යෙසායා 59:1-21

59  ඔබව බේරාගැනීමට යෙහෝවා දෙවිගේ හස්තය දිග මදි කියා ඔබ සිතනවාද?+ ඔබේ කන්නලව් නෑසෙන තරමටම දෙවිගේ ඇසීම දුර්වලයිද?+  කිසිවිටෙකත් එසේ විය නොහැක. ඔබ සහ ඔබේ දෙවි අතර භේදයක් ඇති වුණේ ඔබේම වැරදි ක්‍රියා නිසයි.+ දෙවි ඔබෙන් ඔහුගේ මුහුණ සඟවා ඔබේ කන්නලව්වලට සවන් නොදෙන්නෙත් ඔබ කරන පව් නිසාමයි.+  ඔබේ දෑත් ලෙයින්ද+ ඔබේ ඇඟිලි පාපයෙන්ද අපවිත්‍ර වී ඇත. ඔබේ දෙතොල් වංචාවෙන්ද+ ඔබේ දිව අධර්මිෂ්ඨකමින්ද දූෂ්‍ය වී තිබේ.+  ධර්මිෂ්ඨ දේ කතා කරන කිසිවෙක් නැත.+ නඩු විභාගයකදී සත්‍යය කතා කරන එක් කෙනෙකුවත් සොයාගත නොහැක.+ ඔබ විශ්වාසය තබන්නේ කිසි කමකට නැති නිෂ්ඵල දේවල් කෙරෙහිය.+ ඔබ අන්‍යයන්ට හානි පමුණුවන ලෙස දුෂ්ට දේ කුමන්ත්‍රණය කරන්නහුය.+  ඔවුහු විෂකුරු සර්පයන්ගේ බිත්තර ආරක්ෂා කරති. ඒ බිත්තර කන කවරෙක් වුවත් මිය යයි. ඒවා බිඳෙන විට එළියට එන්නේ පොළොං පැටවුන්ය.+ ඔවුහු මකුළු දැල්ද වියති.+  ඒ මකුළු දැල් වස්ත්‍රයක් සේ පළඳින්න නොහැකි වනවා සේම ඔවුන් කරන කිසිම දෙයකින් ඔවුන්ට ආරක්ෂාවක් නොලැබෙයි.+ ඔවුහු අන්‍යයන්ට දුක් වේදනා ඇති කරන දාමරිකයෝය.+  ඔවුන් දුවන්නේ දුෂ්ටකම් කරන්නමය.+ නිදොස් අයගේ ලේ වගුරුවන්න ඔවුහු ඉක්මන් වෙති.+ ඔවුන්ගේ සිතුවිලි දුෂ්ටය.+ ඔවුහු යන යන තැන කොල්ල කෑම්ද විනාශයද සිදු කරති.+  ඔවුහු සමාදානයේ මඟ+ ප්‍රතික්ෂේප කර ඇත. ඔවුන් යන මඟෙහි යුක්තියට තැනක් නොමැත.+ ඔවුන් කටයුතු කරන්නේ වංකකමිනි.+ ඔවුන් යන මඟෙහි ගමන් කරන කිසි කෙනෙක් සාමය අද්දකින්නේ නැත.+  යුක්තියත් ධර්මිෂ්ඨකමත් අපෙන් ඈත් වී තිබෙන්නේ ඒ නිසාය. ආලෝකය උදා වෙයි කියා බලාපොරොත්තු වුණත් ගන අඳුර දසත පැතිර ඇත. අප නිරතුරුවම ගමන් කරන්නේ අඳුරෙහිය.+ 10  අප තාප්පයක් අත පත ගාමින් ඇවිදින අන්ධයන් මෙනි.+ අප මධ්‍යාහ්නයේ පවා අඳුරේ ඇවිද බිම වැටෙන අය මෙනි. ශක්තිමත් මිනිසුන් අතරේ අප මළ අය මෙනි.+ 11  අපි වලසුන් මෙන් කෑගසන්නෙමු. අපි පරෙවියන් මෙන් දුක්මුසුව හඬ නඟන්නෙමු.+ අප වෙනුවෙන් යුක්තිය ඉටු කරයි කියා බලාපොරොත්තු වුණත්+ එසේ සිදු නොවීය. අපට ගැලවීම ලැබෙයි කියා සිතුවත් එයත් අපට ලැබුණේ නැත.+ 12  අපි ඔබට විරුද්ධව බොහෝ සේ කැරලිගැසුවෙමු.+ අප කළ හැම වැරදි ක්‍රියාවක්ම අපට විරුද්ධව සාක්ෂි දෙයි.+ අප කැරලිගසා ඔබට විරුද්ධව කළ හැම වැරදි ක්‍රියාවක්ම අපි හොඳින් දන්නෙමු.+ 13  ඔවුන් යෙහෝවා දෙවිව ප්‍රතික්ෂේප කර+ ඔහුගේ නීතිය උල්ලංගනය කර තිබේ. ජනයා දෙවිගෙන් ඈත් වී පව් කරන්නත් අන්‍යයන්ට හිංසා පීඩා කරන්නත් කුමන්ත්‍රණය කරති.+ ඔවුහු තම සිත් තුළ වංචනික අදහස් පෝෂණය කරමින් බොරු කියති.+ 14  යුක්තිය පසෙකට දමා ඇත.+ ධර්මිෂ්ඨකම පෙනෙන තෙක් මානයක නැත.+ ජනයා ගැවසෙන ස්ථානවල සත්‍යයටවත් අවංකකමටවත් තැනක් නැත.+ 15  නපුරු දේ ප්‍රතික්ෂේප කරන තැනැත්තා දුෂ්ටයන්ගේ ගොදුරක් බවට පත් වෙයි. සත්‍යය යටපත් වී+ බොරුව රජයයි.+ දේශයේ යුක්තිය ඉටු නොවන බව යෙහෝවා දෙවි දුටුවේය.+ ඔහු ඒ ගැන බොහෝ සෙයින් දුකට පත් වුණේය. 16  නිදොස් අය වෙනුවෙන් මැදිහත් වී+ පියවර ගැනීමට කිසිවෙකු ඉදිරිපත් නොවන බව දැක දෙවි පුදුමයට පත් විය. ඒ නිසා දෙවිම මැදිහත් වී ගැලවීම ලබා දුන්නේය. ඔහුගේ සවිය වූයේ ඔහුගේ ධර්මිෂ්ඨකමයි.+ 17  ඔහු ධර්මිෂ්ඨකම නමැති යුධ ඇඳුමෙන්ද+ ගැලවීම නමැති හිස්වැස්මෙන්ද සැරසී සිටියේය.+ ඔහු තම සතුරන්ට නිසි දඬුවම් ලබා දෙන පිණිස යුක්තිය වස්ත්‍රයක් මෙන්ද+ ඔහුගේ දැවෙන උදහස සළුවක් මෙන්ද පැළඳ ආවේය.+ 18  ඔහු එක් එක් කෙනාට ප්‍රතිඵල දෙන්නේ ඔවුන්ගේ ක්‍රියාවලට අනුවය.+ ඔහු තම සතුරන්ට විරුද්ධව තම කෝපය පිට කරමින් ඔවුන්ට නිසි දඬුවම් ලබා දෙන්නේය.+ දූපත්වල වැසියන් පිටත් ඔහු තම විනිශ්චය ගෙනෙයි.+ 19  යෙහෝවා දෙවි තම බලයෙන් සැරසී වේගයෙන් ගලා එන ජල ධාරාවක් මෙන් පැමිණ මහත් විනාශයක් සිදු කරනු ඇත.+ ඒ නිසා බස්නාහිර දෙසින් සිටින ජනයා යෙහෝවා දෙවිගේ නාමයට ගරුබිය දක්වන්නෝය.+ නැඟෙනහිර දෙසින් සිටින ජනයාද ඔහුට ප්‍රශංසාව දෙන්නෝය.+ 20  යෙහෝවා දෙවි මෙසේ පවසයි. “මිදුම්කරු+ සියොන්+ වෙතට පැමිණ යාකොබ්ගේ+ පුත්‍රයන් අතරින් යහමඟට හැරී එන අය වෙනුවෙන් පියවර ගන්නේය.” 21  යෙහෝවා දෙවි මෙසේ පවසයි. “මා ඔබ සමඟ ඇති කරගන්නා ගිවිසුම මෙයයි.+ “මම ඔබට මාගේ බලය දුන්නෙමි.+ ඔබ කතා කළ යුතු දේ ඔබට කියා දුන්නෙමි.+ මා ඔබට ඉගැන්වූ වචන ඔබේ මුවින්වත් ඔබේ දරුදැරියන්ගේ මුවින්වත් ඔවුන්ගේ දරුදැරියන්ගේ මුවින්වත් කිසිදා පහ නොවෙයි.” යෙහෝවා දෙවි තවදුරටත් මෙසේ පවසයි. “මෙය සදාකාලයටම පවතින පොරොන්දුවකි.”+

පාදසටහන්