මලාකි 2:1-17

2  “පූජකයෙනි, මා මේ අවවාදය දෙන්නේ ඔබටයි.+  ඔබ දැන් මා කියන දේ සිතට ගෙන+ මාගේ නාමයට ප්‍රශංසාව ගෙන දෙන අයුරින් කටයුතු කිරීමට අදිටන් කරගන්න.+ ඔබ එසේ නොකළොත්+ ඔබ පිටට ශාපයක් පැමිණෙනු ඇත.+ ඔබ සෙනඟට ආශීර්වාද කළත් එය ශාපයක් බවට හැරෙනු ඇත.*+ මා කියන දේ ඔබ හිතට නොගත් නිසා දැනටමත් ඒ දේ සිදු වී ඇත” කියා ස්වර්ගයේ සේනාවල අධිපති වන යෙහෝවා දෙවි පවසන්නේය.  “ඔබ වැපුරූ බීජ සියල්ල නාස්ති වී යෑමට මම සලස්වන්නෙමි.+ උත්සවවලදී ඔප්පු කිරීමට ගෙනෙන සතුන්ගේ අසූචි මම ඔබේ මුහුණටම විසි කරන්නෙමි. ඉන්පසු ඔබවත් අසූචි ගොඩගසා තිබෙන ස්ථානයට ගෙන යනු ලබන්නේය.  ඔබට මේ අවවාදය දෙන්නේ,+ ලෙවී සමඟ මා ඇති කරගත් ගිවිසුම+ අවසන් වෙනවා දකින්න මා අකමැති නිසයි”+ කියා ස්වර්ගයේ සේනාවල අධිපති වන යෙහෝවා දෙවි පවසන්නේය.  “මා ඔහු සමඟ ඇති කරගත් ඒ ගිවිසුම මගින් ඔහුගේ ජීවිතය රැකුණේය. ඔහුට සමාදානයෙන් ජීවත් වීමටද හැකි විය.+ ඔහුට ලැබුණු ඒ ආශීර්වාද නිසා මා කෙරෙහි ගරුබියක් ඇතුව ජීවත් වීමට ඔහු පෙලඹුණේය.+ ඔහු මාගේ නාමයට ගරු කළ නිසා මාව අසතුටට පත් කිරීමට අකමැති විය.+  ඔහු සත්‍යය ඉගැන්වීමට ඇපකැප වී සිටියේය.+ ඔහුගේ මුවින් කිසිවිටෙක දුෂ්ට දේ නික්මුණේ නැත. ඔහු අවංකකමින් ක්‍රියා කරමින් මා සමඟ කිට්ටු බැඳීමක් පවත්වාගත්තේය.+ වැරදි මාර්ගයෙන් ඉවතට එන්න ඔහු බොහෝදෙනෙකුට උපකාර කළේය.+  දෙවි පිළිබඳ දැනුම සෙනඟට ලබා දීම පූජකයන් සතු වගකීමකි. නීතිය පැහැදිලි කර දීම ඔවුන්ගේ යුතුකමය.+ මන්ද ඔවුහු ස්වර්ගයේ සේනාවල අධිපති වූ යෙහෝවා දෙවි වන මාගේ පණිවිඩකරුවෝය.+  “නමුත් පූජකයෙනි, ඔබ මාව අත්හැර ගොස් ඇත.+ ඔබ නීතිය නිසි ලෙස පහදා නොදුන් නිසා බොහෝදෙනෙක් වැරදි මාර්ගයේ ගොස් ඇත.+ මා ලෙවී සමඟ ඇති කරගත් ගිවිසුම ඔබ කඩ කළහුය”+ කියා ස්වර්ගයේ සේනාවල අධිපති වන යෙහෝවා දෙවි පවසන්නේය.  “ඔබ මට ඇහුම්කන් නොදී, නීතිය සාධාරණව ඉටු නොකර පැති ගත්තහුය.+ ඒ නිසා සියල්ලන් ඉදිරියේ මම ඔබව නින්දාවට පත් කරන්නෙමි. ඔවුහු ඔබව සුළු කොට සලකනු ඇත.”+ 10  “අප සියලුදෙනාටම සිටින්නේ එක පියෙක් නොවෙයිද?+ අප සියලුදෙනාවම සෑදුවේ එකම දෙවි කෙනෙක් නොවෙයිද?+ එසේනම්, අප එකිනෙකාට ද්‍රෝහිකම් කරමින්+ අපේ මුතුන්මිත්තන් සමඟ දෙවි ඇති කරගත් ගිවිසුමට විරුද්ධව කටයුතු කරන්නේ ඇයි?+ 11  යූදා වැසියෝ ද්‍රෝහිකම් කර ඇත. ඊශ්‍රායෙල් දේශයේ හා යෙරුසලමේ වැසියෝ නින්දිත ලෙස හැසිරෙන්නෝය.+ ඔවුහු වෙනත් දෙවිවරුන්ට නමස්කාර කරන ස්ත්‍රීන්ව විවාහ කරගෙන+ ශුද්ධකමට ප්‍රිය කරන යෙහෝවා දෙවිට නින්දා කළෝය.*+ 12  යෙහෝවා දෙවි එලෙස හැසිරෙන සියලුදෙනාවම විනාශ කර දමන්නේය.+ ඒ වරද කරන තැනැත්තා කවුරු වුණත්* ඔහුව යාකොබ්ගේ වාසස්ථානයෙන් පන්නා දමන්නේය. ස්වර්ගයේ සේනාවල අධිපති වන යෙහෝවා දෙවිට පූජා ඔප්පු කරන තැනැත්තාව පවා දෙවි විනාශ කර දමන්නේය.”+ 13  “ඔබ තවත් වරදක් කරන්නහුය. ඒ වරද නිසා යෙහෝවා දෙවිගේ පූජාසනය කඳුළුවලින් තෙත් වී ඇත. සුසුම්ලමින් හඬා වැලපෙන අයගේ ශබ්දය ඒ ස්ථානයෙන් ඇසෙන්නේය. ඒ වරද නිසා ඔබ ඔප්පු කරන කිසිම පූජාවක් තවදුරටත් දෙවි පිළිගන්නේ නැත.+ 14  නමුත්, ‘අප කරන වරද කුමක්ද’ කියා ඔබ අසන්නහුය.+ ඔබ තරුණ කාලයේදී විවාහ කරගත් බිරිඳට ද්‍රෝහි වී ඇත.+ ඔබ ඇයව සහකාරියක ලෙස තෝරාගෙන මුළු ජීවිත කාලය පුරාවටම ඇය සමඟ සිටින්න ගිවිසගත්තා නොවෙයිද?+ නමුත් ඔබ ඒ ගිවිසුම කඩ කළ බවට යෙහෝවා දෙවි ඔබට විරුද්ධව සාක්ෂි දෙන්නේය. 15  ඒ වරද නොකිරීමට අදිටන් කරගත් ටිකදෙනෙක් ඔබ අතරේ සිටිති. ඔවුන් එසේ කරන්නේ, දෙවිට අවංකව සේවය කරන දරුවන්*+ බිහි කිරීමට ඇති ආශාව නිසාය. ඒ අය තවමත් දෙවිගේ බලයේ මඟ පෙන්වීමට අනුව ක්‍රියා කරන්නෝය. දැන් ඔබත් ඔබේ සිත් සෝදිසි කර ඔබේ ආකල්ප නිවැරදි කරගන්න.+ තරුණ කාලයේදී ඔබ විවාහ කරගත් බිරිඳට ද්‍රෝහි නොවී සිටීමට අදිටන් කරගන්න.+ 16  මන්ද ඊශ්‍රායෙල්වරුන්ගේ දෙවි වන යෙහෝවා මෙසේ පවසන්නේය. “මම, දික්කසාද වීම හෙළාදකින්නෙමි.+ දුෂ්ටකම් කරන තැනැත්තාවද* මම හෙළාදකින්නෙමි.”+ එසේ පවසන්නේ ස්වර්ගයේ සේනාවල අධිපති වන යෙහෝවා දෙවිය. “එබැවින් ඔබේ සිත සෝදිසි කර ඔබේ ආකල්ප නිවැරදි කරගන්න. ඔබේ බිරිඳට ද්‍රෝහි නොවී සිටීමට අදිටන් කරගන්න.+ 17  “ඔබ පවසන දේවල් නිසා යෙහෝවා දෙවි ඔබ ගැන කලකිරීමට පත්ව ඇත.+ නමුත්, ‘දෙවිට එලෙස හැඟෙන්න අපි පැවසුවේ මොනවද’ කියා ඔබ ඇසුවහුය. දෙවි ඔබ ගැන කලකිරී සිටින්නේ ඔබ මෙසේ කියන නිසාය. ‘යෙහෝවා දෙවි දුෂ්ටකම් කරන අයව සලකන්නේ ධර්මිෂ්ඨයන් ලෙසයි. දෙවි ප්‍රේම කරන්නේ එවැනි අයටයි.+ යුක්තිය ඉටු කරන දෙවි කෙනෙක් ඇත්තටම නැහැ.’”+

පාදසටහන්

හෝ, “ඔබ ආශීර්වාද වෙනුවට ශාප අද්දකිනු ඇත.”
“යෙහෝවා දෙවිගේ ශුද්ධකම සුළු කළෝය” යන අදහසද මුල් භාෂාවේ ඇතුළත් කර තිබේ.
මූ.අ.,“අවදිව සිටින තැනැත්තාවද උත්තර දෙන තැනැත්තාවද.”
මූ.අ., “දෙවිගෙන් පැවතෙන තැනැත්තා.”
මූ.අ., “දුෂ්ටකම වස්ත්‍රයක් සේ පැළද සිටින තැනැත්තාවද.”