මතෙව් 24:1-51

24  යේසුස් දේවමාලිගාවෙන් පිටත්ව යද්දී ඔහුගේ ගෝලයෝ ඔහු ළඟට ඇවිත් දේවමාලිගාවට අයත් ගොඩනැඟිලි පෙන්වමින්+ ඒවා ගැන කතා කරන්න පටන්ගත්තෝය.  යේසුස් ඔවුන්ට මෙසේ කීවේය. “ඔබට මේ සියල්ල පේනවා නේද? ඇත්තෙන්ම මා ඔබට කියන්නේ, මෙහි සෑම ගලක්ම බිමට හෙළනු ලබන බවයි.”+  ඔහු ඔලීව කන්දේ එක් තැනක වාඩි වී සිටියදී ගෝලයෝ ඔහුව තනිව හමු වී ඔහුගෙන් මෙසේ ඇසුවෝය. “ඔබ පැවසූ ඒ දේ සිදු වන්නේ කවදාද? ඔබ පැමිණ සිටින කාලය*+ හා පවතින සමාජයේ අවසාන කාල පරිච්ඡේදය+ දැනගන්න කුමක් හෝ ලකුණක් තිබෙනවාද?”  එවිට යේසුස් ඔවුන්ට මෙසේ පිළිතුරු දුන්නේය. “ඔබව නොමඟ යවන්න කිසිම කෙනෙකුට ඉඩ නොදෙන්න.+  මන්ද, ‘මම ක්‍රිස්තුස්’ කියා කියමින් බොහෝදෙනෙක් මගේ නාමයෙන් ඇවිත් බොහෝදෙනෙකුව නොමඟ යවයි.+  ඔබට යුද්ධ ගැනත් යුද්ධ පිළිබඳ ආරංචි ගැනත් අසන්න ලැබෙයි. එයින් බිය නොවීමට වගබලා ගන්න. මන්ද ඒ දේවල් සිදු විය යුතු වුණත් අවසානය තවම පැමිණ නැහැ.+  “ජාතියක් ජාතියකට විරුද්ධවත්+ රාජ්‍යයක් රාජ්‍යයකට විරුද්ධවත්+ නැඟී සිටියි. එක් තැනක් පාසා තවත් තැනක ආහාර හිඟකම්ද+ භූමිකම්පාද+ සිදු වෙයි.  ඒ සියල්ල දරුණු විපත්වල ආරම්භයක් පමණයි.  “මිනිසුන් ඔබට පීඩා කර+ ඔබව මරණයට පත් කරයි.+ ඔබ මගේ නාමය දරන නිසා+ සියලු ජාතීන් ඔබට වෛර කරයි.+ 10  එවිට බොහෝදෙනෙක් සත්‍ය ඉගැන්වීම්වලින් වැටී යයි.+ ඔවුන් එකිනෙකාව පාවා දෙයි. එකිනෙකාට වෛර කරයි.+ 11  බොරු අනාගතවක්තෘවරුන් රාශියක්+ මතු වී බොහෝදෙනෙකුව නොමඟ යවන අතරම,+ 12  අධර්මිෂ්ඨ ක්‍රියා වැඩි වන නිසා+ වැඩිදෙනාගේ ප්‍රේමයද හීන වී යයි.+ 13  ගැලවීම ලබන්නේ+ අවසානය දක්වාම විඳදරාගන්නා තැනැත්තායි.+ 14  රාජ්‍යය පිළිබඳ+ මේ ශුභාරංචිය+ සියලු ජාතීන්ට+ සාක්ෂියක් වන පිණිස ජනාවාස වූ මුළු පොළොව පුරාම දේශනා කරනු ලබයි. එවිට අවසානය+ පැමිණෙයි. 15  “එහෙයින් අනාගතවක්තෘ දානියෙල් මාර්ගයෙන් කියන ලද විනාශය සිදු කරන පිළිකුල් දෙය+ ශුද්ධස්ථානයක තිබෙනවා+ ඔබ දකින විට (පාඨකයා මෙය අවබෝධයෙන් කියවිය යුතුයි), 16  යුදයේ සිටින අය කඳුවලට පලා යා යුතුයි.+ 17  වහල්තලයේ සිටින්නා පහතට ඇවිත් තම ගෙයින් කිසිවක් ගැනීම සඳහා එයට ඇතුල් නොවිය යුතුයි. 18  කෙතෙහි සිටින්නා තමාගේ පිට වස්ත්‍රය ගන්න තම නිවසට නොපැමිණිය යුතුයි. 19  ඒ දවස්වලදී ගැබිනි මව්වරුන්ටත් කිරි දෙන මව්වරුන්ටත් මොන තරම් දුෂ්කරතා ඇති වේවිද!+ 20  ඔබට පලා යන්න සිදු වන දවස ශීත කාලයකදීවත් සබත් දවසකදීවත් උදා නොවන්න කියා නොකඩවා යාච්ඤා කරන්න. 21  මන්ද ලෝකයේ පටන්ගැන්මේ සිට මේ දක්වා නොවූ+ නැවත කිසිදාක සිදු නොවන මහත් පීඩාවක්+ එදාට පැමිණෙයි. 22  ඇත්තෙන්ම ඒ පීඩාව පවතින කාලය කෙටි කළේ නැත්නම් කිසි කෙනෙක් ගැලවෙන්නේ නැහැ. නමුත් තෝරාගත් අය නිසා+ ඒ කාලය කෙටි කරනු ලබයි.+ 23  “එදාට, ‘මෙන්න! ක්‍රිස්තුස් මෙතැනය’+ නැත්නම්, ‘එතැනය’ කියා යමෙක් ඔබට කිව්වොත් ඒ වචන විශ්වාස නොකරන්න.+ 24  මන්ද බොරු ක්‍රිස්තුස්වරුන්ද+ බොරු අනාගතවක්තෘවරුන්ද+ මතු වී හැකි නම් තෝරාගත් අයව+ පවා නොමඟ යැවීම සඳහා මහත් ලකුණු+ හා පුදුම දේ පෙන්වයි. 25  මා කල්තියාම ඔබට මේ දේවල් ගැන අනතුරු ඇඟවූ බව මතක තබාගන්න.+ 26  එහෙයින් මිනිසුන්, ‘අන්න! ඔහු පාළුකරයේ සිටිනවා’ කියා ඔබට කිව්වොත් පිටතට නොයන්න. ‘මෙන්න! ඔහු ඇතුල් කාමරයේ සිටිනවා’ කියා කිව්වත් එය විශ්වාස නොකරන්න.+ 27  අකුණු ගසද්දී+ එම විදුලි සැරය නැඟෙනහිර දෙසින් නික්ම ඇවිත් බස්නාහිර දක්වා ආලෝකය විහිදුවන ආකාරය ඔබ දැක ඇති. මනුෂ්‍ය පුත්‍රයා පැමිණ සිටින කාලයෙත්* එලෙසම වෙයි.+ 28  යම් තැනකට රාජාලීන්+ රැස් වන විට මළ කුණක් එතැන තිබෙන බව වටහාගන්න.+ 29  “ඒ දවස්වලදී එම පීඩාව ඇති වූ සැණින්ම හිරු අඳුරු වී යයි.+ සඳෙන්+ කිසි එළියක් නොලැබෙයි. තාරකා අහසින් වැටෙයි. අහසේ සියලු බලයන්ද සොලවනු ලබයි.+ 30  එවිට මනුෂ්‍ය පුත්‍රයාගේ ලකුණ+ අහසේ පෙනෙයි. එවිට පොළොවේ වාසය කරන සියලු ගෝත්‍ර ශෝකයෙන් තම පපුවට ගසාගනියි.+ බලයෙන්ද මහත් තේජසින්ද යුතුව අහසේ වලාකුළු මත පැමිණෙන මනුෂ්‍ය පුත්‍රයාව ඔවුන් දකියි.+ 31  ඔහු මහත් හොරණෑ ශබ්දයක්+ පතුරුවමින් තම දූතයන්ව එවයි. ඔවුන් මුළු අහස්තලය යට තිබෙන පොළොවේ* හතර දිගින්ම+ ඔහුගේ තෝරාගත් අයව රැස් කරයි.+ 32  “දැන් අත්තික්කා ගස නිදසුනක් ලෙස ගෙන මේ කරුණ ඉගෙනගන්න. එහි අලුතින් වැඩුණු අත්තේ දලු ලියලන විට ගිම්හානය ළඟ බව ඔබ දන්නවා.+ 33  එලෙසම ඔබ මේ සියල්ල දකින විට ඔහු දොරකඩ අසලම සිටින බව දැනගන්න.+ 34  ඇත්තෙන්ම මා ඔබට කියන්නේ, මේ සියල්ල සිදු වන තුරු මේ පරම්පරාව+ කිසි ලෙසකින්වත් පහව යන්නේ නැති බවයි. 35  අහසත් පොළොවත් පහව ගියත්+ මගේ වචන නම් කිසිසේත් පහව යන්නේ නැහැ.+ 36  “පියාණන් මිස+ ඒ දේ සිදු වන දවස හා වේලාව+ කිසිවෙක් දන්නේ නැහැ. ස්වර්ගයෙහි දේවදූතයන්වත් පුත්‍රයාවත් දන්නේ නැහැ. 37  මනුෂ්‍ය පුත්‍රයා පැමිණ සිටින කාලයේ*+ සිදු වන දේවල් නෝවාගේ කාලයේ+ සිදුවීම්වලට සමානයි. 38  ජලගැල්මට පෙර කාලය පුරාම එනම්, නෝවා+ නැවට ඇතුල් වූ දවස දක්වාම+ ඔවුන් කමින් බොමින් විවාහ වෙමින් සහ විවාහ කර දෙමින් සිටියා. 39  ජලගැල්ම ඇවිත් ඔවුන් සියල්ලන්වම ගසාගෙන යන තුරු ඔවුන් සිදු වන දේ ගැන කිසි තැකීමක් කළේ නැහැ.+ මනුෂ්‍ය පුත්‍රයා පැමිණ සිටින කාලයද* ඒ හා සමානයි. 40  ඒ කාලයේදී මිනිසුන් දෙදෙනෙක් කෙතෙහි සිටියි. එක් තැනැත්තෙකුව ගෙන යනු ලබයි. අනික් තැනැත්තාව අත්හරිනු ලබයි. 41  ස්ත්‍රීන් දෙදෙනෙක් ඇඹරුම් ගලේ අඹරමින් සිටියි.+ එක් තැනැත්තියකව ගෙන යනු ලබයි. අනික් තැනැත්තියව අත්හරිනු ලබයි.+ 42  එහෙයින් සෝදිසියෙන් සිටින්න. මන්ද ඔබේ ස්වාමීන් කොයි දවසේ එනවාදැයි ඔබ දන්නේ නැහැ.+ 43  “නමුත් මේ දේ දැනගන්න. එනම් සොරා කොයි රැකවල් යාමයේ එනවාද කියා ගෙහිමියා දැන සිටියා නම්+ ඔහු අවදිව සිට තමාගේ ගෙය බිඳීමට ඉඩ දෙන්නේ නැහැ. 44  එහෙයින් ඔබත් සූදානමින් සිටින බව පෙන්වන්න.+ මන්ද මනුෂ්‍ය පුත්‍රයා එන්නේ ඔබ නොසිතන පැයකදීයි. 45  “ස්වාමියා විසින් තම මෙහෙකරුවන්ට නියම වේලාවට+ ආහාර දීම සඳහා ඔවුන් කෙරෙහි පත් කළ විශ්වාසවන්ත නුවණ ඇති දාසයා+ කවුද? 46  ඔහුගේ ස්වාමියා පැමිණි විට ඔහු එසේ කරනවා දකී නම් ඒ දාසයා සන්තෝෂවත්ය!+ 47  ඇත්තෙන්ම මා ඔබට කියන්නේ, ඒ ස්වාමියා තමන් සතු සියලු දේවල් බලා කියා ගැනීම සඳහා ඔහුව පත් කරන බවයි.+ 48  “නමුත් යම් විටක දුෂ්ට දාසයා, ‘මගේ ස්වාමියා ප්‍රමාද වෙනවා’+ කියා සිතින්+ කියාගෙන, 49  තමන් සමඟ සිටින සෙසු දාසයන්ට තළන්න පටන්ගෙන බේබද්දන් සමඟ කමින් බොමින් සිටියොත්, 50  ඒ දාසයාගේ ස්වාමියා ඔහු බලාපොරොත්තු නොවන දවසක, ඔහු නොදන්නා පැයකදී+ ඇවිත්, 51  ඔහුට ඉතා තදින් දඬුවම් කර+ කුහකයන්ට හිමි වන ස්ථානයට දමයි. එහිදී ඔහුට සිදු වන්නේ හඬමින් හා දත්මිටි කමින් සිටින්නයි.+

පාදසටහන්

පැමිණ සිටීම. ග්‍රීක බසින්, පරූසියා. උපග්‍ර. 7 බලන්න.
පැමිණ සිටීම. ග්‍රීක බසින්, පරූසියා. උපග්‍ර. 7 බලන්න.
මූ.අ., “සුළඟේ.”
පැමිණ සිටීම. ග්‍රීක බසින්, පරූසියා. උපග්‍ර. 7 බලන්න.
පැමිණ සිටීම. ග්‍රීක බසින්, පරූසියා. උපග්‍ර. 7 බලන්න.