මාක් 8:1-38

8  එම කාලයේ තවත් දවසක ඉතා විශාල සමූහයක් එක් රැස් වී සිටියෝය. ඒ අවස්ථාවේදීත් ඔවුන්ට කන්න කිසිවක් තිබුණේ නැත. එමනිසා යේසුස් ගෝලයන්ව කැඳවා ඔවුන්ට මෙසේ කීවේය.+  “මට මේ සෙනඟ ගැන මහත් අනුකම්පාවක් දැනෙනවා.+ දවස් තුනක් පුරා ඔවුන් මා සමඟ ඉන්නවා. ඔවුන්ට කන්නත් කිසි දෙයක් නැහැ.  සමහරුන් ඇවිත් ඉන්නේ ඉතා දුර බැහැර සිටයි. කෑමට බීමට කිසිවක් නොදී ඔවුන්ව යැව්වොත් යන අතරමඟදී ඔවුන් ක්ලාන්ත වී වැටෙයි.”  නමුත් ඔහුගේ ගෝලයෝ ඔහුට මෙසේ පිළිතුරු දුන්නෝය. “අපි ඉන්නේ පාළු තැනක. ඉතින් මෙතරම් විශාල සෙනඟකට අපි රොටි හොයන්නේ කොහොමද?”+  එවිට ඔහු, “ඔබ ළඟ රොටි කීයක් තිබෙනවාද” කියා ඔවුන්ගෙන් ඇසුවේය. “හතක්”+ කියා ඔවුහු පිළිතුරු දුන්හ.  ඔහු සමූහයාට බිම ඉඳගන්න කියා පවසා රොටි හත ගෙන දෙවිට ස්තුති දී+ ඒවා කඩා, සමූහයාට බෙදා දීම සඳහා තම ගෝලයන්ට ඒවා දුන්නේය. ඔවුහු ඒවා ගෙන සමූහයා අතර බෙදා දුන්හ.+  ඔවුන් ළඟ කුඩා මසුන් කිහිපයක්ද තිබිණ. ඔහු ඒ සඳහාද දෙවිට ස්තුති කර ඒවාද බෙදා දෙන්න කියා ඔවුන්ට පැවසුවේය.+  සියලුදෙනා කා තෘප්තිමත් වූහ. ඉන්පසු ඉතුරු වූ කෑමවලින් ඔවුහු විශාල කූඩ හතක් පුරවාගත්තෝය.+  ඒ අවස්ථාවේදී එතැන පුරුෂයෝ හාරදහසක් පමණ සිටියෝය. ඉන්පසු ඔහු ඔවුන්ව පිටත් කර යැව්වේය.+ 10  ඔහු තම ගෝලයන් සමඟ ඉක්මනින් ඔරුවට නැඟ එම ස්ථානයෙන් පිටත් වී දල්මනූතය නම් ප්‍රදේශයට අයත් පළාත්වලට ගියේය.+ 11  එහිදී පරිසිවරු ඇවිත් ඔහු සමඟ විවාද කරන්න පටන්ගෙන ඔහුගේ යම් වරදක් අල්ලාගැනීමේ අදහසින් අහසේ ආශ්චර්යවත් ලකුණක් පෙන්වන මෙන් ඔහුගෙන් ඉල්ලා සිටියහ.+ 12  එවිට ඔහු මහත් දුකකින්+ මෙසේ කීවේය. “මේ පරම්පරාව මේ වගේ ලකුණක් ඉල්ලන්නේ ඇයි? ඇත්තෙන්ම මේ පරම්පරාවට කිසිම ලකුණක් දෙනු ලබන්නේ නැහැ.”+ 13  එය පවසා ඔහු එතැනින් පිටත් වී නැවත ඔරුවට නැඟ එගොඩට ගියේය. 14  නමුත් රොටි ගෙන යෑමට ඔවුන්ට අමතක විය. ඔරුවේ සිටි ඔවුන් ළඟ එක රොටියක් හැර වෙන කිසිවක් තිබුණේ නැත.+ 15  ඒ අවස්ථාවේදී ඔහු ඔවුන්ට මෙසේ අවවාද කළේය. “සෝදිසියෙන් සිටින්න. පරිසිවරුන්ගේ මුහුන්වලින්ද හෙරොද්ගේ මුහුන්වලින්ද පරෙස්සම් වීමට වගබලා ගන්න.”+ 16  එවිට ගෝලයෝ රොටි නොතිබීම ගැන එකිනෙකාට චෝදනා කරන්න පටන්ගත්හ.+ 17  එය දුටු ඔහු ඔවුන්ට මෙසේ කීවේය. “ඔබ ළඟ රොටි නැති එක ගැන එකිනෙකාට චෝදනා කරන්නේ ඇයි?+ ඔබට තවම මා කියූ දේ වැටහෙන්නේවත් එහි අර්ථය තේරෙන්නේවත් නැද්ද? ඔබට එය තේරුම්ගන්න අමාරුද?+ 18  ‘ඇස් තිබුණත් ඔබට පෙනෙන්නේ නැද්ද? කන් තිබුණත් ඔබට ඇසෙන්නේ නැද්ද?’+ ඔබට මතක නැද්ද, 19  මා පුරුෂයන් පන්දහසට රොටි පහකින් කන්න දුන්නා?+ එයින් ඉතුරු වූ කෑමවලින් කූඩ කීයක් පුරවාගත්තාද කියා ඔබට මතකද?” ඔවුහුද, “දොළහක්”+ කියා පිළිතුරු දුන්නෝය. 20  “මා පුරුෂයන් හාරදහසකට රොටි හතක් කඩා දුන් අවස්ථාවේ, ඔබ ඉතුරු කෑමවලින් විශාල කූඩ කීයක් පුරවාගත්තාද?” ඔවුහුද, “හතක්”+ කියා පිළිතුරු දුන්නෝය. 21  එවිට ඔහු, “තවමත් ඔබට තේරෙන්නේ නැද්ද”+ කියා ඔවුන්ගෙන් ඇසුවේය. 22  පසුව ඔවුහු බෙත්සයිදාවට ගියහ. එහිදී මිනිස්සු ඔහු වෙතට අන්ධ මිනිසෙකුව ගෙනැවිත් ඔහුව අල්ලා+ සුව කරන මෙන් ඔහුගෙන් බැගෑපත්ව ඉල්ලා සිටියහ. 23  එවිට ඔහු ඒ අන්ධ මිනිසාව අතින් අල්ලාගෙන ගමෙන් මදක් පිටතට ගෙන ගියේය. ඉන්පසු යේසුස් ඔහුගේ දෙනෙත්වල කෙළ තවරා+ ඔහු පිට අත් තබමින් “ඔබට මොනව හරි පෙනෙනවාද” කියා ඔහුගෙන් ඇසුවේය. 24  ඒ මිනිසා අවට බලමින්, “මට මිනිසුන්ව පේනවා. හැබැයි ඔවුන්ව මට පෙනෙන්නේ ගස් එහා මෙහා යනවා වගෙයි” කියා කීවේය. 25  නැවතත් ඔහු ඒ මිනිසාගේ දෙනෙත් මත තම අත් තැබුවේය. එවිට ඒ මිනිසාට පැහැදිලිව පෙනිණ. ඔහු සුව වූ අතර ඔහුට සෑම දෙයක්ම නිසියාකාරව පෙනුණේය. 26  එවිට ඔහු ඒ මිනිසාව යවමින්, “දැන්මම ගමට යන්න එපා”+ කියා කීවේය. 27  යේසුස් සහ ඔහුගේ ගෝලයෝ සිසේරිය ෆිලිප්පියට අයත් ගම්වලට පිටත්ව ගියහ. ගමන අතරමඟදී ඔහු තම ගෝලයන්ගෙන් මෙසේ ඇසුවේය. “මිනිසුන් මම කවුරුන් කියලද කියන්නේ?”+ 28  ඔවුහු මෙසේ පිළිතුරු දුන්නෝය. “සමහරුන් නම් කියන්නේ ඔබ යොහන් බව්තීස්ත+ කියායි. තවත් අය ඔබට එලියා+ කියලා කියනවා. තවත් සමහරුන් කියන්නේ ඔබ අනාගතවක්තෘවරුන්ගෙන් කෙනෙක්+ කියායි.” 29  එවිට යේසුස්, “ඔබ මොනවාද හිතන්නේ? මම කවුද” කියා ඔවුන්ගෙන් ඇසුවේය. පේතෘස් පිළිතුරු දෙමින්, “ඔබ ක්‍රිස්තුස්”+ කියා ඔහුට කීවේය. 30  එවිට තමන් ගැන කිසිවෙකුට නොකියන ලෙස ඔහු ඔවුන්ට තදින් අවවාද කළේය.+ 31  ඉන්පසු මනුෂ්‍ය පුත්‍රයා බොහෝ දුක් විඳිය යුතු බවත් ඔහුව වැඩිමහල්ලන් විසින්ද නායක පූජකයන් විසින්ද නීතිය පිටපත් කරන්නන් විසින්ද ප්‍රතික්ෂේප කර මරනු ලබන බවත්+ දවස් තුනකින් ඔහුව මරණයෙන් නැඟිටුවන බවත්+ ඔහු ඔවුන්ට පැහැදිලි කරන්න පටන්ගත්තේය. 32  ඔහු ඒ දේවල් පැවසුවේ කිසිම බියක් සැකක් නොමැතිවය. නමුත් පේතෘස් ඔහුව පැත්තකට ගෙන ගොස් ඔහුට තදින් කතා කළේය.+ 33  ඔහු හැරී, තම ගෝලයන් දෙස බලා, “සාතන් මගෙන් අහකට යන්න! ඔබ සිතන්නේ මිනිසුන් සිතන විදිහටයි. දෙවි සිතන විදිහට නොවෙයි”+ කියා පේතෘස්ට තදින් පැවසුවේය. 34  ඔහු තම ගෝලයන් ඇතුළු සමූහයාව තමන් වෙතට කැඳවා ඔවුන්ට මෙසේ කීවේය. “යමෙකු මා අනුව එන්න කැමති නම් ඔහු තම ජීවිතය දෙවි වෙනුවෙන් කැප කර තමන්ගේ වධකණුව රැගෙන,* දිගටම මා අනුව එන්න අවශ්‍යයි.+ 35  මන්ද යමෙකු තම ජීවිතය ගලවාගන්න කැමැත්තෙන් සිටියොත් ඔහුට එය නැති වෙයි. නමුත් මා නිසාත් ශුභාරංචිය නිසාත් තම ජීවිතය නැති කරගන්නාට එය ගලවාගන්න හැකි වෙයි.+ 36  ඇත්තෙන්ම මිනිසෙකු මුළු ලෝකයම ලබාගත්තත් ඔහුට තම ජීවිතය අහිමි වුණොත් ඔහුට එයින් ප්‍රයෝජනයක් තිබෙනවාද?+ 37  තමන් සතු සියල්ල දුන්නත් මිනිසෙකුට තම ජීවිතය බේරාගත හැකිද?+ 38  දෙවිට ද්‍රෝහි වන* මේ පව්කාර පරම්පරාව අතරේ සිටින යමෙක් මගේ ගෝලයෙක් වෙන්නත් මා පවසන දේවල් පිළිගන්නත් ලැජ්ජා වුණොත් මනුෂ්‍ය පුත්‍රයා තම පියාණන්ගේ තේජසින් වැජඹෙමින්, ශුද්ධ දේවදූතයන් සමඟ+ එන අවස්ථාවේදී ඒ තැනැත්තාව පිළිගන්න මනුෂ්‍ය පුත්‍රයාත් කැමති වන්නේ නැහැ.”+

පාදසටහන්

උපග්‍ර. 6 බලන්න.
මූ.අ., “අනාචාරයට නැඹුරු.”