යොහන් 7:1-53

7  යුදෙව්වන් යේසුස්ව මරන්න සොයමින් සිටි නිසා+ ඔහු යුදය අවට ප්‍රදේශවල ගමන් නොකර ගලීලය අවට පමණක් ගමන් කළේය.  මේ අතර පැල් උත්සවය+ ලෙස හඳුන්වන යුදෙව්වරුන්ගේ උත්සවය ළඟා විය.  එහෙයින් ඔහුගේ සහෝදරයෝ+ ඔහුට මෙසේ කීවෝය. “ඔබ කරන ක්‍රියා යුදයේ සිටින ඔබේ ගෝලයන්ටත් දකින්න සැලැස්විය යුතුයි. ඒ නිසා දැන් ඔබ යුදයට යන්න.  සාමාන්‍යයෙන් කෙනෙකුට ප්‍රසිද්ධ වෙන්න අවශ්‍ය නම් ඔහු රහසින් දේවල් නොකර එළිපිටම කළ යුතුයි. ඔබ බොහෝ දේවල් කරන නිසා ගොස් ලෝකයටම ප්‍රසිද්ධ වෙන්න.”  ඇත්තෙන්ම ඔහුගේ සහෝදරයන්ට+ ඔහු කෙරෙහි විශ්වාසයක් තිබුණේ නැත.+  එහෙයින් යේසුස් ඔවුන්ට මෙසේ කීවේය. “මගේ නියමිත වේලාව තවම පැමිණ නැහැ.+ නමුත් ඔබට නම් ඕනෑම වේලාවක යන්න පුළුවන්.  ලෝකයේ සිටින මිනිසුන් ඔබට වෛර කරන්නේ නැහැ. නමුත් මම ඔවුන්ගේ දුෂ්ට ක්‍රියා එළිපිට ප්‍රකාශ කරන නිසා+ ඔවුන් මට වෛර කරනවා.  ඒ නිසා ඔබට පුළුවන් උත්සවයට යන්න. මගේ නියමිත වේලාව+ තවම ඇවිත් නැති නිසා+ මම දැන්මම උත්සවයට යන්නේ නැහැ.”  ඔහු ඒ දේවල් ඔවුන්ට පැවසූ පසු ගලීලයෙහිම නැවතී සිටියේය. 10  නමුත් ඔහුගේ සහෝදරයන් උත්සවයට ගිය පසු ඔහුද ගියේය. ඔහු ගියේ ප්‍රසිද්ධියේ නොව රහසින්ය.+ 11  උත්සවය පවත්වද්දී යුදෙව් ජනතාව ඔහුව සොයන්න පටන්ගෙන,+ “ඒ මිනිසා කොහේද” කියා ඇසූහ. 12  සමූහයා අතරේ ඔහු ගැන බොහෝ කතා පැතිරිණ.+ සමහරු, “ඔහු යහපත් මිනිසෙක්” කියාත් තවත් සමහරු, “නැහැ, ඔහු ඇත්තටම සමූහයාව නොමඟ යවනවා” කියාත් පැවසූහ. 13  නමුත් යුදෙව්වන්ට* ඇති බිය නිසා+ කිසිවෙක් ඔහු ගැන ප්‍රසිද්ධියේ කතා නොකළෝය. 14  උත්සවය මැද හරියේදී යේසුස් දේවමාලිගාවට ගොස් උගන්වන්න පටන්ගත්තේය.+ 15  එහෙයින් යුදෙව්වරු පුදුම වී, “මේ මිනිසා පාසැල්වල ඉගෙනගෙනත් නැහැ.+ එහෙමනම් ඔහුට මෙතරම් දැනුමක් තිබෙන්නේ කොහොමද”+ කියා කීවෝය. 16  යේසුස් ඔවුන්ට මෙසේ පිළිතුරු දුන්නේය. “මා උගන්වන්නේ මගේ අදහස් නොව මාව එවූ තැනැත්තාගේ අදහස්.+ 17  යමෙක් දෙවිගේ කැමැත්ත කරන්න ආශාවෙන් සිටිනවා නම් මා උගන්වන දේ මගේම අදහස්ද නැත්නම් දෙවිගේ අදහස්ද කියා තේරුම්ගන්න ඔහුට පුළුවන්.+ 18  ඇත්තෙන්ම තමාගේ අදහස් ඉදිරිපත් කරන පුද්ගලයා උත්සාහ කරන්නේ තමාටම ගෞරවය ලබාගන්නයි. නමුත් තමා එවූ තැනැත්තාට ගෞරවයක් ගෙන දෙන්න උත්සාහ කරන පුද්ගලයා+ සැබෑ කෙනෙක් වන අතර ඔහු තුළ කිසි බොරුවක් වංචාවක් නැහැ. 19  නීතිය ඔබට ලබා දුන්නේ මෝසෙස් නේද?+ නමුත් ඔබ අතරින් කිසි කෙනෙක් ඒ නීතියට කීකරු වන්නේ නැහැ. ඔබ මාව මරන්න උත්සාහ කරන්නේ ඇයි?”+ 20  සමූහයා පිළිතුරු දෙමින්, “ඔබට භූතයෙක් වැහිලාද?+ ඔබව මරන්න උත්සාහ කරන්නේ කවුද” කියා ඇසූහ. 21  එවිට යේසුස් ඔවුන්ට මෙසේ පිළිතුරු දුන්නේය. “මම එක දෙයයි කළේ.+ ඒත් ඔබ ඒ දේ ගැන පුදුම වෙනවා. 22  මෝසෙස් මගින් ඔබට නියම කළ චර්මච්ඡේදනය වීමේ පිළිවෙත+ ගැන සිතා බලන්න. ඇත්තටම එය මෝසෙස් පටන්ගත් දෙයක් නොව එය අපේ මුතුන්මිත්තන්ගේ කාලයේ පටන් පවතින පිළිවෙතක්.+ කොහොමවුණත් ඔබ සබත් දවසේදී වුණත් මිනිසෙකුව චර්මච්ඡේදනය කරනවා. 23  එසේ කරන්නේ මෝසෙස්ට දෙන ලද නීතිය කඩ නොකිරීමටයි. ඔබ එසේ මිනිසෙකුව සබත් දවසකදී චර්මච්ඡේදනය කරනවා නම් සබත් දවසකදී මා මිනිසෙකුව සම්පූර්ණයෙන්ම සුව කළාට+ ඔබ මා සමඟ මෙතරම් කෝපයකින් සිටින්නේ ඇයි? 24  ඒ නිසා පිටතින් දේවල් දෙස බලා තවදුරටත් විනිශ්චය කරන්න එපා. ධර්මිෂ්ඨකමින් විනිශ්චය කරන්න.”+ 25  එවිට යෙරුසලමෙහි වාසය කළ අයගෙන් සමහරදෙනෙක් මෙසේ පැවසූහ. “ඔවුන් මරන්න සොයන්නේ මේ මිනිසාව නේද?+ 26  ඒත් බලන්න! ඔහු ප්‍රසිද්ධියේ කතා කරමින්+ සිටියත් කවුරුත් කිසිම දෙයක් ඔහුට කියන්නේ නැහැ. මෙසේ සිදු වන්නේ ඔහු ක්‍රිස්තුස් බව පාලකයන් තේරුම්ගෙන සිටින නිසාවත්ද?+ 27  ඒත් එහෙම කියන්නේ කොහොමද? මේ මිනිසා ආවේ කොහෙන්ද කියා අපි හොඳටම දන්නවා.+ නමුත් ක්‍රිස්තුස් ගැන කියා තිබෙන්නේ ඔහු එන විට ඔහු කොතැනින් ආවාද කියා කිසිම කෙනෙක් දැන නොගන්නා බවයි.”+ 28  දේවමාලිගාවෙහි උගන්වමින් සිටි යේසුස්, ඒ දේවල් අසා හඬ නඟා මෙසේ පැවසුවේය. “මා කවුද කියාත් මා පැමිණියේ කොහෙන්ද කියාත් ඔබ දන්නවා.+ මම ආවේ මගේම කැමැත්ත ඉටු කරන්න නොවෙයි.+ මම ආවේ මාව එවූ තැනැත්තා නිසයි. ඔහු සැබෑ පුද්ගලයෙක්.+ නමුත් ඔබ ඔහුව හඳුනන්නේ නැහැ.+ 29  මම නම් ඔහුව හොඳින් හඳුනනවා.+ මන්ද මම ඇවිත් සිටින්නේ ඔහුගේ නියෝජිතයෙක් ලෙසයි. මාව එව්වේ ඔහුයි.”+ 30  එහෙයින් ඔවුහු ඔහුව අල්ලාගන්න උත්සාහ කළෝය.+ නමුත් නියම වේලාව පැමිණ නොතිබුණු නිසා+ කිසි කෙනෙකුට ඔහු පිට අත තබන්නවත් නොහැකි විය. 31  මේ අතර සමූහයාගෙන් බොහෝදෙනෙක් ඔහු කෙරෙහි විශ්වාසය තැබූහ.+ ඔවුහුද, “බලන්න, ඔහු කොතරම් ලකුණු සිදු කරනවාද!+ ඔහු ක්‍රිස්තුස්ම විය යුතුයි” කියා පැවසූහ. 32  සමූහයා ඔවුනොවුන් අතරේ මේ දේවල් කතා කරනවා පරිසිවරුන්ට ඇසිණ. එහෙයින් ඔවුහු නායක පූජකයන් සමඟ එකතු වී ඔහුව අල්ලාගැනීමට නිලධාරීන් පිරිසක්ව යැව්වෝය.+ 33  එවිට යේසුස් මෙසේ කීවේය. “මම ඔබ සමඟ සිටින්නේ තව කෙටි කාලයකට පමණයි. ඉන්පසුව මාව එවූ තැනැත්තා ළඟට මම යනවා.+ 34  එවිට ඔබ කොතරම් සෙව්වත්+ මාව සොයාගන්න ඔබට බැරි වෙයි. මන්ද මා සිටින තැනට ඔබට එන්න බැහැ.”+ 35  එහෙයින් යුදෙව්වරු ඔවුනොවුන් අතරේ මෙසේ කියාගත්හ. “අපට සොයාගන්න බැරි වන විදිහට මේ මිනිසා කොහේද යන්න හදන්නේ? ඔහු ග්‍රීකවරුන් අතරේ ජීවත් වන යුදෙව්වරුන් ළඟට+ ගොස් එහි සිටින ග්‍රීකවරුන්ටත් උගන්වන්න අදහස් කරනවාවත්ද? 36  ‘ඔබ කොතරම් සෙව්වත් මාව සොයාගන්න ඔබට බැරි වෙයි. මන්ද මා සිටින තැනට ඔබට එන්න බැහැ’ කියා ඔහු කිව්වේ ඇයි? මොකක්ද ඒ කතාවේ තේරුම? 37  උත්සවයේ විශේෂිතම දවස වන එහි අවසන් දවසේදී,+ යේසුස් සියලුදෙනා ඉදිරියේ නැඟිට හඬ නඟා මෙසේ කීවේය. “යම් කෙනෙකුට පිපාසය ඇත්නම්+ ඔහුට පුළුවන් මා ළඟට ඇවිත් ඒ පිපාසය සන්සිඳුවා ගන්න. 38  ශුද්ධ ලියවිල්ලේ සඳහන් ආකාරයට මා කෙරෙහි විශ්වාසය තබන තැනැත්තා+ තුළින් ‘ජීවනදායක දිය දහරා ගලා එයි.’”+ 39  ඔහු මෙසේ පැවසුවේ ඔහු කෙරෙහි විශ්වාසය තැබූ අයට දෙවිගේ බලය ලැබීමට නියමිත වූ නිසාය. ඒ වන තුරු යේසුස්ට තම ස්වර්ගික තේජස හිමි වී නොතිබුණු නිසා+ දෙවිගේ බලය ඔවුන්ට ලබා දී තිබුණේ නැත.+ 40  ඔහු පැවසූ දේවල් අසාගෙන සිටි සමූහයා අතරින් සමහරෙක්, “ඔහු අනිවාර්යයෙන්ම එන්න සිටින අනාගතවක්තෘවරයා විය යුතුයි”+ කියා පැවසූහ. 41  තවත් සමහරු, “ඔහු තමයි ක්‍රිස්තුස්”+ කියා පැවසූ අතර ඇතැම් අය මෙසේ ඇසූහ. “ක්‍රිස්තුස්+ එන්නේ ගලීලයෙන්ද?+ 42  ශුද්ධ ලියවිල්ලේ කියා තිබෙන්නේ ක්‍රිස්තුස් දාවිත්ගේ පෙළපතින්+ හා දාවිත්ගේ ගම+ වන බෙත්ලෙහෙමෙන්+ එනවා කියා නොවෙයිද?” 43  එලෙස සමූහයා අතර ඔහු ගැන යම් මතභේදයක් ඇති විය.+ 44  මේ අතරේ කිහිපදෙනෙකු ඔහුව අල්ලාගැනීමට මාන බලමින් සිටියත් ඔවුන්ට කිසිවක් කිරීමට නොහැකි විය. 45  ඉන්පසු නිලධාරීන් පිරිස නායක පූජකයන් සහ පරිසිවරුන් ළඟට ආපසු ගියෝය. “ඔහුව මෙහෙට ගෙනාවේ නැත්තේ ඇයි” කියා ඔවුහු එම පිරිසගෙන් ඇසූහ. 46  එම පිරිස මෙසේ පිළිතුරු දුන්නෝය. “ඒ වගේ උගන්වන්න පුළුවන් මිනිසෙකුව නම් අපි කවදාවත් දැකලා නැහැ.”+ 47  එවිට පරිසිවරු මෙසේ පැවසූහ. “ඔබත් මුළා වෙලාද? 48  ටිකක් හිතලා බලන්න. පාලකයන් හා පරිසිවරුන් අතරින් එක් කෙනෙක්වත් ඔහු කෙරෙහි විශ්වාසය තබා තිබෙනවාද?+ 49  නීතිය ගැන කිසිම අවබෝධයක් නැති මේ සමූහයා දේවශාපයට ලක් විය යුතු පිරිසක්!”+ 50  එවිට ඔවුන්ගෙන් කෙනෙකු වූ, කලින් අවස්ථාවක යේසුස්ව හමු වීමට ගිය නිකදේමස් ඔවුන්ට මෙසේ කීවේය. 51  “අපේ නීතියට අනුව මිනිසෙකුව විනිශ්චය කරන්න කලින් අප ඔහුට සවන් දී+ ඔහු කරන දේවල් ගැන සොයා බැලිය යුතුයි. මේ අවස්ථාවේදීත් අප කළ යුත්තේ ඒ දේම නොවෙයිද?” 52  ඔවුහු පිළිතුරු වශයෙන්, “ඔබත් ගලීලයේ වැසියෙක් නේද? ගලීලයෙන් කිසිම අනාගතවක්තෘවරයෙකු+ පැමිණෙනවාද නැද්ද කියා ශුද්ධ ලියවිල්ලෙන් සොයා බලන්න” කියා ඔහුට කීවෝය.* * යන අත්පිටපත්වල, 53වන පදයේ සිට 8වන පරිච්ඡේදයේ 11වන පදය දක්වා කොටස දක්නට නැත. (විවිධ ග්‍රීක පිටපත් සහ අනුවාදවල යම් වෙනස්කම් දක්නට ලැබුණත්) ඒ පදවල මතු දැක්වෙන තොරතුරු ඇත. 53  ඉන්පසු ඔවුහු තම තමන්ගේ නිවෙස් බලා ගියෝය.

පාදසටහන්

එනම්, යුදෙව් ආගමික නායකයන්ට.