යොහන් 21:1-25

21  එම සිද්ධියෙන් පසු, ටයිබීරියස් මුහුද අසල යේසුස් නැවතත් ගෝලයන් ඉදිරියේ පෙනී සිටියේය. සිදු වූ දේ පිළිබඳ විස්තර මතු දැක්වේ.  ඒ අවස්ථාවේදී සීමොන් පේතෘස්ද නිවුන් දරුවා ලෙස හැඳින්වූ තෝමස්ද+ ගලීලයේ පිහිටි කානා නම් නුවරින් පැමිණි නතානියෙල්ද+ සෙබදීගේ පුත්‍රයෝ+ සහ යේසුස්ගේ ගෝලයන් වූ තවත් දෙදෙනෙක්ද එකට සිටියෝය.  සීමොන් පේතෘස්, “මම යනවා මාළු අල්ලන්න” කියා ඔවුන්ට කීවේය. ඔවුහුද, “අපිත් ඔබ සමඟ එනවා” කියා පවසා ඔරුවට නැග්ගෝය. නමුත් ඒ මුළු රාත්‍රිය පුරාම ඔවුන්ට එක් මාළුවෙක්වත් අල්ලාගැනීමට හැකි වූයේ නැත.+  ඊළඟ උදෑසන එළිය වැටෙද්දීම යේසුස් මෙගොඩ සිටගෙන සිටියේය. නමුත් ඒ යේසුස් බව ගෝලයෝ හඳුනාගත්තේ නැත.+  එවිට යේසුස්, “දරුවෙනි, ඔබට කන්න මුකුත් නැහැ නේද” කියා ඔවුන්ගෙන් ඇසුවේය. ඔවුහුද, “නැහැ” කියා ඔහුට පිළිතුරු දුන්හ.  යේසුස්ද, “ඔරුවේ දකුණු පැත්තෙන් දැල හෙළන්න. එවිට ඔබට මාළු ටිකක් අල්ලගන්න පුළුවන් වෙයි”+ කියා ඔවුන්ට කීවේය. ඔවුන් දැල හෙළූ විට දැලට හසු වූ මසුන් ප්‍රමාණය කොතරම්ද කිවහොත් ඔවුන්ට තවදුරටත් ඒ දැල ඇදගැනීමට නොහැකි විය.+  එහෙයින් යේසුස් බොහෝ සෙයින් ප්‍රේම කළ ගෝලයා,+ “ඒ අපේ ස්වාමීන්” කියා පේතෘස්ට කීවේය.+ එහි සිටියේ ස්වාමීන් බව සීමොන් පේතෘස්ට දැනගන්න ලැබුණු විට ඔහු තම සිරුර වැසෙන සේ වස්ත්‍රයක් දමාගෙන වතුරට පැන්නේය.  නමුත් කුඩා ඔරුව ගොඩබිමෙන් මීටර් සියයක්* පමණ දුරින් තිබුණු නිසා අනික් ගෝලයෝ ඔරුව පදවාගෙන ආවෝය. ඔවුහු මසුන්ගෙන් පිරී තිබුණු දැලද ඇදගෙන ආවෝය.  ඔවුහු ගොඩ බැස්ස විට එහි අඟුරු දල්වා+ ඒ මත මසුන් තිබෙන බවද ඒ අසල රොටි ඇති බවද දුටුවෝය. 10  යේසුස් ඔවුන්ට මෙසේ කීවේය. “ඔබ දැන් ඇල්ලූ මාළුන් කිහිපදෙනෙක්ව රැගෙන එන්න.” 11  එහෙයින් සීමොන් පේතෘස් ඔරුවට නැඟ, ලොකු මසුන් එකසිය පනස්තුන්දෙනෙකුගෙන් පිරී තිබුණු ඒ දැල ගොඩට ඇද්දේය. එපමණ මසුන් ප්‍රමාණයක් සිටියත් දැල ඉරුණේ නැත. 12  “එන්න, කෑම ටිකක් කමු”+ කියා යේසුස් ඔවුන්ට කීවේය. මේ තම ස්වාමීන් බව ඔවුන් දැන සිටි නිසා, “ඔබ කවුද” කියා ඔහුගෙන් අසන්න ගෝලයන්ගෙන් කිසිවෙකුට ධෛර්යයක් තිබුණේ නැත. 13  යේසුස් ඔවුන් ළඟට ඇවිත් ඔවුන්ට රොටි+ සහ මසුන් දුන්නේය. 14  එය යේසුස්ව මරණයෙන් නැඟිටුවනු ලැබූ පසු ඔහු තම ගෝලයන් ඉදිරියේ පෙනී සිටි තුන්වෙනි අවස්ථාවය.+ 15  ඔවුන් තම ආහාරය ගත් පසු යේසුස් සීමොන් පේතෘස්ට කතා කර, “යොහන්ගේ පුත් සීමොන්, මේ දේවලට වඩා ඔබ මට ප්‍රේම කරනවාද”+ කියා ඇසුවේය. ඔහුද, “ඔව් ස්වාමීනි! මගේ හිතේ ඔබ ගැන කොයි තරම් ආදරයක් තිබෙනවාද කියා ඔබ දන්නවා”+ කියා ඔහුට කීවේය. එවිට යේසුස්, “මගේ බැටළු පැටවුන්ව පෝෂණය කරන්න”+ කියා ඔහුට කීවේය. 16  යේසුස් දෙවෙනි වතාවටත්, “යොහන්ගේ පුත් සීමොන්, ඔබ මට ප්‍රේම කරනවාද”+ කියා ඔහුගෙන් ඇසුවේය. පේතෘස්ද, “ඔව් ස්වාමීනි! මගේ හිතේ ඔබ ගැන කොයි තරම් ආදරයක් තිබෙනවාද කියා ඔබ දන්නවා” කියා ඔහුට කීවේය. එවිට යේසුස්, “මගේ කුඩා බැටළුවන්ව රැකබලා ගන්න”+ කියා ඔහුට කීවේය. 17  ඔහු තුන්වෙනි වතාවටත්, “යොහන්ගේ පුත් සීමොන්, ඔබට මා ගැන ආදරයක් තිබෙනවාද” කියා ඔහුගෙන් ඇසුවේය. යේසුස් තුන්වෙනි වතාවටත්, “ඔබට මා ගැන ආදරයක් තිබෙනවාද” කියා තමාගෙන් ඇසූ නිසා පේතෘස් තුළ දුකක් ඇති විය. එහෙයින් ඔහු, “ස්වාමීනි, ඔබ සෑම දෙයක්ම දන්නවා.+ මගේ හිතේ ඔබ ගැන කොයි තරම් ආදරයක් තිබෙනවාද කියාත් ඔබ දන්නවා” කියා ඔහුට කීවේය. එවිට යේසුස් ඔහුට මෙසේ කීවේය. “මගේ කුඩා බැටළුවන්ව පෝෂණය කරන්න.+ 18  ඇත්තෙන්ම මම ඔබට කියන මේ දේ මතක තබාගන්න. ඔබ තරුණයෙක්ව සිටියදී ඔබ කැමති ආකාරයට ඇඳුම් ඇඳගෙන ඔබ කැමති තැන්වල ඇවිදින්න ගියා. නමුත් ඔබ මහලු වන විට වෙන කෙනෙක් ඔබට අත් දිගහරින්න කියා පවසමින් ඔබට ඇඳුම් අන්දවා+ ඔබ යන්න කැමති නැති තැනකට ඔබව ගෙන යයි.”+ 19  යේසුස් ඒ දේ පැවසුවේ පේතෘස් දෙවිට ගෞරවයක් ගෙන දෙමින්+ මරණයට පත් වන ආකාරය පැහැදිලි කිරීමටය.+ ඉන්පසුව, “දිගටම මාව අනුගමනය කරන්න”+ කියා යේසුස් ඔහුට කීවේය. 20  පේතෘස් හැරී බැලූ විට යේසුස් බොහෝ සෙයින් ප්‍රේම කළ ගෝලයා+ තමා පසුපස එනවා දුටුවේය. සන්ධ්‍යා භෝජනයේදී යේසුස් අසලින්ම හාන්සි වී, “ස්වාමීනි, ඔබව පාවා දෙන්නේ කවුද” කියා ඇසුවේ ඔහුය. 21  පේතෘස් ඔහුව දුටු විට, “ස්වාමීනි, මේ මිනිසාට මොනව වෙයිද” කියා යේසුස්ගෙන් ඇසුවේය. 22  යේසුස් ඔහුට මෙසේ කීවේය. “ඔබ ඒ ගැන කරදර වෙන්න එපා. සමහරවිට මා එන තුරු ඔහුට ඉන්න සිදු වෙයි.+ නමුත් ඔබ දිගටම මාව අනුගමනය කරන්න.” 23  යේසුස් පැවසූ ඒ දේ නිසා එම ගෝලයා මිය යන්නේ නැති බව සහෝදරයන් අතර ප්‍රචාරය විය. නමුත් යේසුස්, “ඔබ ඒ ගැන කරදර වෙන්න එපා. සමහරවිට මා එන තුරු ඔහුට ඉන්න සිදු වෙයි”+ කියා පැවසුවා මිස ඔහු මිය යන්නේ නැති බව පැවසුවේ නැත. 24  මේ දේවල් ගැන සාක්ෂි දරන්නෙත් මේ දේවල් ලියා තැබුවෙත් ඉහත සඳහන් ඒ ගෝලයාය.+ ඔහු දෙන සාක්ෂිය සැබෑවක් බව සියලුදෙනාම පිළිගනිති.+ 25  ඇත්තෙන්ම යේසුස් කළ තවත් බොහෝ දේ ඇත. ඒ පිළිබඳ සෑම විස්තරයක්ම ලිවීමට උත්සාහ කළොත් ඒ ලියවිලි ගබඩා කිරීමට මුළු ලෝකයම ප්‍රමාණවත් නොවන බව සිතමි.+

පාදසටහන්

මූ.අ., “අඩි 300ක්.”