යෙසායා 7:1-25

7  උසියාගේ පුත්‍රයා වූ යෝතම්ගේ පුත් ආහස්+ යූදාහි රජකම් කළ කාලයේදී, සිරියාවේ රජු වූ රෙෂින්ද+ ඊශ්‍රායෙල්හි රජු වූ රෙමලියාගේ පුත් පේකාද+ යෙරුසලමට විරුද්ධව යුද්ධ කිරීමට පැමිණියෝය. නමුත් ඔවුන්ට එය යටත් කරගැනීමට නොහැකි විය.+  ඒ කාලයේදී, දාවිත්ගේ රජ පෙළපතට අයත් යූදාහි රජුට මෙසේ ආරංචි විය. “එෆ්‍රායිම්වරුන්+ සමඟ සිරියානුවන් එකතු වෙලා!” මෙය ඇසූ විට ආහස් රජද යූදා සෙනඟද මහත් සේ භය වී තද සුළඟට සෙලවෙන වනයේ ගස් මෙන් වෙවුලන්න පටන්ගත්හ.+  එවිට යෙහෝවා දෙවි යෙසායාට මෙසේ කීවේය. “ඔබේ පුත් ෂෙයර්-යාෂුබ්*+ සමඟ ගොස් ආහස් රජුව හමු වන්න කියා මම ඔබෙන් ඉල්ලමි. රෙදි සෝදන්නන්ගේ පිට්ටනියට යන මාර්ගයෙහි+ පිහිටි ඉහළ පොකුණේ දිය අගල+ ළඟදී ඔබට ඔහුව හමු වෙයි.  ඔහුට මෙසේ කියන්න. ‘ඔබ කලබල නොවී ස්ථිරව සිටිය යුතුයි.+ සිරියාවේ රජු වන රෙෂින් හා රෙමලියාගේ පුත්‍රයා+ මහත් කෝපයෙන් සිටින බව ඇත්තයි. නමුත් ඔවුන්ට භය නොවන්න. අධෛර්යයට පත් නොවන්න.+ මන්ද ඒ රජුන් දෙදෙනා හරියට නිවීගෙන යන දර කැබලි දෙකක් මෙනි.  එෆ්‍රායිම්වරුන් සමඟ එකතු වී සිටින සිරියානුවන්ද රෙමලියාගේ පුත්‍රයාද ඔබට නපුරක් කරන්න සැලසුම් කරමින් මෙසේ කීවෝය.  “අපි යූදා දේශයේ පවුරු බිඳ දමා එය නාස්තියට පමුණුවා යටත් කරගනිමු. ඉන්පසු ටාබෙයෙල්ගේ පුත්‍රයාව ඒ දේශයේ රජු හැටියට පත් කරමු.”+  “‘එහෙත් විශ්වයේ පාලකයාණන් වන යෙහෝවා දෙවි මෙසේ පවසා තිබේ. “ඔවුන්ගේ සැලසුම් කිසිසේත් සාර්ථක වන්නේ නැත.+  සිරියාවේ ප්‍රධාන නගරය දමස්කයයි. දමස්කය පාලනය කරන්නේ රෙෂින් රජුයි. තව අවුරුදු හැටපහකින් එෆ්‍රායිම්වරු ජාතියක් හැටියට පොළොවෙන් තුරන් වනු ඇත.+  එෆ්‍රායිම් දේශයේ ප්‍රධාන නගරය සමාරියයි.+ සමාරිය පාලනය කරන්නේ රෙමලියාගේ පුත්‍රයාය.+ ඔබ සියලුදෙනාම මා කෙරෙහි ස්ථිර විශ්වාසයකින් සිටිය යුතුයි. එසේ නොකළොත් ඔබට වැඩි කල් පැවතීමට ඉඩ නොලැබෙයි.”’”+ 10  යෙහෝවා දෙවි ආහස් රජුට මෙසේද කීවේය. 11  “මේ කාරණා සත්‍යයද කියා සහතික කරගැනීමට යෙහෝවා දෙවි වන මාගෙන් ඕනෑම ලකුණක් ඉල්ලන්න.+ පොළොවේ ගැඹුරුම ස්ථානයක තිබෙන දෙයක් වුණත් ඉහළ අහසේ තිබෙන දෙයක් වුණත් ඉල්ලන්න.” 12  නමුත් ආහස් මෙසේ ඇසුවේය. “මම මොකටද යෙහෝවා දෙවිගෙන් ලකුණක් ඉල්ලා ඔහු ඒ දේ කරයිද කියා පරීක්ෂා කර බලන්නේ?” 13  එවිට අනාගතවක්තෘ ඔහුට මෙසේ කීවේය. “දාවිත්ගේ පුත්‍රය, මා කියන දේට දැන් සවන් දෙන්න. ඔබ මිනිසුන්ව වෙහෙසට පත් කළා මදිවට දැන් මගේ දෙවිවත් වෙහෙසට පත් කරන්න හදනවාද?+ 14  යෙහෝවා දෙවි ඔබට දෙන ලකුණ මෙයයි. තරුණිය+ ගැබ්ගෙන+ පුතෙකු බිහි කරන්නීය.+ ඇය ඔහුට එම්මානුවෙල්* යන නම තබනු ඇත. 15  හරි වැරැද්ද අතර වෙනස තේරුම්ගත+ හැකි වයසට පැමිණෙන විට ඔහු වෙඬරු* හා මීපැණි කමින් සිටියි. 16  දරුවා ඒ වයසට පැමිණෙන්නත් කලින්+ ඔබව මහත් සේ බියට පත් කළ මේ රජුන් දෙදෙනාගේම දේශයන් පාළුවට යන්නේය.+ 17  නමුත් යෙහෝවා දෙවි, ඔබට+ හා ඔබේ පියාගේ පෙළපතට විරුද්ධවත් ඔබේ සෙනඟට විරුද්ධවත් ඇසිරියාවේ රජුව+ එවන්නේය. එෆ්‍රායිම්වරුන් යූදාහි+ වැසියන්ගෙන් වෙන් වූ කාලයේ පටන් මේ දක්වා නොතිබුණු ඉතා දුක්ඛිත කාලයකට ඔබට මුහුණ දෙන්න සිදු වෙයි. 18  “ඒ දවසේදී යෙහෝවා දෙවි ඊජිප්තුවේ නයිල් ගඟෙන් නික්මෙන සියලුම දිය පහරවල් අසල සිටින මැස්සන්ටත් ඇසිරියාවේ+ සිටින මීමැස්සන්ටත්+ හඬගසයි. 19  ඔහුගේ හඬ අසා පැමිණෙන උන් කඳු බෑවුම් හා පර්වත මෙන්ම සියලුම කටු පඳුරු හා තණබිම්ද වසාගනු ඇත.+ 20  “ඒ දවසේදී යෙහෝවා දෙවි, තමන්ගේ කැමැත්ත ඉටු කිරීම සඳහා මහ ගඟ*+ අවට තිබෙන ප්‍රදේශයෙන් දැලිපිහියක් ගෙන්වාගනියි. දෙවි දැලිපිහියක් වැනි වූ ඇසිරියාවේ රජු+ මාර්ගයෙන් දේශයේ වැසියන්ගේ හිසකෙස් හා රැවුල පමණක් නොව ඇඟ පුරාම තිබෙන රෝම පවා කපා ඉවත් කරන්නේය.+ 21  “ඒ කාලයේදී යමෙක් තරුණ එළදෙනකව හා බැටළුවන් දෙදෙනෙකුව බේරා උන්ව රැකබලා ගනියි.+ 22  උන්ගෙන් වුවමනාවටත් වඩා කිරි ලැබෙන නිසා ඔහුට වෙඬරු කන්න සිදු වෙයි. දේශයේ ඉතුරු වී සිටින සියලුදෙනාටම වෙඬරු හා මීපැණි+ හැර වෙන කිසිම දෙයක් කන්න ඉතුරු නොවෙයි. 23  “රිදී ෂෙකෙල් දහසක්+ වටිනා මිදිවැල් දහසක් තිබුණු වතුවල දකින්න ලැබෙන්නේ කටු පඳුරු හා වල් පැළ පමණි.+ 24  දේශයට ඇතුල් වන අයට ඊතල හා දුනු රැගෙන යන්න සිදු වෙයි.+ මන්ද මුළු දේශයම කටු පඳුරු සහ වල් පැළෑටිවලින් වැසී ගිය කැලෑවක් සේ පවතිනු ඇත. 25  කලින් එළි පෙහෙළි කර තිබුණු කඳු බෑවුම් නැවතත් කටු පඳුරු හා වල් පැළෑටිවලින් ගහනව තිබෙනු ඇත. මිනිස්සු ගොනුන්ට සහ බැටළුවන්ට ඒ ස්ථානවල ඉබාගාතේ යන්න හරිති. නමුත් එහි කිසි මිනිසෙක් ගමන් කරන්නේ නැත.”+

පාදසටහන්

තේරුම, “නැවත පැමිණෙන්නේ ඉතුරුව සිටින කුඩා පිරිසක් පමණි.”
තේරුම, “දෙවි අප සමඟය.”
උත් 18:8හි පාදසටහන බලන්න.
එනම්, යුප්‍රටීස් ගඟ.