මතෙව් 17:1-27

17  දවස් හයකට පසු යේසුස් පේතෘස්වද යාකොබ්වද ඔහුගේ සහෝදර යොහන්වද කැඳවාගෙන උස් කන්දකට ගියේය.+  එවිට ඔවුන් ඉදිරියෙහිම ඔහුගේ පෙනුම සම්පූර්ණයෙන්ම වෙනස් විය. ඔහුගේ මුහුණ සූර්යයා මෙන් බැබළෙන්නත්+ ඔහුගේ වස්ත්‍ර ආලෝකය මෙන් දීප්තිමත් වෙන්නත්+ පටන්ගත්තේය.  එවිට මෝසෙස් සහ එලියා ඔහු සමඟ කතා කරමින් සිටිනවා+ ඔවුන්ට පෙනිණ.  එය දුටු පේතෘස්, “ස්වාමීනි, මේ අවස්ථාවේදී මෙතැන සිටින්න ලැබීම අපට ලොකු සතුටක්. ඔබ කැමති නම් මම මෙහි කූඩාරම් තුනක්, එකක් ඔබටද එකක් මෝසෙස්ටද එකක් එලියාටද සාදන්නම්” කියා යේසුස්ට කීවේය.+  ඔහු ඒ දේ පැවසූ මොහොතේම දීප්තිමත් වලාකුළකින් ඔවුන් වට විය. එවිට වලාකුළ අතරින් හඬක් නික්ම ඇවිත්, “මේ මාගේ ප්‍රේමණීය පුත්‍රයාය. මොහුට මාගේ අනුමැතිය ඇත.+ මොහුට සවන් දෙන්න”+ කියා කීවේය.  එය ඇසූ ගෝලයෝ අතිශයින් බිය වී+ දණින් වැටුණෝය.  එවිට යේසුස් ඔවුන් ළඟට ඇවිත් ඔවුන් පිට අත තබා, “නැඟිටින්න, භය වෙන්න එපා”+ කියා කීවේය.  ඔවුහු තම හිස් ඔසවා බැලූ විට යේසුස් හැර වෙන කිසිවෙකු එහි සිටිනවා දුටුවේ නැත.+  ඔවුන් කන්දෙන් බැස එද්දී, “මනුෂ්‍ය පුත්‍රයා මරණයෙන් නැඟිටින තුරු ඔබ දුටු දේ ගැන කිසිවෙකුට නොකියන්න”+ කියා යේසුස් ඔවුන්ට අණ කළේය. 10  එවිට ගෝලයෝ, “එසේනම් එලියා පළමුවෙන් පැමිණිය යුතුයි+ කියා නීතිය පිටපත් කරන්නන් කියන්නේ ඇයි” කියා ඔහුගෙන් ඇසූහ. 11  ඔහු මෙසේ උත්තර දුන්නේය. “අනිවාර්යයෙන්ම මුලින්ම පැමිණෙන්නේ එලියායි. ඔහු ඇවිත් සියල්ල නැවත පිහිටුවයි.+ 12  නමුත් මා ඔබට කියන්නේ, එලියා දැනටමත් පැමිණ ඇති බවයි. නමුත් ඔවුන් ඔහුව හඳුනා නොගෙන තමන්ට කැමති දේ ඔහුට කළා. මනුෂ්‍ය පුත්‍රයාටත් ඔවුන් අතින් පීඩා විඳින්න සිදු වෙයි.”+ 13  ඔහු කතා කළේ යොහන් බව්තීස්ත+ ගැන බව ගෝලයන් තේරුම්ගත්තේ එවිටයි. 14  ඔවුන් සමූහයා+ ළඟට පැමිණි විට මිනිසෙක් යේසුස් වෙතට පැමිණ ඔහු ඉදිරියේ දණින් වැටී මෙසේ පැවසුවේය. 15  “ස්වාමීනි, මගේ පුතාට අනුකම්පා කරන්න. ඔහු මීමැස්මොර රෝගියෙක්. ඔහුගේ රෝගය ඉතා දරුණුයි. ඔහු නිතරම ගින්න හා වතුර සොයාගෙන ගිහින් එහි වැටෙනවා.+ 16  මා ඔහුව ඔබේ ගෝලයන් වෙතට ගෙන ආවත් ඔහුව සුව කරන්න ඔවුන්ට හැකි වුණේ නැහැ.”+ 17  එවිට යේසුස් මෙසේ පැවසුවේය. “ඔබ සියලුදෙනා තුළ කිසිම විශ්වාසයක් නැහැ. ඔබ නොමඟ ගිය පරම්පරාවක්.+ මා ඔබ සමඟ තව කොපමණ කල් සිටින්නද? ඔබ ගැන තව කොපමණ කල් ඉවසන්නද? ඔහුව මා වෙතට ගෙනෙන්න.” 18  එවිට යේසුස් දරුවාට වැහී සිටි භූතයාට තදින් කතා කළේය. භූතයා ඔහුගෙන් දුරු වී+ ගිය අතර ඒ පැයේදී දරුවාට සුවය ලැබිණ.+ 19  එවිට ගෝලයෝ පමණක් යේසුස් ළඟට ඇවිත්, “අපට ඒ භූතයාව දුරු කරන්න බැරි වුණේ ඇයි”+ කියා ඇසූහ. 20  “ඒ ඔබ තුළ තිබෙන විශ්වාසයේ මදිකම නිසයි. ඇත්තෙන්ම මා ඔබට කියන්නේ, අබ ඇටයක් තරම්වත් විශ්වාසයක් ඔබ තුළ ඇත්නම් ඔබ මේ කන්දට, ‘මෙතැනින් අතනට යන්න’ කියා කිව්වොත් එය එතැනට යයි. ඔබට කළ නොහැකි කිසිවක් නැහැ”+ කියා ඔහු ඔවුන්ට පැවසුවේය. 21  —— 22  ඔවුන් ගලීලයේ රැස් වී සිටියදී යේසුස් ඔවුන්ට මෙසේ කීවේය. “මනුෂ්‍ය පුත්‍රයාව මිනිසුන් අතට පාවා දෙන්න නියමිතයි.+ 23  ඔවුන් ඔහුව මරණයට පත් කරයි. නමුත් තුන්වෙනිදා ඔහුව නැඟිටුවනු ලබයි.”+ එය ඇසූ විට ඔවුහු අතිශයින් දුක් වූහ.+ 24  ඔවුන් කපර්ණවුමට පැමිණි විට දේවමාලිගාවට දෙන බද්ද* එකතු කරන මිනිස්සු පේතෘස් ළඟට ඇවිත්, “ඔබේ ගුරුතුමා දේවමාලිගාවට දෙන බද්ද ගෙවන්නේ නැද්ද”+ කියා ඇසූහ. 25  “ගෙවනවා” කියා ඔහු කීවේය. ඔහු ගෙට ඇතුල් වූ විට ඔහු යමක් කියන්න කලින් යේසුස් ඔහුගෙන් මෙසේ ඇසුවේය. “සීමොන්, ඔබ හිතන්නේ කුමක්ද? පොළොවේ රජවරුන් තීරු බදු හෝ ඇඟ බදු හෝ ලබාගන්නේ කාගෙන්ද? තම පුතුන්ගෙන්ද නැත්නම් අනුන්ගෙන්ද?” 26  “අනුන්ගෙන්” කියා ඔහු පැවසුවේය. එවිට යේසුස් ඔහුට මෙසේ කීවේය. “එසේනම් ඇත්තටම පුතුන් බදු ගෙවීමෙන් නිදහස්. 27  නමුත් ඔවුන් සමඟ ප්‍රශ්න ඇති කරගන්න අපට අවශ්‍ය නැහැ.+ එමනිසා ඔබ මුහුදට ගොස් බිලි බාන්න. ඔබ මුලින්ම අල්ලාගන්නා මාළුවා ගෙන උගේ කට අරින විට රිදී කාසියක්* තිබෙනවා ඔබ දකියි. ඒ කාසිය ගෙන මා සහ ඔබ වෙනුවෙන් ඔවුන්ට දෙන්න.”+

පාදසටහන්

මූ.අ., “ඩ්‍රැක්මා දෙකේ බද්ද.” දවස් දෙකක වැටුපට සමානය.
මූ.අ., “ස්ටේටර් කාසියක්.” මෙය වටිනාකමින් ඩ්‍රැක්මා කාසි හතරකට සමානයි.