යෙරෙමියා 49:1-39

49  අම්මොන්වරුන්+ ගැන යෙහෝවා දෙවි පවසන්නේ මෙයයි. “ඊශ්‍රායෙල්ට පුත්‍රයන් නැද්ද? ඔහුට උරුමක්කාරයෙක් නැද්ද? එසේනම්, ගාද්ට අයිති දේශය මල්කාම්+ උදුරාගෙන සිටින්නේ ඇයි?+ මල්කාම් දෙවියාට නමස්කාර කරන අය එහි නගරවල වාසය කරන්නේ ඇයි?”+  “යෙහෝවා දෙවි මෙසේ පවසන්නේය. ‘ඉදිරියේදී අම්මොන්වරුන්ට අයත් නගරයක් වූ රබ්බා නගරයට විරුද්ධව+ යුධ හඬක් ඇසීමට මම සලස්වන්නෙමි.+ ඒ නගරය නටබුන් ගොඩක් බවට පත් වන්නේය.+ එහි අවට පිහිටි කුඩා නගර+ සියල්ල ගින්නෙන් විනාශ වී යනු ඇත.’+ “‘එවිට ඊශ්‍රායෙල්, තමන්ගෙන් දේශය උදුරාගත් අයගෙන් නැවත එය ලබාගන්නේය’+ කියා යෙහෝවා දෙවි පවසන්නේය.  “‘ආයි නගරය විනාශ වී ගොසින්ය. එබැවින් හෙෂ්බොන්හි වැසියෙනි,+ විලාප නඟන්න.+ රබ්බා අවට තිබෙන කුඩා නගරවල වෙසෙන්නෙනි, ගෝණි රෙදි ඇඳගෙන+ බැටළු කොටු අතරේ එහා මෙහා දුවමින් හඬා වැලපෙන්න. මන්ද මල්කාම්වද ඔහුගේ පූජකයන්වද අධිපතීන්වද+ වහලුන් ලෙස ගෙන යනු ලබන්නේය.+  “මට විරුද්ධව පැමිණෙන්නේ කවුද”+ කියමින් තම වස්තුව මත විශ්වාසය තැබූ+ අවිශ්වාසවන්ත දියණිය, ඔබට තිබෙන සරුසාර තැනිතලා බිම් ගැන ඔබ මෙතරම් ආඩම්බරෙන් කතා කරන්නේ ඇයි?’”+  “විශ්වයේ පාලකයාද+ ස්වර්ගයේ සේනාවල අධිපතිද වන යෙහෝවා දෙවි මෙසේ පවසන්නේය. ‘ඔබ අවට සිටින්නන් ලවා භයානක දෙයක් මම ඔබ පිටට පමුණුවන්නෙමි.+ ඔබව විවිධ තැන්වලට විසුරුවාහරිනු ඇත.+ එසේ පලා දුවන අයව ආපසු එකට එකතු කිරීමට කිසිවෙක් ඉදිරිපත් වන්නේ නැත.’”  “‘නමුත් කාලයක් ගත වූ පසු වහල්කමට ගෙන ගිය අම්මොන්වරුන්ව මම නැවත එක් රැස් කරන්නෙමි’+ කියා යෙහෝවා දෙවි පවසන්නේය.”  ඒදොම් ගැන ස්වර්ගයේ සේනාවල අධිපති වන යෙහෝවා දෙවි පවසන්නේ මෙයයි. “තේමාන්හි+ බුද්ධිමතුන් කොහේද?+ ඔවුන්ගේ දැනමුතුකම්වලට සිදු වූයේ කුමක්ද? ඔවුන්ට තිබුණු ප්‍රඥාව දැන් අතුරුදහන් වී ගොසින්ද?+  දෙදාන්හි වැසියෙනි,+ පලා දුවන්න.+ ගැඹුරු තැන්වලට ගොස් සැඟවෙන්න.+ මන්ද ඒසව්ට දඬුවම් කරන කාලය පැමිණි විට+ මම අනිවාර්යයෙන්ම ඔහු පිටට විපත්ති ගෙනෙන්නෙමි.  මිදිපල නෙළන්නන් මුළු අස්වැන්නම නෙළා නොගෙන අන් අය වෙනුවෙන් යම් ප්‍රමාණයක් ඉතුරු කර යන්නේ නැද්ද? එමෙන්ම රාත්‍රියේදී නිවසකට පනින සොරුන් ඔවුන්ට අවශ්‍ය දේ පමණක් ගෙන ඉතුරු දේ නිවසේ තබා යන්නේ නැද්ද?+ 10  නමුත් මම ඒසව්ට අයිති සෑම දෙයක්ම ඔහුගෙන් උදුරාගන්නෙමි.+ ඔහුට තවදුරටත් සැඟවී සිටීමට නොහැකි වන සේ+ ඔහුගේ රහස් තැන් සියල්ල හෙළි කරන්නෙමි.+ ඔහුවද+ ඔහුගේ දරුවන්වද ඔහුගේ සහෝදරයන්වද අසල්වාසීන්වද සම්පූර්ණයෙන්ම විනාශ කර දමන්නෙමි.+ 11  ඔබ අතරේ සිටින පියා නැති දරුවන්ව මට භාර දෙන්න.+ මම ඔවුන්ගේ ජීවිත රක්ෂා කරන්නෙමි. ඔබ අතරේ සිටින වැන්දඹුවන් මා කෙරෙහි විශ්වාසය තැබුවොත් මම ඔවුන්වත් රැකබලා ගන්නෙමි.”+ 12  යෙහෝවා දෙවි මෙසේ පවසන්නේය. “මාගේ සෙනඟට පවා මාගේ උදහස නමැති කුසලානයෙන් බීමට සිදු වෙනවා නම්,+ මාගේ දඬුවමින් ගැලවීමට ඔබට පුළුවන් වෙයි කියා ඔබ සිතන්නෙහිද? ඔබට අනිවාර්යයෙන්ම දඬුවම් ලැබෙන්නේය. මාගේ උදහස නමැති කුසලානයෙන් ඔබට බීමට සිදු වන බව නියතයි.”+ 13  “බොෂ්රාට සිදු වන විපත+ දකින අය පුදුමයට පත් වනු ඇත.+ සම්පූර්ණයෙන්ම වැනසී යන ඒ නගරය සියලුදෙනාගේ නින්දාවටත් ශාපයටත් ලක් වනු ඇත. ඇයට අයත් අන් සියලු නගරද විනාශ වී සදහටම පාළුවට යන්නේය.+ මා කියූ ඒ සියල්ල එලෙසම සිදු වන බව මමම දිවුරා කියන්නෙමි”+ කියා යෙහෝවා දෙවි පවසන්නේය. 14  “එකට එකතු වෙන්න. අපි ගොස් ඒදොම්වරුන්ට විරුද්ධව යුද්ධ කරමු” කියා ජාතීන්ට දැන්වීමට දෙවි පණිවිඩකරුවෙකුව යැව්වේය. යෙහෝවා දෙවි මට ඒ බව දැන්වූවේය.+ 15  “ජාතීන් ඉදිරියේ මම ඔබව පහත් කරන්නෙමි. සියලුදෙනා ඔබව හෙළාදකිනු ඇත.+ 16  පර්වතවල හා කඳු මුදුන්වල සුරක්ෂිතව වසන්නෙනි, ඔබ අනුන්ව භයගන්වමින් මහත් ආඩම්බරයෙන් සිටියත් ඔබ ඇත්තෙන්ම රැවටී සිටින්නහුය.+ ඔබ රාජාලියෙකු මෙන් උස් ස්ථානයක ඔබේ කැදැල්ල සාදාගෙන සිටියත්+ මම ඔබව එතැනින් පහතට ඇද දමන්නෙමි”+ කියා යෙහෝවා දෙවි පවසන්නේය. 17  “ඒදොම්ට සිදු වන විපත සියල්ලන්ගේ පුදුමයට හේතුවක් වනු ඇත.+ ඇයව පසු කර යන සියලුදෙනා පුදුමයෙන් ඇය දෙස බලමින් ඇයට සමච්චල් කරනු ඇත.+ 18  සොදොම් සහ ගොමෝරාද ඒ අවට තිබූ නගරද සහමුලින්ම විනාශ කර දැමූ පසු කිසි මිනිසෙකු එහි වාසය නොකළාක් මෙන්+ ඇය තුළත් කිසි මිනිසෙක් නැවත වාසය කරන්නේ නැත. විදේශිකයෙකු ලෙස ජීවත් වීමටද කිසිවෙක් පැමිණෙන්නේ නැත”+ කියා යෙහෝවා දෙවි පවසන්නේය. 19  “යොර්දාන් ගඟ අසල පිහිටි වනළැහැබේ සිට සිංහයෙකු,+ ඉතා සුව සේ වෙසෙන බැටළුවන්ගෙන් පිරි තණබිමකට කඩාපනින්නාක් මෙන් එක්තරා තැනැත්තෙක් ඒදොම් වෙතට පැමිණෙන්නේය.+ ඒ සමඟම ඒදොම්වරුන්ට තම දේශය අත්හැර පලා දිවීමට මම සලස්වන්නෙමි.+ ඉන්පසු මම තෝරාගත් තැනැත්තාට ඒදොම් දේශය භාර දෙන්නෙමි. මා කිරීමට යන දේට අභියෝග කළ හැකි කෙනෙක් සිටීද?+ මට විරුද්ධව කිසිම නායකයෙකුට නැඟී සිටිය හැකිද?+ මට සමාන කෙනෙක් තවත් සිටීද?+ 20  ජනයෙනි, ඒදොම්ට විරුද්ධව යෙහෝවා දෙවි ගෙන ඇති තීරණයට ඇහුම්කන් දෙන්න.+ තේමාන්හි වැසියන්ට විරුද්ධව ඔහු අරමුණු කළ දේට සවන් දෙන්න.+ රැළේ සිටින බැටළු පැටවුන්ව වනමෘගයෙකු ඇදගෙන යන්නාක් මෙන් ඔවුන්වද ඇදගෙන යනු ලැබේ. ඔවුන් කළ දේවල් නිසා ඔහු ඔවුන්ගේ තණබිම් සියල්ල පාළු කර දමන්නේය.+ 21  ඔවුන්ගේ වැටීමේ ශබ්දය නිසා පොළොව දෙදරා යන්නේය.+ ඔවුන්ගේ හැඬීමේ ශබ්දය+ රතු මුහුද දක්වාම විහිදී යන්නේය.+ 22  පියාපත් විහිදුවාගෙන රාජාලියෙකු තම ගොදුර ඩැහැගැනීමට වේගයෙන් පැමිණෙන්නාක් මෙන්+ බොෂ්රාව ගොදුරු කරගැනීමටත් කෙනෙක් පැමිණෙන්නේය.+ දරුවෙකු බිහි කරන ස්ත්‍රියක අද්දකින වේදනාවට සමාන වේදනාවක් ඒ දවසේදී ඒදොම්හි බලවන්තයෝ අද්දකිනු ඇත.”+ 23  දමස්කය ගැන දෙවි පැවසුවේ මෙයයි.+ “හමාත්+ හා අර්පාද්+ නගරවල වෙසෙන්නන්ට අසන්න ලැබුණු නරක ආරංචිය නිසා ඔවුහු අධෛර්යට පත්ව සිටිති.+ ඔවුන්ට මහත් ලැජ්ජාවක් දැනිණ. ඔවුන් නිශ්චල කිරීමට නොහැකි කැලඹුණු මුහුදක් මෙනි.+ 24  දමස්කයේ වැසියන්ට තිබූ ධෛර්යය නැති වී ගොසින්ය. භීතියෙන් වෙළී සිටින ඔවුන්ට කිරීමට ඉතුරුව ඇත්තේ පලා දිවීම පමණි.+ දරුවෙකු බිහි කරන ස්ත්‍රියක මෙන්+ ඔවුහු වේදනාවෙන් මිරිකී සිටිති. 25  තේජාන්විතව වැජඹුණු ඒ ප්‍රීතිමත් නගරය අත්හැර නොගියේ මන්ද!+ 26  එබැවින් ස්වර්ගයේ සේනාවල අධිපති වන යෙහෝවා දෙවි මෙසේ පවසන්නේය. “ඇගේ තරුණයෝ මැරුම් කා මංසන්ධිවල ඇද වැටෙන්නෝය. ඒ දවසේදී සියලු යුධ භටයෝද නිසලව වැටී සිටින්නෝය.+ 27  මම දමස්කයේ පවුරට ගිනි තබන්නෙමි. ඒ ගින්නෙන් බෙන්-හාදද්ගේ බලකොටු සියල්ල දැවී යන්නේය.”+ 28  කේදාර් දේශය+ හා හාෂොර්හි රාජ්‍යයන්+ ගැන යෙහෝවා දෙවි පවසන්නේ මෙයයි. (පසු කාලයක බැබිලෝනියේ රජු වන නෙබුකද්රෙෂර් ඒ පළාත් යටත් කරගත්තේය.)+ “ජනයෙනි, කේදාර් වෙතට යන්න. පෙරදිග වෙසෙන සෙනඟව විනාශ කර දමන්න.+ 29  ඔවුන්ගේ කූඩාරම්ද+ ඒවායේ රෙදිද+ ඔවුන්ගේ සත්ව රැළවල්ද+ ඔවුන්ට අයිති ඔටුවන්ද+ සියලු බඩු බාහිරාදියද පැහැරගනු ලබන්නේය. එවිට සෙනඟ මොරගසමින් ඔවුන්ට මෙසේ කියනු ඇත. ‘භීතිය දසත පැතිරී තිබේ.’”+ 30  යෙහෝවා දෙවි මෙසේ පවසන්නේය. “හාෂොර්හි වැසියෙනි,+ දුර ඈතට පලා දුවන්න. ගැඹුරු තැනකට ගොස් සැඟවෙන්න. මන්ද බැබිලෝනියේ රජු වන නෙබුකද්රෙෂර්+ ඔබට විරුද්ධව කුමන්ත්‍රණයක් කර ඇත. ඔබ පිටට විපත්ති ගෙන ඒමට සැලසුම් කර ඇත.” 31  “ජනයෙනි, සූදානම් වන්න” කියා යෙහෝවා දෙවි පවසන්නේය. “ඉතා සැහැල්ලුවෙන් ජීවිතය ගත කරන ජාතියට විරුද්ධව යුද්ධයට යෑමට සූදානම් වන්න.+ ඔවුහු තම නිවෙස්වල දොර අගුල් නොදමා, අන් අයගෙන් වෙන්ව+ සුරක්ෂිත ජීවිතයක් ගත කරන්නෝය.+ 32  යෙහෝවා දෙවි මෙසේද පවසන්නේය. “ඔවුන්ගේ ඔටුවන්ව+ හා සත්ව රැළවල් සියල්ල කොල්ල කනු ලැබේ. කම්මුල් දෙපස පිහිටි කෙස් කපා ඇති සියලුදෙනාවම+ මම සීසීකඩ* විසුරුවාහරින්නෙමි.+ අවට පිහිටි සෑම පළාතකින්ම මම ඔවුන් පිටට විපත්ති පමුණුවන්නෙමි. 33  හාෂොර්+ සදහටම පාළුවට ගොස් හිවලුන්ගේ වාසස්ථානයක් බවට පත් වන්නේය.+ කිසි වැසියෙක් නැවත එහි වාසය කරන්නේ නැත. විදේශිකයෙකු ලෙස ජීවත් වීමටද කිසිවෙක් පැමිණෙන්නේ නැත.”+ 34  යූදාහි රජු වූ ශෙදකියා තම පාලනය ආරම්භ කළ කාලයේදී+ යෙහෝවා දෙවිගෙන් අනාගතවක්තෘ යෙරෙමියාට ඒලාම් දේශය ගැන පණිවිඩයක් ලැබිණ.+ එම පණිවිඩය මෙයයි. 35  “ස්වර්ගයේ සේනාවල අධිපති වන යෙහෝවා දෙවි මෙසේ පවසන්නේය. ‘ඒලාම්ගේ ශක්තිය වූ දුනු හේවායන්ව මම විනාශ කර දමන්නෙමි.+ 36  පොළොවේ සතර දිගින් චණ්ඩ මාරුත සතරක් ඒලාම් පිටට හමා ඒමට සලස්වන්නෙමි.+ ඒ සුළඟින් මම ඔවුන්ව ඒ මේ අත විසුරුවාහරින්නෙමි.+ ඒලාම් සිට විසිරී යන අය පලා නොයන දේශයක් නැති තරම්ය.’”+ 37  යෙහෝවා දෙවි මෙසේ පවසන්නේය. “මම ඒලාම්වරුන්ගේ සිත් තුළ, ඔවුන්ගේ ජීවිත විනාශ කර දැමීමට මං සොයන අය ගැනද ඔවුන්ගේ සතුරන් ගැනද භීතියක් ඇති කරන්නෙමි. ඔවුන්ට විරුද්ධව ඇවිළී තිබෙන මාගේ උදහස නිසා මම ඔවුන් පිටට විපත්ති ගෙනෙන්නෙමි.+ ඔවුන් සහමුලින්ම නැති වී යන තුරු මම ඔවුන්ට කඩුවෙන් පහර කෑමට සලස්වන්නෙමි.”+ 38  “මම ඒලාම්හි රජුවත් එහි අධිපතීන්වත් විනාශ කර දමා මාගේ සිංහාසනය එහි පිහිටුවන්නෙමි”+ කියා යෙහෝවා දෙවි පවසන්නේය. 39  “නමුත් අවසාන කාලයේදී+ විසිරී ගිය ඒලාම්වරුන්ව මම නැවත එකතු කරන්නෙමි”+ කියා යෙහෝවා දෙවි පවසන්නේය.

පාදසටහන්

මූ.අ., “සුළඟ හමන සෑම දිශාවකටම.”