පැවත ආ අයයි.) යූදා පාළුකරය පිහිටා තිබුණේ ආරද් නම් නුවරට+ දකුණින්ය. ඔවුහු එම ප්‍රදේශයෙහි ඒ වන විටත් පදිංචිව සිටි අය සමඟ වාසය කරන්න පටන්ගත්තෝය.+ 17  එහෙත් යූදා ගෝත්‍රයේ සෙනඟ තම සහෝදරයන් වූ සිමියොන් ගෝත්‍රයේ අය සමඟ දිගින් දිගටම තම සතුරන්ට විරුද්ධව සටනට ගියෝය. ඔවුහු ෂෙපත් නම් නුවරෙහි වාසය කළ කානානිවරුන්ට පහර දී එය සහමුලින්ම විනාශ කළෝය.+ එම නුවරේ නම හොර්මා*+ ලෙස වෙනස් කරන ලද්දේ ඒ නිසාය. 18  ඉන්පසු යූදා ගෝත්‍රයේ සෙනඟ ගාසා+ සහ ඒ අවට ප්‍රදේශයද අෂ්කෙලොන්+ සහ ඒ අවට ප්‍රදේශයද එක්‍රොන්+ සහ ඒ අවට ප්‍රදේශයද අල්ලාගත්තෝය. 19  ඔවුන්ට යෙහෝවා දෙවිගේ ආශීර්වාදය දිගටම ලැබුණු නිසා කඳුකර ප්‍රදේශය අත් පත් කරගැනීමට හැකි විය. එනමුත් තැනිතලාවල ජීවත් වූ වැසියන්ට යකඩ උල් සවි කළ+ යුධ රථ තිබූ නිසා+ ඔවුන්ව පන්නා දැමීමට යූදා ගෝත්‍රයේ සෙනඟට නොහැකි විය. 20  මෝසෙස් පොරොන්දු වූ පරිදි+ හෙබ්‍රොන් නුවර කාලෙබ්ට දෙනු ලැබූ විට ඔහු එම නුවරින් අනාක්ගේ පුත්‍රයන් තිදෙනාව+ පන්නා දැමුවේය. 21  යෙරුසලමෙහි වාසය කරමින් සිටි යෙබූසිවරුන්ව පන්නා දැමීමට බෙන්ජමින් ගෝත්‍රයේ සෙනඟට නොහැකි විය.+ එහෙයින් යෙබූසිවරු අද දක්වාම බෙන්ජමින් ගෝත්‍රයේ අය සමඟ යෙරුසලමෙහි වාසය කරති.+ 22  යෝසෙප් ගෝත්‍රයේ සෙනඟ+ බෙතෙල් නුවරට+ විරුද්ධව සටනට ගියෝය. ඒ සඳහා ඔවුන්ට යෙහෝවා දෙවිගේ උපකාරය ලැබිණ.+ 23  ඔවුහු බෙතෙල් නුවර ගැන තොරතුරු සොයා බැලීමට ඔත්තුකාරයන්ව යැව්වෝය.+ (බෙතෙල් නුවර කලින් හැඳින්වූයේ ලූෂ් යන නමින්ය.)+ 24  එම නුවරින් පිටතට එන මිනිසෙකුව දුටු ඔත්තුකරුවෝ ඔහුට මෙසේ පැවසුවෝය. “නුවරට ඇතුල් වෙන හැටි අපිට පෙන්වා දෙන්න. ඔබ එහෙම කළොත් අපි ඔබට කරුණාවන්තව සලකන්නම්.”+ 25  එම මිනිසා නුවරට ඇතුල් වන ආකාරය ඔවුන්ට පෙන්වා දුන්නේය. ඔවුහු නුවරට ඇතුල් වී එහි සිටි සියලුදෙනාව කඩුවෙන් මරා දැමුවෝය.+ නමුත් ඔවුන්ට උපකාර කළ ඒ මිනිසාටවත් ඔහුගේ පවුලේ අයටවත් ඔවුහු කිසිම හිරිහැරයක් කළේ නැත.+ 26  පසුව ඒ මිනිසා හිත්තීවරුන්ගේ දේශයට+ ගොස් එහි නුවරක් ගොඩනඟා එයට ලූෂ් යන නම තැබීය. අද දක්වාම එම නුවර හඳුන්වන්නේ එම නමින්ය. 27  බෙත්-ෂෙයාන්+ සහ ඒ අවට පිහිටි කුඩා නුවරවල්ද තයනක්+ සහ ඒ අවට පිහිටි කුඩා නුවරවල්ද දෝර්+ සහ ඒ අවට පිහිටි කුඩා නුවරවල්ද ඉබ්ලෙයාම්+ සහ ඒ අවට පිහිටි කුඩා නුවරවල්ද මෙගිද්දෝ+ සහ ඒ අවට පිහිටි කුඩා නුවරවල්ද අල්ලාගැනීමට මනස්සේ ගෝත්‍රයේ සෙනඟට+ නොහැකි විය. එමනිසා කානානිවරු එම ප්‍රදේශවල දිගටම වාසය කළෝය.+ 28  ඊශ්‍රායෙල්වරු බලවත් වූ විට+ ඔවුහු කානාන් වැසියන්ව මෙහෙකාරකමට ගත්තෝය.+ නමුත් ඊශ්‍රායෙල්වරු ඔවුන්ව සම්පූර්ණයෙන්ම දේශයෙන් පන්නා දැමුවේ නැත.+ 29  ගෙෂෙර්හි වාසය කළ කානානිවරුන්ව පන්නා දැමීමට එෆ්‍රායිම් ගෝත්‍රයේ සෙනඟටද නොහැකි විය. එමනිසා කානානිවරු ඔවුන් සමඟ ගෙෂෙර්හි දිගටම වාසය කළෝය.+ 30  සෙබ්‍යූලන් ගෝත්‍රයේ සෙනඟටද+ කිට්‍රොන්හි හා නහලොල්හි+ විසූ කානානිවරුන්ව පලවාහැරීමට නොහැකි විය. එහෙයින් කානානිවරුන් ඔවුන් සමඟ වාසය කළ අතර+ ඔවුහු කානානිවරුන්ව මෙහෙකාරකමට ගත්තෝය.+ 31  ආෂෙර් ගෝත්‍රයේ සෙනඟටද+ අක්කෝ, සීදොන්,+ අහ්ලාබ්, අක්ෂිබ්,+ හෙල්බා, අපික්+ සහ රෙහොබ්+ යන නුවරවල විසූ කානානිවරුන්ව පන්නා දැමීමට නොහැකි විය. 32  එමනිසා ආෂෙර් ගෝත්‍රයේ සෙනඟ ඔවුන් සමඟ ඒ දේශයෙහි වාසය කරති.+ 33  බෙත්-ෂෙමෙෂ් සහ බෙත්-අනාත්+ යන නුවරවල වැසියන්ව පන්නා දැමීමට නොහැකි වූ නෆ්තලී ගෝත්‍රයේ සෙනඟද+ එහි වාසය කළ කානානිවරුන් අතර ජීවත් වූහ.+ ඔවුහු කානානිවරුන්ව මෙහෙකාරකමට ගත්තෝය.+ 34  දාන් ගෝත්‍රයේ සෙනඟට+ තැනිතලාවට පැමිණ පදිංචි වීමට අමෝරිවරු ඉඩ දුන්නේ නැත.+ ඒ නිසා ඔවුහු කඳුකරයේම ජීවත් වූහ. 35  අමෝරිවරු දිගටම හෙරෙස් කන්දේද ආයාලොන්+ සහ ෂායල්බිම්හිද+ වාසය කළෝය. නමුත් යෝසෙප් ගෝත්‍රයේ සෙනඟ අමෝරිවරුන්ට වඩා බලවත් වූ නිසා ඔවුන්ව පරාජය කර ඔවුන්ව මෙහෙකාරකමට ගත්තෝය.+ 36  අමෝරිවරුන්ට හිමිව තිබූ ප්‍රදේශය අක්‍රබ්බිම් නම් බෑවුමේ+ හා සේලා නම් ස්ථානයේ සිට ඉහළට විහිදී ගියේය.

පාදසටහන්

හෝ, “පහත් බිම්වලද.”
තේරුම, “දිය පොකුණු.”
තේරුම, “සහමුලින්ම විනාශ කළ ස්ථානයක්.”