නික්මයාම 34:1-35

34  පසුව යෙහෝවා දෙවි මෝසෙස්ට මෙසේ කීවේය. “ඔබට කලින් දුන් ගල් පුවරු දෙක හා සමාන තවත් ගල් පුවරු දෙකක් කපාගන්න.+ ඔබ බිඳ දැමූ+ ගල් පුවරුවල ලියා තිබූ වචනම මම ඒ පුවරු දෙකෙහිද ලියන්නෙමි.+  ඔබ හෙට උදෑසන සීනයි කඳු මුදුනට නැඟ මා ඉදිරියට පැමිණෙන්න.+  ඔබ සමඟ වෙන කිසිවෙකුට ඒමට ඉඩ නොදෙන්න. කිසිවෙකු කන්දේ කිසිම තැනක රැඳී නොසිටිය යුතුයි.+ එළුවන්ටවත් බැටළුවන්ටවත් ගවයන්ටවත් කන්ද ඉදිරියේ තණ කෑමට ඉඩ නොදෙන්න.”+  ඉන් අනතුරුව කලින් තිබූ ගල් පුවරු දෙක හා සමාන තවත් ගල් පුවරු දෙකක් මෝසෙස් කපාගත්තේය. යෙහෝවා දෙවි තමාට අණ කළ ලෙසම ඔහු උදෑසනින්ම නැඟිට ඒ ගල් පුවරු දෙකත් රැගෙන සීනයි කන්දට නැග්ගේය.  යෙහෝවා දෙවිද කන්ද මත සිටි මෝසෙස් වෙතට වලාකුළකින් බැස ආවේය.+ දෙවි, යෙහෝවා යන තම නාමය මෝසෙස්ට ප්‍රකාශ කළේය.+  ඒ අවස්ථාවේදී යෙහෝවා දෙවි මෝසෙස්ව පසු කර යමින් මෙසේ ප්‍රකාශ කළේය. “යෙහෝවා දෙවි වන මා දයාන්විතය.+ කරුණාවන්තය.+ කෝප වීමට ඉක්මන් නොවන්නෙමි.+ යෙහෝවා දෙවි වන මම ඉමහත් ප්‍රේමයක්*+ පෙන්වන්නෙමි. සැමවිටම විශ්වාසවන්තව+ ක්‍රියා කරන්නෙමි.  මම පරම්පරා දහස් ගණනකට මහත් ප්‍රේමයක්*+ පෙන්වමින් අයුතුකම්වලටද වැරදිවලටද පාපවලටද සමාව දෙන්නෙමි.+ එහෙත් වරදකරුවන්ට දිය යුතු දඬුවමින් මම කිසිවිටෙක ඔවුන්ව නිදහස් නොකරන්නෙමි.+ පියවරුන්ගේ වැරදි නිසා තුන්වෙනි හා හතරවෙනි පරම්පරා දක්වා ඔවුන්ගේ පුත්‍රයන්ටද පුත්‍රයන්ගේ පුත්‍රයන්ටද අනිවාර්යයෙන්ම දඬුවම් කරන්නෙමි.”+  මෝසෙස් එය ඇසූ විගස බිම වැටී දෙවිට නමස්කාර කළේය.+  ඔහු දෙවිට මෙසේ කීවේය. “අනේ යෙහෝවා දෙවියනි, මා ඔබේ කරුණාව ලැබූ කෙනෙක් නම් මාගේ මේ ඉල්ලීම ඉටු කරන්න. යෙහෝවා දෙවියනි, මේ ගමන යෑමට අප සමඟ පැමිණෙන්න+ කියා මම ඔබෙන් බැගෑපත්ව ඉල්ලා සිටිනවා. මේ සෙනඟ මුරණ්ඩු+ බව ඇත්තයි. එහෙත් අපේ අයුතුකම්වලට හා පව්වලට සමාව දී+ ඔබේ උරුමය හැටියට අපව පිළිගන්න.”+ 10  එවිට දෙවි ඔහුට මෙසේ පිළිතුරු දුන්නේය. “මම දැන් ඔබ සමඟ මේ ගිවිසුම ඇති කරගන්නෙමි. මින් පෙර කිසි දිනක මේ පොළොවේ කොතැනකවත් සිදු නොකළ පුදුම ක්‍රියා මම මේ සෙනඟ ඉදිරියේ කරන්නෙමි. වෙන කිසි ජාතියක් ඉදිරියේ මා එවැනි දේවල් කර නැත.+ යෙහෝවා දෙවි වන මා ඔබ වෙනුවෙන් කරන පුදුම දනවන ක්‍රියා දැක ඔබ අවට සිටින සියලු ජාතීහු බියෙන් වෙවුලනු ඇත.+ 11  “අද මා ඔබට අණ කරන මේ සියල්ල පැවැත්වීමට ඔබ වගබලා ගත යුතුයි.+ මම අමෝරිවරුන්වද කානානිවරුන්වද හිත්තීවරුන්වද පෙරිස්සිවරුන්වද හිවීයවරුන්වද යෙබූසිවරුන්වද ඔබ ඉදිරියෙන් පන්නා දමන්නෙමි.+ 12  ඔබ යන දේශයේ වැසියන් සමඟ කිසි ගිවිසුමක් ඇති කර නොගන්න.+ එසේ කළොත් එය ඔබේ විනාශයට හේතු වනු ඇත.+ 13  ඔබ ඔවුන්ගේ පූජාසන කඩා දැමිය යුතුයි. නමස්කාරය සඳහා ඔවුන් ඉදි කළ කුලුනුද කණුද කුඩු කර දමන්න.+ 14  ඔබ වෙන කිසි දෙවි කෙනෙක් ඉදිරියේ වැඳ වැටී නමස්කාර නොකළ යුතුයි.+ මන්ද යෙහෝවා දෙවි වන මම වෙනත් දෙවිවරුන්ට කරන නමස්කාරය දැඩි ලෙස හෙළාදකින්නෙමි.+ 15  ඔබ දේශයේ වැසියන්ගේ පූජනීය වස්තු විනාශ කර නොදැම්මොත් ඔවුහු තම දෙවිවරුන් ඉදිරියේ පිළිකුල්සහගත ක්‍රියාවල නියැලෙමින්*+ ඔවුන්ට පුදපූජා ඔප්පු කරනු ඇත.+ එවිට ඔවුන්ගේ පූජාවලට හවුල් වෙන්න කියා ඔබට පවසන විට ඔබත් ඔවුන් සමඟ හවුල් වී දෙවිවරුන්ට ඔප්පු කළ දේවලින් අනුභව කිරීමට පෙලඹෙනු ඇත.+ ඔබ ඔවුන් සමඟ ගිවිසුමක් ඇති කරගෙන 16  ඔවුන්ගේ දූවරුන්ව ඔබේ පුත්‍රයන්ට විවාහ කර දෙනු ඇත.+ ඔවුන්ගේ දූවරු ඔවුන්ගේ දෙවිවරුන් ඉදිරියේ පිළිකුල්සහගත ක්‍රියාවල නියැලෙමින්* ඔබේ පුත්‍රයන්වත් එසේ කිරීමට පොලඹවනු ඇත.+ 17  “දේවතා රූප සාදා නොගන්න.+ 18  “ඔබ මුහුන් නොදැමූ රොටි උත්සවය පැවැත්විය යුතුයි.+ මා ඔබට අණ කළ ලෙස දවස් හතක් පුරා මුහුන් නොදැමූ රොටි අනුභව කරන්න. ආබීබ් මාසයේ මා නියම කළ දිනවලදී ඔබ එය කළ යුතුයි.+ මන්ද ඔබ ඊජිප්තු දේශයෙන් පිටතට ආවේ එම මාසයේදීය. 19  “සෑම කුලුඳුලෙක්ම මට අයිතිය.+ ඔබේ ගව රැළේ හෝ බැටළු රැළේ හෝ සිටින සියලු කුලුඳුල් පිරිමි සතුන්ද මට අයිතිය.+ 20  බූරුවන් අතරින් සෑම කුලුඳුල් පැටියෙකුවම මුදවාගැනීම සඳහා බැටළුවෙකු බැගින් දිය යුතුයි.+ ඔබ උන්ව මුදවාගන්නේ නැත්නම් උන්ගේ බෙල්ල කඩා දැමිය යුතුයි. ඔබේ සෑම කුලුඳුල් පුත්‍රයෙකුවද ඔබ මුදවාගත යුතුයි.+ කිසිවෙකු මා ඉදිරියට හිස් අතින් නොපැමිණිය යුතුයි.+ 21  “ඔබ දවස් හයක් පුරා වෙහෙස මහන්සි වී වැඩ කරන්න. නමුත් හත්වන දවසේදී සබතක් පවත්වන්න.+ ඔබ වපුරන කාලයේදීත් අස්වැන්න නෙළන කාලයේදීත් සබත පැවැත්විය යුතුයි.+ 22  “ඔබ සති උත්සවය පැවැත්විය යුතුයි. ඒ සඳහා ඔබේ තිරිඟු අස්වැන්නෙන් ප්‍රථම ඵල භාවිත කරන්න.+ අවුරුද්ද අවසානයේදී අස්වැන්න නෙළීමේ උත්සවය පවත්වන්න.+ 23  “අවුරුද්දට තුන් වතාවක් සෑම පුරුෂයෙකුම ඊශ්‍රායෙල්වරුන්ගේ ස්වාමීන් වන යෙහෝවා දෙවි ඉදිරියට පැමිණිය යුතුයි.+ 24  ඔබ යන දේශයේ ජීවත් වන සියලු ජාතීන්ව මම පන්නා දමන්නෙමි.+ ඔබට බොහෝ ඉඩකඩ ඇති දේශයක් දෙන්නෙමි.+ ඔබ අවුරුද්දට තුන් වතාවක් ඔබේ දෙවි වන යෙහෝවාට නමස්කාර කිරීමට ඔබේ දේශයෙන් පිටත්ව යන විට කිසි මිනිසෙකු ඔබේ දේශය අයිති කරගැනීමට උත්සාහ නොකරන්නේය.+ 25  “ඔබ මට ඔප්පු කරන සතුන්ගේ ලේ සමඟ මුහුන් දැමූ කිසිවක් ඔප්පු නොකළ යුතුයි.+ පාස්කු උත්සවය සඳහා ඔප්පු කරන සතාගේ මස් පසුවදා උදෑසන වන තුරු තබා නොගන්න.+ 26  “ප්‍රථම ඵල+ අතරින් ඉදුණු හොඳම පල ඔබේ දෙවි වන යෙහෝවාගේ ගෘහයට ගෙනා යුතුයි.+ “එළු පැටියෙකුව උගේ මවගේ කිරිවලින් පිසීමෙන් වළකින්න.”+ 27  යෙහෝවා දෙවි තවදුරටත් මෝසෙස්ට මෙසේ කීවේය. “මා ඔබට පැවසූ දේවල් ලියාගන්න.+ මම ඊශ්‍රායෙල් සෙනඟ හා ඔබ සමඟ ගිවිසුමක් ඇති කරගන්නේ ඒ වචනවලට එකඟවයි.”+ 28  මෝසෙස් දහවල් හතළිහක්ද රාත්‍රි හතළිහක්ද යෙහෝවා දෙවි ඉදිරියේ සිටියේය. ඔහු ඒ කාලය අතරතුරේදී කෑම කෑවේවත් වතුර බීවේවත් නැත.+ ඔහු* ගල් පුවරු දෙක මත ගිවිසුමට ඇතුළත් ආඥා දහය* ලියා දුන්නේය.+ 29  මෝසෙස් ගල් පුවරු දෙකත් රැගෙන සීනයි කන්දෙන් බැස ආවේය.+ ඔහු දෙවි සමඟ කතා කළ නිසා ඔහුගේ මුහුණ දීප්තියෙන් බැබළෙමින් තිබුණේය. නමුත් මෝසෙස් ඒ බව දැන සිටියේ නැත.+ 30  මෝසෙස් ආරොන් හා ඊශ්‍රායෙල් පුත්‍රයන් ඉදිරියට පැමිණි විට ඔහුගේ මුහුණ දීප්තියෙන් බැබළෙමින් තිබූ බව ඔවුහු දැක ඔහු ළඟට යෑමට භය වූහ.+ 31  එවිට මෝසෙස් ඔවුන්ව තමා ළඟට කැඳෙව්වේය. ආරොන් සහ සෙනඟ අතරේ සිටි අධිපතීන් සියලුදෙනාම මෝසෙස් ළඟට පැමිණි විට ඔහු ඔවුන් සමඟ කතා කළේය. 32  ඉන්පසු මුළු ඊශ්‍රායෙල් සෙනඟද මෝසෙස් ළඟට ආවෝය. යෙහෝවා දෙවි සීනයි කන්දේදී තමාට දුන් සෑම ආඥාවක් ගැනම මෝසෙස් සෙනඟට පැවසුවේය.+ 33  එදා පටන් මෝසෙස් සෙනඟ සමඟ කතා කළ පසු වැස්මකින් තම මුහුණ වසාගත්තේය.+ 34  නමුත් ඔහු යෙහෝවා දෙවි සමඟ කතා කිරීමට යන විට මුහුණෙන් එම වැස්ම අහක් කළේය.+ දෙවි ඉදිරියෙන් හැරී එන විට ඔහු එම වැස්මෙන් නැවත මුහුණ වසාගත්තේය. ඉන්පසු දෙවි තමාට අණ කළ දේවල් ඔහු ඊශ්‍රායෙල් සෙනඟට දැන්වූවේය.+ 35  ඒ අවස්ථාවලදී මෝසෙස්ගේ මුහුණ දීප්තියෙන් බැබළෙමින් තිබූ බව ඊශ්‍රායෙල් සෙනඟ දුටුවෝය.+ එහෙයින් මෝසෙස් නැවත දෙවි ඉදිරියට යන තුරු එම වැස්මෙන් තම මුහුණ වසාගත්තේය.+

පාදසටහන්

හෝ, “ළැදි ප්‍රේමයක්.”
හෝ, “ළැදි ප්‍රේමයක්.”
මූ.අ., “දෙවිවරුන් සමඟ දුරාචාරයේ යෙදෙමින්.”
නික් 34:15හි පාදසටහන බලන්න.
මෙය යෙහෝවා දෙවිට යොමු දැක්වෙන බව පැහැදිලියි. 1වන පදය බලන්න.
මූ.අ., “වචන දහය.”