ලූක් 19:1-48

19  යේසුස් යෙරිකෝවට+ ඇතුල් වී, ඒ හරහා ගමන් කරමින් සිටියේය.  එම නුවරෙහි එක්තරා ධනවත් මිනිසෙක් සිටියේය. ඔහුගේ නම සකෙවුස්ය. සකෙවුස් බදු එකතු කරන අයගේ ප්‍රධානියෙක් විය.  යේසුස්ව දැක බලා ගැනීමට ඔහු උනන්දුවෙන් සිටියත්+ රැස්ව සිටි සමූහයා නිසා ඔහුට එය කළ නොහැකි විය. මන්ද සකෙවුස් මිටි කෙනෙක් වූයේය.  යේසුස් එක්තරා පාරක් දිගේ යන බව දැනගත් ඔහු කල්තියාම එතැනට දුව ගොස් ඔහුව දැක බලා ගැනීමට හැකි වන ලෙස පාර අසල තිබූ අත්තික්කා ගසකට නැග්ගේය.  යේසුස් ඒ අසලින් ගිය විට ඔහු සකෙවුස් දෙස බලා, “සකෙවුස් ඉක්මන් කර බිමට බහින්න. මම කැමතියි අද ඔබේ ගෙදර නවතින්න” කියා පැවසුවේය.  ඔහු වහාම ගසෙන් බැස මහත් ප්‍රීතියකින් යේසුස්ව තම නිවසට පිළිගත්තේය.  සිදු වූ දේ දුටු අය කොඳුරමින්+ මෙසේ කියන්න පටන්ගත්තෝය. “ඔහු දැන් ගියේ පව්කාර මිනිසෙකුගේ නිවසටයි.”  සකෙවුස් සියලුදෙනා ඉදිරියේ නැඟිට යේසුස්ට මෙසේ පැවසුවේය. “ස්වාමීනි, බලන්න! මා සතු දෙයින් භාගයක් මම දිලිඳුන්ට දෙනවා. මා කවුරු හරි කෙනෙකුට විරුද්ධව බොරු චෝදනා ඉදිරිපත් කර+ ඔහුගෙන් අයුතු ලෙස යමක් අරගෙන තිබෙනවා නම් මම කැමතියි ඔහුට අහිමි වූ ඒ දේ මෙන් හතර ගුණයක් නැවත ගෙවන්න.”+  ඊට සවන් දුන් යේසුස් ඔහුට මෙසේ කීවේය. “අද මේ නිවසට ගැලවීම ලැබිලා. මේ මිනිසාත් ආබ්‍රහම්ගේ පුත්‍රයෙක් කියා මතක තබාගන්න.+ 10  මනුෂ්‍ය පුත්‍රයා ආවේ, නැති වූ අයව සොයා ඔවුන්ව ගලවාගැනීමටයි.”+ 11  යේසුස්ගේ ගෝලයන් ඒ දේවලට සවන් දෙමින් සිටියදී, ඔහු තවත් උපමාවක් පැවසුවේය. ඔහු ඒ අවස්ථාවේදී සිටියේ යෙරුසලමට නුදුරින්ය. මෙම උපමාව පැවසීමට හේතුව වූයේ ඔහු එහි ගිය වහාම දෙවිගේ රාජ්‍යයේ පාලනය ආරම්භ වෙයි කියා ගෝලයන් සිතූ නිසාය.+ 12  එහෙයින් ඔහු මෙසේ කීවේය. “එක්තරා වංශවත් මිනිසෙක් සිටියා. ඔහු ආපසු පැමිණීමේ අදහසින් දුර රටකට ගියා. ඔහු එහි ගියේ ඔහුගේ රජකම ලබාගැනීම සඳහායි.+ 13  පිටත්ව යෑමට පෙර ඔහු තම දාසයන් දසදෙනෙකුව කැඳවා ඔවුන්ට මීනා* දහයක් දී, ‘මා එන තුරු මෙයින් වෙළඳාම් කරන්න’+ කියා පැවසුවා. 14  මේ අතර ඔහුගේ රට වැසියන් ඔහුට වෛර කළ නිසා+ ඔහු ගිය පසු, ‘මොහු අපේ රජ වෙනවාට අපි කැමති නැහැ’+ යන පණිවිඩය තානාපතීන් පිරිසක් අත දන්වා යැව්වා. 15  “කලක් ගත වී ඔහු තම රජකම ලබාගෙන නැවත පැමිණියා. පසුව ඔහු රිදී මුදල් භාර දුන් දාසයන්ව කැඳෙව්වා. ඔහු එසේ කළේ තමන් භාර දුන් මුදල්වලින් ඔවුන් ව්‍යාපාර කටයුතුවල නිරත වෙමින් උපයාගත් දේ සෝදිසි කර බැලීම සඳහායි.+ 16  පළමුවෙනි දාසයා ඉදිරියට ඇවිත්, ‘ස්වාමීනි, ඔබ මට දුන් මීනා එකෙන් මට පුළුවන් වුණා මීනා දහයක් උපයන්න’+ කියා පැවසුවා. 17  එවිට ඔහු, ‘ඔබ ඉතා යහපත් දාසයෙක්! මට ඔබ ගැන ඉතාමත් සතුටුයි. ඔබ ඉතා සුළු කාරණයකදී විශ්වාසවන්තව කටයුතු කළ නිසා නුවරවල් දහයක් පාලනය කිරීමට මම ඔබව පත් කරනවා’+ කියා ඔහුට කිව්වා. 18  ඊළඟට දෙවෙනි දාසයා ඇවිත්, ‘ස්වාමීනි, ඔබ මට දුන් මීනා එකෙන් මට පුළුවන් වුණා මීනා පහක් උපයන්න’+ කියා පැවසුවා. 19  එවිට ඔහු, ‘මම ඔබට නුවරවල් පහක් භාර දෙනවා’+ කියා ඔහුට කිව්වා. 20  නමුත් තවත් දාසයෙක් ඇවිත් මෙසේ පැවසුවා. ‘ස්වාමීනි, මෙන්න ඔබ මට දුන් මීනා එක. මම එය රෙදිකඩක ඔතා තබාගෙන සිටියා. 21  ඔබ සැරපරුෂ කෙනෙක් වන නිසාත් ඔබ වපුරන්නේ නැති තැන්වලින් කපාගන්නා මුදල් තැන්පත් නොකරන තැන්වලින් මුදල් ලබාගන්නා කෙනෙක් වන නිසාත් මට ඔබ ගැන බියක් ඇති වුණා.’+ 22  එවිට ස්වාමියා ඔහුට මෙසේ කිව්වා. ‘ඔබ ඉතා දුෂ්ට දාසයෙක්! මම ඔබට විනිශ්චයක් දෙන්නේ ඔබේම කටින් පිට වූ වචනවලිනුයි.+ මම සැරපරුෂ කෙනෙක් බවත් මම මුදල් තැන්පත් නොකරන තැන්වලින් මුදල් ලබාගන්නා කෙනෙක් බවත් වපුරන්නේ නැති තැන්වලින් කපාගන්නා කෙනෙක් බවත් ඔබ දැන සිටියා නම්,+ 23  ඔබ මගේ රිදී මුදල් බැංකුවක තැන්පත් නොකළේ ඇයි? එසේ කළා නම් මට පොලියක් සමඟම ඒ මුදල ආපසු ලබාගන්න තිබුණා.’+ 24  “ඉන්පසුව ළඟ සිටගෙන සිටි අයට ඔහු මෙසේ පැවසුවා. ‘ඔහුගෙන් මීනා එක ගෙන මීනා දහයක් ඇති තැනැත්තාට දෙන්න.’+ 25  නමුත් පිරිසක්, ‘ස්වාමීනි, ඔහුට දැනටමත් මීනා දහයක් තිබෙනවා’ කියා ඔහුට පැවසුවා. 26  ‘මා දැන් කියන දේට හොඳින් සවන් දෙන්න. යමෙකුට ඇත්නම් ඔහුට තවත් වැඩියෙන් දෙනු ලබයි. නමුත් යමෙකුට කිසිවක් නැත්නම් ඔහුට තිබෙන දේ පවා ඔහුගෙන් ගනු ලබයි.+ 27  මා රජ වෙනවාට අකමැති මගේ සතුරන් කොහේද? ඔවුන්ව මෙතැනට ගෙනැවිත් මා ඉදිරියෙහිම මරා දමන්න.’”+ 28  යේසුස් ඒ දේවල් පැවසූ පසු ඔහු යෙරුසලමට නැඟ යන මාර්ගය දිගේ අන් අයට ඉදිරියෙන්ම ගමන් කළේය.+ 29  ඔහු ඔලීව කන්ද යන නමින් හැඳින්වූ කන්ද+ මත පිහිටි බෙත්පාගය සහ බෙතානිය නම් නුවරවල් ළඟට ගොස් තම ගෝලයන් දෙදෙනෙකුව යවමින්,+ 30  ඔවුන්ට මෙසේ පැවසුවේය. “ඔබට පෙනෙන අර ගමට යන්න. ඔබ එයට ඇතුල් වූ විට කිසි මිනිසෙකු මේ වන තුරු ඉඳගෙන නැති බූරු නාම්බෙක් බැඳ තබා ඇති ආකාරය ඔබ දකියි. ඌව ලිහා මෙතැනට ගෙනෙන්න.+ 31  කවුරු හරි කෙනෙක්, ‘ඔබ ඌව ලිහන්නේ ඇයි’ කියා ඔබෙන් ඇසුවොත්, ‘ස්වාමීන්ට ඌව අවශ්‍ය වී තිබෙනවා’+ කියා ඔහුට කියන්න.” 32  ඒ ගෝලයන් දෙදෙනා පිටත්ව ගොස් යේසුස් පැවසූ ලෙසම ඌව සොයාගත්හ.+ 33  නමුත් ඔවුන් බූරු නාම්බාව ලිහමින් සිටියදී අයිතිකරුවෝ ඇවිත්, “ඔබ මේ බූරු නාම්බාව ලිහන්නේ ඇයි”+ කියා ඔවුන්ගෙන් ඇසූහ. 34  ඔවුහු, “ස්වාමීන්ට ඌව අවශ්‍යයි”+ කියා පිළිතුරු දුන්හ. 35  ඔවුහු බූරු නාම්බාව යේසුස් ළඟට ගෙනැවිත් ඌ මත තම පිට වස්ත්‍ර දැමුවෝය. ඉන්පසු ඔවුන්ගේ උපකාරයෙන් යේසුස් ඌ පිට ඉඳගත්තේය.+ 36  ඔහු ඌ පිට ගමන් කරද්දී,+ රැස්ව සිටි අය තම පිට වස්ත්‍ර මඟ දිගේ එළුවෝය.+ 37  ඔලීව කන්දෙන් බැස එන පාරට ඔහු ළඟා වූ විට රැස්ව සිටි ඔහුගේ ගෝලයන් සමූහය ප්‍රීති වෙමින් තමන් දැක තිබූ සියලු බලවත් ක්‍රියා මතකයට නඟමින් දෙවිට මහත් හඬින් ප්‍රශංසා කරන්න පටන්ගත්තෝය.+ 38  ඔවුන් පැවසුවේ මෙසේයි. “යෙහෝවා දෙවිගේ නාමයෙන් එන රජාණන්ට ආශීර්වාද ලැබේවා!+ ස්වර්ගයට සාමයද ඉතා උසස් වූ තැන්වල වාසය කරන දෙවිට ගෞරවයද ලැබේවා!”+ 39  නමුත් සමූහයා අතරේ සිටි පරිසිවරුන් කිහිපදෙනෙක්, “ගුරුතුමනි, ඔබේ ගෝලයන්ට තදින් අවවාද කරන්න”+ කියා ඔහුට කීවෝය. 40  නමුත් ඔහු, “ඔවුන් නිහඬ වී සිටියොත් ඔවුන් වෙනුවට ගල්+ මහත් හඬින් කෑගසයි” කියා පිළිතුරු දුන්නේය. 41  පසුව යේසුස් නුවරට ළඟා විය. එය දැක ඔහුට ඒ ගැන මහත් දුකක් ඇති විය. ඔහු හඬමින්,+ 42  මෙසේ කීවේය. “මේ කාලයේදී ඔබට සමාදානය ලබාගත හැකි ආකාරය තේරුම්ගන්නයි තිබුණේ.+ නමුත් දැන් ප්‍රමාද වැඩියි. ඒ ප්‍රස්තාව ඔබේ ඇස් ඉදිරිපිටම ඔබට අහිමි වෙලා.+ 43  ඉදිරියේදී ඔබේ සතුරන් ඇවිත් ඔබව වට කරයි. උල් කළ කණුවලින්+ ඔවුන් ඔබ වටා+ විශාල වැටක්+ සාදා සෑම පැත්තෙන්ම ඔබට ප්‍රහාර එල්ල කරයි.+ 44  ඔවුන් ඔබවත් ඔබේ දරුවන්වත් පොළොවේ ගසා මරා දමයි.+ ඔවුන් ඔබේ නුවර සහමුලින්ම විනාශ කරයි. එහි සෑම ගලක්ම බිමට හෙළනු ලබනවා.+ ඒ සියල්ල ඔබට සිදු වන්නේ ඔබව සෝදිසියට ලක් කළ කාලයේදී ඔබ මුරණ්ඩු ලෙස ක්‍රියා කළ නිසයි.”+ 45  ඉන්පසු ඔහු දේවමාලිගාවට ඇතුල් වී, එහි වෙළඳාම් කරමින් සිටි අයව පිටතට එළවා දමන්න පටන්ගෙන,+ 46  “‘මගේ ගෘහය හඳුන්වනු ලබන්නේ යාච්ඤා ගෘහයක් ලෙසයි’+ කියා ලියා තිබුණත් ඔබ එය කොල්ලකාරයන්ගේ ගුහාවක් බවට පත් කර තිබෙනවා”+ කියා ඔවුන්ට පැවසුවේය. 47  ඔහු දිනපතාම දේවමාලිගාවේ ඉගැන්වූවේය. නායක පූජකයන්, නීතිය පිටපත් කරන්නන් සහ වෙනත් ප්‍රධානීන් මාන බලමින් සිටියේ ඔහුව කෙසේ හෝ මරා දැමීමටය.+ 48  නමුත් විශාල සමූහයක් ඔහුට එක් රොක් වී ඔහුට උනන්දුවෙන් සවන් දී සිටි නිසා+ ඔහුට විරුද්ධව කළ යුතු දේ කුමක්ද කියා ඔවුන්ට සිතාගැනීමට නොහැකි විය.

පාදසටහන්

මීනා එකක් එවකට සිටි කම්කරුවෙකුගේ මාස තුනක වැටුපට සමානය. රිදී මුදල් වර්ගයක් වූ එහි වටිනාකම ඩ්‍රැක්මා සියයකි.