ලූක් 20:1-47

20  දිනක් යේසුස් දේවමාලිගාවේ සිටි සෙනඟට උගන්වමින් හා ශුභාරංචිය ප්‍රකාශ කරමින් සිටියදී නායක පූජකයෝද නීතිය පිටපත් කරන්නෝද වැඩිමහල්ලන් සමඟ ඔහු ළඟට ඇවිත්,+  “ඔබට මේ දේවල් කරන්න අවසර තිබෙනවාද? කවුද ඔබට ඒ සඳහා අවසර දුන්නේ”+ කියා ඔහුගෙන් ඇසුවෝය.  ඔහු මෙසේ පිළිතුරු දුන්නේය. “මමත් කැමතියි ඔබෙන් ප්‍රශ්නයක් අසන්න. මට මේ දේ කියන්න.+  යොහන් මිනිසුන්ව බව්තීස්ම කළේ දෙවිගේ අවසරයෙන්ද නැත්නම් මිනිසුන්ගේ අවසරයෙන්ද?”+  ඔවුහු තම තමන් අතරේ මෙසේ කතා කරගත්හ. “අප ‘දෙවිගේ අවසරයෙන්’ කියා කිව්වොත්, ‘ඔබ ඔහුව විශ්වාස නොකළේ ඇයි’ කියා ඔහු අපෙන් අසයි.+  නමුත් අප, ‘මිනිසුන්ගේ අවසරයෙන්’ කියා පැවසුවොත් මිනිස්සු ඇවිත් අපට ගල් ගසයි.+ මන්ද සියලුදෙනාම සිතාගෙන සිටින්නේ යොහන්+ අනාගතවක්තෘවරයෙක්+ කියායි.”  එහෙයින් එම ප්‍රශ්නයට පිළිතුර තමන් නොදන්නා බව ඔවුහු පැවසූහ.  යේසුස්ද, “එසේනම් මම මේ දේවල් කරන්නේ කාගේ අවසරයෙන්ද කියා මමත් ඔබට කියන්නේ නැහැ”+ කියා ඔවුන්ට කීවේය.  ඉන්පසු ඔහු ජනයාට මෙම උපමාව විස්තර කළේය. “මිදිවත්තක් වැවූ එක්තරා මිනිසෙක් සිටියා.+ ඔහු වැවිලිකරුවන් පිරිසකට එය බද්දට දී දිගු කාලයකට පිටරට ගියා.+ 10  පලදාව නෙළන කාලය පැමිණි විට මිදිවත්තේ පලදාවෙන් යමක් ලබාගැනීමට+ ඔහු ඒ වැවිලිකරුවන් වෙතට+ දාසයෙකුව යැව්වා.+ නමුත් වැවිලිකරුවන් ඔහුට තළා ඔහුව ආපසු යැව්වේ හිස් අතිනුයි.+ 11  ඔහු තවත් දාසයෙකුව ඔවුන් වෙතට යැව්වා. ඔවුන් මේ දාසයාටත් නින්දිත ලෙස සලකා ඔහුට තළා ඔහුවත් යැව්වේ හිස් අතිනුයි.+ 12  ඔහු තුන්වෙනි වතාවටත් දාසයෙකුව යැවූ විට+ ඔවුන් ඔහුට තුවාල කර පිටතට ඇද දැමුවා. 13  මේ දේත් ආරංචි වූ පසු මිදිවත්තේ අයිතිකරු, ‘මම දැන් මොනවාද කරන්නේ? මම මගේ ප්‍රේමණීය පුත්‍රයාව ඔවුන් වෙතට යවනවා.+ සමහරවිට ඔවුන් ඔහුට ගරු කරයි’ කියා පැවසුවා. 14  නමුත් වැවිලිකරුවන් ඔහුව දුටු විට තම තමන් අතරේ කතා කරගනිමින්, ‘මේ ඉන්නේ උරුමක්කාරයා. අපි මොහුව මරා දමමු. එතකොට ඔහුගේ උරුමය අපටයි අයිති වන්නේ’ කියා පැවසුවා.+ 15  එසේ කියා ඔවුන් ඔහුව අල්ලාගෙන මිදිවත්තෙන් පිටතට ඇද දමා+ මරා දැමුවා.+ දැන් මිදිවත්තේ අයිතිකරු ඔවුන්ට කුමක් කරයිද?+ 16  ඔහු ඇවිත් ඒ වැවිලිකරුවන්ව විනාශ කර මිදිවත්ත වෙනත් මිනිසුන් පිරිසකට භාර දෙයි.”+ මෙයට සවන් දුන් අය, “ඒ වගේ දෙයක් කවදාවත් සිදු නොවේවා” කියා පැවසූහ. 17  නමුත් යේසුස් ඔවුන් දෙස බලා මෙසේ කීවේය. “එසේනම්, ‘ඉදි කරන්නන් ඉවත දැමූ ඒ ගල+ ප්‍රධාන ගල වී ඇත’+ කියා ලියා තිබෙන දෙයින් අදහස් කරන්නේ කුමක්ද? 18  එම ගල පිට යම් කෙනෙක් වැටුණොත් ඔහු සුනුවිසුනු වී යයි.+ එය යමෙකු පිට වැටුණු විටද+ එය ඔහුව සුනුවිසුනු කර දමයි.”+ 19  යේසුස් එම උපමාව කිව්වේ තමන් ගැන බව වටහාගත්+ නීතිය පිටපත් කරන්නෝ සහ නායක පූජකයෝ ඒ පැයේදීම ඔහුව අල්ලාගැනීමට මඟක් සෙවූහ. නමුත් ඔවුන් රැස්ව සිටි සෙනඟට බියෙන් සිටි නිසා ඔවුන්ට කිසිම දෙයක් කරන්න බැරි විය. 20  යේසුස් කරන දේවල් හොඳින් බලා සිටි ඔවුහු, යම් පිරිසකට රහසින් මුදල් ගෙවා ඔවුන්ව යේසුස් ළඟට යැවූහ. ඔවුන්ගේ අදහස වූයේ ඔහු පවසන යම් දෙයකින් ඔහුගේ වරදක් අල්ලාගෙන+ ඔහුව බලධාරීන්ට සහ ආණ්ඩුකාරයා අතට භාර දීමටයි.+ එම පිරිසට තමන් ධර්මිෂ්ඨයි කියා මවාපෑමට උපදෙස් දී තිබිණ. 21  එහෙයින් ඔවුහු ගොස් යේසුස්ට මෙසේ පැවසූහ. “ගුරුතුමනි, ඔබ නිවැරදි ආකාරයට කතා කරන කෙනෙක් බවත් ඔබේ ඉගැන්වීම් නිවැරදි බවත් ඔබ කාගෙවත් පැත්ත නොගෙන කතා කරන බවත් දෙවි කියා දී තිබෙන මාර්ගය සත්‍යය පදනම් කරගෙන උගන්වන බවත් අපි දන්නවා.+ 22  ඒ නිසා සීසර්ට බදු ගෙවිය යුතුද නැද්ද කියා අපට කියන්න පුළුවන්ද?”+ 23  නමුත් යේසුස් ඔවුන්ගේ කපටිකම අවබෝධ කරගෙන ඔවුන්ට මෙසේ කීවේය.+ 24  “මට ඩිනාරි කාසියක්* දෙන්න. මෙහි තිබෙන රූපයත් නමත් කාගේද?” “සීසර්ගේ”+ කියා ඔවුහු පිළිතුරු දුන්නෝය. 25  “එසේනම් සීසර්ට අයිති දේ සීසර්ටත්+ දෙවිට අයිති දේ දෙවිටත් දෙන්න”+ කියා ඔහු ඔවුන්ට පැවසුවේය. 26  ඒ අනුව යේසුස් පැවසූ දේ නිසා සියලුදෙනා ඉදිරියේ ඔහුගේ යම් වරදක් අල්ලාගැනීමට ඔවුන් දැරූ උත්සාහය අසාර්ථක විය. ඔවුහු ඔහුගේ එම පිළිතුරෙන් පුදුම වී නිහඬව සිටියෝය.+ 27  නමුත් මිය ගිය අය නැවත නැඟිටින්නේ නැති බව කියන සද්දුසිවරුන්ගෙන්* කිහිපදෙනෙක් ඔහු ළඟට ඇවිත්+ ඔහුගෙන් ප්‍රශ්නයක් ඇසුවෝය. 28  ඔවුන් පැවසුවේ මෙයයි. “ගුරුතුමනි, ‘මිනිසෙක් දරුවන් නැතුව මිය ගියොත් ඔහුගේ සහෝදරයා+ ඔහුගේ බිරිඳව විවාහ කරගෙන තම සහෝදරයාගේ නමින් දරුවන් බිහි කළ යුතුයි’+ කියා මෝසෙස්ට දෙන ලද නීතියේ සඳහන් වී තිබුණා.+ 29  එක්තරා පවුලක සහෝදරයන් හත්දෙනෙක් සිටියා. පළමුවෙනියා ස්ත්‍රියක් සමඟ විවාහ වුණත් ඔහු දරුවන් නැතුව මිය ගියා.+ 30  දෙවෙනියා ඇයව විවාහ කරගත්තත් ඔහුත් දරුවන් නැතුව මිය ගියා. 31  ඉන්පසු තුන්වෙනියාද ඇයව විවාහ කරගත්තා. නමුත් ඔහුත් මිය ගියා. එලෙස හත්දෙනාම ඇයව විවාහ කරගත්තත් ඒ හත්දෙනාම දරුවන් නැතුව මිය ගියා.+ 32  අන්තිමේදී ඒ ස්ත්‍රියත් මිය ගියා.+ 33  හත්දෙනාම ඇයව විවාහ කරගත් නිසා නැවත නැඟිටීමේදී ඇය කාගේ බිරිඳ වෙයිද?”+ 34  එවිට යේසුස් ඔවුන්ට මෙසේ කීවේය. “පවතින මේ සමාජයේ ජීවත් වන අය* නම් විවාහ වෙනවා.+ 35  නමුත් මතු පැමිණෙන කාලයේදී*+ නැවත නැඟිටීමක්+ ලබා ජීවත් වීමට සුදුසුකම් ලබන අය+ විවාහ වෙන්නේ නැහැ. 36  ඇත්තෙන්ම ඔවුන් නැවත මිය යන්නෙත් නැහැ.+ ඔවුන් දේවදූතයන් හා සමාන වෙයි. නැවත නැඟිටීමක් ලබන නිසා ඔවුන් දෙවිගේ දරුවන් වෙනවා.+ 37  මිය ගිය අය නැවත නැඟිටින බව මෝසෙස් පවා පැහැදිලි කළා. කටු පඳුර අසල සිද්ධියේ+ යෙහෝවා දෙවිව හඳුන්වා තිබුණේ, ‘ආබ්‍රහම්ගේද ඊසාක්ගේද යාකොබ්ගේද දෙවි’ ලෙසයි.+ 38  මෙයින් පැහැදිලි වන්නේ ඔහු මිය ගොස් ඇති අයගේ දෙවි නොව ජීවත් වන අයගේ දෙවි බවයි. මන්ද ඔවුන් මිය ගොස් සිටියත් දෙවි ඔවුන්ව සලකන්නේ ජීවත් වන අය හැටියටයි.”+ 39  එවිට නීතිය පිටපත් කරන්නන් අතරින් කිහිපදෙනෙක්, “ගුරුතුමනි, ඔබ පැවසූ දේවල් නිවැරදියි” කියා කීවෝය. 40  ඉන්පසු කිසි කෙනෙකුට ඔහුගෙන් තව එක ප්‍රශ්නයක්වත් අසන්න ධෛර්යය තිබුණේ නැත. 41  යේසුස් ඔවුන්ට මෙසේ කීවේය. “ක්‍රිස්තුස් දාවිත්ගේ පුත්‍රයා කියා පවසන්නේ කුමන පදනමක් මතද?+ 42  මන්ද දාවිත්, ගීතාවලියෙහි කියන්නේ මෙයයි. ‘යෙහෝවා දෙවි මාගේ ස්වාමීන්ට මෙසේ කීවේය. “මාගේ දකුණු පැත්තේ ඉඳගන්න. 43  මා ඔබේ සතුරන්ව ඔබේ පා පුටුව ලෙස තබන තුරු එසේ සිටින්න.”’+ 44  දාවිත් ඔහුට ‘ස්වාමීන්’ කියා පවසනවා නම් ඔහු දාවිත්ගේ පුත්‍රයා වන්නේ කොහොමද?” 45  ඉන්පසු සියලුදෙනාම අසාගෙන සිටියදී ඔහු තම ගෝලයන්ට මෙසේ කීවේය.+ 46  “නීතිය පිටපත් කරන්නන්ගෙන් පරෙස්සම් වන්න. ඔවුන් විශේෂ සළු ඇඳගෙන එහා මෙහා ඇවිදීමටත් වෙළඳපොළවලදී ආචාර ලබන්නත් කැමැත්තෙන් සිටිනවා. ඔවුන් සිනගෝගවලදී ඉදිරි ආසනවල සහ සන්ධ්‍යා භෝජනවලදී ප්‍රධානතම ස්ථානවල සිටින්නත් කැමතියි.+ 47  ඔවුන් අනුන් ඉදිරියේ මවාපෑමක් කරමින් දීර්ඝ යාච්ඤා ඉදිරිපත් කළත් වැන්දඹුවන්ගේ ඉඩකඩම් දේපොළ පැහැරගන්නවා.+ ඒ නිසා ඔවුන්ට ලැබෙන්නේ වඩාත් බරපතළ විනිශ්චයක්.”+

පාදසටහන්

ලූක් 7:41හි පාදසටහන බලන්න.
යේසුස්ගේ කාලයේ සිටි ප්‍රසිද්ධ ආගමික නායකයන් පිරිසකි.
මූ.අ., “පවතින මේ සමාජයේ දරුවන්.”
මූ.අ., “ඒ සමාජ ක්‍රමයේදී.”