දානියෙල් 2:1-49

2  නෙබුකද්නෙෂර් රජු රජකම් කළ දෙවන අවුරුද්දේදී ඔහු සිහින දුටුවේය.+ ඒ සිහින දැකීමෙන් පසු නින්ද නොයන තරමටම ඔහුගේ සිත කැලඹුණේය.+  එබැවින් මන්තර ගුරුකම් කරන පූජකයන්ගෙන්,+ පේන කියන්නන්ගෙන්, කට්ටඩියන්ගෙන් හා කල්දිවරුන්ගෙන්* තමා දුටු සිහින ගැන අසා දැනගැනීමට රජ තීරණය කළේය.+ ඒ සියලුදෙනා රජුගේ අණ පරිදි ඔහු ඉදිරියට පැමිණියෝය.  ඉන්පසු රජ ඔවුන්ට මෙසේ කීවේය. “මම සිහිනයක් දුටුවා. ඒ සිහිනයේ අර්ථය දැනගන්නා තුරු මට සැනසිල්ලක් නැහැ.”  එවිට කල්දිවරු ඇරමයික භාෂාවෙන්+ කතා කරමින් රජුට මෙසේ කීවෝය.* “රජතුමනි, ඔබ සදහටම ජීවත් වේවා!+ ඔබ දුටු සිහිනය අපිට කියන්න. එවිට ඔබේ සේවකයන් වන අපි එහි අර්ථය පැහැදිලි කර දෙන්නම්.”+  එහෙත් රජ ඔවුන්ට මෙසේ කීවේය. “මගේ තීරණය මෙයයි. මම දැක්ක සිහිනයත් ඒකේ අර්ථයත් නුඹලා මට කිව්වේ නැත්නම් මම නුඹලාව මරා කෑලි කෑලිවලට කපා දමනවා.+ නුඹලාගේ ගෙවල් මම වැසිකිළි බවට පත් කරනවා.+  නමුත් සිහිනය හා එහි අර්ථය මට කිව්වොත් මම නුඹලාට තෑගිබෝග බොහොමයක් දී නුඹලාව ගෞරවයට පත් කරනවා.+ ඒ නිසා මම දැක්ක සිහිනය විස්තර කර එහි අර්ථය මට කියන්න.”  ඔවුහු නැවතත් මෙසේ කීවෝය. “රජතුමනි, ඔබ දුටු සිහිනය අපිට කියන්න. එවිට ඔබේ සේවකයන් වන අපි එහි අර්ථය පැහැදිලි කර දෙන්නම්.”  එවිට රජ මෙසේ කීවේය. “මම දන්නවා නුඹලා මට මේ ගැන කිසිවක් නොකියන්නේ ඇයි කියලා. නුඹලා හිතනවාද මෙහෙම කාලය නාස්ති කර කර හිටියොත් මම මගේ තීරණය වෙනස් කරයි කියලා?  මම මගේ තීරණය කොහොමටවත් වෙනස් කරන්නේ නැහැ.+ නුඹලා හැදුවේ මට බොරු කියලා කාලය තවත් දික් කරගන්න නේද?+ මම දැක්ක සිහිනය විස්තර කරන්න නුඹලාට බැරි වුණොත් මම කියපු විදිහටම නුඹලාට දඬුවම් කරනවා. ඒ නිසා මම දැක්ක සිහිනය මට විස්තර කරන්න. එතකොට ඇත්තටම ඒකේ අර්ථය පැහැදිලි කරන්න නුඹලාට පුළුවන් කියා මම පිළිගන්නවා.” 10  එවිට කල්දිවරු රජුට මෙසේ කීවෝය. “රජතුමනි, ඔබ ඉල්ලන මේ දේ කරන්න පුළුවන් කෙනෙක් මේ ලෝකයේ කොතැනකවත් නැහැ. මන්තර ගුරුකම් කරන පූජකයන්ගෙන්වත් පේන කියන්නන්ගෙන්වත් කල්දිවරුන්ගෙන්වත් කිසි රජ කෙනෙක් හෝ පාලකයෙක් මීට කලින් මේ වගේ ඉල්ලීමක් නම් කරලා නැහැ. 11  රජතුමා ඉල්ලන්නේ හරිම අමාරු දෙයක්. ඔබ ඉල්ලන දේ මනුෂ්‍යයෙකුට නම් කරන්න බැහැ.+ ඒ දේ කරන්න පුළුවන් දෙවි කෙනෙකුට විතරයි.”+ 12  මෙය අසා රජ අතිශයින් කෝප වී+ බැබිලෝනියේ සිටි සියලුම බුද්ධිමතුන්ව මරා දමන ලෙස අණ කළේය.+ 13  එවිට රජුගේ නියෝගයට අනුව බුද්ධිමතුන්ව මරා දැමීමට සැලසුම් කරනු ලැබීය. ඔවුහු දානියෙල්ව හා ඔහුගේ මිතුරන්වද මරා දැමීමට සෙව්වෝය. 14  බැබිලෝනියේ සිටි බුද්ධිමතුන්ව මරා දැමීමට රජුගේ ප්‍රධාන ආරක්ෂක නිලධාරියා වන අරියොක්ව පිටත් කර යැවූ අවස්ථාවේදී දානියෙල් ඔහුව හමු වී ඉතා ඥානවන්තව ඔහුට කතා කළේය.+ 15  “රජතුමා මේ තරම් දරුණු නියෝගයක් දුන්නේ ඇයි” කියා දානියෙල් අරියොක්ගෙන් ඇසීය. එවිට ඔහු සිදු වූ සියල්ල දානියෙල්ට පැහැදිලි කළේය.+ 16  ඉන්පසු දානියෙල්, රජු වෙතට ගොස් රජුගේ සිහිනයේ අර්ථය පැහැදිලි කර දීමට+ තමන්ට යම් කාලයක් දෙන ලෙස ඉල්ලා සිටියේය. 17  පසුව දානියෙල් තම නිවසට ගියේය. ඔහු තම මිත්‍රයන් වන හනනියා, මිෂායෙල් සහ අෂරියාට සිදු වූ සියල්ල කීවේය. 18  බැබිලෝනියේ ඉතුරුව සිටි අනික් බුද්ධිමතුන් සමඟ ඔවුන්වත් විනාශ නොවන පිණිස+ සිහිනයත් එහි අර්ථයත් පැහැදිලි කර දෙන ලෙස+ දෙවිගෙන්+ අයැදින්න+ කියාද දානියෙල් තම මිත්‍රයන් තිදෙනාට කීවේය. 19  පසුව රාත්‍රියේදී දෙවි දර්ශනයක් මගින් දානියෙල්ට ඒ සිහිනය හෙළි කළේය.+ එවිට දානියෙල් ස්වර්ගයේ දෙවිට ප්‍රශංසා කරමින්+ 20  මෙසේ කීවේය. “දෙවියනි, ඔබේ නාමයට සදාකාලයෙන් සදාකාලයටම ප්‍රශංසාව ලැබේවා!+ මන්ද ප්‍රඥාවත් බලයත් ලබා දෙන්නේ ඔබයි.+ 21  ඔබ නියමිත කාල වකවානු වෙනස් කරනවා.+ රජුන්ව පත් කරන්නෙත් ඔවුන්ව රජකමෙන් පහ කරන්නෙත් ඔබයි.+ ප්‍රඥාවන්තයන්ට ප්‍රඥාව ලබා දෙන්නෙත් වටහාගැනීමේ ශක්තිය ඇති අයට දැනගැන්ම ලබා දෙන්නෙත් ඔබයි.+ 22  ඔබ ගැඹුරු කාරණා හා රහස් හෙළි කර දෙනවා.+ අඳුරේ සැඟවුණු දේවල් පවා ඔබට පැහැදිලිව පෙනේ.+ ඔබ වටා ආලෝකය විහිදෙනවා.+ 23  මගේ මුතුන්මිත්තන්ගේ දෙවියනි, ඔබ මට ප්‍රඥාවත්+ බලයත් ලබා දුන් නිසා මම ස්තුති ප්‍රශංසා කරන්නේ ඔබටයි.+ අපි ඔබෙන් ඉල්ලූ ලෙසම රජුගේ සිහිනය සහ එහි අර්ථය ගැන ඔබ මට හෙළි කළා.”+ 24  ඉන්පසු දානියෙල්, බැබිලෝනියේ බුද්ධිමතුන්ව මරා දැමීමට+ රජු පත් කළ තැනැත්තා වන අරියොක්ව+ හමු වීමට ගියේය. දානියෙල් ඔහුට මෙසේ කීවේය. “බැබිලෝනියේ සිටින බුද්ධිමතුන්ගෙන් එක් කෙනෙකුවත් මරන්න එපා. මාව රජු ළඟට රැගෙන යන්න.+ මම ඔහුගේ සිහිනයේ අර්ථය පැහැදිලි කර දෙන්නම්.” 25  අරියොක් එවෙලේම දානියෙල්ව රජු වෙතට ගෙන ගොස් රජුට මෙසේ කීවේය. “රජතුමනි, යූදා දේශයෙන් ගෙනා අය අතරේ+ ඔබේ සිහිනයේ අර්ථය පැහැදිලි කර දෙන්න පුළුවන් කෙනෙක් ඉන්නවා.” 26  එවිට රජ, බෙල්ටෂසර්+ ලෙස හැඳින්වූ දානියෙල්ගෙන් මෙසේ ඇසුවේය. “මා දැක්ක සිහිනයත් එහි අර්ථයත් කියා දෙන්න ඔබට ඇත්තටම පුළුවන්ද?”+ 27  එවිට දානියෙල් රජුට මෙසේ පිළිතුරු දුන්නේය. “රජතුමනි, බුද්ධිමතුන්ටවත් පේන කියන්නන්ටවත් මන්තර ගුරුකම් කරන පූජකයන්ටවත් ජ්‍යෝතිඃ ශාස්ත්‍රඥයන්ටවත් ඔබේ සිහිනය පැහැදිලි කරන්න බැහැ.+ 28  නමුත් රහස් හෙළි කිරීමට හැකියාව ඇති දෙවි කෙනෙක් ස්වර්ගයේ ඉන්නවා.+ ඔහු මතු දවස්වලදී සිදු වීමට නියමිත දේ සිහිනයක් මාර්ගයෙන් ඔබට දන්වා තිබෙනවා.+ නෙබුකද්නෙෂර් රජතුමනි, ඔබ නිදාගෙන සිටියදී දුටු සිහිනයත් දර්ශනත් මම දැන් ඔබට කියා දෙන්නම්. 29  “රජතුමනි, ඔබ යහනට වී+ ඉදිරියේදී සිදු වීමට යන දේවල් ගැන කල්පනා කරමින් සිටියා. එවිට රහස් හෙළි කරන දෙවි ඒ ගැන ඔබට දැනුම් දුන්නා.+ 30  මේ සිහිනය ගැන දෙවි මට හෙළි කළේ අනික් මනුෂ්‍යයන්ට වඩා මට විශේෂ ප්‍රඥාවක් තිබෙන නිසා නොවෙයි.+ ඔහු මට එය හෙළි කළේ සිහිනයේ අර්ථය හා ඔබ කල්පනා කරමින් සිටි දේ ඔබට පැහැදිලි කර දෙන පිණිසයි.+ 31  “රජතුමනි, ඔබ දුටු සිහිනය මෙයයි. ඔබ ඉදිරියේ අතිවිශාල රූපයක් තිබුණා. එය දීප්තියෙන් බැබළෙන විශාල රූපයක්. එහි පෙනුම ඉතා භයංකරයි. 32  රූපයේ හිස පවිත්‍ර රනින් සාදා තිබුණා.+ පපුව හා අත් දෙක රිදීවලින්ද+ බඩ හා කළවා තඹවලින්ද+ 33  කෙණ්ඩා යකඩවලින්ද+ සාදා තිබුණා. පාදවල සමහර කොටස් යකඩවලින්ද තවත් සමහර කොටස් මැටිවලින්ද සාදා තිබුණා.+ 34  ඔබ රූපය දෙස බලා සිටියදී මිනිසෙකුගේ අතින් නොකැපූ ගලක්+ වේගයෙන් ඇවිත් යකඩවලින් හා මැටිවලින් සෑදී තිබුණු ඒ රූපයේ පාද සුනුවිසුනු කර දැමුවා.+ 35  ඒ මොහොතේම රූපයේ තිබුණු යකඩද මැටිද තඹද රිදීද රත්තරන්ද යන සියල්ල කුඩු වී ගියා. ගිම්හාන කාලයේදී කමතෙන් ගසාගෙන යන දහයියා මෙන්+ ඒ සියල්ල සුළඟට ගසාගෙන ගියා. ඉන්පසු එතැන රූපයක් තිබුණාද කියාවත් සොයාගන්න බැරි වුණා.+ නමුත් රූපය සුනුවිසුනු කළ ගල විශාල කන්දක් වී පොළොව පුරාම පැතිර ගියා.+ 36  “ඔබ දුටු සිහිනය එයයි. අපි දැන් සිහිනයේ අර්ථය ඔබට පැහැදිලි කර දෙන්නම්.+ 37  රජතුමනි, රාජ්‍යයද බලයද ගෞරවයද ශක්තියද දෙවි දී තිබෙන්නේ රජවරුන්ගෙත් රජු වන ඔබටයි.+ 38  මනුෂ්‍යයන් ජීවත් වන සෑම පළාතකම සිටින සතුන්වද කුරුල්ලන්වද දෙවි ඔබට යටත් කර දී ඒ සියල්ල කෙරෙහි ඔබව පාලකයා ලෙස පත් කළා.+ රූපයේ රන් හිස ඔබයි.+ 39  “ඔබේ රාජ්‍යයෙන් පසුව තවත් රාජ්‍යයක් පැමිණෙනවා.+ එය ඔබේ රාජ්‍යය තරම් බලවත් වෙන්නේ නැහැ.+ ඉන්පසු තුන්වන රාජ්‍යයකුත් පැමිණෙනවා. එම රාජ්‍යය මුළු පොළොවම පාලනය කරයි.+ රූපයේ තඹ කොටස එයයි. 40  “හතරවන රාජ්‍යය+ යකඩ මෙන් ශක්තිමත් රාජ්‍යයක්.+ යකඩයකින් ඕනෑම දෙයක් බිඳ දමා සුනුවිසුනු කළ හැකි ආකාරයටම ඒ රාජ්‍යයත් අන් සියලු රාජ්‍යයන් බිඳ දමා විනාශ කරයි.+ 41  “පාද හා පා ඇඟිලිවල සමහර කොටස් යකඩවලින්ද තවත් සමහර කොටස් කුඹල්කරුවෙකු අතින් ඇඹූ මැටිවලින්ද සාදා තිබුණු බව ඔබට මතක ඇති.+ ඒ හා සමානව එම රාජ්‍යය තුළත් බෙදීමක් දක්නට ලැබෙයි.+ එහෙත් මැටි සමඟ යකඩ කලවමේ තිබුණු නිසා එම රාජ්‍යයද යකඩ මෙන් දැඩි ස්වභාවයක් පෙන්වයි.+ 42  පා ඇඟිලිවල මැටි සමඟ යකඩද කලවම් වී තිබුණු ලෙසම එම රාජ්‍යයේ සමහර කොටස් බිඳෙනසුලු වන අතර තවත් සමහර කොටස් ශක්තිමත්ව තිබෙයි. 43  එමෙන්ම යකඩ සමඟ මැටි කලවම් වී තිබෙන නිසා එම රාජ්‍යයට සාමාන්‍ය ජනයාද සම්බන්ධයි. නමුත් යකඩ සමඟ මැටි මිශ්‍ර නොවන්නාක් මෙන් ඒ රාජ්‍යය තුළ කිසි එකමුතුකමක් නොතිබෙයි. 44  “ඒ රජුන්ගේ දවස්වලදී+ ස්වර්ගයේ දෙවි+ කිසිදාක විනාශ නොවන+ රාජ්‍යයක් පිහිටුවයි.+ එය වෙන සෙනඟක් අතට පත් නොවෙයි.+ එම රාජ්‍යය ඒ සියලු රාජ්‍යවල් පොඩි කර නැති කර දමයි.+ නමුත් එය සදහටම පවතියි.+ 45  මිනිසෙකුගේ අතින් නොකැපූ ගලක්+ කන්දෙන් ගැලවී ඇවිත් රූපයේ තිබුණු යකඩද තඹද මැටිද රිදීද රන්ද සුනුවිසුනු කර දමනවා ඔබ දුටු ලෙසම ඒ රාජ්‍යයන්ටත් සිදු වෙයි.+ මෙලෙස ශ්‍රේෂ්ඨ දෙවි+ මතු දවස්වලදී සිදු වීමට නියමිත දේ ඔබට දැනුම් දී තිබේ.+ සිහිනය සැබෑ වන බව ස්ථිරයි. එහි අර්ථයද නිවැරදියි.”+ 46  එවිට නෙබුකද්නෙෂර් රජ දණින් වැටී, නැමී දානියෙල්ට ගෞරවය පිරිනැමුවේය. ඔහුට තෑග්ගක් හා සුවඳ ද්‍රව්‍ය දෙන ලෙසද රජ අණ කළේය.+ 47  රජ දානියෙල්ට මෙසේද කීවේය. “ඇත්තටම ඔබේ දෙවි දෙවිවරුන්ගෙත් දෙවි!+ ඔහු රජවරුන්ගෙත් රජ!+ රහස් හෙළි කරන තැනැත්තා ඔහුයි. ඔබට මේ සිහිනය ගැන හෙළි කරන්න බලය ලැබුණේ ඔහුගෙන්.”+ 48  පසුව රජ දානියෙල්ට බොහෝ බලතල දුන්නේය.+ ඔහුට තෑගිබෝග රැසක්ද දුන්නේය. බැබිලෝනියට අයත් මුළු ප්‍රදේශයේම ආණ්ඩුකාරයා ලෙසද+ බැබිලෝනියේ සියලුම බුද්ධිමතුන්ගේ ප්‍රධානියා ලෙසද ඔහු දානියෙල්ව පත් කළේය. 49  බැබිලෝනියේ පරිපාලන කටයුතු බලාගැනීම සඳහා ෂද්‍රක්වද මේෂක්වද අබෙද්නෙගෝවද+ පත් කරන මෙන් දානියෙල් රජුගෙන් ඉල්ලීමක් කළේය. දානියෙල් දිගටම රජමාලිගාවේ+ සේවය කරමින් සිටියේය.

පාදසටහන්

එනම්, ශාස්ත්‍ර කියන්නන්ගේ විශේෂ කණ්ඩායමකි. මායා බලයෙන් දේවල් කිරීමට ඔවුන් සතු හැකියාව ඉතා විශිෂ්ටයයි ඔවුහු සිතුවෝය.
දානියෙල්ගේ වාර්තාව මෙතැන් සිට 7වන පරිච්ඡේදයේ අවසානය දක්වා ලියා තිබෙන්නේ අරාමීය භාෂාවෙනි.