යාකොබ් 5:1-20

5  ඉතින් ධනවතුනි,+ සවන් දෙන්න. ඔබ පිට පැමිණීමට නියමිත දුක් වේදනා ගැන මොරගසමින් හඬන්න.+  ඔබ රැස් කරගෙන ඇති දේවල් දිරා ගොස් ඇති අතර ඔබේ වස්ත්‍ර කාවෝ කා දමා ඇත.+  ඔබේ රන්ද රිදීද සම්පූර්ණයෙන්ම විනාශ වී ඇත. ඉතුරු වී තිබෙන්නේ මලකඩ පමණි. ඒ මලකඩ ඔබ කළ දේට විරුද්ධව සාක්ෂියක් වන අතර එය ඔබේ ශරීරයද කා දමනු ඇත. ඇත්තෙන්ම ඔබ අවසාන කාලය සඳහා+ රැස් කර තිබෙන්නේ+ ගින්දර පමණි.+  මෙන්න, ඔබේ කෙත්වතුවල අස්වැන්න නෙළූ අයට ඔබ වැටුප් ගෙවා නැති නිසා+ ඔවුහු ඔබට විරුද්ධව මහත් හඬින් කෑගසන්නෝය.+ එමෙන්ම අස්වැන්න නෙළූ අයගේ මොරගැසීම්+ ස්වර්ගීය සේනාවල යෙහෝවා දෙවිගේ කන්වලට වැටී ඇත.+  ඔබ මෙලොවෙහි ගත කර තිබෙන්නේ ඉතා සැපවත් ජීවිතයකි. ඔබ නිතරම ඔබේම ආශාවන් තෘප්තිමත් කරගැනීමට උත්සාහ දරා ඇත.+ මස් සඳහා තර කරන සතුන් හා සමානව ඔබේ හදවත් තර වී ඇත.+  ධර්මිෂ්ඨ තැනැත්තාව හෙළාදකිමින් ඔහුව මරා දැමීමට තරම් වෛරයකින් ඔබ ඔහුට විරුද්ධව ක්‍රියා කර ඇත. එමනිසා ඔහු ඔබට විරුද්ධවද ක්‍රියා කරයි.+  එහෙයින් සහෝදරයෙනි, ස්වාමීන් පැමිණ සිටින කාලය*+ එන තුරු ඉවසිල්ලෙන් බලා සිටින්න. මුලින් ඇද හැළෙන වැස්සත් පසුව ඇද හැළෙන වැස්සත් ලැබෙන තෙක් ඉවසිල්ලෙන් බලා සිටින ගොවියා ඉන්පසු භූමියෙන් අනගි පලදාවක් ලැබෙන තුරු බලා සිටියි.+  ඔබත් ඉවසිල්ලෙන් බලා සිටින්න.+ ඔබේ හදවත් ස්ථිර කරගන්න. මන්ද ස්වාමීන් පැමිණ සිටින කාලය* ළඟා වී ඇත.+  සහෝදරයෙනි, එකිනෙකා ගැන කලකිරීමෙන් වැළකී සිටින්න. මන්ද එසේ වුවහොත් ඔබවත් විනිශ්චයට ලක් වෙයි.+ විනිශ්චයකරුවාණන් දොරකඩ අසලම සිටින බව මතක තබාගන්න.+ 10  සහෝදරයෙනි, යෙහෝවා දෙවිගේ නාමයෙන් කතා කළ+ අනාගතවක්තෘවරුන්+ නපුරු දේවල් දරාගත් ආකාරයද+ ඔවුන් ඉවසූ ආකාරයද+ ආදර්ශයට ගන්න.+ 11  මන්ද පීඩා විඳදරාගෙන සිටින අය සන්තෝෂවත් කියා අපි ප්‍රකාශ කරන්නෙමු.+ යෝබ් විඳදරාගත් ආකාරය ගැන ඔබ අසා ඇති අතර+ යෙහෝවා දෙවි ඔහුට ආශීර්වාද කළ ආකාරය ගැනත් ඔබ දන්නහුය.+ ඉන් පැහැදිලි වන්නේ යෙහෝවා දෙවි ගැඹුරු ස්නේහයක් ඇති ඉතා දයාවන්ත දෙවි කෙනෙකු බවය.+ 12  මාගේ සහෝදරයෙනි, ඔබ විශේෂයෙන්ම නවතා දැමිය යුතු දෙයක් වන්නේ දිවුරීමයි. එහෙයින් තවදුරටත් ස්වර්ගයේ නාමයෙන් හෝ පොළොවේ නාමයෙන් හෝ වෙනත් කිසි දෙයක් පදනම් කරගෙන හෝ දිවුරීමෙන් වැළකී සිටින්න.+ එසේය කියා කිව යුතු අවස්ථාවලදී එසේය කියාත් නැත කියා කිව යුතු අවස්ථාවලදී නැත කියාත් පැවසීම ප්‍රමාණවත්ය. එසේ නොකළොත් ඔබ දෙවිගේ විනිශ්චයට ලක් වනු ඇත.+ 13  ඔබ අතරෙහි කෙනෙක් යම් දුෂ්කරතාවලට මුහුණ දෙමින් සිටිනවාද? නොකඩවා යාච්ඤා කිරීමට ඔහුට පුළුවන.+ යම් කෙනෙක් සතුටින් සිටිනවාද? ඔහුට ගීතිකා ගැයීමට පුළුවන.+ 14  ඔබ අතරෙහි කෙනෙක් යම් අසනීපයකින් සිටීද?*+ එවැනි අවස්ථාවකදී ඔහු සභාවෙහි සිටින වැඩිමහල්ලන්ව+ කැඳවිය යුතුයි. එවිට යෙහෝවා දෙවිගේ නාමයෙන් ඔහුට තෙල් ආලේප කරමින්+ ඔහු වෙනුවෙන් යාච්ඤා කිරීමට ඔවුන්ට පුළුවන. 15  විශ්වාසයකින් යුතුව ඉදිරිපත් කරන යාච්ඤාව මගින් අසනීපයෙන් සිටින පුද්ගලයා සනීප වන අතර+ යෙහෝවා දෙවි ඔහුව නැවත ශක්තිමත් කරයි.+ එලෙසම ඔහු යම් පාපයක් කර ඇත්නම් ඒවා සඳහාත් ඔහුට සමාව ලැබේ.+ 16  එහෙයින් ඔබ කළ පාප ගැන එකිනෙකාට විවෘතව කතා කරන්න.+ එසේම එකිනෙකා වෙනුවෙන් යාච්ඤා කරන්න. එවිට ඔබට සුවයක් ලැබෙනු ඇත.+ ඇත්තෙන්ම ධර්මිෂ්ඨ කෙනෙක් දෙවිට කන්නලව් කරන විට එයින් ඉමහත් ප්‍රයෝජන නෙළාගත හැක.+ 17  එලියා අප හා සමාන හැඟීම් ඇති මිනිසෙකි.+ නමුත් වැසි නොවස්සන්න කියා ඔහු වරක් මහත් ඕනෑකමින් යාච්ඤා කළේය.+ ප්‍රතිඵලයක් ලෙස දේශයට වසර තුනකුත් මාස හයක් පුරා වැසි ඇද හැළුණේ නැත. 18  ඔහු නැවතත් යාච්ඤා කළ විට අහසින් වැසි වැස භූමියෙන් පල හටගත්තේය.+ 19  මාගේ සහෝදරයෙනි, ඔබ අතරෙහි කෙනෙක් සත්‍ය මාර්ගයෙන් නොමඟ ගියොත් යම් කෙනෙක් ඔහුව නැවත හරි මාර්ගයට ගන්නවා නම්,+ 20  එම පව්කාර තැනැත්තාගේ වරදින් ඔහුව ඉවතට හරවාගන්නා පුද්ගලයා+ පව් කළ තැනැත්තාගේ ජීවිතය මරණයෙන් ගලවන බව තේරුම්ගන්න.+ එසේම ඔහු කළ පාපවලට නොඅඩුව සමාව ලබාගැනීමට ඔහුට උපකාර කරන බවත් තේරුම්ගන්න.+

පාදසටහන්

පැමිණ සිටීම. ග්‍රීක බසින්, පරූසියා. උපග්‍ර. 7 බලන්න.
පැමිණ සිටීම. ග්‍රීක බසින්, පරූසියා. උපග්‍ර. 7 බලන්න.
“අසනීපය” යන්න භාවිත කර තිබෙන්නේ සංකේතවත් ආකාරයකිනි.