ලෙවී කතාව 22:1-33

22  යෙහෝවා දෙවි මෝසෙස්ට නැවත මෙසේ කීවේය.  “මා යෙහෝවා දෙවිය. ඊශ්‍රායෙල් සෙනඟ පරිශුද්ධ දේවල් ලෙස මට කැප කරන කිසිම දෙයකට+ අගෞරවනීය ලෙස නොසලකන්න. එය මගේ ශුද්ධ නාමයට කරන නින්දාවකි.+ ඒ බව ආරොන්ට සහ ඔහුගේ පුත්‍රයන්ට කියන්න.  ඔබ ඔවුන්ට මෙසේ කියන්න. ‘ඔබේ සියලු පරම්පරාවලදී ඔබෙන් පැවත එන ඕනෑම කෙනෙකු අපවිත්‍රව සිටියදී,+ ඊශ්‍රායෙල් සෙනඟ යෙහෝවා දෙවි වන මට පරිශුද්ධ දේවල් ලෙස කැප කළ දෙයක් අසලට ආවොත් එම තැනැත්තාව මරා දැමිය යුතුයි. මා යෙහෝවා දෙවිය.  ආරොන්ගෙන් පැවත එන පුරුෂයෙකුට ලාදුරු රෝගය වැලඳී ඇත්නම්+ හෝ ඔහුගේ ලිංගේන්ද්‍රියෙන් ශ්‍රාවයක් ගලනවා නම්+ හෝ ඔහු පවිත්‍ර තත්වයකට පත් වන තෙක් ශුද්ධ දේවලින් නොකෑ යුතුයි.+ මළ සිරුරක් අල්ලා අපවිත්‍ර තත්වයක සිටින යමෙකුව ස්පර්ශ කළ කෙනෙකුටද+ ශුක්‍රාණු පිට වූ කෙනෙකුටද+ එයින් කෑමට අවසර නැත.  අපවිත්‍රයයි ප්‍රකාශ කළ කුඩා සතෙකුව ස්පර්ශ කළ කෙනෙකු+ හෝ අපවිත්‍රව සිටින මිනිසෙකුව ස්පර්ශ කළ කෙනෙකු+ හෝ ශුද්ධ දෙයින් නොකෑ යුතුයි.  එවැනි අපවිත්‍ර දේවල් ස්පර්ශ කරන කවුරු නමුත් ශුද්ධ දේවලින් කිසිවක් නොකෑ යුතුයි. ඔහු නාගෙන සවස් වන තුරු අපවිත්‍ර කෙනෙකු ලෙස වෙන්ව සිටිය යුතුයි.+  ඉර බැස ගිය පසු ඔහු පවිත්‍ර වන්නේය. ඉන්පසු ඔහුට ශුද්ධ දේවලින් කන්න පුළුවන. මන්ද එය ඔහුට අයිති කොටසය.+  වෙනත් සතෙකු විසින් මරා දමනු ලැබූ සතෙකුගේ මස් හෝ වෙනයම් ආකාරයකින් මිය ගිය සතෙකුගේ මස් හෝ ඔහු නොකෑ යුතුයි. ඔහු එසේ කළොත් අපවිත්‍ර වන්නේය.+ මා යෙහෝවා දෙවිය.  “‘මා පූජකයන්ට දුන් වගකීම් ඔවුන් නිසි ආකාරයට ඉටු කළ යුතුයි. පූජකයන් තම වගකීම් පැහැරහැර ශුද්ධ දේ කෙලෙසා පව් කළොත් ඔවුහු අනිවාර්යයෙන්ම මිය යන්නෝය.+ මන්ද යෙහෝවා දෙවි වන මම පරිශුද්ධ සේවය සඳහා ඔවුන්ව වෙන් කර තබන්නෙමි. 10  “‘පූජක පවුලට අයිති නොවන කිසිවෙකු ශුද්ධ දේවලින් නොකෑ යුතුයි.+ පූජකයෙකු සමඟ ජීවත් වන විදේශිකයෙකුවත් කුලීකරුවෙකුවත් ශුද්ධ දේවලින් නොකෑ යුතුයි. 11  නමුත් පූජකයෙකු මිල දී ගත් දාසයෙකුට හෝ ඔහුගේ නිවසේ උපන් දාසයෙකුට හෝ පූජකයන්ට අයිති කොටසෙන් කන්න පුළුවන.+ 12  පූජකයෙකුගේ දුව පූජක පවුලට අයිති නොවන කෙනෙකු සමඟ විවාහ වුණොත් පරිත්‍යාග කළ ශුද්ධ දේවලින් ඇය නොකෑ යුතුයි. 13  නමුත් පූජකයෙකුගේ දුව දරුවන් නොලැබ වැන්දඹුවක වුණොත් හෝ ඇගේ ස්වාමිපුරුෂයා ඇයව දික්කසාද කළොත් හෝ ඇයට නැවත ඇගේ පියාගේ නිවසට යා හැකියි.+ යෞවන කාලයේදී මෙන් තම පියාට අයිති කොටසෙන් ඇයට කන්න පුළුවන.+ නමුත් පූජක පවුලට අයිති නොවන කිසිවෙකු එයින් නොකෑ යුතුයි. 14  “‘පූජක පවුලට අයිති නොවන කෙනෙකු වැරදීමකින් ශුද්ධ දෙයක් කෑවොත් ඔහු වන්දියක් ගෙවිය යුතුයි.+ ඔහු කෑ දේට අමතරව ශුද්ධ දෙයෙහි මුළු වටිනාකමෙන් පහෙන් කොටසක්ද+ පූජකයාට දිය යුතුයි. 15  ඊශ්‍රායෙල් සෙනඟ යෙහෝවා දෙවි වන මට පරිත්‍යාග කරන ශුද්ධ දේවලට පූජකයන් අගෞරව නොකළ යුතුයි.+ 16  සෙනඟට ශුද්ධ දේවල් කෑමට පූජකයන් ඉඩ නොදිය යුතුයි. මන්ද එසේ කළොත් ඔවුන් නිසා සෙනඟ පිට දඬුවම් පැමිණෙනු ඇත. යෙහෝවා දෙවි වන මම පූජකයන්ව ශුද්ධ සෙනඟක් ලෙස වෙන් කර තබන්නෙමි.’” 17  යෙහෝවා දෙවි තවදුරටත් මෝසෙස්ට මෙසේ කීවේය. 18  “ආරොන්ටද ඔහුගේ පුත්‍රයන්ටද ඊශ්‍රායෙල් පුත්‍රයන්ටද මෙසේ කියන්න. ‘ඊශ්‍රායෙල් ජාතිකයෙකු හෝ ඊශ්‍රායෙල්හි ජීවත් වන විදේශිකයෙකු භාරයක් ලෙස+ හෝ සිය කැමැත්තෙන්ම කරන පූජාවක් ලෙස+ හෝ යෙහෝවා දෙවි වන මට දවන පූජාවක් ඔප්පු කරන විට+ 19  ගව රැළෙන් හෝ එළු බැටළු රැළෙන් හෝ නිකැළැල්+ පිරිමි සතෙකුව ගෙනා යුතුයි. දෙවිගේ අනුමැතිය ලබාගැනීමට නම්+ උන් නිකැළැල් සතුන් විය යුතුයි. 20  කැළැලක් ඇති කිසිම සතෙකුව ඔප්පු නොකරන්න.+ මන්ද ඔබේ අතින් පිළිගන්වන එවැනි පූජාවලට දෙවිගේ අනුමැතිය නොලැබේ. 21  “‘යමෙකු භාරයක්+ ලෙස හෝ සිය කැමැත්තෙන්ම කරන පූජාවක් ලෙස හෝ යෙහෝවා දෙවි වන මට හවුල් පූජාවක්+ ඔප්පු කරනවා නම් දෙවිගේ අනුමැතිය ලබාගැනීම සඳහා ඔහු ගව රැළෙන් හෝ එළු බැටළු රැළෙන් හෝ නිකැළැල් සතෙකුව ගෙනා යුතුයි. එම සතා තුළ කිසි දෝෂයක් නොතිබිය යුතුයි. 22  අන්ධ වූ හෝ කකුල් කැඩුණු හෝ තුවාල වූ හෝ සමේ ගඩු හෝ දද හෝ දිලීර රෝගයක් හෝ+ ඇති කිසි සතෙකුව යෙහෝවා දෙවි වන මට ඔප්පු නොකරන්න. එවැනි සතෙකුව කිසිවිටෙකත් පූජාසනය මත යෙහෝවා දෙවි වන මට ඔප්පු නොකළ යුතුයි.+ 23  අංගවිකල වූ+ ගොනෙකුව හෝ බැටළුවෙකුව හෝ සිය කැමැත්තෙන් දෙන පූජාවක් ලෙස ඔප්පු කළ හැක. නමුත් භාරයක් ලෙස එවැනි සතෙකුව ඔප්පු කළොත් එය පිළිගනු නොලැබේ. 24  එහෙත් වෘෂණ කෝෂ+ තුවාල වුණු හෝ තැළුණු හෝ අයින් කර දැමූ හෝ කපා දැමූ හෝ සතෙකුව යෙහෝවා දෙවි වන මට ඔප්පු නොකළ යුතුයි. ඔබේ දේශයේ එවැනි සතෙකුව පූජාවක් ලෙස ඔප්පු නොකරන්න. 25  විදේශිකයෙකු එවැනි සතෙකුව පූජාවක් ලෙස ගෙන ආවොත් දෙවිට පිළිගන්වන ආහාර ලෙස ඔබ ඌව ඔප්පු නොකළ යුතුයි. මන්ද උන් දෝෂ සහිත+ සතුන්ය. උන් තුළ යම් කැළැලක් ඇති බැවින් උන් අපවිත්‍රය. ඔබේ අතින් පිළිගන්වන එවැනි පූජාවකට දෙවිගේ අනුමැතිය+ නොලැබේ.’” 26  යෙහෝවා දෙවි මෝසෙස්ට තවදුරටත් මෙසේ කීවේය. 27  “වස්සෙකු හෝ බැටළු පැටවෙකු හෝ එළු පැටවෙකු හෝ ඉපදුණොත් ඌ දවස් හතක් යන තෙක් උගේ මව සමඟ සිටිය යුතුයි.+ නමුත් අටවන දවසෙන් පසු ඌව යෙහෝවා දෙවි වන මට ඔප්පු කළ හැක. ගින්නෙන් ඔප්පු කරන ලද එම පූජාව සතුටින් පිළිගනු ලැබේ. 28  ගොනෙකු සමඟ උගේ පැටියාව හෝ බැටළුවෙකු සමඟ උගේ පැටියාව හෝ එකම දිනයේදී නොමැරිය යුතුයි.+ 29  “ඔබ යෙහෝවා දෙවි වන මට ස්තුති පූජාවක් ඔප්පු කරනවා+ නම් ඔබට අනුමැතිය ලබාගැනීමට හැකි වන අයුරින් එම පූජාව ඔප්පු කරන්න. 30  ඔබ පූජාව ඔප්පු කරන දවසේදීම එයින් අනුභව කළ යුතුයි.+ පසුවදා උදෑසන වන තෙක් එයින් කිසිවක් ඉතුරු නොකළ යුතුයි.+ මා යෙහෝවා දෙවිය. 31  “ඔබ මගේ ආඥාවලට කීකරු වෙමින් ඒවා අනුව ජීවත් විය යුතුයි.+ මා යෙහෝවා දෙවිය. 32  ඔබ මගේ ශුද්ධ නාමය නොකෙලෙසිය යුතුයි.+ ඊශ්‍රායෙල් සෙනඟ මා ඉතා ශුද්ධ කෙනෙකු ලෙස සැලකිය යුතුයි.+ ඔබව ශුද්ධ සෙනඟක් ලෙස වෙන් කර තබන මා යෙහෝවා දෙවිය.+ 33  ඔබව ඊජිප්තු දේශයෙන් පිටතට ගෙනාවේ මමය. මම ඔබේ දෙවි බව ඔබට ඔප්පු කර පෙන්වන පිණිස එසේ කළෙමි.+ මා යෙහෝවා දෙවිය.”

පාදසටහන්