මාක් 14:1-72

14  පාස්කු උත්සවයද+ මුහුන් නොදැමූ රොටි උත්සවයද+ පැවැත්වීමට තිබුණේ තව දවස් දෙකක් පමණි.+ ඒ වන විට නායක පූජකයෝ සහ නීතිය පිටපත් කරන්නෝ උපායශීලී ලෙස යේසුස්ව අල්ලා මරා දැමීමට මඟක් සොයමින් සිටියහ.+  නමුත් “සෙනඟ අතර කෝලහලයක් ඇති විය හැකි නිසා එය උත්සව කාලයේදී නොකරමු”+ කියා ඔවුහු තම තමන් අතරේ නිතරම පවසමින් සිටියෝය.  මේ අතර යේසුස් සිටියේ බෙතානියේ ලාදුරු රෝගී සීමොන්ගේ+ නිවසෙහිය. ඔහු එහි කෑමට ඉඳගෙන සිටින විට ස්ත්‍රියක් ඉතා මිල අධික, පිරිසිදු, සුවඳැති ජටාමාංස තෙල්* අඩංගු ඇලබැස්ටර් බඳුනක් රැගෙන එම ස්ථානයට පැමිණියාය. ඇය ඒ බඳුන විවෘත කර එහි තිබූ තෙල් යේසුස්ගේ හිස මත වත් කරන්න පටන්ගත්තාය.+  එවිට සමහරු ඊට දැඩි ලෙස විරෝධය පාමින් එකිනෙකාට මෙසේ පැවසුවෝය. “මේ සුවඳ තෙල් ඇයි මෙහෙම නාස්ති කළේ?+  ඇයට තිබුණේ ඒ තෙල් ඩිනාරි* තුන්සියයකට වඩා වැඩි මුදලකට විකුණා දිලිඳුන්ට දෙන්නයි.” ඇත්තෙන්ම ඔවුන්ට ඇය ගැන ඇති වූයේ මහත් කේන්තියකි.+  එවිට යේසුස් ඔවුන්ට මෙසේ කීවේය. “ඇයි ඔබ හැමෝම එකතු වී ඇයට කරදර කරන්නේ? ඇයට ඉන්න දෙන්න. ඇය මට කළේ ඉතා යහපත් දෙයක්.+  දිලිඳු අය නම් ඔබ සමඟ හැමදාම සිටිනවා.+ ඔබට කැමති ඕනෑම වේලාවක ඔවුන් වෙනුවෙන් යහපත් දෙයක් කරන්න ඔබට පුළුවන්. ඒත් මම ඔබ සමඟ හැමදාම සිටින්නේ නැහැ.+  ඇය කළේ ඇයට පුළුවන් දෙයයි. ඇය කල් ඇතුව මගේ ශරීරයේ සුවඳ තෙල් වත් කළේ මගේ ශරීරය තැන්පත් කරනු ලබන නිසයි.+  ඇත්තෙන්ම මා ඔබට කියන්නේ, ලොව පුරාම ශුභාරංචිය දේශනා කරන හැම තැනකදීම+ මේ ස්ත්‍රියව සිහි කිරීම සඳහා ඇය කළ දෙය ගැන කියනු ලබන බවයි.”+ 10  මේ අතර දොළොස්දෙනාගෙන් එක් කෙනෙක් වූ යූදස් ඉස්කාරියොත් නායක පූජකයන්ව හමු වීමට ගියේය. ඔහු එහි ගියේ යේසුස්ව ඔවුන්ට පාවා දීමටයි.+ 11  එය ඇසූ නායක පූජකයෝ මහත් සතුටකින් ඔහුට රිදී මුදල් දෙන්න පොරොන්දු වූහ.+ එතැන් පටන් යූදස් ඔහුව පාවා දීමට සුදුසු අවස්ථාවක් හා ක්‍රමයක් සොයමින් සිටියේය.+ 12  චාරිත්‍රානුකූලව පාස්කු යාගය පූජා කළ දවසේදී එනම්, මුහුන් නොදැමූ+ රොටි උත්සවයේ පළමුවෙනි දවසේදී ඔහුගේ ගෝලයෝ,+ “අපි පාස්කු භෝජනය සූදානම් කළ යුත්තේ කොහේද”+ කියා ඔහුගෙන් ඇසූහ. 13  එවිට ඔහු තම ගෝලයන් දෙදෙනෙකුව යවමින් ඔවුන්ට මෙසේ කීවේය. “මුලින්ම නුවරට යන්න. වතුර පිරුණු මැටි භාජනයක් උසුලාගෙන යන මිනිසෙකුව ඔබට හමු වෙයි.+ ඔහු පසුපස යන්න. 14  ඔහු යම් නිවසකට ඇතුල් වෙයි. ඒ නිවස අයිති තැනැත්තාව හමු වී ඔහුට මෙසේ කියන්න. ‘“මගේ ගෝලයන්+ සමඟ පාස්කු භෝජනය+ ගැනීම සඳහා මට වෙන් කළ කාමරය කොතැනද” කියා ගුරුතුමා අසනවා’ යයි පවසන්න. 15  එවිට ඔහු අවශ්‍ය දේවල් සහිතව පිළියෙල කර ඇති විශාල උඩුමහල් කාමරයක් ඔබට පෙන්වයි. ඔබ භෝජනය සූදානම් කළ යුත්තේ එතැනයි.”+ 16  ඒ අනුව එම ගෝලයෝ දෙදෙනා පිටත් වී නුවරට ඇතුල් වූහ. ඔහු ඔවුන්ට කී ලෙසම සියල්ල සිදු විය. ඉන්පසු ඔවුහු පාස්කුව සඳහා අවශ්‍ය සෑම දෙයක්ම සූදානම් කළහ.+ 17  අඳුර වැටීගෙන එද්දී ඔහු දොළොස්දෙනා සමඟ එම ස්ථානයට ගියේය.+ 18  ඔවුන් කෑම මේසයේ ඉඳගෙන කමින් සිටියදී යේසුස්, “මා ඔබට කියන මේ දේ අසන්න. මා සමඟ ආහාර ගනිමින් සිටින ඔබ අතරෙන් කෙනෙක්+ මාව පාවා දෙනවා”+ කියා කීවේය. 19  එය අසා බොහෝ සෙයින් ශෝක වූ ඔවුහු, “ඒ මමද”+ කියා එක් කෙනෙක් පාසා එක් කෙනෙක් ඔහුගෙන් අසන්න පටන්ගත්තෝය. 20  එවිට ඔහු ඔවුන්ට මෙසේ කීවේය. “ඒ තැනැත්තා ඔබ දොළොස්දෙනාගෙන් කෙනෙක්. මා මේ බඳුනට අත දමන අවස්ථාවේදීම ඔහුත් එයට අත දමයි.+ 21  ලියා තිබෙන ආකාරයටම මනුෂ්‍ය පුත්‍රයා ඔබෙන් අනිවාර්යයෙන්ම සමුගනියි. නමුත් මනුෂ්‍ය පුත්‍රයාව පාවා දෙන ඒ මිනිසාට මොන තරම් දරුණු විපතකට මුහුණ දෙන්න සිදු වෙයිද! ඇත්තෙන්ම ඒ මිනිසා ඉපදුණේ නැත්නම් වඩාත් හොඳයි.”+ 22  ඉන්පසු ඔවුන් කමින් සිටියදී ඔහු රොටියක් ගෙන යාච්ඤාවක් ඉදිරිපත් කර එය කඩා ඔවුන්ට දී, “මෙය ගන්න. මෙයින් නියෝජනය වන්නේ මාගේ ශරීරයයි”+ කියා කීවේය. 23  ඊළඟට ඔහු කුසලානයක් ගෙන දෙවිට ස්තුති යාච්ඤාවක් කර එය ඔවුන්ට දුන්නේය. සියලුදෙනාම එයින් බිව්වෝය.+ 24  ඔහු ඔවුන්ට මෙසේ කීවේය. “මෙයින් නියෝජනය වන්නේ බොහෝදෙනා උදෙසා+ වගුරුවනු ලබන+ මගේ රුධිරයයි.+ ගිවිසුම*+ ස්ථිර වන්නේ මේ රුධිරයෙනුයි. 25  ඇත්තෙන්ම මා ඔබට කියන්නේ, දෙවිගේ රාජ්‍යයෙහි මා අලුත් වයින් බොන දවස එන තුරු මා මෙතැන් පටන් මිදිවැලේ පලයෙන් ලැබෙන වයින් කිසිසේත් බොන්නේ නැති බවයි.”+ 26  අවසානයේදී ප්‍රශංසා ගී ගැයූ+ ඔවුහු, ඔලීව කන්දට පිටත්ව ගියහ.+ 27  යේසුස් ඔවුන්ට මෙසේ කීවේය. “ඔබ සැමදෙනාම මාව අත්හැර යයි. මන්ද ‘මම එඬේරාට පහර දෙන්නෙමි.+ එවිට බැටළුවෝ සීසීකඩ විසිරී යනු ඇත’+ කියා ලියා තිබෙනවා. 28  නමුත් මාව මරණයෙන් නැඟිටුවනු ලැබූ පසු ඔබට කලින් මම ගලීලයට යනවා.”+ 29  නමුත් පේතෘස්, “අන් සියලුදෙනාම ඔබව අත්හැර ගියත් මම නම් කවදාවත් ඔබව අත්හරින්නේ නැහැ”+ කියා ඔහුට කීවේය. 30  එවිට යේසුස් ඔහුට මෙසේ කීවේය. “ඇත්තෙන්ම මා ඔබට කියන්නේ, කුකුළෙක් දෙවතාවක් හඬලන්න කලින් අදම මේ රාත්‍රියේම වෙන කවුරුත් නොවෙයි ඔබම, මාව හඳුනන්නේ නැහැ කියා තුන් වතාවක් පවසන බවයි.”+ 31  නමුත් ඔහු, “මට ඔබ සමඟ මැරෙන්න සිදු වුණත් ඔබව හඳුනන්නේ නැහැ කියා නම් මම කොහොමටවත් කියන්නේ නැහැ” කියා තරයේ කියා සිටියේය. අන් සියලුදෙනාද ඒ දේම පැවසූහ.+ 32  ටික වේලාවකින් ඔවුහු ගෙත්සෙමනය ලෙස හැඳින්වූ ස්ථානයකට ගියහ. “මා යාච්ඤා කරන තුරු මෙහි ඉඳගෙන සිටින්න”+ කියා ඔහු තම ගෝලයන්ට කීවේය. 33  ඉන්පසු ඔහු පේතෘස්වද යාකොබ් සහ යොහන්වද+ ඔහු සමඟ රැගෙන ගියේය. එවිට ඔහු තුළ කම්පනයක්ද මහත් කැලඹීමක්ද ඇති වෙන්න පටන්ගත්තේය.+ 34  ඔහු, “මා තුළ ඇති වී තිබෙන ශෝකය කොතරම්ද කියනවා නම්+ මට දැනෙන්නේ මා මිය යනවා වගෙයි. ඔබ මෙහි නැවතී අවදියෙන් සිටින්න”+ කියා ඔවුන්ට කීවේය. 35  ඉන්පසු ඔහු ටික දුරක් ඉදිරියට ගොස් බිම වැටී, තමාට මුහුණ දෙන්න සිදු වන අසීරු අවස්ථාව හැකි නම් විගස අවසන් කරන ලෙස ඉල්ලා යාච්ඤා කළේය.+ 36  ඔහු, “අබ්බා, පියාණෙනි,+ ඔබට සෑම දෙයක්ම කරන්න පුළුවන්. මේ කුසලානය* මගෙන් ඉවත් කරන්න. නමුත් සිදු විය යුත්තේ මා කැමති දේ නොව ඔබ කැමති දෙයයි”+ කියා කීවේය. 37  ටික වේලාවකින් ඔහු පැමිණ ඔවුන් නිදා සිටිනවා දැක පේතෘස්ට මෙසේ කීවේය. “සීමොන්, ඔබට නින්ද ගියාද? ඔබට එක පැයක්වත් අවදියෙන් සිටින්න ශක්තිය නැද්ද?+ 38  යම් වරදක් කිරීමට පෙලඹීමක් ඇති නොවීම සඳහා අවදිව සිට යාච්ඤා කරන්න.+ නමුත් ඒ දේ කරන්න සිත කොතරම් කැමති වුණත් මිනිසුන්ගේ දුර්වලකම එයට ඉඩ දෙන්නේ නැහැ.”+ 39  ඔහු නැවත ගොස් කලින් පැවසූ වදන්ම පවසමින් යාච්ඤා කළේය.+ 40  ඔහු නැවතත් පැමිණි විට ඔවුන් නිදා සිටිනවා දුටුවේය. නිදිබරව සිටි ඔවුහු නිදහසට කුමක් කියන්නද කියාවත් නොදැන සිටියෝය.+ 41  ඔහු තුන්වෙනි වතාවටත් ඇවිත් ඔවුන්ට මෙසේ කීවේය. “මෙවැනි වේලාවක ඔබ නිදාගෙන විවේක ගන්නවාද? දැන් ඇති! මෙන්න බලන්න! මනුෂ්‍ය පුත්‍රයාව පව්කාරයන්ගේ අතට පාවා දෙන්න+ වේලාව ඇවිත්.+ 42  නැඟිටින්න, අපි යමු.+ මෙන්න! මාව පාවා දෙන තැනැත්තා ළඟටම ඇවිත්!”+ 43  ඔහු කතා කරමින් සිටියදීම, දොළොස්දෙනාගෙන් එක් කෙනෙක් වූ යූදස් ආවේය. ඔහු සමඟ කඩු මුගුරු රැගත් පිරිසක් පැමිණියෝය. ඔවුන්ව එවා තිබුණේ නායක පූජකයන්, නීතිය පිටපත් කරන්නන් හා වැඩිමහල්ලන්ය.+ 44  ඔහුව පාවා දෙන්නා ඔහුව අල්ලාගැනීම සඳහා ඔවුන්ට කලින්ම ලකුණක් දී තිබිණ. ඔහු ඔවුන්ට කියා තිබුණේ, “මම ඔහුව සිඹගන්නවා. එවිට ඔබට ඔහුව හඳුනාගත හැකියි. ඉන්පසු ඔහුව අත්අඩංගුවට ගෙන රැගෙන යන්න” කියායි.+ 45  ඔහු කෙළින්ම යේසුස් ළඟට ගොස්, “ගුරුතුමනි”* කියා මහත් ආදරයක් මවාපාමින් ඔහුව සිඹගත්තේය.+ 46  එවිට ඔවුහු යේසුස්ව අත්අඩංගුවට ගත්හ.+ 47  නමුත් එතැන සිටගෙන සිටි කෙනෙක් තම කඩුව ඉවතට ගෙන උත්තම පූජකයාගේ දාසයාට පහර දුන්නේය. එවිට ඒ දාසයාගේ කන කැපී ගියේය.+ 48  යේසුස් ඔවුන්ට මෙසේ කීවේය. “ඔබ කඩු මුගුරු රැගෙන මාව අත්අඩංගුවට ගන්න ආවේ මා සොරෙක් කියා හිතාගෙනද?+ 49  මම හැමදාම දේවමාලිගාවේ උගන්වමින්+ සිටියා නේද? නමුත් ඔබ මාව අත්අඩංගුවට ගත්තේ නැහැ. මේ සියල්ල මෙසේ සිදු වුණේ ශුද්ධ ලියවිල්ලේ+ සඳහන් කළ දේ ඉටු වීම සඳහායි.”+ 50  එවිට සියලුදෙනා ඔහුව අත්හැර+ පලා ගියහ.+ 51  නමුත් අනර්ඝ ලිනන් වස්ත්‍රයක් ඇඳ සිටි එක්තරා තරුණයෙක් යේසුස්ට නුදුරින් ඔහු පසුපස ගියේය. ඔවුන් එම තරුණයාව අල්ලාගන්න උත්සාහ කළ විට,+ 52  ඔහු තම ලිනන් වස්ත්‍රය අත්හැර පලා ගියේය. 53  ඔවුහු යේසුස්ව උත්තම පූජකයා ළඟට ගෙන ගියහ. ඒ අවස්ථාවේදී සියලු නායක පූජකයෝ, වැඩිමහල්ලෝ සහ නීතිය පිටපත් කරන්නෝ එහි රැස්ව සිටියෝය.+ 54  පේතෘස් උත්තම පූජකයාගේ නිවසේ ඇතුල් මළුව දක්වා යේසුස්ට පිටුපසින් තරමක දුරකින් ගියේය.+ පසුව ඔහු ඇතුල් මළුවේදී නිවසේ සේවකයන් සමඟ ගිනිමැලයක් ඉදිරියෙහි ඉඳගෙන ගිනි තපිමින් සිටියේය. 55  මේ අතර යේසුස්ව මරණයට පත් කිරීම සඳහා+ නායක පූජකයෝද මුළු මන්ත්‍රණ සභාවද* ඔහුට විරුද්ධව සාක්ෂි සොයමින් සිටියෝය. නමුත් කිසිම සාක්ෂියක් සොයාගැනීමට ඔවුන්ට නොහැකි විය.+ 56  බොහෝදෙනෙකු ඔහුට විරුද්ධව බොරු සාක්ෂි දුන්නත්+ ඔවුන්ගේ සාක්ෂි අතර කිසි එකඟතාවක් තිබුණේ නැත.+ 57  සමහරු නැඟිට ඔහුට විරුද්ධව බොරු සාක්ෂි දෙමින් මෙසේ පැවසූහ. 58  “අපට ඇහුණා ඔහු මෙහෙම කියනවා. ‘අතින් සෑදූ මෙම දේවමාලිගාව කඩා දමා, අතින් නොසෑදූ වෙන එකක් දවස් තුනකින් මම ගොඩනඟනවා.’”+ 59  නමුත් මේ සම්බන්ධයෙන්ද ඔවුන් දුන් සාක්ෂි අතර කිසිම එකඟතාවක් තිබුණේ නැත. 60  එවිට උත්තම පූජකයා නැඟිට, “ඔබ කිසි පිළිතුරක් දෙන්නේ නැද්ද? මොවුන් ඔබට විරුද්ධව දෙන මේ සාක්ෂි ඔබට ඇහෙනවාද”+ කියා යේසුස්ගෙන් ඇසුවේය. 61  නමුත් යේසුස් කිසි පිළිතුරක් නොදී නිහඬව සිටියේය.+ එහෙයින් උත්තම පූජකයා නැවතත්, “ඔබ ශුද්ධ දෙවිගේ පුත් ක්‍රිස්තුස්ද”+ කියා ඔහුගෙන් ඇසුවේය. 62  එවිට යේසුස්, “ඒ මම තමයි. මනුෂ්‍ය පුත්‍රයා+ බලවත් තැනැත්තාණන්ගේ දකුණු පැත්තේ ඉඳගෙන සිටින ආකාරයත්+ ආකාශයේ වලාකුළු සහිතව එන ආකාරයත්+ ඔබට දකින්න ලැබෙයි” කියා කීවේය. 63  එය අසා උත්තම පූජකයා තම ඇතුල් වස්ත්‍ර ඉරාගනිමින්+ මෙසේ කීවේය. “අපට සාක්ෂිකාරයන් තවත් අවශ්‍ය නැහැ.+ 64  ඔහු කළ දේවඅපහාසය+ ඔබට දැන් ඇහුණා. එයින් ඔබට පැහැදිලි වන්නේ කුමක්ද?” එවිට සියලුදෙනාම ඔහුට මරණ දණ්ඩනය නියම කළ යුතුයි කියා කීවෝය. 65  සමහරු ඔහුට කෙළ ගසන්න+ පටන්ගත් අතර ඔහුගේ මුහුණ සම්පූර්ණයෙන්ම වසා අත් මිටමොළවා ඔහුට පහර දී, “ඔබ අනාගතවක්තෘවරයෙක් කියලා ඔප්පු කර පෙන්වන්න” කියා පැවසූහ. පසුව අධිකරණයේ සේවකයෝද ඔහුගේ කම්මුලට පහර දෙමින් ඔහුව ගෙන ගියහ.+ 66  මේ අතරේ පේතෘස් මළුවෙහි සිටියේය. උත්තම පූජකයාගේ එක් සේවිකාවක් ඇවිත්,+ 67  පේතෘස් ගිනි තපිමින් සිටිනවා දැක ඔහු දෙස හොඳින් බලා, “ඔබත් නාසරෙත් නුවරින් පැමිණි යේසුස් සමඟ සිටියා නේද”+ කියා ඇසුවාය. 68  එවිට ඔහු එය ප්‍රතික්ෂේප කරමින්, “ඔබ මොනව කියනවාද කියලා මම නම් දන්නේ නැහැ. මම ඔහුව හඳුනන්නෙත් නැහැ” කියා පවසා පිටතට ගොස් දොරටුව අසල සිටියේය.+ 69  එතැනදීද ඒ සේවිකාව ඔහුව දැක, “මොහු ඔවුන්ගෙන් කෙනෙක්”+ කියා ඒ අසල සිටි අයට නැවතත් කිව්වාය. 70  ඔහු නැවත වරක් එය ප්‍රතික්ෂේප කළේය. මද වේලාවකට පසු ඔහු අසල සිටගෙන සිටි අය, “ඇත්තෙන්ම ඔබ ඔවුන්ගෙන් එක් කෙනෙක් විය යුතුයි. ඔබ ගලීලයේ වැසියෙක් නේද”+ කියා පේතෘස්ගෙන් ඇසුවෝය. 71  නමුත් ඔහු තමාටම ශාප කරමින්, “ඔබ කියන මේ මිනිසාව මම හඳුනන්නේවත් නැහැ”+ කියා දිවුරා පැවසුවේය.+ 72  ඒ මොහොතේදීම කුකුළෙක් දෙවෙනි වරටත් හැඬලුවේය.+ “කුකුළෙකු දෙවතාවක් හඬලන්න කලින් ඔබ මාව හඳුනන්නේ නැහැ කියා තුන් වතාවක් කියනවා”+ කියා යේසුස් පැවසූ දේ එවිට පේතෘස්ට මතක් විය. එයින් ඇති වූ ශෝකය දරාගත නොහැකිව ඔහු බොහෝ සෙයින් හැඬුවේය.+

පාදසටහන්

සුවඳවත් අල සහිත ශාකයකින් සාදනු ලබන සුවඳවත් තෙලක්.
මාක් 6:37හි පාදසටහන බලන්න.
මෙය අලුත් ගිවිසුමකි.
මතෙ 26:39හි පාදසටහන බලන්න.
එනම්, රබ්බි.
එනම්, යුදෙව් සැන්හෙඩ්‍රින සභාව.