ලූක් 4:1-44

4  දෙවි තම බලයෙන් යේසුස්ට දුන් මඟ පෙන්වීම්වලට එකඟව ඔහු යොර්දාන් ගඟ අසලින් පිටත් වී පාළුකරයට ගියේය. ඔහු තුළ දෙවිගේ බලය ප්‍රබලව ක්‍රියාත්මක විය. පාළුකරයේ විවිධ ස්ථානවලට ගිය ඔහු,+  දවස් හතළිහක්+ එහි ගත කළේය. යක්ෂයා ඔහුව වරදකට හසු කරගන්න+ උත්සාහ කළේ එහිදීය. ඒ දවස් හතළිහ පුරාම ඔහු කිසිම ආහාරයක් නොගත් නිසා ඔහුට කුසගින්නක් දැනිණ.  එවිට යක්ෂයා, “ඔබ දෙවිගේ පුත්‍රයෙකු නම් මේ ගල රොටියක් කරන්න” කියා ඔහුට පැවසුවේය.  නමුත් යේසුස් ඔහුට මෙසේ පිළිතුරු දුන්නේය. “‘මිනිසාගේ ජීවිතය රඳා පවතින්නේ කෑම වේලක් මත පමණක් නොවේ’ කියා ලියා තිබෙනවා.”+  එවිට යක්ෂයා ඔහුව උස් තැනකට ගෙනැවිත් ලොව පුරා පිහිටුවා ඇති සියලු රාජ්‍යයන් එක සැණින්ම පෙන්වා,  ඔහුට මෙසේ කීවේය. “මේ සෑම දෙයක්ම තිබෙන්නේ මගේ බලය යටතේයි. එහි ගෞරවයත් තේජසත් හිමි වී තිබෙන්නේ මටයි. මා කැමති කෙනෙකුට ඒවා දෙන්න මට පුළුවන්.+ දැන් ඒ දේවල් ඔබට ලබා දෙන්න මම කැමතියි.+  එමනිසා ඔබ එක වරක්+ මට නමස්කාර කළොත් මේ සියල්ල ඔබට අයිති වෙයි.”  යේසුස් එවිට මෙසේ පිළිතුරු දුන්නේය. “‘ඔබ නමස්කාර කළ යුත්තේ ඔබේ දෙවි වන යෙහෝවාටයි.+ ඔබේ පරිශුද්ධ සේවය පිරිනැමිය යුත්තේ ඔහුට පමණයි’ කියා ලියා තිබෙනවා.”+  ඉන්පසු ඔහු යේසුස්ව යෙරුසලමට ගෙන ගියේය. එහිදී ඔහුව දේවමාලිගාවේ පවුර මුදුනට ගෙන ගොස්,+ “ඔබ දෙවිගේ පුත්‍රයෙකු නම් මෙතැනින් පහතට පනින්න.+ 10  මන්ද ලියා තිබෙන්නේ මෙසේයි. ‘ඔහු තම දූතයන්ට ඔබව ආරක්ෂා කිරීමට අණ දෙන්නේය.+ 11  එවිට ඔබේ පය කිසිවිටකත් ගලක නොවදින පිණිස ඔවුහු සිය අත්වලින් ඔබව උසුලනවා ඇත’”+ කියා ඔහුට කීවේය. 12  එවිට යේසුස් ඔහුට මෙසේ පිළිතුරු දුන්නේය. “‘ඔබේ දෙවි වන යෙහෝවා ඔබ වෙනුවෙන් මැදිහත් වෙයිද නැද්ද කියා පරීක්ෂා නොකළ යුතුයි’ කියාද සඳහන් වී තිබෙනවා.”+ 13  යේසුස්ව වරදකට හසු කරගන්න යක්ෂයා දැරූ ඒ වෑයම එතැනින් අවසන් විය. ඔහු තවත් සුදුසු අවස්ථාවක් පැමිණෙන තෙක්+ ඔහුගෙන් අහක්ව ගියේය. 14  ඉන්පසු දෙවි තම බලයෙන් යේසුස්ට මඟ පෙන්වූ නිසා ඔහු නැවතත් ගලීලයට ගියේය.+ ඒ අවට මුළු ප්‍රදේශය පුරාම ඔහු ගැන යහපත් දේවල් බොහොමයක් පැතිර ගියේය.+ 15  ඔහු ඔවුන්ගේ සිනගෝගවලදී ඉගැන්වූ අතර සියලුදෙනා ඔහුට ගෞරව කළෝය.+ 16  ඉන්පසු යේසුස් තමා ඇතිදැඩි වූ නාසරෙත් නුවරට පැමිණියේය.+ සබත් දවසක් වූ එදින සුපුරුදු පරිදි ඔහු සිනගෝගයට ඇතුල් වී,+ ශුද්ධ ලියවිල්ලෙන් කොටසක් කියවීමට සිටගත්තේය. 17  ඔහුගේ අතට දෙනු ලැබුවේ අනාගතවක්තෘ යෙසායාගේ ලියවිල්ලයි. ඔහු එය දිගහැර මතු දැක්වෙන කොටස සොයාගත්තේය. 18  “යෙහෝවා දෙවිගේ බලය+ මට ලැබී ඇත. මන්ද ඔහු දිලිඳුන්ට ශුභාරංචිය ප්‍රකාශ කරන්න මාව අභිෂේක කළේය. ඔහු මාව එවා තිබෙන්නේ වහලුන්ට නිදහස ලැබෙන බවත් අන්ධයන්ට නැවත පෙනීම ලැබෙන බවත් දේශනා කිරීමට සහ තැළී පීඩිතව සිටින අයව නිදහස් කිරීමටයි.+ 19  එමෙන්ම යෙහෝවා දෙවිගේ කරුණාවේ අවුරුද්ද ගැන දේශනා කිරීමටයි.”+ 20  ඔහු එය කියවීමෙන් පසු ලියවිල්ල අකුළා, එය නැවත සේවකයාට දී ඉඳගත්තේය. ඒ අවස්ථාවේදී සිනගෝගයේ සිටි සියලුදෙනාම ඔහු දෙස බලාගෙන සිටියේ මහත් උනන්දුවකිනි. 21  ඉන්පසු ඔහු, “ශුද්ධ ලියවිල්ලෙන් ඔබට ඇහෙන්න කියෙවූ එම කොටස ඔබේ ඇස් ඉදිරිපිටම දැන් ඉටු වෙනවා”+ කියා ඔවුන්ට කීවේය. 22  එවිට ඒ සියලුදෙනාම ඔහු ගැන ප්‍රශංසාත්මක ලෙස කතා කරමින් ඔහු පැවසූ සිත්ගන්නා දේවල් ගැන පුදුම වී,+ “මොහු යෝසෙප්ගේ පුතෙක් නේද”+ කියා ඇසුවෝය. 23  එය අසා ඔහු මෙසේ පැවසුවේය. “‘වෛද්‍යතුමනි,+ ඔබවම සුව කරගන්න’ යන කියමන ඔබත් අසා ඇති. සමහරවිට ඔබ එය මට අදාළ කර, ‘කපර්ණවුමෙහි+ ඔබ කළා කියා අපට ආරංචි වූ දේවල්+ ඇයි ඔබේම ගම් පළාතෙත් කරන්නේ නැත්තේ’+ කියා ඔබ සිතනවා ඇති.” 24  ඔහු මෙසේද පැවසුවේය. “ඇත්තෙන්ම මා ඔබට කියන්නේ, කිසි අනාගතවක්තෘවරයෙකුට තමාගේම ගම් පළාතේ පිළිගැනීමක් නැති බවයි. 25  උදාහරණයක් හැටියට එලියාගේ දවස්වලදී සිදු වූ දෙයක් ගැන ඔබට මතක් කරන්න කැමතියි. අවුරුදු තුනකුත් මාස හයක් පුරා ඊශ්‍රායෙල් දේශයට වැසි වැටුණේ නැති නිසා ඒ මුළු දේශය පුරාම මහත් සාගතයක් ඇති වුණා. ඒ කාලයේදී උපකාර අවශ්‍යව තිබූ වැන්දඹුවන් බොහෝදෙනෙක් ඊශ්‍රායෙල් දේශයේ සිටියා.+ 26  නමුත් ඒ ස්ත්‍රීන්ගේ එක් නිවසකටවත් යන්න කියා එලියාට කිව්වේ නැහැ. ඒ වෙනුවට ඔහුව යැව්වේ සීදොන් දේශයේ සාරෆෙත් නුවරෙහි සිටි වැන්දඹුවකගේ නිවසටයි.+ 27  ඒ වගේම අනාගතවක්තෘ එලිෂාගේ කාලයේදී ඊශ්‍රායෙලයෙහි ලාදුරු රෝගීන් බොහෝදෙනෙක් සිටියත් ඒ කිසි කෙනෙකුව සුව කරනු ලැබුවේ නැහැ. ඒ වෙනුවට ඔහු පවිත්‍ර කළේ සිරියාවේ සිටි නාමන්ව පමණයි.”+ 28  ඒ දේවල් ඇසූ සිනගෝගයේ සිටි සියල්ලන් තුළ මහත් කෝපයක් ඇති විය.+ 29  ඔවුහු නැඟිට, ඉක්මනින්ම ඔහුව නුවරින් පිටතට රැගෙන ගොස් තම නුවර ගොඩනඟා තිබූ කන්දේ කෙළවරට ඔහුව ගෙන ගියෝය. ඔවුන් එසේ කළේ ඔහුව එයින් පහතට තල්ලු කර දැමීමේ අදහසිනි.+ 30  නමුත් ඔහු කෙසේ හෝ සෙනඟ අතරින් ගැලවී එතැනින් ගියේය.+ 31  පසුව ඔහු ගලීලයේ පිහිටි නුවරක් වූ කපර්ණවුමට පැමිණියේය.+ ඔහු සබත් දවසේදී එහි සිටි සියලුදෙනාට උගන්වමින් සිටියේය. 32  එහිදීත් ඔහුට සවන් දෙමින් සිටි අය ඔහු ඉගැන්වූ ආකාරය ගැන මවිතයට පත් වූහ.+ මන්ද ඔහු දෙවි මත රඳා සිටිමින් කතා කළේය.+ 33  මේ අතර යේසුස් සිනගෝගයේ සිටි විට භූතයෙකු වැහී සිටි මිනිසෙක්+ මහත් හඬින් කෑගසා මෙසේ කීවේය. 34  “නාසරෙත් නුවරින් ඇවිත් සිටින යේසුස්,+ ඔබ අපට කරදර කරන්නේ ඇයි?+ ඔබ ආවේ අපව විනාශ කරන්නද? ඔබ කවුද කියා මම හොඳටම දන්නවා.+ දෙවි විසින් එවා ඇති ශුද්ධ තැනැත්තා ඔබයි.”+ 35  නමුත් යේසුස් ඒ මිනිසාට වැහී සිටි භූතයාට තදින් අණ කරමින්, “නිහඬ වෙන්න. ඔය මිනිසාගෙන් පිටතට එන්න” කියා කීවේය. එවිට ඒ භූතයා රැස්ව සිටි සියලුදෙනා ඉදිරියෙහිම ඒ මිනිසාව බිම වැට්ටුවේය. නමුත් ඔහුට කිසි හානියක් සිදු නොකර ඔහුගෙන් පිටතට ආවේය.+ 36  එය දුටු සියලුදෙනා විස්මයට පත් වී, “මොනවාද මොහු මේ කියන්නේ? ඔහු භූතයන්ට අණ දෙන්නේ මහත් අධිකාරියක් හා බලයක් තිබෙන කෙනෙක් වගෙයි. ඔහු අණ කළ විගස ඔවුන් පිටතට එනවා” කියා එකිනෙකා අතරේ කතා වෙන්න පටන්ගත්තෝය.+ 37  එහෙයින් ඔහු ගැනත් ඔහු කළ දේවල් ගැනත් ඒ අවට ප්‍රදේශය පුරාම අස්සක් මුල්ලක් නෑර පැතිර ගියේය.+ 38  ඉන්පසු ඔහු සිනගෝගයෙන් පිටත් වී, සීමොන්ගේ නිවසට පැමිණියේය. සීමොන්ගේ බිරිඳගේ මවට තද උණක් වැලඳී, ඇය දැඩි සේ රෝගාතුරව සිටියාය. ඇය වෙනුවෙන් යමක් කරන්න කියා ඔවුන් ඔහුගෙන් ඉල්ලා සිටි නිසා,+ 39  ඔහු ඇය ළඟට ගොස් ඇගේ උණ රෝගය සුව කළේය.+ ඇය විගස නැඟිට, ඔවුන්ට සංග්‍රහ කරන්න පටන්ගත්තාය.+ 40  හිරු බැස යද්දී අවට සිටි සියලුදෙනාම තමන් ළඟ සිටි රෝගීන්ව ඔහු වෙතට ගෙන ආවෝය. විවිධ රෝග වැලඳී සිටි ඒ සෑම කෙනෙකු පිටම තම අත් තබමින් ඔහු ඔවුන්ව සුව කළේය.+ 41  භූතයෝද, “ඔබ දෙවිගේ පුත්‍රයායි”+ කියා මොරගසමින් බොහෝදෙනෙකුගෙන් පිටතට පැමිණියෝය.+ නමුත් ඔහු ඔවුන්ට තදින් කතා කර ඔවුන්ව නිහඬ කළේය.+ ඔහු එසේ කළේ ඔහු ක්‍රිස්තුස්+ බව ඔවුන් දැන සිටි නිසාය.+ 42  පසු දින පාන්දරින්ම ඔහු පාළු තැනකට ගියේය.+ නමුත් සමූහයා මහත් උත්සාහයක් දරමින් ඔහුව සොයා ගොස් ඔහු සිටි තැනට පැමිණ, තමන්ව අත්හැර නොයන්න කියා පවසමින් ඔහුව නවත්වාගැනීමට උත්සාහ දැරූහ. 43  නමුත් ඔහු ඔවුන්ට මෙසේ පැවසුවේය. “දෙවිගේ රාජ්‍යය ගැන ශුභාරංචිය වෙනත් නුවරවලත් දේශනා කළ යුතුයි. මාව එවා තිබෙන්නේ ඒ සඳහායි.”+ 44  එහෙයින් ඔහු යුදයේ නුවරවල සංචාරය කරමින් එහි සිනගෝගවල දේශනා කළේය.+

පාදසටහන්