යෙරෙමියා 29:1-32

29  අනාගතවක්තෘ යෙරෙමියා යෙරුසලමේ සිට බැබිලෝනියට ලිපියක් යැව්වේය. නෙබුකද්නෙෂර් රජු යෙරුසලමේ සිට බැබිලෝනියට ගෙන ගිය+ සෙනඟවත් ඔවුන් අතරේ ඉතුරුව සිටි වැඩිමහල්ලන්වත් පූජකයන්වත් අනාගතවක්තෘවරුන්වත් අමතමින් ඔහු එම ලිපිය යැවීය.  ඔහු එම ලිපිය යවන විට යෙකොනියා රජුවද+ මව් බිසවද+ ඔහුගේ නිලධාරීන්වද යූදාහි හා යෙරුසලමේ අධිපතීන්වද+ කැටයම්කරුවන්ව සහ පවුරු ඉදි කරන්නන්වද+ යෙරුසලමෙන් ගෙන ගොස් තිබිණ.  යෙරෙමියා එම ලිපිය යැව්වේ ෂාපාන්ගේ පුත්‍රයා+ වන එලාසා සහ හිල්කියාගේ පුත්‍රයා වන ගෙමරියා මාර්ගයෙනි. ඒ කාලයේදී යූදාහි රජුව සිටි ශෙදකියා+ විසින් ඔවුන් දෙදෙනාව බැබිලෝනියේ රජු වන නෙබුකද්නෙෂර් වෙතට යවන ලදි. ඒ අවස්ථාවේදී ඔවුහු එම ලිපියද රැගෙන ගියෝය. එහි සඳහන් වූයේ මෙයයි.  “තම සෙනඟව යෙරුසලමේ සිට බැබිලෝනියට පිටමං කළ+ ස්වර්ගයේ සේනාවල අධිපතිද ඊශ්‍රායෙල්හි දෙවිද වන යෙහෝවා මෙසේ පැවසුවේය.  ‘ජනයෙනි, ඔබ දැන් ජීවත් වන දේශයෙහි ගෙවල් ගොඩනඟා ඒවාහි පදිංචි වන්න. දේශයෙහි වගා කටයුතු කර, එයින් ලැබෙන පලදාව භුක්ති විඳින්න.+  විවාහ වී දරුදැරියන් බිහි කරන්න.+ ඔවුන් උස් මහත් වූ විට ඔවුන්වද විවාහ කර දෙන්න. එවිට ඔවුන්ටත් දරුවෝ බිහි වනු ඇත. ඔබේ ජාතිය ගණනින් අඩු නොවන පිණිස එසේ කරන්න.  එමෙන්ම යෙහෝවා දෙවි වන මා ඔබව වහල්භාවයට යැවූ නගරය තුළ සාමය රැකෙන අයුරින් ජීවත් වන්න. ඒ නගරය වෙනුවෙන් යාච්ඤා කරන්න. මන්ද එහි සාමකාමී වාතාවරණයක් පැවතුණොත් ඔබටත් සමාදානයෙන් ජීවත් වීමට හැකි වනු ඇත.’+  ස්වර්ගයේ සේනාවල අධිපතිද ඊශ්‍රායෙල්හි දෙවිද වන යෙහෝවා තවදුරටත් මෙසේ පැවසුවේය. ‘ඔබ අතරේ සිටින අනාගතවක්තෘවරුන්ට හා ශාස්ත්‍ර කියන්නන්ට ඔබව මුළා කිරීමට ඉඩ නොදෙන්න.+ ඔවුන්ගේ සිහින ගැන ඔවුන් පවසන විට ඊට සවන් නොදෙන්න.+  මන්ද අනාවැකි පැවසීමට මම ඔවුන්ව පත් නොකළෙමි.+ ඔවුන් මාගේ නාමයෙන් ඔබට කියන්නේ බොරු අනාවැකිය. මේ දේවල් ඔබට පවසන මා යෙහෝවා දෙවිය.’” 10  “යෙහෝවා දෙවි මෙසේද පැවසුවේය. ‘බැබිලෝනියේ ජීවත් වීමට නියම කර ඇති අවුරුදු හැත්තෑව සම්පූර්ණ වූ විට මම ඔබව සිහි කරන්නෙමි.+ ඔබේ මව්බිමට ඔබව නැවත රැගෙන එන බවට මා දුන් පොරොන්දුව එදාට ඉෂ්ට කරන්නෙමි.’+ 11  “යෙහෝවා දෙවි මෙසේද පැවසුවේය. ‘මාගේ අරමුණ+ වන්නේ ඔබ පිටට විපත්ති ගෙන ඒම නොවේ.+ නමුත් සාමයෙන් පිරුණු ප්‍රීතිමත් ජීවිතයක් ගැන බලාපොරොත්තුවක් ඔබට ලබා දීමය.+ 12  ඒ කාලයේදී ඔබ මා වෙතට හැරී මට හඬගසනු ඇත. මට කන්නලව් කරනු ඇත. එවිට මම ඔබට සවන් දෙන්නෙමි.’+ 13  “‘ඔබ මුළු හදවතින්ම මා වෙතට හැරී මාගේ මඟ පෙන්වීම් පතන නිසා+ මට නමස්කාර කිරීමට ඔබට හැකි වනු ඇත.+ 14  මමද ඔබ කරන නමස්කාරය පිළිගන්නෙමි’+ කියා යෙහෝවා දෙවි පැවසුවේය. ‘වහල්භාවයේ සිටින ඔබ සියලුදෙනාවම මම එකට එකතු කරගන්නෙමි. මම ඔබව විසුරුවාහැරිය සියලු ජාතීන් අතරින්ද සියලු දේශවලින්ද ඔබව එකතු කරගන්නෙමි.+ ඔබ වහල්භාවයට යෑමට පෙර ජීවත් වූ දේශයටම මම නැවත ඔබව රැගෙන එන්නෙමි’+ කියා යෙහෝවා දෙවි තවදුරටත් පැවසුවේය. 15  “නමුත්, ‘බැබිලෝනියේදීත් අපි වෙනුවෙන් අනාවැකි කීමට යෙහෝවා දෙවි අනාගතවක්තෘවරුන්ව පත් කළා’ කියා ඔබ පැවසුවහුය. 16  “දාවිත්ගේ සිංහාසනයේ හිඳින රජුටත්+ ඔබ සමඟ වහල්භාවයට නොගොස් මේ නගරයේ ජීවත් වන ඔබේම සහෝදරයන්ටත්+ යෙහෝවා දෙවි පවසන මේ දේ සැලකිල්ලට ගන්න. 17  ‘ස්වර්ගයේ සේනාවල අධිපති වන යෙහෝවා දෙවි මෙසේ පවසන්නේය. “මම ඔවුන්ට කඩුවෙන්ද+ සාගතයෙන්ද+ වසංගතවලින්ද+ පහර දෙන්නෙමි. මම ඔවුන්ව කෑමට ගත නොහැකි තරමටම නරක් වූ අත්තික්කා ගෙඩි මෙන් වීමට සලස්වන්නෙමි.”’+ 18  “‘මම ඔවුන්ව ලුහුබැඳ ගොස්, කඩුවෙන්ද සාගතයෙන්ද වසංගතවලින්ද පහර දෙන්නෙමි. ඔවුන්ට සිදු වන විපත දැක පොළොවේ සියලු රාජ්‍යයන් බියෙන් වෙවුලනු ඇත.+ මම ඔවුන්ව විසුරුවාහරින සියලු ජාතීන් අතරේ ඔවුහු නින්දාවටත් සමච්චලයටත් ලක් වන්නෝය. ඒ ජාතීහු ඔවුන්ට ශාප කරනු ඇත. ඔවුන් අද්දකින විපත දැක පුදුමයට පත් වනු ඇත.+ 19  ඔවුන්ට එවැනි විපත්තිවලට මුහුණ දීමට සිදු වන්නේ මා හිමිදිරි උදෑසන සිට නොනවත්වා ඔවුන් වෙතට එවූ මාගේ සේවකයන් වන අනාගතවක්තෘවරුන්ට ඔවුන් සවන් නොදුන් නිසාය’+ කියා යෙහෝවා දෙවි පවසන්නේය. “යෙහෝවා දෙවි මෙසේද පවසන්නේය. ‘ඔබත් මට ඇහුම්කන් දුන්නේ නැත.’+ 20  “දෙවි විසින් යෙරුසලමේ සිට බැබිලෝනියට පිටමං කළ ජනයෙනි,+ යෙහෝවා දෙවිගේ වදන්වලට ඇහුම්කන් දෙන්න.+ 21  ඔහුගේ නාමයෙන් ඔබට බොරු අනාවැකි පවසන අය ගැන+ එනම්, කොලායාගේ පුත්‍රයා වන ආහබ් ගැනත් මයසේයාගේ පුත්‍රයා වන ශෙදකියා ගැනත් ස්වර්ගයේ සේනාවල අධිපතිද ඊශ්‍රායෙල්හි දෙවිද වන යෙහෝවා පවසන මේ දේට සවන් දෙන්න. ‘මම ඔවුන් දෙදෙනාව බැබිලෝනියේ රජු වන නෙබුකද්රෙෂර්ගේ අතට භාර දෙන්නෙමි. ඔබේ ඇස් පනාපිටම ඔහු ඔවුන් දෙදෙනාට පහර දී මරා දමනු ඇත.+ 22  බැබිලෝනියේ වහලුන් ලෙස සිටින යූදා සෙනඟ යමෙකුට ශාප කරන විට ඔවුන් දෙදෙනාට සිදු වූ විපත මතක් කරමින් මෙසේ පවසනු ඇත. “බැබිලෝනියේ රජ, ශෙදකියා හා ආහබ්ව ගින්නෙන් පුලුස්සා දැමුවේය.+ ඔවුන් දෙදෙනාට අත් වූ විපත යෙහෝවා දෙවි ඔබ පිටටත් ගෙනේවා!”+ 23  ඔවුන්ට එවැනි විපත්තියකට මුහුණ දීමට සිදු වන්නේ ඊශ්‍රායෙල් දේශයේදී ඔවුන් පිළිකුල්සහගත ක්‍රියාවල නියැලුණු නිසාය.+ ඔවුහු තම අසල්වාසීන්ගේ භාර්යාවන් සමඟ අනාචාරයේ යෙදෙන්නෝය.+ මා නොදුන් පණිවිඩ ඔවුහු මාගේ නාමයෙන් දිගින් දිගටම සෙනඟට පවසන්නෝය.+ “‘ඔවුන් කරන සෑම දෙයක්ම මම හොඳින් දනිමි. ඒ දේවලට මම සාක්ෂිකරුවෙක් වෙමි.+ මෙසේ පවසන මා යෙහෝවා දෙවිය.’” 24  “නෙහෙලාම්හි ෂෙමායාට+ ඔබ මෙය දන්වන්න. 25  ‘ස්වර්ගයේ සේනාවල අධිපතිද ඊශ්‍රායෙල්හි දෙවිද වන යෙහෝවා මෙසේ පවසන්නේය. “ඔබ ඔබේ නමින් යෙරුසලමේ සිටින මයසේයාගේ පුත්‍රයා වන පූජක ශෙපනියාටත්+ සෙසු පූජකයන්ටත් සියලු සෙනඟටත් ලිපි යවමින්+ මෙසේ දන්වා ඇත. 26  ‘යෙහෝවා දෙවි, පූජක යෙහෝයාදා වෙනුවට ඔබව යෙහෝවා දෙවිගේ ගෘහයේ ප්‍රධාන පූජකයා ලෙස කටයුතු කිරීමටත්+ අනාවැකි පවසන ඕනෑම උන්මත්තකයෙකුව+ දඬුකඳේ* ගැසීමට+ අයිතිය ඇති තැනැත්තා ලෙසත් පත් කළේය. 27  එසේනම් සෙනඟ ඉදිරියේ අනාවැකි ප්‍රකාශ කරන+ අනාතොත්හි වැසියෙකු වූ යෙරෙමියාට+ ඔබ කිසි තරවටුවක් නොදී සිටින්නේ ඇයි? 28  ඔහු බැබිලෝනියේ සිටින අපට මේ වගේ දෙයක් ලියා එව්වේ ඒ නිසාය. “ඔබට තව බොහෝ කාලයක් වහල්භාවයේ සිටීමට සිදු වනු ඇත. ඒ නිසා ගෙවල් ගොඩනඟා ඒවායේ පදිංචි වන්න. දේශයෙහි වගා කටයුතු කරමින් එහි අස්වැන්න භුක්ති විඳින්න.”’”’”+ 29  ෂෙමායා එවූ ලිපිය පූජක ශෙපනියා+ අනාගතවක්තෘ යෙරෙමියාට ඇසෙන්න කියෙව්වේය. 30  ඉන්පසු යෙහෝවා දෙවි යෙරෙමියාට මෙසේ පැවසුවේය. 31  “බැබිලෝනියේ සිටින සියලුදෙනාට+ ලිපියක් මාර්ගයෙන් මෙසේ දන්වන්න. ‘නෙහෙලාම්හි ෂෙමායා සම්බන්ධයෙන් යෙහෝවා දෙවි මෙසේ පවසන්නේය. “අනාවැකි පැවසීමට මම ෂෙමායාව පත් නොකළත් ඔහු ඔබට අනාවැකි පැවසුවේය. එමෙන්ම ඔහු පවසන බොරු අනාවැකි විශ්වාස කිරීමට ඔහු ඔබව පෙලඹුවේය.+ ඒ හේතුව නිසා 32  නෙහෙලාම්හි ෂෙමායාටත්+ ඔහුගෙන් පැවතෙන සියලුදෙනාටත්+ මම දඬුවම් කරන්නෙමි. මෙසේ පවසන මා යෙහෝවා දෙවිය. “‘“ඔහුගෙන් පැවතෙන කිසිවෙකුට මේ සෙනඟ අතරේ ජීවත් වීමට අවස්ථාවක් නොලැබෙන්නේය.+ මාගේ සෙනඟ වෙනුවෙන් මා කරන යහපත් දේවලින් කිසිම දෙයක් ඔහුට දකින්න නොලැබෙන්නේය.+ මන්ද ඔහු කැරලිගසමින් යෙහෝවා දෙවි වන මට විරුද්ධව කතා කළේය.+ මේ දේවල් පවසන්නේ යෙහෝවා දෙවි වන මමය.”’”

පාදසටහන්

මුල් භාෂාවේ මෙහි වචන දෙකක් සඳහන් වේ. එක් වචනයක් පාදවලට දමන දඬුකඳටත් අනික් වචනය අත් සහ ගෙලට දමන දඬුකඳටත් යොමු දැක්වූවා විය හැක.