මතෙව් 27:1-66

27  ඊළඟ උදෑසන සියලු නායක පූජකයෝද ජනතාව අතර සිටි වැඩිමහල්ලෝද යේසුස්ව මරණයට පත් කරන ආකාරය ගැන සාකච්ඡා පැවැත්වූහ.+  ඔවුහු ඔහුව බැඳ ආණ්ඩුකාරයා වූ පිලාත් වෙතට ගෙන ගොස් භාර දුන්හ.+  එවිට ඔහුව පාවා දුන් යූදස් යේසුස්ව මරණයට නියම කර ඇති බව දැක බලවත් සේ තැවී, තමා ලබාගත් රිදී කාසි තිහ+ නායක පූජකයන්ටද වැඩිමහල්ලන්ටද නැවත දීමට ගෙනැවිත්,  “මා කර තිබෙන්නේ පාපයක්! මා පාවා දුන්නේ ධර්මිෂ්ඨ කෙනෙක්ව”*+ කියා කීවේය. ඔවුහු, “ඉතින් එයින් අපට ඇති පලේ මොකක්ද? ඒක ඔබේ ප්‍රශ්නයක්”+ කියා කීවෝය.  එහෙයින් ඔහු රිදී කාසි ටික දේවමාලිගාව ඇතුළට විසි කර එතැනින් අහක්ව ගොස් එල්ලී මැරුණේය.+  නායක පූජකයෝ රිදී කාසි ටික ගෙන, “මේ මුදල් මිනී මැරුමකට ගෙවූ කුලියක්* වන නිසා ඒවා පරිශුද්ධ භාණ්ඩාගාරයට දැමීම සුදුසු නැහැ” කියා කීවෝය.  පසුව ඔවුහු ඒ ගැන සාකච්ඡා කර විදේශිකයන්ව භූමදාන කිරීම සඳහා කුඹල්කරුගේ පිට්ටනිය එයින් මිල දී ගත්හ.  එහෙයින් අද දක්වා ඒ පිට්ටනියට “ලේ පිට්ටනිය”+ යයි කියනු ලැබේ.  එවිට අනාගතවක්තෘ යෙරෙමියා* මාර්ගයෙන් කියන ලද මේ දේ ඉටු විය. එනම්, “ඊශ්‍රායෙල්වරුන් අතරෙන් සමහරෙක් ඔහු වෙනුවෙන් නියම කළ මුදල වූ රිදී කාසි තිහ ගෙන,+ 10  කුඹල්කරුගේ+ පිට්ටනිය සඳහා දුන්නෝය. එය සිදු වූයේ යෙහෝවා දෙවි මට නියම කළ පරිදිය.” 11  යේසුස්, ආණ්ඩුකාරයා ඉදිරියෙහි පෙනී සිටියේය. ආණ්ඩුකාරයාද, “ඔබ යුදෙව්වරුන්ගේ රජද”+ කියා ඔහුගෙන් ඇසුවේය. “එයට පිළිතුර ඔබේ ප්‍රශ්නයෙන්ම පැහැදිලියි”+ කියා යේසුස් පිළිතුරු දුන්නේය. 12  නමුත් නායක පූජකයන්ද වැඩිමහල්ලන්ද ඔහුට විරුද්ධව චෝදනා නඟමින් සිටියදී+ ඔහු කිසි පිළිතුරක් දුන්නේ නැත.+ 13  එවිට පිලාත්, “ඔබට විරුද්ධව ඔවුන් කොපමණ චෝදනා නඟනවාද කියා ඔබට ඇසෙනවාද”+ යයි ඇසුවේය. 14  නමුත් ඔහු එක වචනයකින්වත් පිළිතුරු දුන්නේ නැත. එහෙයින් ආණ්ඩුකාරයා බොහෝ සෙයින් පුදුම විය.+ 15  සාමාන්‍යයෙන් සෑම උත්සවයකදීම සෙනඟට කැමති සිරකරුවෙකුව ආණ්ඩුකාරයා විසින් නිදහස් කර දීමේ සිරිතක් තිබිණ.+ 16  මෙම කාලයේදීම අපරාධකරුවෙකු ලෙස ප්‍රසිද්ධ වූ බරබ්බස් නමැති කෙනෙක් සිරභාරයේ සිටියේය.+ 17  එහෙයින් සෙනඟ රැස්ව සිටියදී පිලාත් ඔවුන්ගෙන් මෙසේ ඇසුවේය. “ඔබ කැමති මා කවුරු නිදහස් කර දෙනවාටද? බරබ්බස්වද නැත්නම් ක්‍රිස්තුස් ලෙස හඳුන්වන යේසුස්වද?”+ 18  ඔහු එවැනි දෙයක් ඇසුවේ යේසුස්ව ඔවුන් පාවා දුන්නේ ඔහු ගැන ඔවුන්ට තිබූ ඊර්ෂ්‍යාව නිසා+ බව ඔහු තේරුම්ගෙන සිටි නිසාය.+ 19  මීට අමතරව ඔහු විනිශ්චයාසනයෙහි ඉඳගෙන සිටියදී ඔහුගේ බිරිඳ ඔහුට පණිවිඩයක් එවමින් මේ දේ පැවසුවාය. “ඒ ධර්මිෂ්ඨ+ මිනිසා සම්බන්ධ කාරණයට කොහොමටවත් හවුල් වෙන්න එපා. මම මේ දේ කියන්නේ මා සිහිනයක්+ දුටු නිසයි. එය මගේ හිතට හුඟක් වධ දෙනවා.” 20  නමුත් නායක පූජකයෝද වැඩිමහල්ලෝද බරබ්බස්ව+ නිදහස් කරන ලෙස ඉල්ලන්නත් යේසුස්ව මරන්නත් සෙනඟව කැමති කරවාගත්හ. 21  ඉන්පසු ආණ්ඩුකාරයා, “ඔබ කැමති වන්නේ මේ දෙදෙනාගෙන් මා කවුරු නිදහස් කරනවාටද” කියා ඔවුන්ගෙන් ඇසුවේය. “බරබ්බස්ව නිදහස් කරන්න”+ කියා ඔවුහු කීවෝය. 22  එවිට පිලාත්, “එසේනම් ක්‍රිස්තුස් ලෙස හඳුන්වන යේසුස්ට මම මොනවාද කරන්නේ” කියා ඔවුන්ගෙන් ඇසුවේය. “ඔහුව කණුවක ඇණ ගසා මරන්න”+ කියා ඔවුහු එක හඬින් කීවෝය. 23  එවිට ඔහු, “ඒ ඇයි? ඔහු කළ වරද මොකක්ද” කියා ඇසුවේය. එසේවුවත්, “ඔහුව කණුවක ඇණ ගසා මරන්න” කියා කියමින් ඔවුහු තව තවත් කෑගැසූහ.+ 24  තමාගේ උත්සාහයෙන් කිසි පලක් නැති බවත් කෝලහලයක් ඇති වන බවත් දුටු පිලාත්, වතුර ගෙන+ සෙනඟ ඉදිරියෙහි තම දෑත් සෝදමින්, “මේ මිනිසාගේ මරණයට* මම නම් වග කියන්නේ නැහැ. එයට වග කිව යුත්තේ ඔබයි” කියා කීවේය. 25  එවිට ඒ සියලුදෙනාම, “ඔහුගේ මරණයේ වගකීම අපිත් අපේ දරුවනුත් භාරගන්න සූදානම්”+ කියා පිළිතුරු දුන්නෝය. 26  එවිට ඔහු බරබ්බස්ව ඔවුන්ට නිදහස් කර දුන්නේය. නමුත් ඔහු යේසුස්ට කසයෙන් තළන්න+ කියා අණ කර ඔහුව කණුවක ඇණ ගසා මරණයට පත් කිරීම සඳහා භාර දුන්නේය.+ 27  එවිට ආණ්ඩුකාරයාගේ හේවායෝ යේසුස්ව ආණ්ඩුකාරයාගේ මාලිගාවට ගෙන ගියෝය. එහිදී සියලුම හේවායෝ ඔහු වටා එක් රොක් වූහ.+ 28  ඔවුහු යේසුස්ගේ පිට වස්ත්‍ර ගලවා දමා තද රතු පාට සළුවක්+ ඔහුට පැළඳෙව්වෝය. 29  කටු අතුවලින් ඔටුන්නක් සාදා ඔහුගේ හිස මත දැමූ ඔවුහු, ඔහුගේ දකුණු අතට බට දණ්ඩක්ද දුන්හ. ඔවුහු යේසුස් ඉදිරියෙහි දණ ගසා කවටකම් කරමින්,+ “යුදෙව්වරුන්ගේ රජ්ජුරුවෙනි, ඔබට සුබ දවසක් වේවා” කියා කීවෝය.+ 30  ඔවුහු ඔහුට කෙළ ගසා+ ඔහුගේ අතේ තිබූ බට දණ්ඩ ගෙන ඔහුගේ හිසට පහර දෙන්න පටන්ගත්හ. 31  එසේ කවටකම් කළ පසු+ ඔවුහු ඔහුගේ සළුව ගලවා ඔහුගේම පිට වස්ත්‍ර ඔහුට අන්දවා ඔහුව කණුවක ඇණ ගැසීම සඳහා ගෙන ගියහ.+ 32  ඔවුන් පිටත්ව යද්දී සිරේනිය නම් නුවරේ උපන් සීමොන් නමැති තැනැත්තෙකු+ ඔවුන්ට හමු විය. යේසුස්ගේ වධකණුව උසුලාගෙන යෑමට ඔවුහු ඔහුට බල කළෝය. 33  ඔවුහු හිස්කබල නම් අර්ථය ඇති ගොල්ගොතා+ නම් ස්ථානයට පැමිණි විට, 34  තිත්ත යමක්*+ මිශ්‍ර කළ වයින් ඔහුට බොන්න දුන්හ. නමුත් ඔහුට එහි රස දැනුණු විට ඔහු එය ප්‍රතික්ෂේප කළේය.+ 35  ඔහුව කණුවේ ඇණ ගැසීමෙන් පසු+ ඔවුහු දාදු දමා+ ඔහුගේ පිට වස්ත්‍ර තමන් අතරේ බෙදාගත්හ.+ 36  ඔවුහු එහි ඉඳගෙන ඔහුව මුර කළහ. 37  එමෙන්ම, “මේ යුදෙව්වරුන්ගේ රජ වන යේසුස්ය”+ කියා ඔහුට විරුද්ධව කළ චෝදනාව ලියා ඔහුගේ හිසට ඉහළින් තැබූහ. 38  මේ අතර කොල්ලකරුවන් දෙදෙනෙකුව ඔහුගේ දෙපැත්තේ කණුවල එල්ලන ලදි. එක් කෙනෙකු සිටියේ ඔහුගේ දකුණු පැත්තෙහිය. අනික් තැනැත්තා සිටියේ ඔහුගේ වම් පැත්තෙහිය.+ 39  මඟ යන එන අය තම හිස් වනවනා+ ඔහුට නින්දා කරමින්,+ 40  “දේවමාලිගාව කඩා දමා දවස් තුනකින් ගොඩනඟන බව ඔබ පැවසුවා නේද?+ ඉතින්, ඇයි බැරි ඔතනින් ගැලවෙන්න. ඔබ දෙවිගේ පුත්‍රයෙක් නම් වධකණුවෙන් බහින්න”+ කියා කීවෝය. 41  එලෙසම නායක පූජකයෝ, නීතිය පිටපත් කරන්නන් හා වැඩිමහල්ලන් සමඟ එකතු වී ඔහුට කවටකම් කරමින් මෙසේ කීවෝය.+ 42  “ඔහු අනුන්ව ගලවාගත්තා. නමුත් තමන්ව ගලවාගන්න ඔහුට බැහැ. ඔහු ඊශ්‍රායෙලයෙහි රජු නේද?+ ඉතින් ඔහු දැන් වධකණුවෙන් බැස ආවොත් නම් අපි අනිවාර්යයෙන්ම ඔහුව විශ්වාස කරනවා.+ 43  ‘මම දෙවිගේ පුත්‍රයා’+ කියා ඔහු කිව්වා නේද? ඔහුට දෙවි ගැන මහත් විශ්වාසයක් තිබෙනවා. ඉතින් දෙවි කැමති නම් දෙවිට පුළුවන්නේ ඔහුව බේරාගන්න.”+ 44  ඔහු සමඟ කණුවල එල්ලන ලද කොල්ලකරුවෝ පවා ඒ ආකාරයෙන්ම ඔහුට නිග්‍රහ කරන්න පටන්ගත්හ.+ 45  මේ අතර හයවෙනි පැයේ පටන් නවවෙනි පැය* දක්වා+ මුළු පොළොවම අන්ධකාරයෙන් වැසී ගියේය.+ 46  නවවෙනි පැයේදී පමණ යේසුස්, “ඒලී, ඒලී, ලාමා සබක්තානි” කියා මහත් හඬකින් පැවසුවේය. එනම්, “මගේ දෙවියනි, මගේ දෙවියනි, ඔබ මාව අත්හැරියේ ඇයි”+ කියා ඔහු මහත් හඬකින් පැවසුවේය. 47  එහි සිටගෙන සිටි අයගෙන් සමහරෙක් ඒ වචන අසා, “ඔහු එලියාට අඬගසනවා”+ කියා පැවසූහ. 48  එවිට ඔවුන්ගෙන් එක් කෙනෙක් ඉක්මනින් දුව ගොස් ස්පොන්ජියක් හා සමාන දෙයක් ගෙන එය ඇඹුල්+ වයින්වල පොඟවා බට දණ්ඩක ගසා ඔහුට බොන්න දුන්නේය.+ 49  නමුත් සෙසු අය, “ඔහුට ඉන්න හරින්න! ඔහුව ගලවාගන්න එලියා එයිද කියා බලමු” කියා කීවෝය.+ [[තවත් මිනිසෙක් හෙල්ලයක් ගෙන ඔහුගේ ළයට පහළින් පිහිටි පෙදෙසට ඇන්නේය. එවිට ලේත් වතුරත් පිටතට ගලා ආවේය.]]+ 50  නැවතත් යේසුස් මහත් හඬකින් කෑගසා අවසන් හුස්ම හෙළුවේය.+ 51  එවිට ශුද්ධස්ථානයේ තිරය+ ඉහළ පටන් පහළ දක්වා දෙපළු වී ගියේය.+ පොළොව දෙදරුම් කෑවේය. පර්වතද පැළී ගියේය.+ 52  ඒ සමඟම සොහොන් ගෙවල් විවර වී, සැතපී සිටි ශුද්ධ තැනැත්තන්ගේ දේහයන් බොහොමයක් පිටතට විසි විය. 53  එය බොහෝදෙනෙකුට දැකගත හැකි විය. (ඔහුව මරණයෙන් නැඟිටුවනු ලැබූ පසු සොහොන් ගෙවල් අතරට ගිය අය ශුද්ධ නුවරට+ ඇතුල් වූහ.*) 54  හමුදා නිලධාරියා සහ ඔහු සමඟ යේසුස්ව මුර කරමින් සිටි අය භූමිකම්පාවද සිදු වූ දේවල්ද දැක මහත් බියකින්, “ඇත්තෙන්ම මේ දෙවිගේ පුත්‍රයා” කියා කීවෝය.+ 55  යේසුස්ට උපකාර කිරීම සඳහා ගලීලයේ සිට ඔහු සමඟ පැමිණි බොහෝ ස්ත්‍රීහු+ දුරින් ඉඳ සියල්ල බලා සිටියහ.+ 56  ඔවුන් අතරෙහි මරියා මග්දලේනාද යාකොබ් සහ යෝසෙස්ගේ මව වූ මරියාද සෙබදීගේ පුත්‍රයන්ගේ මවද සිටියෝය.+ 57  සවස් වූ විට අරිමාතිය නම් නුවරේ විසූ ධනවතෙකු වූ යෝසෙප් නම් මිනිසෙක් ආවේය. ඔහුද යේසුස්ගේ ගෝලයෙකි.+ 58  ඔහු පිලාත් ළඟට ගොස් යේසුස්ගේ දේහය භාරගැනීමට අවසර ඉල්ලුවේය.+ එවිට පිලාත් එය ඔහුට භාර දෙන්න අණ කළේය.+ 59  දේහය ගෙන පිරිසිදු අනර්ඝ ලිනන් රෙදිවලින් එතූ+ යෝසෙප්, 60  පර්වතයක කපා තිබුණු ඔහුටම අයත් අලුත් සොහොන් ගෙයක එය තැන්පත් කළේය.+ ඉන්පසු ඔහු එහි දොරකඩ වැසෙන සේ විශාල ගලක් පෙරළා තබා ගියේය.+ 61  නමුත් මරියා මග්දලේනා සහ මරියා යන නමින් හැඳින්වූ අනික් ස්ත්‍රියද සොහොන් ගෙය ඉදිරිපිට දිගටම ඉඳගෙන සිටියහ.+ 62  සූදානම් වීමේ දවසට*+ පසු දින නායක පූජකයෝද පරිසිවරුද පිලාත් ඉදිරියෙහි රැස් වී, 63  මෙසේ කීවෝය. “උතුමාණෙනි, ඒ ප්‍රෝඩාකාරයා ජීවත්ව සිටියදී, ‘දවස් තුනකට පසු+ මාව මරණයෙන් නැඟිටුවනු ලබනවා’ කියා පැවසූ බව අපට මතක් වුණා. 64  එමනිසා තුන්වෙනි දවස දක්වා සොහොන් ගෙය ආරක්ෂා කරන ලෙස අණ කරන්න. නැතහොත් සමහරවිට ඔහුගේ ගෝලයන් ඇවිත් ඔහුගේ දේහය සොරාගෙන ගොස්,+ ‘ඔහුව මරණයෙන් නැඟිටුවනු ලැබුවා’ කියා ජනයාට කියන්න පුළුවන්. එවිට මේ අවසන් වංචාව මුලින් සිදු වූ වංචාවටත් වඩා දරුණු වෙයි.” 65  පිලාත්ද, “ඔබට මුරකරුවන් සිටිනවා නේද?+ ඉතින්, ගොස් ඔබට පුළුවන් විදිහට සොහොන ආරක්ෂා කරගන්න” කියා කීවේය. 66  එහෙයින් ඔවුහු ගොස් ගල මුද්‍රා කර,+ මුරකරුවන් ලවා සොහොන් ගෙය මුර කිරීමට පියවර ගත්තෝය.

පාදසටහන්

මූ.අ., “ධර්මිෂ්ඨ ලේ.”
මූ.අ., “ලේ වැගිරවීමට ගෙවූ මුදලක්.”
මෙම වචන සෙක 11:12, 13න් රැගෙන තිබේ. මතෙව්ගේ කාලයේදී අනාවැකි පොත් සමූහයේ මුලින්ම තැබුවේ යෙරෙමියා පොතයි. එමනිසා “යෙරෙමියා” යන නම සෙකරියා ඇතුළුව සියලුම අනාවැකි පොත් සඳහා භාවිත කළ පොදු නමක් විය හැකියි. ලූක් 24:44 බලන්න.
මූ.අ., “ලේවලට.”
ශාකයකින් ලබාගත් තිත්ත, මත් කරවනසුලු ද්‍රව්‍යයක් විය හැකියි.
එනම්, දහවල් 12 සිට ප.ව. 3 දක්වා.
පෙනෙන විදිහට ඔවුන් එසේ ඇතුල් වූයේ තමන් දුටු දේ දැන්වීමටය.
සතිපතා පවත්වන සබත් දිනයට කලින් දිනය. යුදෙව්වන් සබත් දිනට සූදානම් වූයේ එම දිනයේදීය.