මාක් 9:1-50

9  තවදුරටත් ඔහු ඔවුන්ට මෙසේ කීවේය. “ඇත්තෙන්ම මා ඔබට කියන්නේ, දෙවිගේ රාජ්‍යයේ පාලනය මොන තරම් බලවත් එකක්ද කියා දකින්න පෙර මෙතැන සිටගෙන සිටින්නන්ගෙන් සමහරෙක් කිසිවිටකත් මරණය අද්දකින්නේ නැති බවයි.”+  දවස් හයකට පසු යේසුස්, පේතෘස්ව යාකොබ්ව සහ යොහන්ව පමණක් කැඳවාගෙන උස් කන්දකට ගියේය. එවිට ඔවුන් ඉදිරියෙහිම ඔහුගේ පෙනුම සම්පූර්ණයෙන්ම වෙනස් විය.+  ඔහුගේ වස්ත්‍ර මිහිපිට සිටින මොනම රෙදි සෝදන්නෙකුටවත් සුදු කළ නොහැකි තරමට සුදු වී බැබළුණේය.+  ඔහු අසල මෝසෙස් සහ එලියා සිටින ආකාරයත් ඔවුන් යේසුස් සමඟ කතා කරන ආකාරයත්+ ඔවුන්ට දැකගත හැකි විය.  එය දුටු පේතෘස්, “ගුරුතුමනි,* මේ අවස්ථාවේදී මෙතැන සිටින්න ලැබීම අපට ලොකු සතුටක්. අපි මෙහි කූඩාරම් තුනක්, එකක් ඔබටත් එකක් මෝසෙස්ටත් එකක් එලියාටත් සාදන්නම්”+ කියා යේසුස්ට කීවේය.  ඒ සිද්ධිය දුටු ඔවුන් කොතරම් බියට පත් වූවාද කිවහොත් කුමක් කියන්නද කියාවත් ඔහු දැනගෙන සිටියේ නැත.  එකවරම වලාකුළක් ඇවිත් ඔවුන්ව වසාගත්තේය. එවිට, “මේ මාගේ ප්‍රේමණීය පුත්‍රයාය.+ මොහුට සවන් දෙන්න”+ කියා පවසන හඬක්+ ඒ වලාකුළ අතරින් නික්මුණේය.  ඉන්පසු ඔවුහු ඉක්මනින් වටපිට බැලුවත් ඔවුන් සමඟ යේසුස් මිස වෙන කිසිවෙකු නොසිටින බව දුටුවෝය.+  ඔවුන් කන්දෙන් බැස එන විට මනුෂ්‍ය පුත්‍රයා මරණයෙන් නැඟිටින තුරු+ තමන් දුටු දේ කිසිවෙකුට නොපවසන්න+ කියා ඔහු ඔවුන්ට තදින් අවවාද කළේය. 10  ඔවුහු ඔහු පැවසූ දේ සිතට ගත් නමුත් මරණයෙන් නැඟිටුවීම ගැන ඔහු පැවසූ දෙයින් අදහස් කළේ කුමක්ද කියා ඔවුනොවුන් අතරේ කතා කළෝය. 11  එවිට ඔවුහු, “පළමුවෙන් එලියා+ පැමිණිය යුතුයි+ කියා නීතිය පිටපත් කරන්නන් කියන්නේ ඇයි” කියා ඔහුගෙන් ඇසූහ. 12  ඔහු ඔවුන්ට මෙසේ කීවේය. “එලියා පළමුවෙන් ඇවිත් සියල්ල නැවත පිහිටුවයි.+ නමුත් මනුෂ්‍ය පුත්‍රයා ගැන ලියා තිබෙන්නේ ඊට වඩා වෙනස් දෙයක්. ඔහු බොහෝ දුක් විඳින බවත්+ කිසි වැදගැම්මකට නැති කෙනෙකු ලෙස ඔහුට සලකන බවත්+ ලියා තිබෙනවා. එසේ ලියා තිබෙන්නේ ඇයි කියා ඔබ දන්නවාද? 13  ඇත්තටම මා ඔබට කියන්නේ, එලියා+ මේ වන විටත් ඇවිත් තිබෙන බවයි. ඔහු ගැන ලියා තිබෙන ආකාරයටම ජනයා තමන් කැමති කැමති දේ ඔහුට කළා.”+ 14  ඔවුන් අනික් ගෝලයන් සිටි තැනට පැමිණි විට විශාල පිරිසක් ඔවුන්ව වට කරගෙන සිටින ආකාරයත් නීතිය පිටපත් කරන්නන් ඔවුන් සමඟ විවාද කරමින් සිටින ආකාරයත් ඔවුන්ට දැකගත හැකි විය.+ 15  නමුත් මුළු සමූහයා ඔහුව දුටු විගස පුදුම වී ඔහු වෙතට දුව ගොස් ඔහුව සාදරයෙන් පිළිගත්තෝය. 16  එවිට ඔහු, “ඔබ ඔවුන් සමඟ විවාද කරන්නේ කුමක් ගැනද” කියා ඔවුන්ගෙන් ඇසුවේය. 17  සමූහයා අතරින් එක් කෙනෙක් ඔහුට මෙසේ පිළිතුරු දුන්නේය. “ගුරුතුමනි, මගේ පුතාට භූතයෙක් වැහිලා. ඒ නිසා ඔහු ගොළු වෙලා. මම පුතාව ඔබ වෙතට ගෙනාවේ ඔහුව සුව කරගන්නයි.+ 18  භූතයා මගේ පුතාට ආවේශ වන ඕනෑම තැනකදී ඔහුව බිම දමනවා. ඊටපස්සේ ඔහු කටින් පෙණ දමමින්, දත්මිටි කනවා. ඒ වෙලාවලදී ඔහුගේ ඇඟට කිසිම පණක් නැහැ. ඒ භූතයාව දුරු කරන්න කියලා මා ඔබේ ගෝලයන්ට කිව්වා. නමුත් ඔවුන්ට ඒ දේ කරන්න බැරි වුණා.”+ 19  එවිට ඔහු, “ඔබ සියලුදෙනා තුළ කිසිම විශ්වාසයක් නැහැ.+ මා මේ පරම්පරාව සමඟ තව කොපමණ කල් සිටින්නද? ඔබ ගැන තව කොපමණ කල් ඉවසන්නද? ඔහුව මා ළඟට ගෙනෙන්න”+ කියා ඔවුන්ට කීවේය. 20  එවිට ඔවුහු යේසුස් වෙතට ඔහුව ගෙන ආවෝය. ඒ භූතයා යේසුස්ව දුටු විගස දරුවාව ගැහෙන්න සැලැස්වූවේය. දරුවා බිම වැටී, පෙරළෙමින් කටින් පෙණ දමමින් සිටියේය.+ 21  යේසුස් දරුවාගේ පියාගෙන් මෙසේ ඇසුවේය. “මෙය කොතරම් කාලයක් පුරා මොහුට සිදු වෙනවාද?” එවිට ඔහු මෙසේ පිළිතුරු දුන්නේය. “කුඩා කාලයේ ඉඳලා. 22  ඔහුට වැහෙන භූතයා ඔහුව විනාශ කර දැමීමේ අදහසින් වරින් වර ඔහුව ගින්නටත් වතුරටත් දමනවා.+ අනේ, අපට අනුකම්පා කරන්න. පුළුවන් නම් මොනව හරි කරලා අපට උපකාර කරන්න.” 23  එවිට යේසුස්, “‘පුළුවන් නම්’ කියා ඔබ කිව්වා නේද? කෙනෙකුට විශ්වාසය තිබෙනවා නම්+ ඕනෑම දෙයක් කරන්න පුළුවන්” කියා පැවසුවේය. 24  එවිට ඒ දරුවාගේ පියා, “මට විශ්වාසය තිබෙනවා. ඒත් මගේ විශ්වාසය ශක්තිමත් කරගන්න මට උපකාර කරන්න”+ කියා වහාම හඬ නඟා පැවසුවේය. 25  සමූහයක් එකතු වී ඔවුන් ළඟට දුවගෙන එනවා දුටු යේසුස් භූතයාට තදින් කතා කරමින්+ මෙසේ කීවේය. “ගොළු වීමත් බිහිරිකමත් ඇති කරන භූතයෙක් වන ඔබට මා අණ කරන්නේ මොහුගෙන් පිටතට ඇවිත් නැවතත් ඔහුට ආවේශ වෙන්න එපා කියායි.” 26  භූතයා මොරගසා, බොහෝ වර දරුවාට ගැහෙන්න සලස්වා පිටතට ආවේය.+ දරුවා මළ කෙනෙකු මෙන් වූ නිසා බහුතරයක්, “ඔහු මැරිලා” කියා පවසන්න පටන්ගත්තෝය. 27  නමුත් යේසුස් ඔහුගේ අත අල්ලා ඔහුව නැඟිටෙවූ විට ඔහු සිටගත්තේය.+ 28  ඉන්පසු යේසුස් එක්තරා නිවසකට ගියේය. එවිට ඔහුගේ ගෝලයෝ පමණක් ඔහු ළඟට ඇවිත් ඔහුගෙන් මෙසේ ඇසූහ. “අපට ඒ භූතයාව දුරු කරන්න බැරි වුණේ ඇයි?”+ 29  ඔහු ඔවුන්ට මෙසේ පිළිතුරු දුන්නේය. “ඒ වගේ භූතයන්ව දුරු කරන්න ලෙහෙසි නැහැ. ඒ සඳහා යාච්ඤාව ඉතාමත් වැදගත්.”+ 30  පසුව ඔවුහු එතැනින් පිටත්ව ගලීලය හරහා ගමන් කළෝය. නමුත් ඒ ගැන කිසිවෙකු දැනගන්නවාට ඔහු අකමැති විය. 31  මන්ද ඔහු තම ගෝලයන්ට මෙසේ පැහැදිලි කළේය. “මනුෂ්‍ය පුත්‍රයාව මිනිසුන් අතට පාවා දෙන්න නියමිතයි. ඔවුන් ඔහුව මරා දමයි.+ ඒ වුණත් දවස් තුනකින් ඔහුව නැවත නැඟිටුවනු ලබනවා.”+ 32  ඔහු පැවසූ ඒ දේ තේරුම්ගැනීමට ඔවුන්ට නොහැකි වූ අතර ඒ ගැන ඔහුගෙන් ප්‍රශ්න අසන්නත් ඔවුහු බිය වූහ.+ 33  පසුව ඔවුහු කපර්ණවුමට ගියහ. ඔහු එහි නිවසක සිටියදී, “ඔබ මඟදී වාද කරමින් සිටියේ කුමක් ගැනද”+ කියා ඔවුන්ගෙන් ඇසුවේය. 34  ඔවුන් මඟ එන විට වාද කළේ තමන් අතරේ වඩා උතුම් වන්නේ කවුද+ යන්න ගැන නිසා ඔවුහු නිශ්ශබ්දව සිටියෝය. 35  එහෙයින් ඔහු වාඩි වී දොළොස්දෙනාව කැඳවා, “කවුරු හරි උතුම්ම තැනැත්තා වෙන්න කැමති නම් ඔහු සියල්ලන් අතරින් සුළුම තැනැත්තා වී ඔවුන්ගේ සේවකයා විය යුතුයි”+ කියා ඔවුන්ට පැවසුවේය. 36  ඉන්පසු ඔහු තමන් ළඟට කුඩා දරුවෙකු ගෙන ඔවුන් මැද සිටුවා ඔහුව තුරුලු කරගෙන ඔවුන්ට මෙසේ කීවේය.+ 37  “මා නිසා* යමෙකු කුඩා දරුවන් මෙන් සිටින කෙනෙකුව මගේ අනුගාමිකයෙකු ලෙස පිළිගත්තොත් ඔහු මාවත් පිළිගන්නවා කියා පැවසිය හැකියි. මාව පිළිගන්නා පුද්ගලයා මාව පමණක් නොව මාව එවූ තැනැත්තාවත් පිළිගන්නවා.”+ 38  යොහන් ඔහුට මෙසේ කීවේය. “ගුරුතුමනි, භූතයන් දුරු කරන මිනිසෙක් අපිට හමු වුණා. ඔහු එය කරන්නේ ඔබේ නාමයෙන්. ඔහු අපත් සමඟ ආවේ නැති නිසා+ අපි ඔහු කරන දේ නතර කරන්න උත්සාහ කළා.”+ 39  නමුත් යේසුස් මෙසේ කීවේය. “ඔහුව නතර කරන්න එපා. මන්ද කිසිම කෙනෙක් මගේ නාමයෙන් බලවත් ක්‍රියාවක් කළ පසු මා ගැන අගුණ කියන්නේ නැහැ.+ 40  අපිට විරුද්ධව වැඩ කරන්නේ නැති කෙනෙක් ඇත්තටම සිටින්නේ අපට පක්ෂවයි.+ 41  ඇත්තෙන්ම මා ඔබට කියන්නේ, ඔබ ක්‍රිස්තුස්ගේ අනුගාමිකයෙක්+ නිසා යමෙක් ඔබට බොන්න වතුර කෝප්පයක්+ දුන්නොත් ඔහුට ලැබීමට නියමිත ත්‍යාගය ඔහුට අනිවාර්යයෙන්ම ලැබෙන බවයි. 42  නමුත් යමෙක් කරන දෙයක් නිසා මා කෙරෙහි විශ්වාසය තබන කුඩා දරුවන් හා සමාන ඔවුන්ගෙන් එක් කෙනෙකු හෝ වැටී ගියොත්* බූරුවෙකු විසින් කරකවනු ලබන ඇඹරුම් ගලක් ඒ දේ කරන තැනැත්තාගේ බෙල්ලේ එල්ලා ඔහුව මුහුදේ හෙළීම වඩාත් හොඳයි.+ 43  “ඔබේ අත නිසා ඔබ වරදක් කරන්න පෙලඹෙනවා නම්* එය කපා ඉවත් කරන්න. අත් දෙක සහිතව ගෙහෙන්නාවට* එනම්, නිවිය නොහැකි ගින්නට දමනවාට වඩා අතක් නැති කෙනෙකු ලෙස ඔබට ජීවනය හිමි වෙනවා නම් එය වඩාත් හොඳ නැද්ද?+ 44  —— 45  ඔබේ පය නිසා ඔබ වරදක් කරන්න පෙලඹෙනවා නම්* එය කපා ඉවත් කරන්න. දෙපා සහිතව ගෙහෙන්නාවට හෙළනු ලබනවාට+ වඩා පාදයක් නැතුව+ ඔබට ජීවනය හිමි වෙනවා නම් එය වඩාත් හොඳ නැද්ද? 46  —— 47  ඔබේ ඇස නිසා ඔබ වරදක් කිරීමට පෙලඹෙනවා නම් එය උගුලා අහකට විසි කරන්න.+ දෑස් ඇතුව ගෙහෙන්නාවට හෙළනු ලබනවාට+ වඩා එක ඇසක් නැතුව වුණත් දෙවිගේ රාජ්‍යය හිමි කරගැනීම වඩාත් හොඳයි. 48  ගෙහෙන්නාවේ තිබෙන ගින්න නිවී යන්නේවත් එහි සිටින පණුවෝ නසින්නේවත් නැහැ.+ 49  “කෑම මත ලුණු ඉසිනවා වගේ දෙවි එවැනි අය මත ගින්නක් එවා ඔවුන්ව දවා දමයි.+ 50  ලුණුවල ප්‍රයෝජන තිබෙනවා. නමුත් ලුණුවල ලුණු රසය නැති වුණොත් එය නැවත ඇති කරන්නේ කොහොමද?+ ඔබත් ලුණු රසය ඇති ලුණු මෙන් විය යුතුයි.+ එසේ සිටීමෙන් එකිනෙකා අතර සමාදානය පවත්වාගන්න+ ඔබට පුළුවන්.”

පාදසටහන්

එනම්, රබ්බි.
හෝ, “මාගේ නාමයෙන්.”
මූ.අ., “පය පැකිළී වැටුණොත්.”
මූ.අ., “ඔබේ පය පැකිළී ඔබ වැටෙනවා නම්.”
යෙරුසලමෙන් පිටත කසළ පුලුස්සා දැමීම සඳහා භාවිත කළ ස්ථානය. උපග්‍ර. 2 බලන්න.
මාක් 9:43හි පළමුවෙනි පාදසටහන බලන්න.