යොහන් 19:1-42

19  එවිට පිලාත් යේසුස්ට කසයෙන් තැළීමට අණ දුන්නේය.+  හේවායෝද කටුවලින් ඔටුන්නක් සාදා, එය ඔහුගේ හිස මත තබා දම් පැහැති වස්ත්‍රයක් ඔහුට ඇන්දුවෝය.+  ඉන්පසු ඔවුහු ඔහු ළඟට ඇවිත්, “යුදෙව්වරුන්ගේ රජ්ජුරුවෙනි, ඔබට සුබ දවසක් වේවා” කියා පවසමින් ඔහුගේ කම්මුලට පහර දුන්හ.+  එවිට පිලාත් නැවතත් පිටතට ගොස්, “මෙන්න මම නැවතත් ඔහුව ඔබ ඉදිරියට ගෙනෙනවා. ඇත්තෙන්ම ඔහු තුළ කිසි වරදක් මට පෙනෙන්නේ නැහැ”+ කියා ඔවුන්ට කීවේය.  ඒ අවස්ථාවේදී කටු ඔටුන්නක් පැළඳගෙන දම් පැහැති වස්ත්‍රයක් ඇඳගෙන සිටි යේසුස් පිටතට ආවේය. එවිට පිලාත්, “බලන්න! මේ තමයි ඒ මිනිසා” කියා සියලුදෙනාට කීවේය.  නමුත් නායක පූජකයෝ හා නිලධාරීහු ඔහුව දුටු විට, “ඔහුව කණුවක ඇණ ගසා මරා දමන්න! ඔහුව කණුවක ඇණ ගසා මරා දමන්න”+ කියා කෑගැසූහ. පිලාත් ඔවුන්ට මෙසේ කීවේය. “මට නම් ඔහුගේ කිසි වරදක් පෙනෙන්නේ නැහැ. ඔහුව කණුවක ඇණ ගසා මරා දමන්න ඔබට අවශ්‍ය නම් ඔබම ඔහුව ගෙන ගොස් ඒ දේ කරන්න.”+  යුදෙව්වරු ඔහුට මෙසේ පිළිතුරු දුන්නෝය. “තමා දෙවිගේ පුත්‍රයා කියා ඔහු පවසා තිබෙනවා.+ අපේ නීතියට+ අනුව එය මරණ දණ්ඩනය ලැබිය යුතු වරදක්.”  පිලාත්ට ඒ දේ ඇසුණු විට ඔහුගේ බිය තවත් වැඩි විය.  තම මාලිගාවට නැවතත් ඇතුල් වූ ඔහු, “ඔබ ආවේ කොහෙන්ද” කියා යේසුස්ගෙන් ඇසුවේය. නමුත් යේසුස් ඔහුට කිසි පිළිතුරක් දුන්නේ නැත.+ 10  එවිට පිලාත්, “ඔබ මට කිසිවක් කියන්නේ නැද්ද?+ ඔබව නිදහස් කර හරින්නත් ඔබව කණුවක ඇණ ගසා මරා දමන්නත් මට බලය තිබෙන බව ඔබ දන්නේ නැද්ද” කියා යේසුස්ට පැවසුවේය. 11  යේසුස්ද, “ඔබට ඉහළින් ඒ සඳහා අවසර ලබා දී තිබුණේ නැත්නම් මට විරුද්ධව කිසිම පියවරක් ගන්න ඔබට බලයක් නැහැ.+ නමුත් ඔබට මාව භාර දුන් මිනිසාගේ පාපය ඊටත් වඩා බරපතළයි” කියා ඔහුට පිළිතුරු දුන්නේය. 12  එහෙයින් ඔහුව නිදහස් කිරීමට කැමැත්තෙන් සිටි පිලාත් ඒ සඳහා මඟක් සෙවීමට උත්සාහ කළේය. නමුත් යුදෙව්වරු, “ඔබ මේ මිනිසාව නිදහස් කර හැරියොත් ඔබ සීසර්ගේ මිත්‍රයෙක් වන්නේ නැහැ. රජෙක් හැටියට පත් වෙන්න උත්සාහ කරන ඕනෑම කෙනෙක් වැඩ කරන්නේ සීසර්ට විරුද්ධවයි”+ කියා කෑගසමින් පැවසූහ. 13  ඒ වචන ඇසූ පිලාත් යේසුස්ව පිටතට ගෙනාවේය. ඔහු හෙබ්‍රෙව් බසින් ගබ්බතා ලෙස හඳුන්වන ගල් අතුරා ඇති ස්ථානයේ තිබූ විනිශ්චයාසනයක ඉඳගත්තේය. 14  ඒ දේ සිදු වූයේ හයවෙනි පැයේදී* පමණය. එදින පාස්කුව සඳහා සූදානම් වීමේ දවස විය.+ “බලන්න, ඔබේ රජ” කියා පිලාත් යුදෙව්වරුන්ට කීවේය. 15  නමුත් ඔවුහු කෑගසමින්, “ඔහුව මරා දමන්න! මරා දමන්න! ඔහුව කණුවක ඇණ ගසා මරා දමන්න” කියා පැවසූහ. “මම ඔබේ රජුව කණුවක ඇණ ගසා මරා දමනවාට ඔබ කැමතිද” කියා පිලාත් ඔවුන්ගෙන් ඇසුවේය. නායක පූජකයෝ පිළිතුරු දෙමින්, “අපට සීසර් හැර වෙන කිසි රජෙක් නැහැ”+ කියා පැවසූහ. 16  එවිට පිලාත් ඔහුව කණුවක ඇණ ගසා මරණයට පත් කිරීම සඳහා භාර දුන්නේය.+ එවිට හේවායෝ යේසුස්ව භාරගත්හ. 17  යේසුස් වධකණුව රැගෙන ගියේය.+ ඔහු එය රැගෙන හෙබ්‍රෙව් බසින් ගොල්ගොතා ලෙස හැඳින්වූ+ හිස්කබල නම් ස්ථානයට ගියේය.+ 18  හේවායන් ඔහුව කණුවේ ඇණ ගසා එල්ලා තැබුවේ එතැනය.+ එහි තවත් මිනිසුන් දෙදෙනෙකුවද කණුවල එල්ලන ලදි. මැදින් එල්ලා තැබුවේ යේසුස්වය.+ එක් කෙනෙක් ඔහුගේ දකුණු පසින්ද අනික් තැනැත්තා ඔහුගේ වම් පසින්ද එල්ලන ලදි. 19  පිලාත් වධකණුවේ සවි කිරීම සඳහා සටහනක්ද පිළියෙල කළේය. එහි ලියා තිබුණේ, “යුදෙව්වරුන්ගේ රජු වන නාසරෙත් නුවරේ යේසුස්”+ කියාය. 20  යේසුස්ව කණුවේ ඇණ ගසා තිබූ ස්ථානය නුවරට කිට්ටුවෙන් පිහිටා තිබුණු නිසා+ යුදෙව්වරුන්ගෙන් බොහෝදෙනෙක් ලියා තිබූ ඒ දේ කියෙව්වෝය. එය හෙබ්‍රෙව්, ලතින් සහ ග්‍රීක යන භාෂාවලින් ලියා තිබිණ. 21  නමුත් යුදෙව්වරුන්ගේ නායක පූජකයෝ පිලාත්ට මෙසේ කීවෝය. “‘යුදෙව්වරුන්ගේ රජ’ කියා ලියන්න එපා. ‘මම යුදෙව්වරුන්ගේ රජු’ කියා ඔහු පැවසූ බව ලියන්න.” 22  එවිට පිලාත්, “මම ලියූ දේ වෙනස් කරන්නේ නැහැ” කියා පැවසුවේය. 23  යේසුස්ව කණුවේ ඇණ ගැසූ හේවායෝ, ඔහුගේ පිට වස්ත්‍ර ගෙන එක් හේවායෙකුට එක් කොටසක් බැගින් කොටස් හතරකට බෙදාගත්තෝය. ඔවුහු ඔහුගේ ඇතුල් වස්ත්‍රයද ගත්හ. ඒ වස්ත්‍රයට මූට්ටුවක් තිබුණේ නැත. එය උඩ සිට පහළට මුළුමනින්ම එකට වියා තිබිණ.+ 24  එහෙයින් ඔවුහු එකිනෙකාට මෙසේ කීවෝය. “අපි එය ඉරන්නේ නැතුව එය අයිති වෙන්නේ කාටද කියා තීරණය කරන්න දාදු දමමු” කියා කීවෝය. මෙයින්, “ඔවුහු මාගේ පිට වස්ත්‍ර තමන් අතරේ බෙදාගෙන මාගේ ඇඳුම් සඳහා දාදු දැමුවෝය”+ කියා ශුද්ධ ලියවිල්ලේ සඳහන් දේ ඉටු විය. ඒ හේවායන් කටයුතු කළ ආකාරය ශුද්ධ ලියවිල්ලේ සඳහන් ලෙසම සිදු විය. 25  යේසුස්ගේ වධකණුව අසල ඔහුගේ මව,+ ඔහුගේ මවගේ සහෝදරිය, ක්ලෝපස්ගේ භාර්යාව වූ මරියා+ සහ මරියා මග්දලේනා+ යන අය සිටගෙන සිටියහ. 26  එවිට යේසුස් ඔහුගේ මවද ඇය අසල තමා ප්‍රේම කළ ගෝලයාද+ සිටිනවා දැක, “මේ සිටින්නේ ඔබේ පුතා” කියා තම මවට කීවේය. 27  ඉන්පසු ඔහු ඒ ගෝලයාට මෙසේ පැවසුවේය. “මේ සිටින්නේ ඔබේ මව!” පසුව ඒ ගෝලයා ඇයව තම ගෙදරට ගෙන ගොස් බලාගත්තේය. 28  ඒ දේවලින් පසු යේසුස්, දැන් සියල්ල ඉටු වී තිබෙන බව දැන ශුද්ධ ලියවිල්ලේ සඳහන් තවත් දෙයක් ඉටු කරමින් “මට තිබහයි”+ කියා කීවේය. 29  එම ස්ථානයෙහි ඇඹුල් වයින්වලින් පිරුණු බඳුනක් තිබිණ. එහෙයින් ඔවුහු ස්පොන්ජියකට සමාන දෙයක් ගෙන එය ඇඹුල් වයින්වලින් පොඟවා ඉදල් ඉරිඟු* බට දණ්ඩක ගසා එය ඔහුගේ මුවට ළං කළෝය.+ 30  යේසුස් ඒ ඇඹුල් වයින් ස්වල්පයක් ගත් පසු, “ඔබ පැවසූ සෑම දෙයක්ම මම ඉටු කළා”+ කියා පවසමින් තම හිස නමා අවසන් හුස්ම හෙළුවේය.+ 31  එදා සබතට සූදානම් වීමේ දවස විය.+ සබත් දවසේදී වධකණු මත මළ සිරුරු එල්ලා තිබෙනවා දැකීමට යුදෙව්වරුන් අකමැති වූ නිසා+ ඔවුහු ඔවුන්ගේ කකුල් කඩා, එතැනින් මළ සිරුරු ඉවත් කිරීමට පිලාත්ගෙන් අවසර ලබාගත්තෝය. (ඒ සබත් දවස මහ සබත් දවසක් විය.)+ 32  ඒ අනුව හේවායන් කිහිපදෙනෙක් ඇවිත් යේසුස් අසල කණුවක එල්ලා තැබූ මුල් තැනැත්තාගේ කකුල්ද ඉන්පසු අනික් තැනැත්තාගේ කකුල්ද කැඩුවෝය. 33  ඔවුහු යේසුස්ගේ කකුල් කැඩීමට ඔහු ළඟට ගිය විට ඔහු ඒ වන විටත් මිය ගොස් ඇති බව දුටු නිසා ඔහුගේ කකුල් කැඩුවේ නැත. 34  නමුත් එක් හේවායෙක් හෙල්ලයකින් ඔහුගේ ළයට පහළින් පිහිටි පෙදෙසට ඇන්නේය.+ එවිට එතැනින් ලේත් වතුරත් පිටතට ආවේය. 35  මේ සෑම දෙයක්ම වාර්තා කරන්නේ ඇසින් දුටු සාක්ෂිකරුවෙකු විසිනි. ඔහුගේ සාක්ෂිය සැබෑය. තම සාක්ෂිය සැබෑ බව ඔහුටද විශ්වාසය. එමනිසා ඔබටත් එය විශ්වාස කළ හැකිය.+ 36  ඇත්තෙන්ම ඒ දේවල් සිදු වූ විට, “ඔහුගේ එක ඇටයක්වත් බිඳිනු නොලබන්නේය”+ කියා ශුද්ධ ලියවිල්ලේ සඳහන් දේ ඉටු විය. 37  ශුද්ධ ලියවිල්ලේ තවත් ස්ථානයක, “ඔවුන් තම හෙල්ලයෙන් තුවාල කළ තැනැත්තා දෙස බලන”+ බවද සඳහන් වී තිබේ. 38  මෙම සිද්ධීන්වලින් පසු අරිමාතියේ උපන් යෝසෙප්, යේසුස්ගේ දේහය ගෙන යෑමට පිලාත්ගෙන් අවසර ඉල්ලුවේය. ඔහු යුදෙව්වරුන්ට* ඇති බිය නිසා+ රහසින් යේසුස්ගේ ගෝලයෙකුව සිටි කෙනෙකි. පිලාත් ඔහුට ඒ සඳහා අවසර දුන් විට+ ඔහු ඇවිත් යේසුස්ගේ දේහය රැගෙන ගියේය.+ 39  මුල්ම වතාවේදී රාත්‍රියක යේසුස්ව හමු වීමට පැමිණි නිකදේමස්ද සුවඳ ලාටු සහ අගිල් රාත්තල් සියයක්* පමණ රැගෙන ආවේය.+ 40  ඔවුහු යේසුස්ගේ දේහය ගෙන යුදෙව්වරුන්ගේ සිරිතට අනුව තැන්පත් කිරීම සඳහා සූදානම් කළෝය. ඒ සඳහා දේහය සුවඳ ද්‍රව්‍ය සමඟ රෙදි පටිවලින් ඔතන ලදි.+ 41  ඔහුව කණුවේ ඇණ ගැසූ ස්ථානයෙහි උයනක් තිබිණ. ඒ උයනෙහි එතෙක් කිසිවෙකුව තැන්පත් කර නොතිබුණු අලුත් සොහොන් ගෙයක්ද තිබිණ.+ 42  එදා යුදෙව්වරුන්ගේ සූදානම් වීමේ දවස වූ නිසාත්+ සොහොන් ගෙය ළඟපාතක තිබූ නිසාත් ඔවුහු යේසුස්ව එහි තැන්පත් කළෝය.

පාදසටහන්

එනම්, දහවල් 12ට පමණ.
හිසොප් යනුවෙන්ද හැඳින්වේ.
යොහ 7:13හි පාදසටහන බලන්න.
කිලෝග්‍රෑම් 32.7ක් පමණ.