යෙරෙමියා 9:1-26

9  මගේ ඇස් දෙක කඳුළු උල්පතක් වී නම්+ මගේ හිස දිය පොකුණක් වී නම් මැරුම් කෑ මාගේ සෙනඟ වෙනුවෙන් දිවා රෑ දෙකේ මට හඬා වැලපීමට තිබිණ.+  අනේ, මට පාළුකරයේ නවාතැනක් තිබුණා නම්!+ අනාචාරයේ* යෙදෙන,+ ද්‍රෝහිකම් කරන+ මගේ සෙනඟව අත්හැර මට එතැනට දිව යෑමට තිබිණ.  බොරු කීමට ඔවුහු තම දිව දුන්නක් මෙන් නවාගනිති.+ ඔවුහු විශ්වාසවන්ත අය ලෙස දේශයේ හොඳ නමක් දිනාගෙන නැත. යෙහෝවා දෙවි මෙසේ පවසයි. “ඔවුහු නපුරුකමේ අඩියටම බැස සිටිති. ඔවුහු මා ගැනවත් කිසිදු තැකීමක් කළේ නැත.”+  “ඔබේ මිතුරාගෙන් පරෙස්සම් වෙන්න.+ ඔබේ සහෝදරයාවවත් විශ්වාස නොකරන්න.+ ඔබේම සහෝදරයෝ පවා ඔබට හිමි දේ ලබාගැනීමට ඔබව මුළා කරති.+ ඔබේ මිතුරෝ ඔබට අපහාස කරමින් සෑම තැනම ඇවිදිති.+  ඔවුහු එකිනෙකා තම තමාගේ මිතුරාව රවටති.+ ඔවුන්ගේ කටින් එක සත්‍ය වචනයක්වත් පිට නොවෙයි. ඔවුන්ගේ දිව පුරුදු වී තිබෙන්නේ බොරු කීමටමය.+ ඔවුන් හෙම්බත් වන තුරුම කරන්නේ නපුරු දේවල්මය.+  යෙහෝවා දෙවි මෙසේ පවසයි. “ඔබ ජීවත් වන්නේ වංචාකරුවන් අතරෙයි.+ ඔවුන්ගේ කපටිකම නිසා මාව දැන හඳුනා ගැනීමට ඔවුහු කැමති නැත.”+  එබැවින් ස්වර්ගයේ සේනාවල අධිපති වන යෙහෝවා දෙවි තවදුරටත් මෙසේ කීවේය. “මම ඔවුන්ව ලෝහ මෙන් උණු කර ඔවුන්ගේ තත්වය පරීක්ෂා කර බලන්නෙමි.+ එසේ නොකර මාගේ සෙනඟට මා වෙන මොනවා කරන්නද?+  ඔවුන්ගේ දිව් මාරාන්තික ඊතල මෙනි.+ ඔවුන් කතා කරන්නේ වංචනික දේවල්මය. ඔවුහු තම මිත්‍රයා සමඟ සමාදානයෙන් කතා කළත් රහසින් ඔහුට උගුල් අටවති.”+  යෙහෝවා දෙවි මෙසේ පවසයි. “ඔවුන් කරන මේ අපරාධවලට ඔවුන් අනිවාර්යයෙන්ම මට ගණන් දිය යුතුයි. එයින් මා ඔවුන්ව නිදහස් කරන්නේ කෙසේද? මෙලෙස හැසිරෙන ජාතියකට මා දඬුවම් නොකර සිටින්නේ කෙසේද?+ 10  මම කඳු ගැන හඬා වැලපෙන්නෙමි.+ පාළුකරයක් බවට පත් වන තණබිම් ගැනත් විලාප ගීයක් ගයන්නෙමි. දේශය ගින්නෙන් දැවී පාළුවට යන බැවින්+ කිසි මනුෂ්‍යයෙකු ඒ හරහා යන්නේවත් එළුවන්ගේ හෝ බැටළුවන්ගේ හඬක් ඒ දෙසින් ඇසෙන්නේවත් නැත.+ කුරුල්ලෝද වනසත්වයෝද දේශය අත්හැර පලා යන්නෝය.+ 11  මම යෙරුසලම නටබුන් ගොඩක් බවටද+ හිවලුන් ලගින තැනක් බවටද+ පත් කරන්නෙමි. මම යූදාහි නගර සියල්ල කිසි මිනිසෙකු වාසය නොකරන පාළු තැනක් බවට පත් කරන්නෙමි.+ 12  “මේ දේවල් තේරුම්ගැනීමට තරම් ප්‍රඥාවක් තිබෙන කෙනෙක් සිටීද? අන් අයට පවසන පිණිස යෙහෝවා දෙවි මේ දේවල් ප්‍රකාශ කළේ කාටද?+ මේ දේශය විනාශ විය යුත්තේ ඇයි? කිසිවෙකු ගමන් නොකරන, පාළුකරයක් මෙන් මේ දේශය ගින්නෙන් දැවී පාළුවට යා යුත්තේ ඇයි?”+ 13  යෙහෝවා දෙවි මෙසේ පවසයි. “මා ඔවුන්ට දුන් නීතිය ඔවුහු පිළිපැද්දේ නැත. මාගේ හඬට ඇහුම්කන් දී මා පෙන්වූ මාර්ගයේ ගමන් කරනවා වෙනුවට+ 14  තම තමන් කැමති මාර්ගයේ ගමන් කරමින් ඔවුහු මුරණ්ඩු ලෙස ක්‍රියා කළෝය.+ ඔවුන්ගේ මුතුන්මිත්තන් ඉගැන්වූ ලෙස+ ඔවුහු බාල් දෙවිවරුන්ට නමස්කාර කළෝය.+ 15  එබැවින් ස්වර්ගයේ සේනාවල අධිපතිද ඊශ්‍රායෙල්හි දෙවිද වන යෙහෝවා වන මම මෙසේ පවසමි. ‘මම මේ සෙනඟට තිත්ත දේ කන්න දෙමි.+ බීමට විෂ මිශ්‍ර වතුර දෙමි.+ 16  ඔවුන්වත් ඔවුන්ගේ මුතුන්මිත්තන්වත් නොදැන සිටි ජාතීන් අතරට මම ඔවුන්ව විසුරුවාහරින්නෙමි.+ ඔවුන් සම්පූර්ණයෙන්ම විනාශ වී යන තුරු ඔවුන්ට කඩුවෙන් පහර කෑමට මම ඉඩහරින්නෙමි.’+ 17  “මේ දේවල් තේරුම්ගෙන, විලාප ගී ගයන ස්ත්‍රීන්වද+ කුලියට හඬන අයවද+ කැඳවන ලෙස ස්වර්ගයේ සේනාවල අධිපති වන යෙහෝවා දෙවි අපට අණ කළේය. 18  අප වෙනුවෙන් විලාප නැඟීමට ඔවුන්ට ඉක්මනින් එන්න කියන්න. අපේ ඇස්වලින් කඳුළු ගංගා ගලා ඒවා!+ 19  “අපි විනාශ වී ගිය හැටි බලන්න!+ අප මොන තරම් ලැජ්ජාවට පත් වුණාද! උන්හිටි තැන් අපට අහිමි වී ඇත. අපේ දේශයෙන් අපට යන්න සිදු වී ඇත”+ කියා විලාප නඟන හඬක් සියොන් නුවරින් නික්මුණේය.+ 20  ස්ත්‍රියෙනි, යෙහෝවා දෙවිගේ වදන්වලට හොඳින් ඇහුම්කන් දෙන්න. ඔබේ දූවරුන්ට විලාප ගීයක් උගන්වන්න.+ සෑම ස්ත්‍රියක්ම ඇගේ මිතුරියට දුක්මුසු කවියක් කියා දෙන්න.+ 21  මරණය අපේ කවුළුවලින් එබිකම් කරයි. වීථිවල සිටින ළමුන්වද මංසන්ධිවල සිටින තරුණයන්වද විනාශ කර දමන පිණිස එය අපේ බලකොටු තුළට ඇවිත් සිටියි.”+ 22  “මේ ගැන දන්වන්න. ‘යෙහෝවා දෙවි වන මා පවසන්නේ මෙයයි. “මිනිසුන්ගේ මළ කඳන් භූමිය මතුපිට කසළ මෙන්ද අස්වැන්න නෙළාගන්නා බිම දිගේ අතුරා තබන ධාන්‍ය මිටි මෙන්ද විසුරුවා තිබෙනවා දක්නට ලැබෙයි. ඒවා එකතු කිරීමට කිසිවෙක් නොසිටිනු ඇත.”’”+ 23  යෙහෝවා දෙවි මෙසේ පවසයි. “ප්‍රඥාවන්තයා තම ප්‍රඥාව ගැන පුරසාරම් දෙඩීමෙන් වැළකිය යුතුයි.+ බලවන්තයාද තමාගේ බලවත්කම ගැන පුරසාරම් දෙඩීම නතර කළ යුතුයි.+ ධනවතාත් තමාගේ ධන සම්පත් ගැන පුරසාරම් දෙඩීමෙන් වැළකී සිටිය යුතුයි.”+ 24  යෙහෝවා දෙවි මෙසේ පවසන්නේය. “කෙනෙක් මහත් සතුටකින් කතා කළ යුත්තේ තමා කොතරම් හොඳින් යෙහෝවා දෙවි වන මාව දැන හඳුනා ගෙන සිටිනවාද යන්න+ ගැනයි. මා ගැන තමාට තිබෙන ගැඹුරු අවබෝධය ගැනත්+ ඔහුට කතා කළ හැක. පොළොවේ ජීවත් වන වැසියන්ට ප්‍රේමය* පෙන්වීමෙන්ද යුක්තිය ඉටු කිරීමෙන් හා ධර්මිෂ්ඨකම පැවැත්වීමෙන්ද මා ඉමහත් සතුටක් ලබන+ දෙවි කෙනෙක් බව ඔහු දැන සිටීම ගැනත්+ ඔහුට ආඩම්බරයෙන් කතා කළ හැක.” 25  යෙහෝවා දෙවි මෙසේද පවසන්නේය. “චර්මච්ඡේදනය වූ නමුත් අචර්මච්ඡේදිතයන් ලෙස හැසිරෙන අයව මම විනිශ්චය කරන කාලය ළඟදීම පැමිණෙන බව දැනගන්න.+ 26  ඊජිප්තුවේ වැසියන්ව,+ යූදා වැසියන්ව,+ ඒදොම් වැසියන්ව,+ මෝවබ් වැසියන්ව+ හා අම්මොන්වරුන්ව+ මම විනිශ්චය කරමි. පාළුකරයේ වෙසෙන, කම්මුල් දෙපස පිහිටි කෙස් කපා ඇති අයවත්+ මම විනිශ්චය කරමි. මා මෙසේ විනිශ්චය කරන්නේ චර්මච්ඡේදනය නොවූ සියලු ජාතීන්ව සහ තම සිත් පවිත්‍ර කර නොගත්*+ මුළු ඊශ්‍රායෙල් සෙනඟවය.”

පාදසටහන්

මූ.අ., “පරදාර සේවනයේ.”
හෝ, “ළැදි ප්‍රේමය.”
මූ.අ., “සිත් චර්මච්ඡේදනය කර නොගත්.”