ද්විතීය කතාව 10:1-22

10  “ඒ අවස්ථාවේදී යෙහෝවා දෙවි මට මෙසේ පැවසුවා. ‘ඔබට කලින් දුන් ගල් පුවරු දෙකට සමාන පුවරු දෙකක්+ කපාගෙන කන්ද නැඟ මා ළඟට එන්න. ඊට අමතරව ඔබ ලී පෙට්ටියකුත්*+ සාදාගන්න.  ඔබ බිඳ දැමූ ගල් පුවරුවල තිබූ වචනම එම අලුත් පුවරු දෙක මත මම නැවත ලියා දෙන්නම්. ඉන්පසු එම පුවරු දෙක ඔබ සාදාගත් පෙට්ටිය තුළ තබන්න.’  දෙවි කී ලෙස මම ෂිටිම් ලීවලින් පෙට්ටියක් සාදා, කලින් තිබූ ගල් පුවරු දෙකට සමාන පුවරු දෙකක්ද කපාගත්තා.+ පසුව මා එම පුවරු දෙකත් අරගෙන කන්ද උඩට ගියා.  යෙහෝවා දෙවි කලින් ලියා දුන් ලෙසම+ ඒ පුවරු දෙකෙත් ආඥා දහය*+ ලියා දී ඒවා නැවත මට භාර දුන්නා. ඒ පුවරු දෙකෙත් ලියා තිබුණේ කන්ද ළඟ රැස්ව සිටි ඊශ්‍රායෙල් සෙනඟට+ යෙහෝවා දෙවි ගින්න තුළින් කතා කර+ පැවසූ දේමයි.  මම කන්දෙන් බැස ඇවිත්+ යෙහෝවා දෙවි මට අණ කළ ලෙසම එම පුවරු දෙක මා සාදාගත් පෙට්ටිය තුළ තැබුවා.+  “ඉන්පසුව බෙයේරොත් බෙනෙ-යායකන්හි+ කඳවුරු බැඳගෙන සිටි ඊශ්‍රායෙල් සෙනඟ ගමන් කළේ මොසේරා නම් ස්ථානයටයි. ආරොන් මිය ගියේ එම ස්ථානයේදීයි. ඔහුව එහි තැන්පත් කළායින් පසු+ ඔහු වෙනුවට ඔහුගේ පුත් එලියාසර් උත්තම පූජකයා හැටියට සේවය කරන්න පටන්ගත්තා.+  එතැනින් පිටත් වූ සෙනඟ ගුද්ගොදා වෙතටත් එතැන් සිට යොත්බාතා වෙතටත් ගමන් කළා.+ යොත්බාතා කියන්නේ ඇළදොළවලින් පිරුණු ප්‍රදේශයක්.  “යෙහෝවා දෙවි ලෙවී ගෝත්‍රය+ විශේෂ සේවයක් සඳහා වෙන් කළේ ඒ කාලයේදීයි. යෙහෝවා දෙවිගේ ගිවිසුම් පෙට්ටිය රැගෙන යෑමත්+ යෙහෝවා දෙවි ඉදිරියේම සේවය කිරීමත්+ දෙවිගේ නාමයෙන් සෙනඟට ආශීර්වාද කිරීමත් ඔවුන්ගේ වගකීම්වලට අයත් වුණා.+ ඔවුන් අද දක්වාම එම කාර්යයන්වල නිරත වෙමින් සිටිනවා.  සෙසු ඊශ්‍රායෙල් ගෝත්‍රවලට යම් ප්‍රදේශයක් උරුම වුණත් ලෙවීවරුන්ට ප්‍රදේශයක් උරුම නොවන්නේ ඒ නිසයි.+ යෙහෝවා දෙවි ඔවුන්ට පැවසූ ලෙස ඔවුන්ගේ උරුමය වන්නේ යෙහෝවා දෙවිමයි.+ 10  මම කලින් වතාවේදී මෙන් නැවතත් දවස් හතළිහක් රෑ දවල් දෙකේ+ කන්දට වී දෙවිට කන්නලව් කළා. මේ වතාවේදීත් යෙහෝවා දෙවි මට සවන් දුන්නා.+ ඒ නිසයි යෙහෝවා දෙවි ඔබව විනාශ නොකළේ.+ 11  ඉන්පසුව යෙහෝවා දෙවි මට මෙසේ පැවසුවා. ‘ඔබ දැන් සෙනඟ සමඟ මේ ස්ථානයෙන් පිටත්ව යෑමට සූදානම් වන්න. ඔවුන්ගේ මුතුන්මිත්තන්ට මා පොරොන්දු වූ දේශයට ඇතුල් වෙන්න දැන් ඔවුන්ට අවස්ථාව පැමිණ තිබෙනවා.’+ 12  “ඊශ්‍රායෙල්වරුනි, ඔබේ දෙවි වන යෙහෝවා දැන් ඔබෙන් බලාපොරොත්තු වන්නේ මෙපමණයි.+ ඔබේ දෙවි වන යෙහෝවාට ඔබ ගරුබිය+ දැක්විය යුතුයි. ඔබ එසේ කළොත් ඔබේ දෙවි වන යෙහෝවාට ප්‍රේම කරමින්+ සැමවිටම ඔහු දෙන මඟ පෙන්වීම්වලට අනුව ජීවත් වෙන්න+ ඔබට හැකි වෙයි. ඔබේ මුළු ජීවිතයම ඔහු වෙනුවෙන් කැප කර මුළු හදවතින්ම ඔහුට සේවය කරන්න ඔබ පෙලඹෙයි.+ 13  ඔබේම යහපත+ සඳහා අද මම ඔබට කියා දෙන යෙහෝවා දෙවිගේ අණපනත් පිළිපදින්නත් ඔබට හැකි වෙයි.+ 14  ජනයෙනි, අහස දෙස බලන්න! ඉමක් කොනක් නොපෙනෙන අහසත්+ එහි ඇති සියල්ලත් මේ මහ පොළොවත්+ එහි ඇති සියල්ලත් අයිති වෙන්නේ ඔබේ දෙවි වන යෙහෝවාටයි. 15  නමුත් මෙතරම් ශ්‍රේෂ්ඨ දෙවි කෙනෙක් වන යෙහෝවා ඔබේ මුතුන්මිත්තන්ට සමීප වී ඔවුන්ට ප්‍රේම කළා. ඒ නිසා දෙවි සියලු ජාතීන් අතරින් තමන්ගේ සෙනඟ වීමට තෝරාගත්තේ ඔවුන්ගෙන් පැවතෙන්නන් වන ඔබවයි.+ 16  ඒ නිසා ඔබ තවදුරටත් මුරණ්ඩු ලෙස ක්‍රියා කරන්න එපා.+ ඔබේ සිත් පවිත්‍ර කරගන්න.*+ 17  මන්ද ඔබේ දෙවි වන යෙහෝවා වෙනත් සියලු දෙවිවරුන්ට වඩා උසස්.*+ ස්වාමිවරුන්ගෙත් ස්වාමීන් ඔහුයි.+ දෙවි ශ්‍රේෂ්ඨයි, බලසම්පන්නයි. ඔහු ගරුබිය ලැබීමට වටින දෙවි කෙනෙක්.+ සියල්ලන්ටම එක හා සමානව සලකන+ ඔහු කිසිවෙකුගෙන් අල්ලසක් ගන්නේ නැහැ.+ 18  පියා නැති දරුවා හා වැන්දඹුව වෙනුවෙන් ඔහු සාධාරණය ඉටු කරයි.+ ඔබ අතරේ සිටින විදේශිකයාටත්+ ඔහු කිසිම වෙනසක් නොකර ඔහුට ප්‍රේම කරමින් කෑම බීම හා ඇඳුම් පැළඳුම් ලබා දෙයි. 19  ඒ නිසා ඔබ අතරේ සිටින විදේශිකයන්ට ඔබත් ප්‍රේම කළ යුතුයි.+ ඔබත් යම් කාලයක් ඊජිප්තුවේ විදේශිකයන් ලෙස ජීවත් වූ බව කිසි දිනක අමතක කරන්න එපා.+ 20  “ඔබ යෙහෝවා දෙවිට ගරුබිය දැක්විය යුතුයි.+ ඔබ නමස්කාර කළ යුත්තේ ඔහුට පමණයි.+ ඔහු මතම රඳා සිටින්න.+ ඔබ යම් දෙයක් ගැන දිවුරා පොරොන්දු වන විට ඔහුගේ නාමයෙන් පමණක් එසේ කරන්න.+ 21  ඔබේ ප්‍රශංසාව ලැබිය යුත්තේ ඔහු පමණයි.+ මන්ද ඔබේ දෙවි වන්නේ ඔහුයි. ඔබේ ඇස් දෙකෙන්ම ඔබ දුටු ඉතා පුදුමසහගත, බිය උපදවන දේවල් කළේ ඔහුයි.+ 22  ඔබේ මුතුන්මිත්තන් ඊජිප්තුවට යන විට ඔවුන් අතර සිටියේ හැත්තෑදෙනෙකු පමණයි.+ නමුත් දැන් බලන්න! යෙහෝවා දෙවිගේ ආශීර්වාද නිසා ඔබ දැන් අහසේ තිබෙන තරු මෙන් ඉතා විශාල ජාතියක් වී සිටිනවා.+

පාදසටහන්

නික් 16:34හි පාදසටහන බලන්න.
නික් 34:28හි පාදසටහන බලන්න.
මූ.අ., “ඔබේ හදවත් චර්මච්ඡේදනය කරගන්න.”
මූ.අ., “දෙවිවරුන්ගෙත් දෙවිය.”