නික්මයාම 16:1-36

16  ඊශ්‍රායෙල් සෙනඟ ඒලිම් වෙතින් පිටත්ව ගියෝය.+ පසුව ඔවුහු ඒලිම් හා සීනයි අතරේ තිබෙන සින් නම් පාළුකරයට+ පැමිණියෝය. ඊජිප්තු දේශයෙන් පිටත්ව යෑමෙන් අනතුරුව දෙවෙනි මාසයේ පහළොස්වන දිනයේදී ඊශ්‍රායෙල් සෙනඟ එතැනට ආවෝය.  මුළු ඊශ්‍රායෙල් සෙනඟ පාළුකරයේදී මෝසෙස්ට හා ආරොන්ට විරුද්ධව මැසිවිලි නඟන්න පටන්ගත්තෝය.+  ඔවුහු මැසිවිලි නඟමින් මෙසේ කීවෝය. “ඔබ අපිව මේ පාළුකරයට ගෙනාවේ හාමතේ මරලා දාන්නද?+ අපි ඊජිප්තු දේශයේදීම යෙහෝවා දෙවිගේ අතින් මැරුම් කෑවා නම්+ මීට වඩා හොඳයි. එහෙදී අපි හිතේ හැටියට මස් කෑවා.+ තව කොච්චර කෑම ජාතිත් අපි කෑවද!”  එවිට යෙහෝවා දෙවි මෝසෙස්ට මෙසේ කීවේය. “මේ සෙනඟ මගේ නීතියට එකඟව ක්‍රියා කරනවාද නැද්ද කියා මම දැන් සෝදිසි කර බලන්නෙමි.+ මම ඔබට අහසෙන් කෑම වැටෙන්න සලස්වන්නෙමි.+ සෙනඟ තම තමන්ට අවශ්‍ය කෑම ප්‍රමාණය දවසින් දවස අහුලාගත යුතුයි.+  නමුත් ඔවුන් හයවෙනි දවසේදී+ අනික් දවස්වලදී එකතු කරන කෑම ප්‍රමාණයට වඩා දෙගුණයක් එකතු කරගත යුතුයි.+ ඉන්පසු ඒවා කෑමට පිළියෙල කරගත යුතුයි.”  එහෙයින් මෝසෙස් සහ ආරොන් සෙනඟට මෙසේ කීවෝය. “ඔබව ඊජිප්තු දේශයෙන් පිටතට ගෙනාවේ වෙන කිසිවෙකු නොව යෙහෝවා දෙවිම බව ඔබ අද හවස නිසැකවම දැනගනීවි.+  ඇයි ඔබ අපට විරුද්ධව මැසිවිලි නඟන්නේ? අපි කවුද? අපි නිකම්ම නිකම් මිනිස්සු විතරයි. ඇත්තෙන්ම ඔබ මැසිවිලි නඟන්නේ යෙහෝවා දෙවිට විරුද්ධවයි. එය ඔහුට ඇහෙන බව අමතක කරන්න එපා. හෙට උදෑසන වන විට ඔබ ස්ථිර වශයෙන්ම යෙහෝවා දෙවිගේ තේජස දකීවි?”+  මෝසෙස් ඔවුන්ට තවදුරටත් මෙසේ කීවේය. “ඔබ යෙහෝවා දෙවිට විරුද්ධව නඟන මැසිවිලි ඔහුට ඇහෙනවා. ඒ නිසා යෙහෝවා දෙවි අද හවසට ඔබට කන්න මස්ද හෙට උදෑසන ඇති තරම් කන්න තවත් ආහාරද ලබා දී ඔහුගේ තේජස ඔබට දකින්න සලස්වයි. අපිට විරුද්ධව මැසිවිලි නඟන්න අපි කවුද? ඔබ මැසිවිලි නඟන්නේ අපිට විරුද්ධව නොවෙයි. යෙහෝවා දෙවිට විරුද්ධවයි.+ ඒක අමතක කරන්න එපා.”  පසුව මෝසෙස් ආරොන්ට මෙසේ කීවේය. “ඊශ්‍රායෙල් සෙනඟට මෙසේ කියන්න. ‘ඔබ නැඟූ මැසිවිලි දෙවිට ඇහුණා.+ දැන් යෙහෝවා දෙවි ඉදිරියේ රැස් වෙන්න.’” 10  ආරොන් මුළු ඊශ්‍රායෙල් සෙනඟට කතා කළ පසු ඔවුහු පාළුකරය දෙස හැරී බැලුවෝය. එවිට යෙහෝවා දෙවිගේ තේජස වලාකුළක් තුළ දිස් විය.+ 11  යෙහෝවා දෙවි නැවත මෝසෙස්ට මෙසේ කීවේය. 12  “ඊශ්‍රායෙල් පුත්‍රයන්ගේ මැසිවිලි මට ඇසිණ.+ ඔවුන්ට මෙසේ පවසන්න. ‘අද හවස* ඔබට කෑමට මස් ලැබෙනු ඇත. හෙට උදේට තවත් ආහාර ඇති තරම් ඔබට ලැබෙනු ඇත.+ එවිට මා ඔබේ දෙවි වන යෙහෝවා බව ඔබ අනිවාර්යයෙන්ම දැනගනීවි.’”+ 13  සවස් වූ විට මුළු කඳවුරම වැසී යන තරමට ඒ දෙසට වටුවෝ+ ආවෝය. පසුවදා උදෑසන කඳවුර අවට සෑම තැනකම පිනි තිබිණ.+ 14  පින්න නැති වී ගිය පසු හිමවලට සමාන+ වූ ඉතා කුඩා ඇට වර්ගයක්+ පාළුකරයේ භූමිය පුරා තිබෙනවා ඔවුහු දුටුවෝය. 15  ඊශ්‍රායෙල් සෙනඟ එය දැක, “ඒ මොනවාද” කියා එකිනෙකාගෙන් ඇසුවෝය. මන්ද පොළොව පුරා වැටී තිබුණේ කුමක්දැයි ඔවුහු දැන සිටියේ නැත. එවිට මෝසෙස් ඔවුන්ට මෙසේ කීවේය. “මේ තිබෙන්නේ යෙහෝවා දෙවි ඔබට දුන් කෑම.+ 16  ඔබ කෑම එකතු කරගත යුත්තේ කෙසේද කියා යෙහෝවා දෙවි ඔබට දැන්නුවා. ‘ඔබ එක් එක් කෙනා තම තමාට අවශ්‍ය ප්‍රමාණය එකතු කරගන්න. ඔබේ කූඩාරම්වල ජීවත් වන අයගේ සංඛ්‍යාව ගණන් කර ඒ එක් එක් කෙනාට කෑම ඕමෙරයක්*+ බැගින් එකතු කරගන්න.’” 17  ඊශ්‍රායෙල් සෙනඟ ඔහු කී ලෙස කළෝය. ඔවුන්ගෙන් සමහරෙක් වැඩි ප්‍රමාණයක්ද තවත් සමහරෙක් සුළු ප්‍රමාණයක්ද එකතු කරගත්තෝය. 18  ඔවුහු තමන් එකතු කරගත් දේ ඕමෙරයක මිම්මෙන් මැන බැලූ විට සියලුදෙනාම තම තමන්ට ප්‍රමාණවත් ලෙස කෑම එකතු කරගෙන තිබූ බව පෙනී ගියේය. කිසිවෙකුට කෑම අඩු වුණේවත් වැඩි වුණේවත් නැත.+ 19  ඉන්පසු මෝසෙස්, “හෙට උදේ වෙනකම් කිසි දෙයක් ඉතුරු කරගන්න එපා”+ කියා ඔවුන්ට කීවේය. 20  නමුත් ඔවුහු මෝසෙස් කී දේට සවන් දුන්නේ නැත. යමෙකු උදේ වන තුරු කෑම ඉතුරු කරගත් විට එහි පණුවන් බෝ වී ගඳ ගසන්න පටන්ගත්තේය.+ එය දැක මෝසෙස් ඔවුන් සමඟ කෝප විය.+ 21  ඔවුහු උදයක් පාසා උදයක්+ තම තමන්ට අවශ්‍ය කෑම ප්‍රමාණය එකතු කරගත්තෝය. අව් රශ්මිය තද වූ විට පොළොව මත තිබූ ඒ කෑම දිය වී ගියේය. 22  හයවෙනි දවසේදී ඔවුහු වෙනදා එකතු කරගත් ප්‍රමාණය මෙන් දෙගුණයක් එකතු කරගත්තෝය.+ ඔවුහු තම තමාට ඕමෙර දෙකක් බැගින් එකතු කරගත්තෝය. පසුව සෙනඟ අතරේ සිටි අධිපතියෝ මෝසෙස්ට ඒ ගැන දැන්වූවෝය. 23  එවිට මෝසෙස් ඔවුන්ට මෙසේ කීවේය. “දැන් යෙහෝවා දෙවි කියූ කාරණය අසන්න. හෙට දින සබත් දවසක්. හෙට යෙහෝවා දෙවිට ගෞරව කරන පිණිස ශුද්ධ සබතක් පැවැත්විය යුතුයි.+ ඒ නිසා ඔබට යම් කෑමක් පුලුස්සගන්න හෝ තම්බගන්න අවශ්‍ය නම් එය අදම කරන්න.+ ඉතුරු වන කෑම හෙටට තබාගන්න. ඒක විසි කරන්න එපා.” 24  ඔවුහු මෝසෙස් කී ලෙස කෑම උදේ වන තුරු තබාගත්තෝය. එයින් දුඟදක් හැමුවේවත් එයට පණුවෝ බෝ වුණේවත් නැත.+ 25  ඉන්පසු මෝසෙස්, “අද යෙහෝවා දෙවිට ගෞරව කරන පිණිස සබතක්+ පැවැත්විය යුතුයි. ඉතුරු කරගත් කෑම අද ඔබට කන්න පුළුවන්. අද භූමිය මතුපිටට කෑම වැටෙන්නේ නැහැ. 26  ඔබ දවස් හයක් කෑම එකතු කරගත යුතුයි. නමුත් හත්වෙනි දවස සබත් දවසක්.+ එදින භූමිය මතුපිට කෑම තිබෙන්නේ නැහැ.” 27  නමුත් සමහර අය හත්වන දවසේදීද කෑම එකතු කරගැනීමට ගියෝය. එහෙත් ඔවුන්ට එකතු කරගැනීමට කිසිවක් තිබුණේ නැත. 28  එහෙයින් යෙහෝවා දෙවි මෝසෙස්ට මෙසේ කීවේය. “මේ සෙනඟ තව කොපමණ කාලයක් මෙලෙස මගේ ආඥා හා නීති කඩ කරයිද?+ 29  යෙහෝවා දෙවි වන මා ඔබට සබත පැවැත්වීමට අණ කළ බව අමතක නොකරන්න.+ හත්වෙනි දවසේදී සියලුදෙනාම තම තමන්ගේ ස්ථානවලම රැඳී සිටින්න.+ කිසිම කෙනෙක් පිටතට නොයා යුතුයි. මා හයවෙනි දවසේදී ඔබට දවස් දෙකකට ප්‍රමාණවත් කෑම දෙන්නේ ඒ නිසයි.” 30  සෙනඟද හත්වෙනි දවසේදී සබත පැවැත්වූවෝය.+ 31  ඊශ්‍රායෙල් ජනයා භූමිය මතුපිටට වැටුණු එම ආහාරයට, “මන්නා”* යන නම තැබූහ. එය සුදු පාටය. එහි හැඩය කොත්තමල්ලි ඇටයකට සමානය. එහි රස, පැණි දමා සෑදූ කැවිලිවල රස මෙනි.+ 32  පසුව මෝසෙස් මෙසේ කීවේය. “යෙහෝවා දෙවි මෙසේ පැවසුවේය. ‘මා ඔබව ඊජිප්තු දේශයෙන් පිටතට ගෙනා පසු ඔබට පාළුකරයේදී කන්න දුන්නේ+ කුමක්ද කියා ඔබේ මතු පරම්පරාවල සියලුදෙනාම දකින පිණිස එයින් ඕමෙරයක් එකතු කර තබාගන්න.’”+ 33  ඉන්පසු මෝසෙස් ආරොන්ට මෙසේ කීවේය. “මන්නා ඕමෙරයක් භාජනයක දමා ඔබේ සියලු පරම්පරාවල අයට එය දැකගැනීම සඳහා යෙහෝවා දෙවි ඉදිරියේ තබන්න.”+ 34  යෙහෝවා දෙවි මෝසෙස්ට අණ කළ පරිදි ආරොන්, මන්නා භාජනය විශේෂ පෙට්ටිය*+ ඉදිරියේ ආරක්ෂා සහිතව තැබුවේය. 35  ඊශ්‍රායෙල් සෙනඟ ජනාවාස දේශයක් වූ කානාන් දේශයේ+ සීමාවට පැමිණෙන තෙක්ම+ එනම්, අවුරුදු හතළිහක්+ පුරාම මන්නා කෑවෝය. 36  ඕමෙරයක් යනු ඒපාවකින්* දහයෙන් කොටසකි.

පාදසටහන්

නික් 12:6හි පාදසටහන බලන්න.
ලීටර් 2.2ක් පමණය.
තේරුම, “ඒ මොනවාද” විය හැකියි. 15වන පදය බලන්න.
මූ.අ., “සාක්ෂිය.”
ඒපාවක් යනු ලීටර් 22ක් දැමිය හැකි මිනුම් භාජනයකි.