යෙසායා 5:1-30

5  මා ප්‍රේම කරන තැනැත්තාට ඔහුගේ මිදිවත්ත+ ගැන මම දැන් ගීයක් ගයන්නෙමි. මා ප්‍රේම කරන තැනැත්තා සශ්‍රීක කඳු බෑවුමක මිදිවත්තක් වගා කළේය.  ඔහු එහි බිම කොටා ගල් ඉවත් කරමින් පස හොඳින් සූදානම් කළේය. ඉන්පසුව ඔහු ඉස්තරම් රතු මිදි වර්ගයක් වගා කර එහි වයින් සාදන යන්ත්‍රයක්ද සෑදුවේය.+ ඔහු මිදිවත්ත මැද ටැඹක් ඉදි කළේය.+ ඒ මිදිවැලෙන් හොඳ පලදාවක්+ ලැබෙයි කියා ඔහු බලාපොරොත්තු වුණත් එහි හටගත්තේ වල් මිදිය.+  “යෙරුසලමේ වැසියෙනි, යූදාහි ජනයෙනි, දැන් මා දෙසත් මගේ මිදිවත්ත දෙසත් බලා විනිශ්චය කරන්න.+  මගේ මිදිවත්ත වෙනුවෙන් මට කළ හැකි හැම දෙයක්ම මම කළෙමි. ඒ වෙනුවෙන් කරන්න තව කිසි දෙයක් ඉතුරු වී නැත.+ මම බලාපොරොත්තු වුණේ එයින් හොඳ පලදාවක් නොවෙයිද? එසේනම්, එයින් වල් මිදි හටගත්තේ කොහොමද?  මගේ මිදිවත්තට මම කරන්න යන දේ දැන් ඔබට දන්වමි. මම වත්ත වටේට සෑදූ වැට ඉවත් කර+ පුලුස්සා දමන්නෙමි.+ ගල්වලින් සෑදූ එහි තාප්පයද මම කඩා දමන්නෙමි. ඉන්පසු වත්ත පාගා දමනු ඇත.+  මම එය පාළුවට යන්න ඉඩහරින්නෙමි.+ එහි මිදිවැල් කප්පාදු කරන්නවත් පස් බුරුල් කරන්නවත්+ කිසිවෙකු නොමැති නිසා, එය කටු පඳුරු හා වල් පැළෑටිවලින් වැසී යනු ඇත.+ වැසි නොවසින ලෙස මම වලාකුළුවලට අණ දෙන්නෙමි.+  මේ මිදිවත්තේ+ අයිතිකරු ස්වර්ගයේ සේනාවල අධිපති වූ යෙහෝවා දෙවි වන මමය. මිදිවත්තෙන් සංකේතවත් කරන්නේ ඊශ්‍රායෙල් ජාතියවයි. මා ප්‍රිය කළ මිදිවැල නම් යූදා ගෝත්‍රයයි.+ ඔවුන් යුක්තිය ඉටු කරයි+ කියා මා බලාපොරොත්තු වූ නමුත් ඔවුහු නීතියට ගරු නොකළෝය. ඔවුන් ධර්මිෂ්ඨ ලෙස ක්‍රියා කරයි කියා මා බලාපොරොත්තු වුණත් මට ඇසුණේ පීඩිතවූවන්ගේ විලාප හඬ පමණි.”+  අනුන්ට කිසිවක් ඉතුරු නොකර අවට තිබෙන නිවෙස්+ හා වතුපිටි සියල්ල අයිති කරගෙන+ දේශයේ තනිව ජීවත් වන අයට දුක් වෙන්න සිදු වෙයි.  මේ විශාල මන්දිර කොතරම් අලංකාරව තිබුණත් ඒවා ගරාවැටී පාළුවට යන ආකාරය දැක මිනිස්සු පුදුමයට පත් වන්නෝය. ඒ නිවෙස්වල එක් වැසියෙකුවත් ඉතුරු නොවන බවට ස්වර්ගයේ සේනාවල අධිපති වන යෙහෝවා දෙවි මට දිවුරා පොරොන්දු විය.+ 10  අක්කර+ දහයක මිදිවත්තකින් ලැබෙන්නේ වයින් බාත් මිනුමක්*+ පමණි. බීජ හෝමරයක්* වැපුරුවත් ලැබෙන්නේ ධාන්‍ය ඒපාවක්* පමණි.+ 11  හිමිදිරි පාන්දරින්ම නැඟිට මත්පැන්+ සොයා ගොස් රෑ යාමය දක්වාම බොමින් වෙරිමත් වී සිටින අයට අත් වන්නේ දුක පමණි.+ 12  වීණාවේ, කුඩා වීණාවේ, බට නළාවේ සහ රබානේ මිහිරි හඬ ඔවුන්ගේ උත්සවවලදී ඇසෙයි. ඔවුහු වයින් බොමින් ප්‍රීති වෙති.+ එහෙත් යෙහෝවා දෙවිගේ ක්‍රියා ඔවුහු ගණනකටවත් ගන්නේ නැත. ඒවා ගැන සොයා බලන්න ඔවුන්ට කිසිම වුවමනාවක් නැත.+ 13  මගේ සෙනඟ දැනගැන්මට අනුව ක්‍රියා නොකරන+ නිසා ඔවුන්ව වහල්භාවයට රැගෙන යනු ඇත. ඔවුන්ගේ උත්තමයෝ හාමතෙන්ද+ පොදු ජනයා පිපාසයෙන්ද පෙළෙනු ඇත.+ 14  මිනී වළද එහි කට අප්‍රමාණ ලෙස ඇරගෙන ඔවුන්ව ගිලගන්න මහත් ආශාවෙන් බලාගෙන සිටියි.+ නගරයේ උත්තමයන්වද පොදු ජනයාවද ඝෝෂා කරන්නන්වද ප්‍රීති ප්‍රමෝදයට පත් වන්නන්වද එය ගිලගනියි.+ 15  සැමදෙනාවම නින්දාවට පත් කරනු ලබයි. උත්තමයන්වත් පහත් කරනු ලබයි.+ 16  ස්වර්ගයේ සේනාවල අධිපති වන යෙහෝවා දෙවි යුක්තිය ඉටු කරන නිසා ඔහු මහත් සේ ගෞරවයට පත් වන්නේය.+ ශුද්ධ තැනැත්තාණන්+ වන සැබෑ දෙවි ධර්මිෂ්ඨව කටයුතු කරමින්+ තමන්ගේ ශුද්ධකම එළිදරව් කරන්නේය. 17  දේශයේ නටබුන් අතරේ බැටළුවෝ තණ කන්නෝය. ඔවුන්ගේ සතුන්ගේ ගොදුරුබිම් දැන් විදේශිකයන්ගේ ගොදුරුබිම් වී ඇත.+ 18  සතෙකු කඹයකින් ගැලක් ඇදගෙන යන්නාක් මෙන් වංකව කටයුතු කර පාපය ඇදගන්නා අයට අත් වන්නේ දුක පමණි.+ 19  ඔවුහු මෙසේ කියති. “දෙවිට කැමති දෙයක් කරන්න කියන්න. අපේ ඇස් දෙකට දකින පිණිස පමා නොවී එසේ කරන්න කියන්න. ඊශ්‍රායෙල්හි ශුද්ධ තැනැත්තාණන් ඔහුගේ අරමුණ ඉටු කරන ආකාරය බලන්න අපිත් ආසයි.”+ 20  යහපතට නපුර කියාද නපුරට යහපත කියාද+ අඳුරට ආලෝකය කියාද ආලෝකයට අඳුර කියාද තිත්ත දේට මිහිරි කියාද මිහිරි දේට තිත්ත කියාද පවසන සියලුදෙනාටම දුක් වෙන්න සිදු වෙයි.+ 21  තමන් ප්‍රඥාවන්තයයි සිතන අයටත් තමන්ට නුවණ තිබෙනවායයි සිතන අයටත් දුක් වෙන්න සිදු වෙයි.+ 22  බොහෝ වයින් බීමටත් සැර මත්පැන් සෑදීමටත් දක්ෂ වූ අයට අත් වන්නේද දුක පමණි.+ 23  අල්ලසක් ගෙන වරදකරුවෙකු නිදොස් බව ප්‍රකාශ කරන අයත්+ ධර්මිෂ්ඨයෙකු වරදකරුවෙකු බව ප්‍රකාශ කරන අයත් දුකට පත් වේ.+ 24  ඔවුහු ස්වර්ගයේ සේනාවල අධිපති වන යෙහෝවා දෙවිගේ නීතිය ප්‍රතික්ෂේප කළෝය.+ ඊශ්‍රායෙල්හි ශුද්ධ තැනැත්තාණන්ගේ වචනයට ඔවුහු අගෞරව කර ඇත.+ ඒ නිසා, ගිනිදැල්ලට පිදුරු දැවී යන්නාක් මෙන්ද+ වියළී ගිය තණකොළ පොළොවටම අළු වී යන්නාක් මෙන්ද ඔවුහු විනාශ වෙති. ඔවුන්ගේ මුල දිරාපත් වී ගඳගසයි.+ ඔවුන්ගේ මල් වියළී දූවිලි මෙන් සුළඟට ගසාගෙන යයි. 25  යෙහෝවා දෙවිගේ කෝපය ඔවුන්ට විරුද්ධව ඇවිළී තිබෙන්නේ හොඳ හේතු ඇතුවයි. ඔහු අත දිගහැර ඔවුන්ට පහර දෙයි.+ එකල කඳු දෙදරුම් කයි.+ බැලූ බැලූ තැන ඔවුන්ගේ මළ මිනී කුණු කසළ මෙන් වීථිවල ගොඩගසා තිබෙයි.+ ඔවුන්ගේ දුෂ්ටකම හේතුවෙන් දෙවිගේ කෝපය තවමත් නිවී නැත. ඔහුගේ හස්තය ඔවුන්ට විරුද්ධව දිගු කර තිබේ. 26  දෙවි කොඩියක් සිටුවා දුර ඈත සිටින බලවත් ජාතියකට සංඥාවක් දෙන්නේය.+ පොළොවේ ඈත කෙළවර සිටින ඒ ජනයාව කැඳවන්නේය.+ ඔහුගේ හඬ ඇසුණු විගස ඔවුහු වේගයෙන් පැමිණෙන්නෝය.+ 27  ඔවුන් අතරේ විඩාවට පත්වූවෙක්වත් දුර්වලයෙක්වත් නැත. කිසිවෙක් විවේක ගන්නේවත් නිදාගන්නේවත් නැත. ඔවුන්ගේ ඉඟපටි නොලිහෙන්නේය. වහන්පටිද නොකැඩෙන්නේය. 28  ඔවුහු තම ඊතල තියුණු කර දුන්න සූදානම් කරගෙන සිටිති.+ ඔවුන්ගේ අශ්වයන්ගේ කුර කලු ගල් මෙනි.+ ඔවුන්ගේ අශ්ව රථවල රෝද සුළිසුළඟක් මෙන් කැරකෙන්නේය.+ 29  ඔවුන්ගේ හඬ ගොරවන සිංහයෙකුගේ මෙනි. තරුණ කේශර සිංහයන්+ මෙන් ඔවුහු ගර්ජනා කරති. ඔවුහු ගොදුර ඩැහැගෙන කැමති තැනකට ඇදගෙන යති. ඔවුන්ව නතර කරන්න කිසිවෙකුට නොහැක.+ 30  ඔවුහු ගර්ජනා කරමින් ගොදුර ළඟින්ම සිටිති. ඔවුන්ගේ ගර්ජනා හඬ මුහුදේ ඝෝෂාව මෙන් වන්නේය.+ දේශය දෙස බලන ඕනෑම කෙනෙකු දකින්නේ බිය උපදවන ඝන අන්ධකාරයකි.+ මුළු අහසම වැහි වලාකුළුවලින් වැසී ඇත.

පාදසටහන්

එනම්, ලීටර් 22කි.
එනම්, ලීටර් 220කි.
එනම්, ලීටර් 22කි.