යෙරෙමියා 44:1-30

44  ඊජිප්තුවේ මිග්දෝල්හිද+ තාහ්පනේස්හිද+ නොෆ්හිද+ පත්‍රොස් දේශයෙහිද+ ජීවත් වූ යුදෙව්වරුන්ට පැවසිය යුතු පණිවිඩයක් දෙවිගෙන් යෙරෙමියාට ලැබිණ.+ එම පණිවිඩයෙහි මෙසේ සඳහන් විය.  “ස්වර්ගයේ සේනාවල අධිපතිද ඊශ්‍රායෙල්හි දෙවිද වන යෙහෝවා මෙසේ පවසන්නේය. ‘මා යෙරුසලම පිටටත්+ යූදාහි සියලු නගර පිටටත් ගෙනා සෑම විපත්තියක්ම ඔබ දුටුවහුය. බලන්න! අද එහි ඉතුරු වී තිබෙන්නේ නටබුන් පමණි. මිනිස් පුළුටක්වත් එහි දක්නට නැත.+  එහි විසූ සෙනඟ, තමන්ද තම මුතුන්මිත්තන්ද කලින් නොදැන සිටි+ වෙනත් දෙවිවරුන්ට සුවඳ දුම් ඔප්පු කර ඔවුන්ට නමස්කාර කළෝය. ඔවුන්ට ඒ වගේ විපතක් සිදු වුණේ මා උදහස් වන තරමටම ඔවුන් කළ ඒ දුෂ්ටකම් නිසාය.+  මම හිමිදිරි උදෑසන සිට නොනවත්වා මාගේ සේවකයන් වන අනාගතවක්තෘවරුන්ව ඔවුන් වෙතට යවා,+ “ජනයෙනි, මට අප්‍රසන්න මේ පිළිකුල්සහගත ක්‍රියා සම්පූර්ණයෙන්ම අත්හැර දමන්න”+ කියා ඔවුන්ට අවවාද කළෙමි.  නමුත් ඔවුහු මට ඇහුම්කන් දුන්නේ නැත.+ වෙනත් දෙවිවරුන්ට සුවඳ දුම් ඔප්පු කිරීම අත්හරින්න කියා මා ඔවුන්ට අවවාද කළත් ඔවුහු ඒවා ගණනකටවත් ගත්තේ නැත.+ එසේ ඔවුහු දිගටම ඔවුන්ගේ දුෂ්ට ක්‍රියාවල නිරත වූහ.  එබැවින් මාගේ දැවෙන කෝපයත් උදහසත් මම ඔවුන් පිට වැගුරුවෙමි. යූදාහි නගර හා යෙරුසලමේ වීථි එයින් දැවී ගියේය.+ ඒ නිසා අද එහි දකින්න ලැබෙන්නේ පාළුවට ගිය නටබුන් ගොඩක් පමණි.’+  “ස්වර්ගයේ සේනාවල අධිපතිද ඊශ්‍රායෙල්හි දෙවිද වන යෙහෝවා දැන් මෙසේ පවසන්නේය. ‘ඔබ මහත් විපතක් ඔබ පිටටම පමුණුවාගන්න හදන්නේ ඇයි?+ ඉතුරු වී සිටින යූදාහි පුරුෂයන් හා ස්ත්‍රීන්වද දරුවන් හා ළදරුවන්වද සහමුලින්ම විනාශ වී යෑමට සලස්වන්නේ ඇයි?+  ඔබ විදේශිකයන් ලෙස පදිංචිව සිටින ඊජිප්තු දේශයේදී දේවතා රූප සාදමින්, වෙනත් දෙවිවරුන්ට සුවඳ දුම් ඔප්පු කරමින් මාව උදහසට පත් කරන්නේ ඇයි?+ ඔබ එසේ කර ඔබ පිටටම විනාශය පමුණුවාගන්නහුය. සියලු ජාතීහු ඔබට අපහාස කරමින් ශාප කරනු ඇත.+  ඔබේ මුතුන්මිත්තන්ද+ යූදාහි රජවරුන්ද+ ඔවුන්ගේ භාර්යාවන්ද+ කළ දුෂ්ටකම් සියල්ල ඔබට අමතක වී ඇද්ද? ඔබත් ඔබේ භාර්යාවනුත්+ යූදා දේශයෙහිද යෙරුසලමේ වීථිවලද කළ දුෂ්ටකම් ඔබට දැන් මතක නැද්ද? 10  අද වන තුරු කිසි කෙනෙක් තමන් කළ දුෂ්ටකම් ගැන පසුතැවිලි වී නැත.+ ඔබ කළ දේවල් ගැන ඔබට කිසි බියක් දැනුණෙත් නැත.+ ඔබේ මුතුන්මිත්තන්ටත් ඔබටත් මා දුන් නීතියට ඔබ කීකරු වුණේවත්+ මාගේ අණපනත් පිළිපැද්දේවත් නැත.’+ 11  “එබැවින් ස්වර්ගයේ සේනාවල අධිපතිද ඊශ්‍රායෙල්හි දෙවිද වන යෙහෝවා මෙසේ පවසන්නේය. ‘යූදාහි වැසියන් වන ඔබ පිටට විපත්ති ගෙනැවිත් ඔබ සියලුදෙනාවම විනාශ කර දැමීමට මම තීරණය කළෙමි.+ 12  යූදා දේශයේ ඉතුරුව සිටි යුදෙව්වරුන්ට එනම්, ඊජිප්තු දේශයට පැමිණ එහි පදිංචි වීමට තීරණය කළ යුදෙව්වරුන්ට විරුද්ධව මම පියවර ගන්නෙමි.+ ඔවුහු සියලුදෙනා ඊජිප්තු දේශයේදීම විනාශ වී යන්නෝය.+ විවිධ තරාතිරම්වලට අයත් සියලුදෙනාම කඩුවෙන්ද සාගතයෙන්ද පහර කා+ මරණයට ගොදුරු වන්නෝය. ඔවුන්ට සිදු වන විපත දකින සියල්ලෝ පුදුමයට පත් වනු ඇත. ඔවුහු අන් අය ඉදිරියේ නින්දාවට ලක් වන්නෝය. සියල්ලෝ ඔවුන්ට ශාප කරනු ඇත.+ 13  යෙරුසලමේ වැසියන්ට මා කඩුවෙන්ද සාගතයෙන්ද වසංගතවලින්ද පහර දී දඬුවම් කළාක් මෙන් ඊජිප්තුවට පැමිණ එහි පදිංචි වී සිටින සියලුදෙනාටත් මම දඬුවම් කරන්නෙමි.+ 14  පලා ගිය කිහිපදෙනෙකු හැරෙන්න ඊජිප්තු දේශයේ පදිංචි වීමට පැමිණි කිසිම යුදෙව්වෙක්ට මා ගෙනෙන විපත්තිවලින් බේරී යන්නවත් තම ජීවිතය ගලවාගන්නවත් ලැබෙන්නේ නැත.+ ඔවුන් නැවත යූදා දේශයට යෑමට ආශාවෙන් බලා සිටියත් ඔවුන්ගෙන් කිසිවෙක්ට එහි යෑමට ලැබෙන්නේ නැත.’”+ 15  යෙරෙමියාගේ පණිවිඩයට සවන් දුන් පසු, තම භාර්යාවන් වෙනත් දෙවිවරුන්ට සුවඳ දුම් ඔප්පු කරන බව දැන සිටි සියලු පුරුෂයෝද+ රැස්ව සිටි ඔවුන්ගේ භාර්යාවෝ සියලුදෙනාද ඊජිප්තු දේශයේ පත්‍රොස්හි+ ජීවත් වූ සියලුදෙනාද+ යෙරෙමියාට මෙසේ කීවෝය. 16  “ඔබ යෙහෝවා දෙවිගේ නාමයෙන් අපට පැවසූ දේවලට අපි කීකරු වෙන්නේ නැහැ.+ 17  අපිත්+ අපේ මුතුන්මිත්තනුත්+ රජවරුනුත්+ අධිපතීනුත් පොරොන්දු වුණු විදිහට+ යූදාහි නගරවල හා යෙරුසලමේ වීථිවල අහස් දේවතාවියට සුවඳ දුම්+ හා පාන පූජා+ ඔප්පු කළා. දැනුත් අපි ඒ විදිහටම කරනවා. මොකද ඒ කාලයේ අපිට ඇති තරම් කන්න බොන්න තිබුණා. අපි කිසි කරදරයක් නැතුව ජීවත් වුණා.+ 18  ඒත් අහස් දේවතාවියට+ සුවඳ දුම් හා පාන පූජා ඔප්පු කිරීම නතර කළ දවසේ සිට අපිට ඒ හැම දෙයක්ම නැති වුණා. අපි කඩුවටත් සාගතයටත් ගොදුරු වුණා.+ 19  “අපි අහස් දේවතාවියට සුවඳ දුම් ඔප්පු කළෙත්+ ඇගේ රූපයට සමාන රොටි සාදා ඒවා ඇයට ඔප්පු කළෙත් පාන පූජා ඇය ඉදිරියේ වැගිරෙව්වෙත්+ අපේ පුරුෂයන්ගේ අනුදැනුම ඇතුව නොවෙයිද?”+ 20  එවිට යෙරෙමියා තමාට ඒ දේවල් පැවසූ සියලු පුරුෂයන්ටද ඔවුන්ගේ භාර්යාවන්ටද අනික් සියලුදෙනාටද මෙසේ කීවේය. 21  “ඔබත්+ ඔබේ මුතුන්මිත්තනුත්+ රජවරුනුත්+ අධිපතීනුත්+ අනික් වැසියනුත් යූදාහි නගරවල හා යෙරුසලමේ වීථිවල සුවඳ දුම් ඔප්පු කළ ආකාරය+ යෙහෝවා දෙවිගේ මතකයේ තිබුණා.+ 22  ඔබ කළ ඒ දුෂ්ට දේවල් හා පිළිකුල්සහගත ක්‍රියා යෙහෝවා දෙවිට තවදුරටත් ඉවසා සිටීමට නොහැකි වූ නිසා+ ඔහු දේශය විනාශ කර දැමුවා. එය අද දක්වාම මිනිස් පුළුටක් නැතුව පාළුවට ගොස් තිබෙන්නෙත් අන් අයගේ පුදුමයට හා ශාපයට ලක් වී තිබෙන්නෙත් ඒ නිසයි.+ 23  ඔබ යෙහෝවා දෙවිගේ හඬට ඇහුම්කන් නොදී+ ඔහුගේ නීතිය කඩ කළා.+ ඔබ ඔහුගේ අණපනත්වලට කීකරු වුණේවත් ඔහුගේ සිහිගැන්වීම්වලට ඇහුම්කන් දුන්නේවත් නැහැ. ඔබ වෙනත් දෙවිවරුන්ට සුවඳ දුම් ඔප්පු කරමින්+ යෙහෝවා දෙවිට විරුද්ධව පව් කළා.+ අද ඔබට මේ හැම විපතකටම මුහුණ දීමට සිදු වී තියෙන්නේ ඒ නිසයි.”+ 24  යෙරෙමියා තවදුරටත් සියලු සෙනඟට හා ස්ත්‍රීන්ට කතා කරමින් මෙසේ කීවේය. “ඊජිප්තුවේ සිටින යුදෙව්වරුනි,+ යෙහෝවා දෙවි පවසන දේට ඇහුම්කන් දෙන්න. 25  ස්වර්ගයේ සේනාවල අධිපතිද ඊශ්‍රායෙල්හි දෙවිද වන යෙහෝවා පවසන්නේ මෙයයි. ‘“අපි අහස් දේවතාවියට වූ භාරයට අනුව සුවඳ දුම්+ හා පාන පූජා+ අනිවාර්යයෙන්ම ඇයට ඔප්පු කරනවා”+ කියා ඔබේ භාර්යාවන් දුන් පොරොන්දුව ඔබත් ඔබේ භාර්යාවනුත් ඉෂ්ට කරමින් සිටින්නහුය.+ භාර්යාවෙනි, ඔබ වූ භාරය දිගටම ඔප්පු කරන්න. නොවරදවාම එය ඉෂ්ට කරන්න.’ 26  “ඊජිප්තුවේ ජීවත් වන යුදෙව්වරුනි,+ යෙහෝවා දෙවි පවසන දේට ඇහුම්කන් දෙන්න. ‘යෙහෝවා දෙවි පවසන්නේ මෙයයි. “ඊජිප්තුවේ ජීවත් වන කිසි යුදෙව්වෙක් තවදුරටත් මාගේ නාමය භාවිත නොකරනු ඇත.+ ‘විශ්වයේ පාලකයාණන් වන යෙහෝවා දෙවි ජීවමානයි’+ කියා ඔවුහු තවදුරටත් නොකියනු ඇත. ඒ බව මම මාගේ ශ්‍රේෂ්ඨ නාමයෙන් දිවුරා+ ඔබට පවසන්නෙමි. 27  ඔවුන් පිටට යහපත නොව විපත්ති ගෙන ඒමට මම බලා සිටිමි.+ ඊජිප්තුවේ ජීවත් වන යුදෙව්වරු සියලුදෙනාම කඩුවෙන් හා සාගතයෙන් පහර කා විනාශ වී යනු ඇත.+ 28  කඩු පහරින් බේරෙන කිහිපදෙනෙක් පමණක් ඊජිප්තුවේ සිට යූදා දේශයට නැවත හැරී යනු ඇත.+ එවිට යූදාහි ඉතුරු වූ යුදෙව්වරු එනම්, විදේශිකයන් ලෙස ජීවත් වීමට ඊජිප්තු දේශයට පැමිණි යුදෙව්වරු, ඉටු වන්නේ තමන් පැවසූ දේද නැත්නම් මා පැවසූ දේද කියා හොඳින් තේරුම්ගනු ඇත.”’”+ 29  “යෙහෝවා දෙවි මෙසේද පවසන්නේය. ‘මම මේ දේශයේදීම ඔබට දඬුවම් කරන්නෙමි. එවිට ඔබට පැමිණෙන විපත්ති ගැන මා ප්‍රකාශ කළ සෑම වචනයක්ම නිසැකවම ඉටු වන බව ඔබ දැනගනු ඇත.+ ඒ සඳහා මා ඔබට දෙන ලකුණ මෙයයි.’+ 30  යෙහෝවා දෙවි තවදුරටත් මෙසේ පවසන්නේය. ‘යූදාහි රජු වූ ශෙදකියාව, ඔහුගේ ජීවිතය විනාශ කර දැමීමට සෙවූ ඔහුගේ සතුරා වූ බැබිලෝනියේ රජු වන නෙබුකද්රෙෂර්ගේ අතට මා භාර දුන්නාක් මෙන්+ ඊජිප්තුවේ රජු වන හොප්රා නමැති පාරාවෝවත්+ ඔහුගේ සතුරන්ගේ අතට එනම්, ඔහුගේ ජීවිතය විනාශ කර දැමීමට සොයන අයගේ අතට මම භාර දෙන්නෙමි.’”+

පාදසටහන්