නික්මයාම 7:1-25

7  යෙහෝවා දෙවි මෝසෙස්ට මෙසේ කීවේය. “මම ඔබව පාරාවෝ ඉදිරියේ දෙවි කෙනෙකු මෙන්* වීමට සලස්වන්නෙමි.+ ඔබේම සහෝදරයා වන ආරොන් අනාගතවක්තෘවරයෙකු ලෙස ඔබ වෙනුවෙන් කතා කරන්නේය.+  මා ඔබට අණ කරන සෑම දෙයක්ම ඔබේ සහෝදරයා වන ආරොන්ට කියන්න.+ පාරාවෝ ඉදිරියේ කතා කළ යුත්තේ ඔහුයි.+ පාරාවෝ, ඊශ්‍රායෙල් සෙනඟව මේ දේශයෙන් පිටතට යවන බව මම ස්ථිරවම දනිමි.+  එහෙත් ඊට කලින් ඔහු තම සිත මුරණ්ඩු කරගන්නේය. ඔහුට එසේ කිරීමට මම ඉඩහරින්නෙමි.+ ඉන්පසු මම ඊජිප්තු දේශයේදී බොහෝ ලකුණු පෙන්වන්නෙමි. දේශය පුරා බොහෝ ආශ්චර්යයන්ද සිදු කරන්නෙමි.+  එහෙත් පාරාවෝ ඔබ දෙදෙනාට සවන් නොදෙන්නේය.+ ඒ නිසා මම ඊජිප්තුවේ වැසියන්ට විරුද්ධව මාගේ මහත් බලය* විදහාපෙන්වන්නෙමි. ඔවුන්ට දැඩි ලෙස දඬුවම්+ කර මහත් සේනාවක්+ බඳු මගේ සෙනඟ වන ඊශ්‍රායෙල්වරුන්ව+ ඊජිප්තු දේශයෙන් පිටතට ගෙනෙන්නෙමි.+  ඊජිප්තුවේ වැසියන්ට විරුද්ධව මාගේ මහත් බලය* විදහාපෙන්වන විට මා යෙහෝවා දෙවි බව ඊජිප්තුවරු අනිවාර්යයෙන්ම දැනගනු ඇත.+ මම ඊශ්‍රායෙල් පුත්‍රයන්ව ඊජිප්තු දේශයෙන් පිටතට ගෙනෙන්නෙමි.”+  පසුව මෝසෙස් සහ ආරොන් යෙහෝවා දෙවි කී ලෙස කළෝය.+ ඔවුහු දෙවි අණ කළ ලෙසම කළෝය.+  පාරාවෝ සමඟ කතා කළ අවස්ථාව වන විට මෝසෙස්ට වයස අවුරුදු අසූවක්ද ආරොන්ට වයස අවුරුදු අසූතුනක්ද විය.+  යෙහෝවා දෙවි මෝසෙස්ට සහ ආරොන්ට මෙසේ කීවේය.  “‘ආශ්චර්යයක් කර පෙන්වන්න’+ කියා පාරාවෝ පැවසුවොත්, ‘පාරාවෝ ඉදිරියේ සැරයටිය+ බිමට විසි කරන්න’ කියා ඔබ ආරොන්ට කියන්න. එවිට සැරයටිය විශාල සර්පයෙක් බවට පත් වෙයි.”+ 10  පසුව මෝසෙස් සහ ආරොන් පාරාවෝ ඉදිරියට ගොස් යෙහෝවා දෙවි ඔවුන්ට අණ කළ ලෙසම කළෝය. පාරාවෝ හා ඔහුගේ සේවකයන් ඉදිරියේ ආරොන් තම සැරයටිය බිමට විසි කළ විට එය විශාල සර්පයෙකු බවට පත් විය. 11  එවිට පාරාවෝ ඊජිප්තු දේශයේ සිටි ප්‍රඥාවන්තයන්වද කට්ටඩියන්වද+ එතැනට කැඳෙව්වේය. කට්ටඩියෝ තම මන්තර බලය යොදාගෙන ආරොන් කළ දේම කළෝය.+ 12  ඔවුහු එක් එක් කෙනා තම තමාගේ සැරයටිය බිමට විසි කළෝය. එවිට ඒවා සියල්ලද විශාල සර්පයන් බවට පත් විය. නමුත් ආරොන්ගේ සැරයටිය ඔවුන්ගේ සැරයටි ගිල දැමුවේය. 13  එහෙත් යෙහෝවා දෙවි කී ලෙසම පාරාවෝ තම සිත තව තවත් මුරණ්ඩු කරගත් බැවින්+ ඔහු මෝසෙස් හා ආරොන් කී දේට සවන් දුන්නේ නැත. 14  එවිට යෙහෝවා දෙවි මෝසෙස්ට මෙසේ කීවේය. “පාරාවෝගේ සිත දැඩි වී ඇත.+ ඔහු සෙනඟට යන්න නොදෙන්නේ ඒ නිසයි.+ 15  හෙට උදේට ඔබ නැවත පාරාවෝ හමු වීමට යන්න. ඔහු නයිල් ගඟ ළඟට පැමිණෙයි.+ ඔබ ගං ඉවුරට වී ඔහු එන තුරු බලා සිටින්න.+ මා කලින් වතාවේ සර්පයෙකු බවට පත් කළ ඔබේ සැරයටියත් රැගෙන යන්න.+ 16  ඔබ ඔහුට මෙසේ කියන්න. ‘මාව ඔබ ළඟට එව්වේ හෙබ්‍රෙව්වරුන්ගේ දෙවි වන යෙහෝවාය.+ “මට නමස්කාර කරන පිණිස මගේ සෙනඟට පාළුකරයට යන්න දෙන්න”+ කියා දෙවි ඔබට කීවේය. නමුත් ඔබ ඔහු කියූ දේ ඇසුවේ නැත. 17  දැන් යෙහෝවා දෙවි ඔබට මෙසේ කියන්නේය.+ “මා යෙහෝවා දෙවි බව මා කරන්න යන මේ දෙයින් ඔබ දැනගන්නෙහිය.+ සැරයටියෙන් මම නයිල් ගඟේ වතුරට පහර දෙමි.+ එවිට එහි වතුර ලේ බවට හැරෙන්නේය.+ 18  නයිල් ගඟේ සියලු මසුන් මැරී,+ ගඟෙන් දුගඳක් හමනු ඇත.+ එවිට ඊජිප්තුවරු ගඟේ වතුර බීමට පිළිකුල් කරනු ඇත.”’”+ 19  යෙහෝවා දෙවි මෝසෙස්ට තවදුරටත් මෙසේ කීවේය. “ආරොන්ට මෙසේ කියන්න. ‘ඊජිප්තු දේශයේ සියලු ගංගා, ඇළදොළ* හා පොකුණුවල+ තිබෙන වතුර ලේ බවට හැරෙන පිණිස ඔබේ සැරයටිය ජලය තිබෙන සෑම තැනකටම දිගු කරන්න.’+ එවිට ඊජිප්තු දේශයේ සෑම තැනකම ලේ දකින්න ලැබෙයි. ලීවලින් හා ගල්වලින් සෑදූ සෑම භාජනයකම ලේ තිබේවි.” 20  මෝසෙස් හා ආරොන් යෙහෝවා දෙවි අණ කළ පරිදි+ කළෝය.+ පාරාවෝ හා ඔහුගේ සේවකයන් ඉදිරියේ ආරොන් තම සැරයටියෙන් නයිල් ගඟේ වතුරට ගැසුවේය.+ එවිට නයිල් ගඟේ වතුර ලේ බවට හැරුණේය.+ 21  ගඟේ සිටි සියලු මත්ස්‍යයෝද මිය ගියෝය.+ ගඟෙන් දුගඳක්ද හමන්න පටන්ගත්තේය. ඊජිප්තුවරුන්ට ගඟේ වතුර බීමට නොහැකි විය.+ ඊජිප්තු දේශයේ සෑම තැනකම ලේ දක්නට ලැබිණ. 22  නමුත් ඊජිප්තුවේ මන්තර ගුරුකම් කරන පූජකයෝද ඔවුන්ගේ මන්තර බලය යොදාගෙන එලෙසම කළෝය.+ එහෙයින් පාරාවෝ තම සිත තව තවත් මුරණ්ඩු කරගත්තේය.+ යෙහෝවා දෙවි කී ලෙසම ඔහු මෝසෙස්ට හා ආරොන්ට සවන් දුන්නේ නැත.+ 23  ඒ ආශ්චර්යය පවා ගණනකට නොගත්+ ඔහු තම මාලිගාව වෙතට හැරී ගියේය. 24  නයිල් ගඟේ වතුර බීමට නොහැකි වූ නිසා සියලු ඊජිප්තුවරු වතුර සොයමින් නයිල් ගඟ වටේ වළවල් හෑරුවෝය.+ 25  යෙහෝවා දෙවි නයිල් ගඟට පහර දී දවස් හතක් ගත විය.

පාදසටහන්

නික් 4:16හි පාදසටහන බලන්න.
නික් 3:19හි පාදසටහන බලන්න.
නික් 3:19හි පාදසටහන බලන්න.
මූ.අ., “නයිල් ගඟේ වතුර ලබාගැනීම සඳහා කපා ඇති ඇළ මාර්ග.”